Капитан ныл (Пушкин)/15
| ← XIV люкетэз. Суд | Капитан ныл Кельтэм люкетэз Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 105—115. |
(XIII люкетаз ватсан)
Ми Волга шурлэн дураз матэ вуиськом. Полкмы милям ** гуртэ пыриз но отчы ик кӧлыны дугдӥз. Шурлэн тупалаз ваньмаз гуртъёс бугыръясько, котькытын Пугачёвлэн шайкаосыз калго шуыса, староста мыным вераз. Та ивор монэ кушетскытӥз. Милемлы ӵуказеяз ӵукна шур тупала выжыны кулэ вал. Мон нокызьы но уг ни чидаськы. Мынам бубыелэн гуртэз шурлэн тупалаз 30 иськемын гинэ. Кин ке монэ уз-а меда шур вамен выжыты шуыса, мон юасько. Татын ваньмыз сямен ик крестьянъёс чорыгасьёс: пыжъёс трос. Мон Зурин доры лыктӥ но ас малпанъёсме солы верай. «Берегись, — шуиз со мыным. — Огнад кошкыны кышкыт. Ӵукнаозь вить. Асьмеос нырысь ик выжом но тынад бубыосыд доры ог 50 мурт гусаръёсты куное ваём».
Мон ас малпамъёсы вылын сылӥсько. Пыж дасямын вал. Мон отчы кык кузя полысасьёсын пукси. Соос ярдурысь люкиськизы но полысаны кутскизы.
Ин чылкыт. Толэзь пиштэ. Куазь туж чус. Волга шур каньыл бызе. Пыжмы лякытэн верттаськыса, сьӧд тулкымъёс вылтӥ гылӟыса ӝог мынэ. Мон пӧртэм малпаськонъёсы зуми: инкуазь сярысь, кышкытэсь политической ужъёс, яратон но мукет… Ог ӝыны час котыр ортчиз ини. Ми шурлэн шораз вуим… вдруг полысасьёс куспазы лушкем вераськыны кутскизы. «Мар сыӵе?» — сэзьытскыса, юай мон. «Ум тодӥське, инмар мед тодоз мар сыӵе», — одӥг интые учкыса, полысасьёс пумитам верало. Мынам синъёсы соослэн учкем палазы ик кариськизы но, мон Волга шур кузя малэсь ке уллань васькемзэ ӝомыт пыртӥ адӟи. Тодмотэм арбери ми доры матэ вуэ. Сое витьыны понна, мон полысамысь дугдыны косӥ. Толэзь пилем сьӧры ватскиз. Шур кузя васькись маке уката пеймыт луиз. Мон дорысен со матын вал ини, нош мон озьы ке но мазэ-созэ валаны уг быгатӥськы на. «Мар меда со, — шуо полысасьёс. — Парус ке шуоно, паруслы уг тупа; мачта ке шуоно, мачта но ӧвӧл кадь…» — Со куспын толэзь пилем сьӧрысь потӥз но ас югытэныз кышкыт мае ке адӟытӥз. Милям пумитамы пур вылэ лэсьтэм ошон ваське — ваменпуаз куинь адямиос ошемын. Мынам ошем адямиослэн ымныразы учкеме потӥз.
