Капитан ныл (Пушкин)/14
| ← XIII люкетэз. Арест | Капитан ныл XIV люкетэз. Суд Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
Кельтэм люкетэз → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 95—105. |
Суд
Калык кылпум —
Зарезь тулкым.
Мадён
Оренбургысь ас эрикеным кошкемен йырин та уж пӧрмиз шуыса, оскыса улӥ мон. Шонере потыны мыным шуг ӧй луысал: тушмонъёс вылэ потанэз ноку но ӧз алэ, алэм гинэ ӧвӧл, сюлмысь ушъяллязы. Монэ начальстволэсь кылскымтэен виноватэ ӧй уськытысалзы, мултэс пӧсекъям понна шат виноват карысалзы. Нош мынам Пугачёвен эш кадь уртче улэме тросэныз адӟисьёсын зэматэмын луозы, сое тӥни кызьы чаклалозы. Кызьы мыным юан-веран лэсьтозы, кызьы мон верало, со сярысь тӥни мон сюрес кузя пыр малпаса мынӥ. Судлы ваньзэ вылэм ужъёсме кызьы ке вал, озьы вераны кариськи. Шонере потон понна та амал самой огшоры но соин ӵош ик самой оскымон шуыса малпай.
Сутскем но кыр кылем Казане мон вуи. Ульчаосазы коркаос интые эгыр люкъёс но ӵынэн сьӧдэктэм, липеттэм но укноостэм борддоръёс гинэ адско. Сыӵе вал Пугачёвен кельтэм пытьы! Сутскем городлэн шораз ик сутскытэк кылем крепосте монэ вайизы. Гусаръёс монэ караульной офицерлы сётӥзы. Со дуриськисез ӧтьыны косӥз. Мынам пыдъёсам жильы понӥзы но сое басьяны луонтэм дуризы. Собере монэ тюрьмае нуизы но гольык борддоро, корт решоткаен дурем укноё, почи, ёркыт конуркае огнаме кельтӥзы.
Тӥни озьы пумитамзы мыным номре но ӟечсэ азьпалам уг ни возьматы. Озьы ке но мон осконме но капчи мылкыдме уг ыштӥськы. Мон вань курадӟыса улӥсьёслэн буйгатскон сямзы борды кутски но, чылкыт но курадӟем сюлэмысь верам молитвалэсь ческытсэ валаса, мар монэным луоз сое чаклатэк, туж каньылэн умме уси.
Ӵуказеяз тюрьмалэн сторожез монэ сайкатӥз но комиссие ӧтё шуыса ялӥз. Кык салдатъёс монэ тюрьма азбар вамен комендантлэн корказ вайизы но асьсэос нырысь висъетаз кылизы, монэ огнаме пуш комнатаосы лэзизы.
Мон бадӟым гинэ залэ пыри. Бумагаосын шобыртэм ӝӧк сьӧрын кык кузя адямиос пуко: лек тусо мӧйы генерал но, егитгес, ог кызь тямыс аресъем, чебер тусъем етӥз но вераськыны капчи мылкыдо маке гвардейской капитан. Укно дорын, нимаз ӝӧк сьӧрын, пель сьӧраз пероен, бумага вылэ мыкырскыса, мынэсьтым верамъёсме гожъяны дась улыса, секретарь пуке. Допрос кутскиз. Мынэсьтым нимме но чинме юазы. Андрей Петрович Гринёвлэн пиез уд-а луиськы шуыса, генерал юаз. Мынам вераме бере со лек куараен шуиз: «Жаль, сокем сӥё-дано адямилэн таӵе номырлы лэсянтэм пиез!» Котькыӵе урод ужъёсын монэ виноватэ мед уськытозы, мон сюлмысьтым шонер верамъёсыным соосты палэнтыны быгато шуи мон соослы, чик пӧсекъятэк, огсыр сяменым. Мынам оскыса вераськеме солы ӧз кельшы. «Тон, брат, туж лэчыт, — шуиз со, синъёссэ кисыртыса, — нош ми таӵеоссэ гинэ ӧм адӟылэ!»
