Канѡ̑ны, си́рѣчь кни́га пра́вилъ/Пра̑вила сардікі́йскагѡ собо́ра

Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Пра̑вила свѧта́гѡ помѣ́стнагѡ собо́ра сардікі́йскагѡ.

Пра́вило а҃.

Ѻ҆сі́й є҆пі́скопъ гра́да кордꙋ́вы ре́къ: подоба́етъ и҆з̾ са́мыхъ ѡ҆снова́нїй и҆скорени́ти не сто́лькѡ хꙋдо́е ѡ҆быкнове́нїе ско́лькѡ вре́днѣйшее разстро́йство дѣ́лъ церко́вныхъ. Никомꙋ̀ и҆з̾ є҆пі́скопѡвъ да не бꙋ́детъ позво́лено и҆з̾ ма́лагѡ гра́да преходи́ти въ и҆ны́й гра́дъ. И҆́бо въ се́мъ дѣ́лѣ ꙗ҆́вна причи́на, длѧ ко́ей ѻ҆но̀ предпрїе́млетсѧ: потомꙋ̀ что̀ никогда̀ не мо́жно бы́ло ѡ҆брѣстѝ ни є҆ди́наго є҆пі́скопа, кото́рый бы и҆з̾ вели́кагѡ гра́да во гра́дъ ме́ньшїи переведе́нъ бы́ти тща́лсѧ. Ѿсе́лѣ ꙗ҆́вствꙋетъ, что̀ таковы́е пла́менною стра́стїю многостѧжа́нїѧ возжига́ютсѧ, и҆ го́рдости бо́лѣе рабо́таютъ, да полꙋ́чатъ бо́льшꙋю, по ви́димомꙋ, вла́сть. И҆та́къ, бꙋ́детъ ли ᲂу҆го́дно всѣ̑мъ, да сꙋро́вѣе наказꙋ́етсѧ толи́кое развраще́нїе; мню́ же, ꙗ҆́кѡ таковы̑мъ не до́лжно и҆мѣ́ти ѻ҆бще́нїѧ нижѐ наравнѣ̀ съ мїрѧ́нами. Всѣ̀ є҆пі́скопы реклѝ: ᲂу҆го́дно всѣ̑мъ.

Пра́вило в҃.

А҆́ще же ѡ҆брѧ́щетсѧ кто̀ толи́кѡ безꙋ́менъ и҆лѝ дерзнове́нъ, ꙗ҆́кѡ возмни́тъ нѣ́кое и҆звине́нїе приноси́ти въ таково́мъ дѣ́лѣ, ᲂу҆твержда́ѧ, что̀ ѿ наро́да при́слано къ немꙋ̀ посла́нїе: ꙗ҆́вно є҆́сть, ꙗ҆́кѡ моглѝ не мно́гїе нѣ́кїе, прельще́нные воздаѧ́нїемъ и҆ цѣно́ю, ско́пище соста́вити въ це́ркви, а҆́кибы жела́ѧ и҆мѣ́ти є҆го̀ є҆пі́скопомъ. Посемꙋ̀ полага́ю, сїѝ ᲂу҆хищрє́нїѧ и҆ кѡ́зни всеконе́чнѡ нака́зывати, да никто̀ и҆з̾ таковы́хъ, нижѐ при кончи́нѣ свое́й, не бꙋ́детъ ᲂу҆досто́иваемъ ѻ҆бще́нїѧ, да́же наравнѣ̀ съ мїрѧ́нами. Оу҆го́дно ли мнѣ́нїе сїѐ; ѿвѣща́йте. И҆ ѿвѣща́ли: и҆зрече́нное прїе́млемъ.

Пра́вило г҃.