Мынам косэмея, полысасьёс пурез багоръёсын дугдытӥзы, мынам пыже уясь ошон пур борды шуккиськиз. Мон пур вылэ тэтчи но кышкытэсь юбоос куспы пыри. Тыр толэзь шудтэм адямиослэсь шӧтэм карем ымнырзэс югдытӥз. Соос пӧлысь одӥгез пересь чуваш вал, кыктэтӥез, заводын улӥсь ӟуч крестьян, кужмо но таза мугоро, ог 20 аресъем егит пи. Нош куиньметӥез шоры учкыса, мон чылкак абдрай но жаль потӥсь куараен вазьытэк ӧй чида: со Ванька вал, мынам куанер Ванькае, ас визьтэменыз Пугачёв доры кариськем. Йыр азязы соослэн сьӧд пул шуккемын, со вылын: «Воръёс но бунтовщикъёс» — шуыса, бадӟымесь букваосын гожтэмын. Полысасьёс огшоры мылкыдэн, монэ витьыса, пыжзэс багоръёсын пур бордын возё. Мон нош пыже пукси. Пур шур кузя уллань ваське. Пеймыт уйин ошон кема ӵоже сьӧд адскиз на. Бервылаз со ышиз — мынам пыже ӝужыт, меӵ яр дуре дугдӥз…
Мон полысасьёслы коньдонме дун тыри. Соос пӧлысь одӥгез монэ, перевоз дорын ик сылӥсь гуртэ, выборной доры келяса мынӥз. Мон соин ӵош корка пыри. Мынэсьтым валъёс куремме кылыса, выборной монэ чурыт пумитам вал, нош мынам келясе солы лушкемен кӧня ке кыл вераз но, со соку ик мукет луиз, мыным котьмаин юрттыны дась луиз. Одӥг минутскын тройка валъёс дасямын вал. Мон уробое пукси но аслам гуртам нуыны косӥ.
Изись гуртъёс пыртӥ, бадӟым сюрес кузя мон туж ӝог мынӥсько. Мон сюрес вылын дугдытэмзылэсь гинэ кышкасько. Та уе мынам Волга шур вылын пумиськеме та ёросъёсын бугыръяськисьёс ванез возьматэ ке но, нош со куспын ик правительство ласянь но соослы зол пезьдэт сётэмез возьматэ. Олокыӵе но дыръёс луылозы шуыса, мон кисыям Пугачёвен сётэм пропускме но Зурин полковниклэсь приказзэ но возисько вал. Нош пумитам нокин но ӧз шедьы. Ӵукна луон азьын мон шурез но кыз нюлэсэз адӟи, — соос сьӧрын милям гуртмы. Ямщике валъёссэ золгес улляны кутскиз. Ог дас вить минутъёс ортчыса, мон ** гуртэ пыри.
Барской корка гуртлэн сопал пумаз сылэ. Валъёсмы тэтчыса мыно. Малпамтэ шорысь, ямщике валъёссэ дугдытыны кутскиз. «Мар сыӵе?» — ямщиклэсь дыртыса юасько. «Застава, барин», — шуэ ямщик, лек валъёссэ мырдэм дугдытыса. Мон учки но, зэмзэ ик, ульчалы ваменак коръёс тыремен, отын ик кияз зыр кутыса, возьмаськись сылэ. Мужик мон дорам лыктӥз, шляпазэ басьтӥз но мынэсьтым пашпортме юа. «Мар таӵе та? — юай мон солэсь, — малы татын сюрес пытсамын? Кинэ тон возьмаськод?» — «Ми, батюшка, бунтовать кариськом», — кормаськыса вераз со мыным.
— Нош тӥляд господаосты кытын? — сюлмы путыса, юай мон солэсь.
— Господаосмы милям кытын-а шуиськод? — юаз мужик. — Господаосмы милям ю возён кеносын пытсамын.
— Кызьы кеносын?
— Бен, Андрюха земской, соосты пытсаз но пыдъёсазы колодкаос тыриз — государь батюшка доры келяны ӧдъя.
— Боже мой! Сюрес вылысь коръёсты палэнты, дурак. Мар учкыса сылӥськод?
Возьмаськись гызмыльтэ. Мон уробоысь тэтчи, солэн пельдораз (виноват) сали но корез ачим палэнтӥ. Мужике мынам, визьтэм мурт сямен, мон шоры учкыса сылэ. Мон нош уробое пукси но барской корка доры ворттыны косӥ. Ю возён кеносмы азбарын пуктэмын вал. Тунгонам ӧсэз дорын кык кузя крестьянъёс зыръёсын сыло. Уробомы ӵапак соос вадьсы дугдӥз. Мон, уробоысь тэтчыса, шонерак соос шоры мынӥсько. «Усьтэ ӧсэз!» — шуи мон соослы. Тусэ мынам соку туж кышкыт, лэся, вылэм. Соос кыкназы ик, зыръёссэс куяса, пегӟизы. Мон ӧслэсь замоксэ пешкытыны либо ӧссэ тӥяны кутскем вал, нош ӧс тыпыез лэсьтэмын, бадӟым замок но тӥяны луонтэм. Со куспын калык улон коркась егитгес веськыт мугоро мужик потӥз но, вылтӥяськись тусын, — кызьы тон буянить карыны дӥсьтӥськод шуыса, мынэсьтым юаз. «Кытын земской Андрюшка, — кеськи мон со шоры. — Али ик сое татчы ӧть».