Собере егитэз адями юаз мынэсьтым: мар муген но ку мон Пугачёвлы служить карыны кутски но мар поручениос со мыным сётъяз?
Мон чиданы луонтэм воже потыса солы верасько: мон офицер но дворянин, нокыӵе службаен Пугачёвлы служить ӧй кар, нокыӵе косонъёссэ солэсь ас вылам ӧй басьтылы.
— Нош кызьы озьы, — пумитам юалляськисе вера, — одӥгез дворянин но офицер самозванецен пощадить каремын, нош солэн эшъёсыз ваньмыз сьӧсь мылкыдын виылэмын? Кызьы озьы самой со офицер но дворянин, бунтовщикъёсын, эшъёсыныз сямен, юэ, главной злодейлэсь кузьымъёс басьтылэ: шуба, вал но полтинник коньдон? Сыӵе паймоно кадь эшъяськон измена бордысен, либо гнусной но преступной ляблык бордысен сяна кытысен потэмын?
Гвардейской офицерлэн та кылъёсызлы мон чидантэм йыркур луи но пӧсектэм мылкыдын асме шонере поттыны кутски. Мон верай, кызьы мон степын, буран дыръя Пугачёвен тодматски; кызьы со Белогорской крепостез басьтон дыръяз монэ тодмаз но улэп кельтӥз. Тулупсэ но валзэ мон самозванецлэсь басьтыны ӧй возьдаськы ке но, нош Белогорской крепостез басьтон дыръяз, мон злодейлы пумит вань кужымме поныса пумитъяськи шуыса, верасько. Бервылаз аслам генералэ сярысь но верай, оренбургской осада дыръя мынэсьтым сюлмысь ужамме со но тодэ шуисько.
Лек пересь ӝӧк вылысь усьтэм гожтэтэз басьтӥз но сое шара лыдӟыны кутскиз:
— «Ваше превосходительство, прапорщик Гринёвлэн туала ортчем смутаын сураськемез сярысь но солэн, службалы ярантэм но присягалы пумит луыса, злодеен тупаса улэмез сярысь юандылы, тазьы ивортыны честь имею: со прапорщик Гринёв, кылем 1773 арын октябрь толэзьлэн нырысь нуналъёсысеныз кутскыса, туала аре 24-тӥ февралёзь Оренбургын служить кариз. 24-тӥ феврале со городысь кошкиз но со дырысь мынам командаям ӧз ни вуылы. Нош перебежчикъёслэн верамзыя, со Пугачёв доры, солэн слободаяз вуылэм но, Пугачёвен ӵош Белогорской крепосте ветлэм. (Азьвыл со отын служить кариз). Солэн выросэз (поведениез) сярысь мон тазьы верано луисько…» Та интыысен со лыдӟемысь дугдӥз но лек куараен мон шоры вазиз: «Астэ шонере поттон понна табере мар вералод?»
Нырысь кутскем сяменым ик, мон Марья Ивановнаен кусыпмы сярысь но, мукетъёссэ вераме сямен ик, сюлмысь шонер вераны малпасько вал. Собере ӝотрак мылкыды мыдлань берытскиз. Йырам таӵе малпан пыриз: солэсь нимзэ поттылӥ ке, сое но юаны-вераны комиссия ӧтёз. Солэсь нимзэ милемлы урод малпась злодейёс пӧлы сураны но соосын ваче син вуттон понна сое ассэ но татчы вайыны — со кышкыт малпан монэ куалектытӥз, соин могӟи но сураськи.