Нꙋ́жно и҆ сїѐ присовокꙋпи́ти, да никто̀ и҆з̾ є҆пі́скопѡвъ не прихо́дитъ и҆з̾ своеѧ̀ ѻ҆́бласти во и҆нꙋ́ю ѻ҆́бласть, въ кото́рой є҆́сть своѝ є҆пі́скопы, ра́звѣ то́кмѡ бꙋ́детъ по́званъ ѿ бра́тїй находѧ́щихсѧ въ ѻ҆́ной, да не возмни́мсѧ затворѧ́ти двє́ри любвѝ. Подоба́етъ же и҆ сїѐ предꙋсмотрѣ́ти: а҆́ще въ ко́ей ѻ҆́бласти, кто́ либо и҆з̾ є҆пі́скопѡвъ и҆мѣ́етъ дѣ́ло съ бра́томъ свои́мъ и҆ соепі́скопомъ: ни кото́рый и҆з̾ ни́хъ да не призыва́етъ въ посре́дники є҆пі́скопѡвъ и҆з̾ и҆ны́ѧ ѻ҆́бласти. А҆́ще же кто̀ и҆з̾ є҆пі́скопѡвъ, въ нѣ́коемъ дѣ́лѣ, ѡ҆ка́жетсѧ ѡ҆сꙋжда́емымъ, но возмни́тъ себѐ не непра́вое и҆мѣ́ти дѣ́ло, а҆ пра́ведное, да и҆ па́ки возѡбнови́тсѧ сꙋ́дъ: то, а҆́ще ᲂу҆го́дно ва́мъ, любо́вїю почти́мъ па́мѧть петра̀ а҆пⷭ҇ла, и҆ да напи́шетсѧ ѿ си́хъ сꙋди́вшихъ къ і҆ꙋ́лїю є҆пі́скопꙋ ри́мскомꙋ, да возѡбнови́тсѧ, а҆́ще потре́бно, сꙋ́дъ чрез̾ ближа́йшихъ къ то́й ѻ҆́бласти є҆пі́скопѡвъ, и҆ да назна́читъ ѻ҆́нъ разсмотри́телей дѣ́ла. А҆́ще же ѡ҆бвинѧ́емый не возмо́жетъ предста́вити дѣ́ла своегѡ̀ тре́бꙋющымъ втори́чнагѡ сꙋжде́нїѧ: то є҆ди́ножды присꙋжде́нное да не нарꙋша́етсѧ, но, что̀ сдѣ́лано, то̀ да бꙋ́детъ тве́рдо.Шесты́мъ пра́виломъ пе́рвагѡ вселе́нскагѡ собо́ра, по дре́внемꙋ ѻ҆бы́чаю, предоста́влены въ подчине́нїе ри́мскомꙋ є҆пі́скопꙋ мнѡ́гїѧ є҆па́рхїи на за́падѣ, подо́бнѡ ка́къ а҆леѯандрі́йскомꙋ и҆ а҆нтїохі́йскомꙋ мнѡ́гїѧ є҆па́рхїи на ю҆́гѣ и҆ восто́кѣ. Согла́снѡ съ си́мъ раздѣ́ленїемъ, ѻ҆сі́й є҆пі́скопъ і҆спа́нскагѡ го́рода кордꙋ́вы, принадлежа̀ къ ѻ҆́бласти ри́мскагѡ є҆пі́скопа, предлага́етъ ѿноси́ть на є҆гѡ̀ разсмотре́нїе сомни́тельные слꙋ́чаи за́падныхъ є҆па́рхїй: и҆ въ се́мъ смы́слѣ при́нѧлъ є҆гѡ̀ предложе́нїе помѣ́стный сардїкі́йскїй собо́ръ, не ѿстꙋпа́ѧ ѿ ѕ҃ пра́вила пе́рвагѡ вселе́нскагѡ собо́ра.

Пра́вило д҃.

А҆́ще кото́рый є҆пі́скопъ, сꙋдо́мъ є҆пі́скопѡвъ въ сосѣ́дствѣ находѧ́щихсѧ, и҆зве́рженъ бꙋ́детъ ѿ са́на, и҆ рече́тъ, что̀ ѻ҆́нъ па́ки возлага́етъ на себѧ̀ до́лгъ ѡ҆правда́нїѧ: то не пре́жде поставлѧ́ти дрꙋга́го на є҆гѡ̀ мѣ́сто, ра́звѣ когда̀ є҆пі́скопъ ри́мскїй, дозна́въ дѣ́ло, произнесе́тъ своѐ ѡ҆предѣле́нїе по ѻ҆́номꙋ.

Пра́вило є҃.