— Мон ачим Андрей Афанасьевич, мон Андрюшка ӧвӧл, — киоссэ урдсаз тырыса, со мыным вера. — Мар кулэ?
Солэн юамезлы верам интые мон сое сильсьӧртӥз кутӥ но, кенос ӧс доры вайыса, усьтыны косӥ. Земской пыкиське вал, нош отеческой наказание сое но шӧдскись кариз, лэся. Со усьтонъёссэ поттӥз но кеносэз усьтӥз. Мон соку ик, ӧс кусып вамен тэтчыса, кеносэ пыри но, вӧлдэтэ лэсьтэм сюбег укноетӥ пиштӥсь югытъя, пеймыт сэрегысь мумыме но бубыме адӟи. Киоссы соослэн мышказы керттылэмын вал, пыдъёсазы колодкаос понэмын. Мон соосты ӟыгыръяны кутски, пал кыл но вераны ӧй быгаты. Соос кыкназы ик паймыса мон шоры учко, — куинь ар ӵоже военной службаын ортчытэм бере, мон прочсэ мукет луиськем, соин ик соос монэ уг ни тодмало.
Малпамтэ шорысь, мон тодмо но мусо куара кылӥ. «Пётр Андреич! Тон-а!» Берытски но — мукет сэрегысь, таосыз сямен ик керттылэмын, Марья Ивановнаез адӟисько. Мон пуми…
Мумие кеськиз но синвуоссэ кисьтыса бӧрдыны кутскиз. Бубые номре вератэк шорам учкыса улэ, аслыз ачиз оскыны уг дӥсьты. Ымныраз солэн шумпотон шудэ. Мон гозы гердъёссэс сабляеным вандылыны дыртӥсько.
— Ӟечбур, ӟечбур, Петруша, — шуэ бубые, монэ сюлэм бордаз ӟыгыръяса, — инмарлы тау, коть тынэсьтыд бертэмдэ витьыса вуим…
— Петруша, мынам гажанэ, — шуэ нэнэе. — Кызьы тонэ инмар вуттӥз! Таза-а, бен, тон?
Мон соосты пытсэтысьтызы поттыны дыртӥсько вал но, — ӧс доры лыктӥ но, ӧс пытсамын. «Андрюшка, — кеськисько мон, — усьты!» — «Ӵапак усьтӥ, — ӧс сьӧрысен земской вазе. — Ачид но пук али татын. Тани тонэ дышетом али буянить карыны но государьлэсь чиновникъёссэ сильсьӧртӥзы нуллыны!»
Татысь потыны луон инты ӧвӧл меда шуыса, мон кеносэз эскерыны кутски.
— Эн тыршы, — шуиз мыным бубые, — мынам кеносъёсам лушкаськисьёслэн сюресъёссы кузя пыраны-потаны уд быгаты, мон сыӵе кузё ӧвӧл.
Мынам вуэменым сэрен, шумпотэм мумие, быдэс семьяенымы ӵош мыным но быроно луонэз адӟыса, кытчы пырыны инты уг шедьты. Нош мон соос пӧлын но, Марья Ивановнаен ӵош луэме дырысь уг сюлмаськиськы ни. Мынам бордам сабляе но кык пистолетэ вань, мон ӧжыт возиськыны быгато на. Ӝытпал Зурин татчы вуыны кулэ, со милемыз пытсэтысь мозмытоз. Та сярысь мон верай но мумыме ӧжыт буйгатыны быгатӥ. Табере соослэн мылкыдзы адскеммылэн шумпотонэныз тырмемын.
