Губорть ширеса
Мокша веленясь,
Коза шачсь и кассь
Полю од стирнясь.
Народсь ков ласькихть?
Мянь вирнясь увнай.
Корхтайхть: — Полюсь сай
Полюсь фронцта сай!
Сась сон пеедезь
Шачем веленцты,
Стирьхне, цёратне
Кепсезь вярине.
Лоткась варманясь
Аш кашт молине,
Ушедсь корхтама
Полю од стирьнясь:
— Тинь шумбратада,
Од стирьхть, од цёрат,
Велень атянят,
Родной алянят!
Мяляфтсамасть монь,
Плетьса шавомазь,
Шовда каторгав
Сотнезь сявомазь.
Кшниса ковандазь
Якай пильгоненень,
Якай пильгоненень,
Пукшу кяднянень.
Коммунисттне монь
Тоста ворьфтемазь.
Тонафтомазь монь
Сёрмас содама,
Ленин ялганьконь
Мельге молема.
Фронтса тюреме —
Срафтоськ баярхнень,
Модать лангса минь
Тяни азорхне.
Явомс эрявихть
Козянь модатне,
Лама ули минь
Кшиньке-сёроньке.
Вай, лиякс арась
Мокша веленясь,
Меки пижелгодсь
Сянгяря вирнясь.
Добрай Ленин минь —
Родной аляньке,
Валда эряфти
Сон минь вятиньке.