А҆́ще бꙋ́детъ на кото́раго є҆пі́скопа доно́съ, и҆ є҆пі́скопы ѻ҆кре́стные собра́вшись низло́жатъ є҆го̀ съ є҆гѡ̀ сте́пени, а҆ ѻ҆́нъ, переносѧ̀ дѣ́ло, прибѣ́гнетъ къ блаже́ннѣйшемꙋ є҆пі́скопꙋ ри́мскїѧ це́ркви, се́й же восхо́щетъ внѧ́ти є҆мꙋ̀, и҆ призна́етъ пра́веднымъ возѡбнови́ти и҆зслѣ́дованїе дѣ́ла ѡ҆ не́мъ: то до́лжно и҆ сїѐ положи́ти, да благоволи́тъ написа́ти къ сопредѣ́льнымъ то́й ѻ҆́бласти є҆пі́скопамъ, дабы̀ ѻ҆нѝ тща́тельнѡ и҆ съ подро́бностїю вни́кнꙋли во всѣ̀ ѡ҆бстоѧ́тєльства, и҆, по ᲂу҆бѣжде́нїи въ и҆́стинѣ, произнеслѝ сꙋ́дъ ѡ҆ дѣ́лѣ. А҆́ще же кто̀ востре́бꙋетъ, что́бы дѣ́ло є҆гѡ̀ па́ки вы́слꙋшано бы́ло, и҆, по проше́нїю є҆гѡ̀, заблагоразсꙋждено̀ бꙋ́детъ ри́мскимъ є҆пі́скопомъ ѿ себѐ посла́ти пресвѵ́терѡвъ: да бꙋ́детъ во вла́сти сегѡ̀ є҆пі́скопа, поколи́кꙋ за лꙋ́чшее и҆ до́лжное призна́етъ и҆ ѡ҆предѣли́тъ, длѧ сꙋжде́нїѧ вмѣ́стѣ съ є҆пі́скопами, посла́ти застꙋпа́ющихъ мѣ́сто посла́вшагѡ. И҆ли́ же а҆́ще доста́точнымъ призна́етъ бы́вшее разсмотре́нїе и҆ рѣше́нїе дѣ́ла ѡ҆ се́мъ є҆пі́скопѣ: да ᲂу҆чини́тъ, что̀ благоразꙋ́мнѣйшемꙋ є҆гѡ̀ разсꙋжде́нїю за бла́го возмни́тсѧ. Ѿвѣща́ли є҆пі́скопы: и҆зрече́нное прїе́млемъ.

Пра́вило ѕ҃.

А҆́ще въ є҆ди́ной ѻ҆́бласти, и҆мѣ́ющей мно́гихъ є҆пі́скопѡвъ, слꙋчи́тсѧ є҆ди́номꙋ є҆пі́скопꙋ заме́длити, и҆ ѻ҆́нъ, по нѣ́коемꙋ небреже́нїю, не восхо́щетъ бы́ти въ собра́нїи и҆ согласи́тисѧ на постановле́нїе є҆пі́скопѡвъ, собра́вшеесѧ же мно́жество люде́й бꙋ́детъ проси́ти, да поста́витсѧ тре́бꙋемый и҆́ми є҆пі́скопъ: подоба́етъ во пе́рвыхъ, чрез̾ посла́нїе є҆ѯа́рха ѻ҆́бласти [разꙋмѣ́ю є҆пі́скопа митропо́лїи], воспомѧнꙋ́ти ѻ҆́номꙋ заме́длившемꙋ є҆пі́скопꙋ, ꙗ҆́кѡ про́сѧтъ лю́дїе да́ти и҆̀мъ па́стырѧ. За бла́го признаю̀ ѡ҆жида́ти, да прибꙋ́детъ и҆ ѻ҆́нъ. А҆́ще же, и҆ чрез̾ посла́нїе бы́въ про́шенъ, не прїи́детъ, и҆ нижѐ ѿпи́шетъ, то подоба́етъ ᲂу҆довлетвори́ти жела́нїю наро́да. Но и҆ ѿ бли́жнїѧ ѻ҆́бласти до́лжно призва́ти є҆пі́скопѡвъ къ поставле́нїю є҆пі́скопа митропо́лїи. Напро́тивъ тогѡ̀ ѿню́дь да не бꙋ́детъ позво́лено поставлѧ́ти є҆пі́скопа въ како́е либо село̀ и҆лѝ въ ма́лый го́родъ, длѧ ко́егѡ довлѣ́етъ и҆ є҆ди́ный пресвѵ́теръ. И҆́бо не нꙋ́жно поставлѧ́ти та́мѡ є҆пі́скопѡвъ, да не ᲂу҆ничижа́етсѧ и҆́мѧ є҆пі́скопа и҆ вла́сть. Но є҆пі́скопы ѻ҆́бласти должны̀, ка́къ и҆зрече́но мно́ю вы́ше, є҆пі́скопѡвъ поставлѧ́ти въ тѣ̀ гра́ды, въ кото́рыхъ и҆ пре́жде бы́ли є҆пі́скопы. А҆́ще же ѡ҆брѧ́щетсѧ нѣ́кїй гра́дъ, мно́гимъ число́мъ люде́й толи́кѡ возра́стшїй, что̀ при́знанъ бꙋ́детъ досто́йнымъ и҆мѣ́ти є҆пі́скопа: да прїи́метъ. Согла́сны ли на сїѐ всѣ̀; ѿвѣща́ли всѣ̀: согла́сны.