Мынэсьтым верамъёсме ӧжыт оскыса кадь кылскыны кутскем судьяослэн, мар вераны паймемме адӟыса, мон сярысь малпанзы нош вошкиз. Мон вылам самой главной йыбыръяськисен (чагиськисен) монэ ваче син вуттоно шуыса, гвардейской офицер куриз. Генерал толон вуттэм злодеез ӧтьыны косӥз. Монэ виноватэ уськытӥсьлэсь пыремзэ витьыса, мон соку ик синъёсме ӧс пала берыктӥ. Кӧня ке минут ортчыса, жильыосын жильтыртэм куара кылӥськиз, ӧс усьтӥськиз но, Швабрин пыриз. Солэн тусыз вошкемлы мон чылкак пайми. Со вераны луонтэм восьтэт но кӧсыт вал. Кемалась ик ӧвӧл, тэкит кадь сьӧд йырсиосыз солэн копак пурысь луиллям, кузь тушез гынскемын. Монэ виноватэ уськытон кылъёссэ ляб но дӥсьтӥсь куараен вераз со. Солэн верамезъя, Пугачёв монэ, шпион карыса, Оренбурге, пе, лэзиз. Городын мар каро, кыӵе мар соослэн отын ужзы мынэ, со сярысь бумага вылэ гожтыса, сведениос сётъян понна, нуналлы быдэ, пе, мон вал вылын город сьӧры ыбылӥськон муген поталляй. Бервылаз, пе, мон быдэсак самозванец пала кариськи но, соин ӵош крепостьысь крепосте ворттылыса ветлӥ, котькыӵе мугъёсын ас изменник эшъёсме, соослэсь интызэс аслым карон понна, быдтыны, пе, мон тырши но самозванецлэсь пӧртэм кузьымъёс, пе, басьяй. Солэсь верамзэ мон куаретытэк кылски но одӥгез понна гинэ шумпотӥ: возьыттэм злодей Марья Ивановналэсь нимзэ ӧз поттылы; оло сое Марья Ивановналэн ас бордысьтыз палэнтэмез тодаз лыктыса, оло солэн но сюлэмаз Марья Ивановна сярысь мынам кадь ик мылкыдыз вал. Котькызьы мед луоз но, Белогорской крепостьысь комендант ныллэн нимыз та комиссия азьын верамын ӧй вал. Ас малпамъёсме мон уката зол возёно кариськи, соин ик — Швабринлэн верамезлы пумит мар вералод шуыса судьяослэн юамзылы, мон аслэсьтым нырысь верамъёсме гинэ вераны уг быгатӥськы шуи. Генерал милемыз поттыны косӥз. Ми ӵош потӥм. Мон огсыр сяменым Швабрин шоры учки но пал кыл но солы ӧй вазьы. Со лек серемен серектӥз но, ас жильыоссэ ӝутыса, монэ азьпалтӥз но ӝог вамышъяса кошкиз. Монэ нош тюрьмае келязы. Со дырысен допросэ ӧз ни ӧтьылэ.
Лыдӟисьёсты мар сярысь тодытыны кулэ на — со ужъёсты мон ачим ӧй адӟы. Нош со сярысь верамъёсты мон туж ӵем кылылӥ, соин ик со верамъёс мынам йырсазям туж зол пыризы, будто ачим но, нокинлы адӟонтэм вылысь, отын вал кадь потӥсько.
Марья Ивановнаез мынам бубы-мумыосы туж небыт сюлмын но шумпотыса пумиталлям, вуж дауре улӥсь калыкъёслэн сямзы сыӵе вал угось. Куанер сиротаез юртазы пыртыны но сое эркияса возьыны ачиз инмар кылдытэм шуыса кадь, соос учко. Ӝоген соос Марья Ивановна борды сюлмысь герӟаськизы; малы ке шуоно, сое умой-умой тодэм бере, яратытэк кельтыны уг лу. Мынэсьтым Марья Ивановнаез яратонме мынам бубые табере шузияськемен уг ни лыдъя. Нош мумиелэн вань малпанэз со гинэ: солэн Петрушаез капитанлэн та мусо нылыныз мед кышнояськоз шуыса, малпа со.
