Колхозонь эряф/1934/11-12/Советскай литературать колга/Буржуазнай Европать творческай вийфтемя шиц
| Буржуазнай Европать творческай вийфтемя шиц |
Мезсь вятезе Европань литературать творческай вийфтема шити, конань сон няфтезе XX векста? Сембе виень путозь и лама вал мархта аралякшневсь искусствань свободась, творческай мыслять эсь волякс шиц, кода—повсь кемексневсь литературать афклассовай бытияц и развитияц, сонь аф зависимай шиц социальнай политикать эзда. Тя кемокснемась ульсь калдяв политикакс, именно сон афняевиста вятезень ламонц литераторхнень ся необходимостти, штоба кирьфтамс действительностень няемя кругть, атказамс сонь келиста, сембе ширьде тонафнеманц эзда, сувамс „эсь седиень вакска эрямать потмос“, лоткамс „эсь прянь шарьхкодемать“ плодфтома шинц лангс, мыслять, конац сязьф эряфть эзда, эсь пря касфотманц и эсь воля шинц вельде. Лиссь, што ломанць аф содави башка ся действительностть эзда конац сембе и пачк суваф политикаса. Лиссь, што ломанць, кодама затейливайста, сон эсь прянц афольхце думандакшне, сембе-сякс иладкшни социальнай единицакс, а аф космическайкс, кодапт планетатне. А тянь мельга лиссь, што индивидуализмась, эгоцентризмакс араманц мархта, тиеньди „лишнай ломать“. Аф весть ульсь корхнеф, што сембеда цебярь и пароста няфтьф героекс XIX столетиянь европейскай литературать эса ащи „лишнай ломанень“ типсь. Именна тя типть лангс лоткась литературась эсь развитиясонза трудонь геройть эзда - ся ломанть эзда, конац технически безоруженнай, но конац ингели содазе сонь победань канды виенц; феодальнай завоевательть эзда — ся ломанть эзда, конац шарьхкодезе, што нельгомс сяда аф стака, чем тиемс; буржуазиять мархта кельгф плутть, сонь „эряфонь учителенц“ эзда — ся ломанть эзда, конац шарьхкодьсь, што васькафнемс и салсемс сяда тьождя, чем работамс, — лоткась, йотась вакска капитализмань и ломанень угнетандай основань путы цебярьста няеви фигуратнень вакска, конат ламода сяда седифтопт, чем феодальнай дворяттнень коряс епископне, корольхне, оцязорхне.
Западонь буржуайзнай литературать эса тоже эрявихть няемс авторонь кафта группат: Фкясь шнакшнезе и забавляндакшнезе эсь классонц: Троллоп, Вильки Коллииз, Бреддан, Мариэт, Джером, Поль-де-кок, Поль-Феваль, Октав Фейлье, Онэ, Георг Самаров, Юлиус Штиньде и сядот тяфтапт. Нят сембе — типичнай „добрай буржуат“, аф пяк талантливайхть, но лофкайхть, и пошловитайхть кода и синь лувисна. Омбоцесь лувондови аф лама кемоньца, и нят — критичечкай реализмань и революционнай романтизмань вельф оцю творецт. Сембе синь — лунзяфкст, эсь классонь „блуднай идьт“, дворятт конатнень розариндазень буржуазиясь или мелкай буржуазиянь итть, конат мяньцть эсь классонь ляпияфты атмосферать эзда. Европейскай литераторхнень тя группаснон книганза кирьдихть эсь эсост тейнек кафтонь-крдань и афспоряви питни ши: васендакиге, кода техникань ширьде образцовай произведеният литературать эса, омбоцекс, кода документт, конат азондсазь буржуазиять развитиянь и разложениянь процессонц, документт, конатнень тиезь тя классть эзда сязьфксне (отщепенецне), но лац и критическайста няфнесазь сонь эряма шинц, традициянзон и тевонь тиеньдеманзон.
XIX веконь европейскай литературать эса критическай реализмать роленцты подробнай анализонь максомась аф тяльгонди монь докладозон. Основной сутенц снь можно вятемс феодалхнень консерватизмаснон каршес тюремати, конань шачфтозе крупнай буржуазиясь, кона тюремась мольсь демократиянь организовандамать вельде, лиякс азомс мелкай буржуазиять организовандаманц вельде, либеральнай и гуманитарнай идеятнень почваснон лангса, тяда башка демократиянь организовандамать ламоц авторхнень эзда и сембеда ламосна лувихнень шарьхкодькшнезь кода защитань необходимость и крупнай буржуазиять каршес и пролетариатть ширьде сембе сяда виелгоды натискть каршес.