— Ну, Пётр, — шуиз мыным бубые, — данак гинэ тон проказничать карыса улӥд, мон но тон вылэ зол гинэ йыркуръяськисько вал. Нош ортчемзэ ум ни вералэ. Табере тон тупатскид, лӧптонэд ортчиз ини шуыса оскисько. Тодӥсько: честной офицерлы кызьы служить карыны кулэ, тон озьы ик служить карид. Тау. Монэ пересез шумпоттытӥд. Нош тонэныд сэрен мон быремлэсь ке мозми на, улэме мынам кык полэс шулдыр луоз.
Синвуосы пачыл потыса, мон солэсь кизэ чупасько но Марья Ивановна шоры учкисько: со мынам вуэмелы туж шумпотэмын, со туж шудо мурт кадь адске.
Нуназе вадес ми маке йӧспӧртэм кесяськем но куашетэм куараосты кылӥм. «Мар та таӵе, — шуэ бубые, — тынад полковникед вуиз, шат?» — «Ӧвӧл дыр, — мон солы шуисько. — Ӝытлэсь вазь со уз вуы». Куашетэм куара кужмо но кужмо луэ. Гырлы жуго. Азбаретӥ валъёс вылын калык ортче. Ӵапак соку, борддорлэн сюбег укнояз Савельичлэн пурысь йырыз мычиськиз. Мынам куанер дядькае бӧрдоно кадь куараен вазиз: «Андрей Петрович, Авдотья Васильевна, батюшкае тон мынам, Пётр Андреич, матушка Марья Ивановна, беда! злодейёс селое пыризы. Нош тодӥськод-а, Пётр Андреич, кин соосты ваиз? Швабрин, Алексей Иваныч, албасты сое мед басьтоз!» Адӟем-потостэм нимез кылыса, Марья Ивановна чапкиськиз гинэ но пумем кадь сылэ.
— Кылскы али, — шуи мон Савельичлы, — кинэ ке сое вал вылэ пуктыса, ӝоген * перевоз доры, гусарской полклэн пумитаз ысты; милемлы кышкыт луэмез полковниклы тодыты.
— Бен, кинэ ыстом, сударь! Пиналъёс но ваньмыз бунтовать каро, валъёс но ваньмыз нуэмын! Ок, ты! Тӥни азбарын ини — кенос доры вутско.
Соку ӧс сьӧрын кӧня ке куара кылӥськиз. Мумиелы но Марья Ивановналы мон сэреге палэнскыны косӥ, ачим, сабляме поттыса, ӧс доры борд борды султӥ. Бубые, пистолетъёсты басьтыса, курокъёссэс ӝутӥз но бордам ик султӥз. Замокез усьтэм куара кылӥськиз, ӧс усьтӥськиз но земскойлэн йырыз адскиз. Мон солэн йыраз сабляеным ӵоги но, со отчы ик пограз, мугорыныз кеносэ пыронэз кенераз. Со куспын ик бубые но ӧсэтӥ пистолетэныз ыбиз. Ми выламы лыктӥсь калык, выламы юриськыса палэнскиз. Ранить карем земскоез ӧс куспысь кенос пушкы кыски но кенослэсь ӧссэ пушласянь пытсэтэн пытсай. Азбар тыр ожмаськон кивалтосъёсын калык люкаськемын. Соос пӧлысь мон Швабринэз но тодмай.
— Эн кышкалэ, — шуи мон кышноослы. — Осконмы вань. Нош тон, батюшка, табере эн ни ыбылы. Берпум зарядмес запас возёмы.
Мумие куаретытэк инмарлы вӧсяське. Марья Ивановна со вӧзын ик адӟонмылэсь пумаз вуэмзэ, ангел музэн, чус витьыса сылэ. Ӧс сьӧрын урод кылъёсын черекъям, тышкаськем но юриськись куараос кылӥсько. Мон ас интыям, нырысь пырыны дӥсьтӥсьсэ кораны дась сылӥсько. Вдруг злодейёс чусомизы. Мон Швабринлэсь куаразэ кылӥсько, со мынам нимыным вазе.
— Мон татын, мар тыныд кулэ?