Монэ арестовать каремзы сярысь вуэм ивор мынэсьтым семьяме ваньзэсты куректон улэ уськытӥз. Мынам Пугачёвен паймымон тодматскеме сярысь Марья Ивановна соослы туж огшоры кылъёсын мадиз, соин ик соос, сюлмаськем гинэ ӧвӧл, ӵем дыръя сюлмысьтызы ик серекъяллязы. Государез престолысьтыз поттон вылысь но дворян выжы калыкез быдтон вылысь урод бунтлэн ужъёсаз мон пыриськи шуыса, бубыелэн нокызьы но оскемез уг поты. Со Савельичлэсь зол-зол юалляськиз. Мынам Емелька Пугачёв доры куное ветлылэме сярысь но кызьы злодей мыным кузьым сётӥз, сое дядькае ватытэк верам, нош маке измена сярысь со нокытысь но, нокинлэсь но ӧй кылы шуыса, вӧсяськыса бубыелы вера. Пересьёс буйгатскизы но ӟеч иворъёслэсь вуэмзэс чидатэк витьыны кутскизы. Марья Ивановна но зол кушетскемын вал, нош сюлмаськонзэ нокинлы но уг вера, малы ке шуоно, со чакласькытэк ноку но мултэс кылзэ уг вера вал.
Озьы кӧня ке арняос ортчизы… Малпамтэ шорысь, мынам бубые Петербургысь, милемлы ӵыжы-выжы луись Б. князьлэсь гожтэтсэ басьтэ. Князь солы мон сярысь гожъя. Огшоры ужъёс сярысь гожъямез бере, тазьы гожтэм: бунтовщикъёслэн урод малпаса бугыръяськонзы борды мынам пыреме сеськыны луонтэм зэмаз, со понна монэ казнить каронозы вал но, бубыелэсь мӧйы луэмзэ но азьвыл ӟеч служить каремзэ чакласа, государыня преступник пидэс жаляз, помиловать кариз но сое, казнить каремлэсь мозмытыса, пырак азелы улон вылысь Сибырлэн кыдёкысь улосъёсаз келяны косӥз, пе.
Таӵе малпамтэ шорысь урод ивор мынэсьтым бубыме ӧжыт гинэ гуэ ӧз пырты. Аслэсьтыз огъя чурыт сямъёссэ со ыштӥз. Куректонъёссэ со азьвыл лушкемен гинэ ортчытэ ке вал, табере шара вераса ӝожке. «Кызьы! — нокытын чидатэк, ялан одӥг кылъёссэ вера со. — Мынам пие Пугачёвлэн урод малпамъёсызлы юрттӥз! Э, инмаре, кыӵе дорозь мон улыса вуи! Государыня сое казнить каремлэсь мозмытэ! Бен, солэсь мыным капчи шат луэ? Казнить карон кышкыт ӧвӧл: мынам песятаелэн песятаез но аслаз шонерез понна казнить каремын; мынам бубые но Волынскоен но Хрущёвен ӵош быриз. Нош дворянинлы, ас присягаезлы пумит кариськыса, разбойникъёсын, йыр быдтӥсьёсын, беглой холопъёсын огазеяськыны!.. Быдэс выжымылы возьыт но срам!..» Солэн нокытчы пырон инты шедьтонтэм куректэмезлэсь кышкаменыз, мумие со азьын бӧрдыны но уг ни дӥсьты, ялан сое буйгатыны турттэ, калык кылпумъёс ӵем дыръя зэм уг луо шуэ. Бубые мынам нокызьы уг буйгатскы.
Марья Ивановна ваньзылэсь трос курадӟе. Мынам асме ачим шонере поттыны быгатэме луысал — шуыса, со юн оске. Малы мон асме ачим шонертыны ӧй быгаты, со сярысь со шӧдыса улэ но мынам шудтэм улэ шедемлы, ассэ виноватэн лыдъя. Аслэсьтыз синвуоссэ но курадӟемзэ со ватыса возиз. Со куспын ик, монэ мозмытон амалъёс утчаса, дугдытэк малпаське.
