— Ой, война, война! —
Марявсь велети,
Равжа дуця сась
Валда менельти.
Сявозь велеста
Сембе алятнень,
Аляфтома лядсть
Иттне, аватне.
Кие трясыне,
Кие щасыне
Иттнень, аватнень,
Сире бабатнень?
Кати живста сай
Родной алясна,
Кати пильгфтома,
Кати кядьфтома.
Оржа шашкатне
Лама пряда керсть,
Вай, оцю ляйнякс
Шудесь якстерь версь.
Вяшки пулятне
Кода вирь керыхть,
Сюдуф салдаттнень
Калму пяярдихть.
Салдаттне марязь
Ленинть валонзон.
— Йордамс оцязорть,
Да помещикнень
И заводчикнень —
Веронь симихнень!
Сявомс модаснон,
Максомс сокайти,
А заводснон синь
Максомс покайти! —
Тясоль Полю стирсь
Алякс наряжась,
Эсь винтовканянц
Кемоста люпштась.
Кода мяндезе
Полють каторгась.
Коса сон эрясь,
Коста фронту сась?
Оцязорть каршес
Шарфнезь ружьяснон
Трудяй ломаттне,
Мудрай Ленинонь
[ 75 ]
Мельге молихне.
— Ура! Ура! —
Гайнясть вайгяльхне,
Ушедсть торама
Вию пушкатне.
Тошналь баярти —
Вов и пец сонь сась!
Кафта пря орелсь
Шарозь алу прась.
Но тяда башка
Лядондсть буржуйхне,
Ломанень шави
Войнань вятихне.
Синьге каршезост
Ленин кочкамазь,
Властьснон машфтома
Ленин вятемазь.
И октябрянь шись
Валда эряф тись.
Трудяй ломаттне
Азоркс синць арасть:
Заводть — покайти,
Модать — сокайти.
Лямбе ширеста
Уфси варманясь,
Ушедсь панжема
Сянгярь рощанясь.
Мази нармоттне
Морайхть, лиендихть,
Лопанятнень ёткс
Пизот тиендихть.
Тяфта ушеткшни
Валда эрямась.
|