— Сётскы, Гринёв, токма гинэ пумитъяськиськод. Жаля аслэсьтыд пересьёстэ. Ваменъяськеменыд астэ ачид возьманы уд быгаты. Мон тӥ доры вутско али!
— Оскалты, изменник!
— Токма шорысь мон ачим но уг мерскы, калыкме но аслэсьтым юнме уг быдты: кеносэ тыл поныны косо но, соку адӟом, мар карыны быгатод тон, белогорской Дон-Кишот. Али нуназезэ сиськон дыр вуэмын. Со куспын пук но тэк улон сямен малпа. Ӟеч лу, Марья Ивановна, тон азьын мон извиняться уг кариськиськы: пеймыт азьын аслад рыцареныд тыныд мӧзмыт ӧвӧл дыр.
Кенос доры караул пуктыса, Швабрин кошкиз. Ми ум вераськиське. Ми пӧлысь котькудӥз ас понназ малпа, малпамъёссэ мукетэзлы вераны уг дӥсьты. Леке вуттэм Швабрин мар но мар карыны быгатоз, мон со сярысь малпасько. Ас сярысьтым мон чик уг сюлмаськиськы. Шонерзэ верано-а меда? Бубыосылы но мар луэмлэсь мон сокем уг кышкаськы, Марья Ивановналэн адӟонэз монэ ортчыт дэймытэ. Мон тодӥсько, мумыме крестьянъёс но дворовой калыкъёс гажало вал. Бубые лек ке но, сое но ярато вал, малы ке шуоно, со шонерез яратэ вал, ки улысьтыз калыкезлэсь нуждазэс но ӟеч тодылэ вал. Соослэн бунтовать каремзы — со шуак кудӟем выллем уж, со вожпотэмен ӝутскем уж ӧвӧл. Бубыосме оло ӧй быдтысалзы. Нош Марья Ивановна? Мар дасяса возе солы костаськись но возьыттэм адями? Таӵе кышкытэсь малпанъёсы дугдыны ик кышкасько. Сыӵе тушмон адямилэн ки улаз сое кыктэтӥзэ сётытозь, мон сое, прости господи, ачим ӝоггес быдтыны малпасько вал.
Нош ог час мында дыр ортчиз. Гуртын кудӟем калыклэн кырӟам куараоссы кылӥсько. Возьмаськисьёсмы милям соослэсь вожъясько, милемлы йыркуръясько, жугыса курадӟытонэн но виемен милемыз кышкато. Ми Швабринлэсь кышкатонзэ ужен быдэстэмзэ витиськом. Бервылаз нош азбаретӥ трос калык ветлыны кутскиз, нош ик ми Швабринлэсь куаразэ кылӥмы.
— Мар, малпады-а ни тӥ? Ас эрикеныды мынам ки улам сётскиськоды-а?
Нокин но солэн пумитаз уг вазь. Ӧжыт могаса, Швабрин куро вайыны косӥз. Кӧня ке минут ортчыса, тыл ӝуатскиз но пеймыт кеносэз югыт кариз, ӧс кусыплэн вискытӥз ӵын пырыны кутскиз. Соку Марья Ивановна мон доры лыктӥз но, монэ киытӥм кутыса, каллен гинэ вераз:
— Дугдэ ни, Пётр Андреич! Монэным сэрен бубыостэ но, астэ но эн быдтэ. Лэзе монэ. Швабрин мынэсьтым кылзӥськоз.
— Уг! — сюлмысь кеськи мон. — Мар тонэ вите, сое тодӥськод-а тон?
— Сантэмамлы мон уг чида, — огсыр сяменыз со вера. — Нош, оло, мон аслэсьтым мозмытӥсьме но куанер сиротаез утялтӥсь семьяез кызьы ке но быремлэсь мозмытыны быгато. Ӟеч луэ, Андрей Петрович, ӟеч луэ, Авдотья Васильевна… Мон поннам тӥ ӟеч карисьёслэсь но ӟечесь вал. Благословить каре монэ. Тӥ но, Пётр Андреич, монэ простить каре. Оскыса улэ, марым… марым… — соку со бӧрдыны кутскиз… ымнырзэ киосыныз ӵоксаз… Мон визьтэм мурт кадь вал. Нэнэе бӧрдӥз.