Одӥг пол мынам бубые диван вылын, придворный календарлэсь листъёссэ пужалляса пуке, нош малпанъёсыз солэн кыдёкын, книга лыдӟон азьвыл сямен мылкыдзэ уг ни бугырты. Со вашкала марш гурен шула. Мумие, номре куаретытэк, ыжгон шортэз шуныт дэрем (фуфайка) керттэ, синвуосыз уж вылаз усьыло. Отын ик, уж бордын пукись Марья Ивановна, малпамтэ шорысь, Петербурге мыно, мынытэк нокызьы но уг лу — шуыса, ялӥз но ассэ кызьы ке но келяны куриз. Нэнэ туж ӝоже усиз. «Малы тон Петербурге мынод? — шуиз со. — Шат, тон но, Марья Ивановна, милемыз куштыны малпаськод ини?» Азьпала улон-вылонэзлэн шудэз та сюресэн герӟаськемын шуыса, вераз Марья Ивановна. Бадӟым чино калыкъёслэсь юрттэмзэс но дур ваемзэс курыны мыно, службазэ шонер нуэмез понна бырем адямилэн нылызлы юрттозы, дыр, шуиз.
Бубые мынам йырзэ ошиз: пиезлэн пӧяськыса виноватэ шедемез сярысь кылпум потэ ке, солы туж секыт кылӥське, маин ке бышкалтэм кадь луэ. «Мын, матушка! — мур лулскыса, шуиз со. — Тынад шудэдлы ми пумит кариськыны ум малпаське. Ӟеч адямиез тыныд инмар кузпаллы мед сётоз, сантэм карем изменник медам шедьы». Со султӥз но комнатаысь потӥз.
Марья Ивановна, мынам мумиеным ваче кусып кылем бере, ас малпамъёссэ кӧнязэ ке солы вераз. Синвуосыз ик потыса, мынам мумие сое ӟыгыртӥз но, малпам ужез ӟеч пумаз мед вуоз шуыса, инмарлы вӧсяське. Марья Ивановнаез сюрес вылэ дасязы. Кӧня ке нунал ортчыса, солэсь люкиськылонтэм Палашаез но, мынэсьтым люкиськылонтэм Савельичез сётыса, сюрес вылэ лэзизы. Савельич монэным кужмысь сямен люкиськоно луэм бераз, коть мынам кышно луоноелы служить карисько шуыса, ассэ ачиз буйгатыса улэ.
Марья Ивановна Софие вуиз но, соку дыръя эксэйлэн дворецез Царской Селоын луэ шуыса тодэм бераз, та вуэм интыяз ик дугдыны кариськиз. Кунока солы пулэн висъям висъет сьӧрысь сэрегез сётӥзы. Смотрительлэн кышноез Марья Ивановнаен соку ик вераськыны кутскиз. Со эксэй дворецын гуръёсты эстыса улӥсь муртлы племянница луэмез сярысь но, дворецын улэм-вылэмзы сярысь но ваньзэ пыр-поч мадиз. Кӧня часкын государыня султэ, ку кофе юэ, ку гулять карыны пота; кыӵе вельможаос со котырын уло; мар сярысь со толон ӝӧк сьӧрын пукыкуз вераськиз, ӝытазе кинэ со принимать кариз — огъя вераса, Анна Власьевналэн вераськемысьтыз калыклэн выжыезлы туж дуно луымон кӧня ке исторической запискаос гожъяны луысал. Марья Ивановна солэсь верамзэ умой-умой кылскиз. Собере соос садэ потӥзы. Анна Власьевна кажной аллеялэсь, кажной выжлэсь историязэ вераз. Гулять карем беразы соос берен станцие берытскизы, огзылы огзы соослэн мылкыдзы туж тупаз.