— Дугды ни пӧялляськемысь, Марья Ивановна, — шуиз мынам бубые. — Кин тонэ огнадэ разбойникъёс доры лэзёз! Пук татын но, эн куареты. Кулоно ке, ваньмылы ӵош кулоно. Кылскы али — мар отын нош верало на?
— Сётскиськоды-а? — черекъя Швабрин. — Адӟиськоды-а? вить минут ортчем бере тӥледыз пыжом.
— Ум сётске, злодей! — чурыт куараен вера мынам бубые.
Солэн кисырам ымнырыз абдрано кадь етӥз луэмын. Пурысь синкабакъёсыз улысь синъёсыз лек пишто. Собере мон шоры вазиз:
— Табере дыр вуиз!
Со ӧсэз усьтӥз. Кеносэ тыл пыриз но коръёс кузя, кӧс ӝуй вылтӥ ӝутскиз. Бубые пистолетэн ыбиз но ӝуась ӧс куспытӥ вамыштӥз: «Ваньды мон бӧрсьы» — шуыса, кеськиз. Нэнэме но Марья Ивановнаез китӥзы кутыса, мон соосты дыртыса поттӥ. Ӧс дорын бубыелэн пересь киыныз ыбем Швабрин кылле. Малпамтэ шорысь ыбылӥськыса потэммылэсь кышкатскем разбойникъёс соку ик нош сэзь кариськизы но милемыз котыртыны кутскизы. Мон кӧня ке муртэз сабляеным шуккыны вуи, нош кинлэн ке лэзем кирпичез шонерак мынам гадям йӧтӥз. Мон пограй, кӧня ке минутлы йырсазьме ыштӥ. Асме ачим шӧдыны кутскем бере, мон Швабринэз адӟи. Со вирен наштаськем ожо вылын пуке, солэн азяз милям ваньмыз семьямы сылэ. Монэ ки ултӥм возьыса сылыны юртто. Ми крестьянъёсын, казакъёсын но башкирецъёсын котыртэмын. Швабрин вераны луонтэм кӧсэктэмын. Одӥг киыныз со ранить карем урдэссэ кутыса возе. Ымныраз солэн курадӟон но вожпотон пыӵамын. Со каллен гинэ йырзэ ӝутӥз, мон шоры учкиз но, ляб, мырдэм валано куараен вераз:
— Ошоно сое… ваньзэс… тазэ кельтоно…
Соку ик злодейёс милемыз котыртӥзы но кесяськыса ӟезьы доры нуо. Нош малпамтэ шорысь соос, милемыз кельтыса, пегӟизы: ӟезьыетӥ Зурин пыриз, со бӧрсьы, пуртэсысьтызы поттэм шашкаосын, быдэс эскадрон.
Бунтовщикъёс пӧртэм пала пегӟо, гусаръёс соосты уйылӥзы, коразы, пленэ кутылӥзы. Зурин вал вылысьтыз тэтчиз, бубыелы но нэнэелы йыбыртӥз но мыным кизэ сётӥз. «Дырыз дыръя ик мон вуи, — шуиз со милемлы. — А, тани тынад невестаед но». Марья Ивановна пельдӥнёзяз ӵыжектӥз. Бубые со доры лыктӥз но каньылэн, сюлмысьтыз ик тау кариз. Нэнэе сое мозмытӥсь ангел шуыса ӟыгыръя. «Ми дорамы пырыны сюлмысь куриськом», — шуиз солы бубые но милям коркамы сое нуиз.
Швабрин дортӥ ортчыкуз, Зурин дугдӥз. «Та кин?» — юаз со, ранить карем адями шоры учкыса. «Ачиз азьветлӥсьсы со, шайкалэн начальникез, — вуж воин туссэ возьматыса, ӧжыт вылтӥяськыса кадь, бубые солы вераз, — егит злодеез наказать карыны но мынам пиелэн вирыз понна солы берыктыны мынам пересь киылы инмар юрттӥз».
— Швабрин со, — шуи мон Зуринлы.
— Швабрин! Туж шумпотӥсько. Гусаръёс! басьтэ сое! Собере асьме лекарьмылы верано, солэсь раназэ со мед бинёз но, ас син чеберзэ кадь, эскерыса мед возёз. Швабринэз одно ик казанской секретной комиссие келяно. Преступникъёс пӧлысь со самой главной, солэн верамъёсыз туж кулэесь луозы.
Жадем муртлэн кадь синъёссэ Швабрин усьтӥз. Солэн ымнырыз, вӧсь луэмзэ сяна, номре но уг возьматы. Гусаръёс сое плащ вылэ поныса нуизы.
Ми корка пушкамы пырим. Пинал дыръёсме тодам вайыса, мон, куалектыса кадь, ас котырме учкисько. Корка пушкын номриз вошкымтэ, ваньмыз азьвыл интыяз. Швабрин грабить карыны лэзьымтэ. Ачиз улэ лэзькеменыз ӵош, со муртлэсь ваньбурзэ киултонэз умойтэм лыдъян сямзэ ыштымтэ. Слугаос нырысь висъетэ люкаськизы. Бунтовать карон борды соос ӧз кутскылэ, милям мозмеммылы сюлмысь ик шумпотӥзы. Савельич шумпотонэн уртчемын. Тодыны кулэ: разбойникъёс вуэм бере, тревога дыръя, со вал гидэ мынӥз. Отын Швабринлэн валэз сылэ вал. Со валэз энераз, — гидысь лушкемен потӥз но, калык кушекъяськон куспын, нокин шӧдытэк, перевоз доры ворттӥз. Отын со Волга тапалан шутэтскись полкез пумитаз. Милям кышкыт уже шедеммы сярысь Зурин солэсь тодӥз, соку ик — «марш, марш, в галоп» — команда сётӥз но, — инмарлы тау, дырыз дыръя вуиз.
Земскойлэн ӵогем йырыз кӧня ке час ӵожелы кабак дорын, пуӵ йылэ пуктэмын мед луоз шуыса, Зурин косӥз.
Уйиськыса ветлӥсь гусаръёс, кӧня ке муртэз пленэ басьтыса, берытскизы. Соосты милям пукем кеносэ ик пытсазы.
Ми котькудӥз ас комнатаосамы кошкылӥм. Пересьёсылы шутэтскон кулэ вал. Быдэс уез изьытэк ортчытэмен, мон валес вылэ уськытски но туж зол умме уси. Зурин распоряжениос сётыны кошкиз.
Ӝыт ми ваньмы куноосты пыртон комнатаын, самовар котыре люкаським но ортчем кышкыт ужъёс сярысь шулдыр вераським. Марья Ивановна чай лэзьылэ, мон со вӧзы пукси но со котырын мусояськисько. Мынам, бубы-мумие милям сыӵе мусо выреммы шоры пумит луытэк учкылӥзы кадь. Та дырозь мон со ӝытэз уг вунэтӥськы. Мон шудо вал, туж шудо вал, нош адямилэн куанер улон ӵожаз трос-а сыӵе шудо дыръёс луыло?
Крестьянъёс баринлэн азбараз, виноват луэмзы понна сюлворыны лыктӥллям шуыса, ӵуказеяз бубылы веразы. Бубые соос доры корка азе потӥз. Сое адӟыса, мужикъёс ваньзы пыдесъяськизы.
— Ну, мар ни, шузиос, — шуиз бубые соослы, — малы тӥ бунтовать карыны малпады?
— Виноват луиськом, милям государьмы, — ӵош верало соос.
— То-то, виноват луиськом. Йыртэмало но собере асьсэос нерад. Пиеным, Пётр Андреичен, адскыны инмар кылдытэм понна шумпотэменым, тӥледыз простить карисько. Ну, ярам: виноватсэ валась йырез сабля уг ӵогы. — Виноват луиськом! Конешно, виноватэсь. Инмар ӟеч куазьзэ сётӥз, турынэз октоно-калтоно вал ни, нош тӥ, визьтэмъёс, быдэс куинь нунал ӵоже мар кариды? Староста! Вань калыкез турнаны ысты. Смотри, горд ӵушъял, Иванов нуналозь штобы турын ваньмыз чумолёын мед луоз. Кошке татысь.