Ӵуказеяз ӵукна, вазь султыса, Марья Ивановна дӥсяськиз но лушкемен садэ потӥз. Ӵукна куазь туж шулдыр вал, сӥзьыл сайкытэн ӵужектыны кутскем беризьёслэсь йылъёссэ шунды югдытэ. Паськыт тылэн пукись вуэз чиля. Солэн дуръёсаз будӥсь куакъёс улысь сайкатскем юсьёс, вылтӥяськыса кадь, уяса пото. Марья Ивановна чебер возь дуртӥ мынэ. Отын Пётр Александрович Румянцевлы, ожмаськонын вормемъёссэ буре вайыса, али гинэ памятник пуктэмын. Малпамтэ шорысь, олокытысь английской выжы почи гинэ пуны утыса Марья Ивановналэн пумитаз лыктэ. Марья Ивановна кышказ но дугдӥз. Соку ик мусо кышномурт куара кылӥськиз: «Эн кышкалэ, со уз куртчы». Марья Ивановна памятник вадсысь скамья вылын пукись дамаез адӟиз. Марья Ивановна скамьялэн мукет пал пумаз пуксиз. Со шоры дама туж эскеръяськыса учкиз. Марья Ивановна но, ас пумысьтыз кӧня ке пол син ултӥз учкыса, сое пыдъёсысеныз йырозяз учкыны вуиз. Со дама ӵукна нуллон тӧдьы платьяен, кӧлан такьяен но шуныт кофтаен дӥсяськемын вал. Арлыдызъя со ог ньыльдон арес адске. Тыр но ӵыжыт ымнырыз солэн сюлмаськонтэм но важной туссэ возьматэ, нош чагыр синъёсыз но капчи мынясь ымдуръёсыз вераны луонтэм чебересь адско. Нырысь ик дама кылпум поттӥз.
— Тӥ татысь ӧвӧл кадь? — шуиз со.
— Точно так-с: мон толон гинэ провинциысь лыктӥ.
— Тӥ аслад бубыосыныд лыктӥды дыр?
— Никак нет-с. Мон огнам лыктӥ.
— Огнад! Нош тӥ туж егит на ук.
— Мынам бубые но мумие но ӧвӧл.
— Марке со ужен татчы лыктӥды дыр?
— Точно так-с. Мон государынялы куриськон сётыны лыктӥ.
— Тӥ сирота: обидь каремъёс вылэ но, урод ужъёс вылэ йыбыръяськыны малпаськоды дыр?
— Ӧвӧл. Мон милость курыны лыктӥ, судлэсь шонерзэ утчаны ӧй лыкты.
— Юаны ке луэ, кин, бен, тӥ луиськоды?
— Мон Миронов капитанлэн нылыз.
— Миронов капитанлэн! Оренбург округын одӥг крепостьын комендантын улӥз, самой солэн-а нылыз?
— Точно так-с.
Марья Ивановналэн верамез дамалэн сюлмаз йӧтӥз кадь. «Извинить каре монэ, — куаразэ уката небыт карыса, шуиз со, — тӥляд уж куспады пыремелы; нош мон двореце но вуылӥсько; мар пумысь лыктэмдэс мыным вералэ, оло мон юрттыны но быгато.»
Марья Ивановна султӥз но, сӥ-дан сётыса, тау кариз. Тодмотэм дамалэн котьмаиз адямилэсь сюлэмзэ бордаз бинялтэ, сое оскытытэ. Марья Ивановна, кисыысьтыз (ӟепысьтыз) куасаллям бумагазэ поттӥз но, ас тодмотэм дурвайисезлы сётӥз. Соиз ас куспаз лушкемен лыдӟыны кутскиз.
Нырысь со туж ӟеч мылкыдын но умой гинэ лыдӟиз, собере ымнырыз шуркак мукет луиз. Марья Ивановна, со шорысь синъёссэ вошъятэк учкыса улӥсь маке, дамалэн алигес гинэ мусо тусыз лек тусо кариськемен кышказ.
— Тӥ Гринёв сярысь куриськоды? — кезьыт тусо кариськыса, юаз дама. — Императрицалэн сое простить каремез уг лу. Номре валасьтэм но капчи визьмо мурт луыса со самозванец борды ӧз кариськы, урод сямо но номырлы лэсянтэм адями луыса, со борды кариськиз.
— Ах, зэм ӧвӧл! — кеськиз Марья Ивановна.
— Кызьы, зэм ӧвӧл? — ӵыж-ӵыж ӵыжектыса, пумитаз дама вазиз.
— Зэм ӧвӧл, инмар понна, зэм ӧвӧл! Мон ваньзэ тодӥсько, мон ваньзэ тӥледлы верало. Одӥг монэн йырин гинэ со сыӵе курадӟон улэ шедиз. Нош суд азьын ке со ассэ ачиз шонертыны ӧз быгаты, отчы монэ сурамез потымтэен гинэ. — Собере Марья Ивановна та дамалы Гринёв сярысь вань ужъёссэ пӧсь мылкыдын мадиз. Мар мадемзэ мынам лыдӟисьёсы тодо ини.
Солэсь мадемзэ дама сак кылскиз. «Кытчы тӥ дугдӥды?» — юаз со собере. Марья Ивановналэсь Анна Власьевна доры дугдэмзэ тодыса, серем пыр тазьы шуиз: «А! тодӥсько. Ӟеч луэ! Пумиськеммы сярысь нокинэн эн вераське. Гожтэтлы ответ кема витёно уд луэ дыр шуыса оскисько».
Та кылъёссэ верам бераз, дама султӥз но липем аллея кузя кошкиз, нош Марья Ивановна шумпотымон осконъёсын Анна Власьевна доры бертӥз.
Анна Власьевна, сӥзьыл куазен ӵукна вазь гулять карыны потамез понна, сое куаретӥз. Солэн верамезъя, таӵе уж егит ныллэн тазалыкезлы, пе, уг тупа. Собере со ӝӧк вылэ самовар вайиз но чай юон куспаз дворецын улон-вылон сярысь нош пумтэм-йылтэм мадёнъёссэ вераны кутскем вал. Малпамтэ шорысь дворецысь ыстэм карета корка азе дугдӥз. Камер-лакей корка пырыса, Миронова нылэз государыня ас дораз ӧте шуыса, ялӥз.
Анна Власьевна паймиз но куалектэменыз мар карыны но уг ни вала. «Ахти господи! — кеськиз со. — Государыня тонэ двореце ӧте. Кызьы нош тон сярысь со тодӥз? Кызьы гинэ тон, матушка, императрица доры пырод? Мынам малпамея, тон дворецын улӥсьёс сямен пыддэ но лёгыны уд быгатӥськы… Мон, шат, тонэ келяса мыно ини? Всётаки мон малы ке солы тонэ валэктыны быгато. Нош кызьы тон сюрес вылэ дӥсям платьяеныд мынод? Пинал ваён дыръя юрттӥсь бабка доры, шат, ыстыса, солэсь ӵуж роброн платьязэ куроно?» Марья Ивановна маке дӥсен дӥсяськемын, со дӥсеныз ик государыня лыктыны косӥз шуыса, камер-лакей вераз. Мар карод на: Марья Ивановна каретае пуксиз но двореце мынӥз. Анна Власьевна, пӧртэм визь-кенешъёс но благословленняос сётыса, келяз.
Милям шудмы та дыръя солань-а, талань-а кариськоз, сое Марья Ивановна шӧдэ, солэн сюлмыз тэтчоно кадь жугиське. Кӧня ке минут ортчыса, карета дворец азе дугдӥз. Марья Ивановна кышкаса тубатъёс кузя тубе. Солэн азяз ӧсъёс усьтӥськизы. Со олокӧня, туж чебересь комнатаосыз ортчиз: камер-лакей солы сюрес возьматэ. Бервылаз со пыдсам ӧс доры вуиз но, али ик со сярысь государынялы верало шуыса, сое огназэ кельтӥз.
Императрицаен ваче пумит вуон сярысь малпан Марья Ивановнаез ортчыт кышкатэ, со мырдэм пыд йылаз сылэ. Ог минутъёс ортчыса, ӧс усьтӥськиз но со государынялэн дӥсяськон висъетаз пыриз.