Мужикъёс йыбырскизы но, номре луымтэ сямен, барщинае мынӥзы.
Швабринлэн ранаез сокем кышкыт ӧвӧл вылэм. Сое конвоен Казане келязы. Кызьы сое уробое пуктӥзы мон укноетӥ адӟи. Милям синъёсмы ваче пумит шедизы. Соку со йырзэ ошиз, нош мон укно дорысь ӝоггес палэнски. Тушмон луись муртэлэн шудтэм улэ усемезлы но ултӥе вуэмезлы шумпотӥ медаз малпа шуыса, мон керпотӥсько.
Зуринлы азьлань кошкыны кулэ вал. Семьяе куспын кӧня ке нунал ортчытэме потэ ке но вал, мон со бӧрсьы ик мыныны кариськи. Кошкеммылэсь валлё нуналэ мон бубыосы доры лыктӥ но, соку возем сямъёсъя, Марья Ивановнаен кышнояськыны соослэсь благословеннязэс курыса, соослэн пыдазязы йыбыртӥ. Пересьёсы монэ ӝутӥзы но шумпотэм синвуоссы пыртӥ асьсэлэсь тупамзэс веразы. Мон соос доры ӟаректэм но куалекъясь Марья Ивановнаез вайисько. Милемыз благословить каризы… Кыӵе мылкыды вал, со сярысь уг гожъя. Мынам таӵе ужъёсы кадь улэ кин ке шедьылӥз, со гожъятэк но валалоз, нош кин ке сыӵе ужез ӧз адӟылы на, сыӵе муртэз мон жалясько но дыр ортчемлэсь азьло яратыны но, мумы-бубыостылэсь благословення басьтыны дэмласько.
Ӵуказеяз полкмы кошкыны дасяськиз. Зурин милям семьяен проститься кариськиз. Ӝоген ожмаськон ужмы быроз ни шуыса, ми ваньмы оскемын. Толэзь ортчыса, мон но яратон нылэлы кузпал луо ни шуыса, оскисько. Монэным прощаться кариськыкуз, Марья Ивановна монэ ваньзы азьын чупаз. Мон вал вылэ пукси. Савельич нош мон сьӧрам ик мынэ. Полкмы кошкиз.
Кыдёке ортчем берамы но, мон ялан коркамы шоры учкисько. Марке урод луонэз шӧдон монэ сюлмаськытэ. Шудтэме усёнъёс ваньмыз бырымтэ на шуыса, кин ке мынам пель сьӧрам шыпыртэ кадь. Выль сильтӧлэз сюлмы шӧдэ.
Милесьтым походмес но Пугачёвской войналэн быремез сярысь уг гожъя. Ми Пугачёвен таргам гуртъёс пыртӥ ортчылӥм но куанер улӥсьёслэсь, соослы разбойникъёсын кельтэм ваньбурзэс талано луиськом.
Кинлэсь кылскыны соку соос ӧз тодэ. Правление котькытын дугдытэмын. Помещикъёс нюлэсъёсын ватскыса улӥзы. Разбойникъёслэн шайкаоссы котькытын но йыртэмало. Астрахань пала пегӟись Пугачёв сьӧры уйиськыны ыстэм отрядъёслэн начальникъёссы, виноватэ усемъёссэ но виноваттэмъёссэ но ас эрикенызы наказать карылӥзы…
Быдэс улоскын тылпу вӧлскемен, улон туж кышкыт вал. Инмар медаз кылдыты бессмысленной но беспощадной ӟуч бунтэз адӟыны. Кинъёс ке асьмелэн вормонтэм переворот лэсьтон борды кутско ке, соос либо егитэсь но соин асьме калыкез уг тодо, либо туж чурыт сюлэмоесь, соос понна муртлэн йырыз — полушка, асьсэлэн но чыртызы — копейка.