Императрица ӵукна дӥсяськон уж бордаз пуке вал. Котыраз сылӥсь кӧня ке придворнойёсыз Марья Ивановналы сюрес сётӥзы. Небыт куараеныз государыня со шоры вазиз но, Марья Ивановна, со шоры учкыса, кӧня ке минут талэсь азьвыл садын пумиськыса, сюлмысь вераськем дамаез тодмаз. Государыня сое ас дораз ӧтиз но пальпотыса вераз: «Тӥлесьтыд куремдэс но тӥледлы сётэм кылме быдэстэмелы шумпотӥсько. Тӥляд ужды быдэстэмын. Тӥляд кузпал луоно мурттылэн виноват луымтэезлы мон табере оскисько. Тани гожтэт, сое тӥ асьтэос бубы луоно мурттылы нуыны тырше ни».
Куалекъясь киосыныз Марья Ивановна гожтэтсэ басьтӥз но бӧрдыса императрицалэн пыд азяз усиз. Императрица сое ӝутӥз но чупаз. Государыня соин вераськыны кутскиз. «Тӥлесьтыд начар улэмдэс тодӥсько, — шуиз со, — нош мон Миронов капитанлэн нылыз азьын пунэмо (в долгу). Азьпала улон сярысь эн сюлмаське. Ваньбур ласянь улондэс тупатыны ас вылам басьтӥсько».
Куанер сиротаез буйгатэм бераз, государыня сое лэзиз. Марья Ивановна отчы лыктэм придворной каретаын ик кошкиз. Солэсь берытскемзэ чидантэм витьыса улӥсь Анна Власьевна оломар сярысь но юалляськыны кутскиз. Марья Ивановна солэн юалляськемъёсызлы кызьы но озьы гинэ вера. Анна Власьевналы сыӵе вунэтон сям ӧз ке но яра, нош провинциысь лыктэм калык возьдаськылэ но мар шуыса, простить кариз. Со нуналэ ик Марья Ивановна, Петербургез но учкытэк, гуртаз кошкиз…
Пётр Андреевич Гринёвлэн гожъямъёсызлэн пумыз, семья куспын выжыысен выжые верамъёсъя, тодмо: Гринёв тюрьмаысь 1774 арлэн пумаз, государынялэн косэмезъя мозмытэмын вал. Со Пугачёвез казнить карон дорын вылэм, Пугачёв сое калык пӧлысь тодмам но солы йырзэ шонтэм. Ог минут ортчыса, солэсь кулэм но вире наштаськемен йырзэ калыклы возьмато. Собере ӝоген Пётр Андреевич но Марья Ивановна куспазы кышнояськизы. Соослэн выжы луисьёссы али но Симбирской губерняын уло.
*** дорысен куамын иськемын бадӟым село вань. Со селоен дас помещикъёс кузёясько. Одӥгаз барской коркан, пияла сьӧры рамае понэм, Екатерина II-лэсь ас киыныз гожъям гожтэтсэ возьматъяло. Со гожтэт Пётр Андреевичлэн бубыезлы, солэсь пизэ шонере поттон сярысь но Миронов капитанлэсь нылзэ визьмыз но сюлэмез ласянь ушъяса гожтэмын. Пётр Андреевич Гринёвлэн гожъямез солэн пиезлэн пиеныз милемлы сётэмын вал. Со дедушкаез дыръя вылэм ужъёсты ми гожъяны малпаськом шуыса тодэм но дедушкаезлэсь гожъямзэ милемлы вайиз. Ӵыжы-выжыосыныз тупатскыса Пётр Андреевичлэсь гожъямзэ ми нимаз поттыны кариським. Люкетэзлы быдэ тупась эпиграфъёс шедьтылӥм но кудзэ-огзэ собственной нимъёсты воштӥм.
Издатель.
19 окт. 1836 ар.