Пра́вило з҃.

Ѻ҆сі́й є҆пі́скопъ ре́къ: безвре́мєнныѧ, весьма̀ ча̑стыѧ и҆ несправедли́выѧ прошє́нїѧ на́ши сдѣ́лали то̀, что̀ мы̀ не и҆мѣ́емъ толи́кїѧ благода́ти и҆ дерзнове́нїѧ, каковы́ѧ и҆мѣ́ти долженствꙋ́емъ. И҆́бо мно́гїе и҆з̾ є҆пі́скопѡвъ не престаю́тъ приходи́ти въ во́инскїй ста́нъ, а҆ наипа́че а҆фрика́нскїе, кото́рые, ка́къ мы̀ ᲂу҆вѣ́дали ѿ возлю́бленнагѡ бра́та на́шегѡ и҆ соепі́скопа гра́та, поле́зныхъ совѣ́тѡвъ не прїе́млютъ, но презира́ютъ та́къ, что̀ є҆ди́нъ человѣ́къ прино́ситъ въ во́инскїй ста́нъ прошє́нїѧ мно́жайшыѧ и҆ разли̑чныѧ, не могꙋ́щыѧ бы́ти на по́льзꙋ це́рквамъ, посо́бствꙋетъ и҆ покрови́тельствꙋетъ, не бѣ̑днымъ и҆ простолюди́намъ, и҆лѝ вдови́цамъ, ка́къ бы́ло бы до́лжно и҆ прили́чно, но мїрски́хъ досто́инствъ и҆ должносте́й и҆́щетъ длѧ нѣ́которыхъ. Таково́е невѣ́жество причинѧ́етъ на́мъ ᲂу҆ще́рбъ, не без̾ собла́зна нѣ́коегѡ и҆ зазо́ра. Прили́чнѣйшимъ же почита́ю, что́бы є҆пі́скопъ по́мощь свою̀ подава́лъ томꙋ̀, кто̀ ѿ когѡ́ либо ᲂу҆тѣснѧ́етсѧ, и҆лѝ є҆́стьли кото́раѧ вдова̀ ѻ҆би́дꙋ претерпѣва́етъ, и҆лѝ си́рый кто́ либо лиша́етсѧ принадлежа́щагѡ є҆мꙋ̀, є҆́стьли прито́мъ и҆ по си́мъ предме́тамъ проше́нїе бꙋ́детъ справедли́вое. А҆́ще ᲂу҆̀бо, возлю́бленные бра́тїѧ, ᲂу҆го́дно сїѐ всѣ̑мъ: то ᲂу҆тверди́те, ꙗ҆́кѡ ни є҆ди́нъ є҆пі́скопъ не до́лженъ приходи́ти въ во́инскїй ста́нъ, кромѣ̀ тѣ́хъ, кото́рыхъ благочести́вѣйшїй ца́рь на́шъ призове́тъ свои́мъ писа́нїемъ. Но поели́кꙋ многокра́тнѡ слꙋча́етсѧ, что̀ нѣ́которые, за престꙋпле́нїѧ своѝ, на заточе́нїе и҆лѝ на ѻ҆́стровъ ѡ҆сꙋжде́нные, и҆лѝ и҆но́мꙋ како́мꙋ либо ѡ҆сꙋжде́нїю подве́рженные, прибѣга́ютъ къ це́ркви, тре́бꙋѧ милосе́рдїѧ: таковы̑мъ не надлежи́тъ ѿка́зывати въ по́мощи, но неме́дленнѡ и҆ без̾ сомнѣ́нїѧ проси́ти длѧ ни́хъ снисхожде́нїѧ. А҆́ще и҆ сїѐ ᲂу҆го́дно, препода́йте на сїѐ согла́сїе всѣ̀. Ѿвѣ́тствовали всѣ̀: да бꙋ́детъ постано́влено и҆ сїѐ.

Пра́вило и҃.

Поели́кꙋ бы́ло разсꙋжда́емо, дабы̀ кто̀ и҆з̾ є҆пі́скопѡвъ не подпа́лъ ѡ҆сꙋжде́нїю, приходѧ̀ въ во́инскїй ста́нъ: сегѡ̀ ра́ди, а҆́ще кото́рые и҆з̾ ни́хъ и҆мѣ́ютъ такі́ѧ прошє́нїѧ, ѡ҆ каковы́хъ мы̀ вы́ше ᲂу҆помѧнꙋ́ли, да препосыла́ютъ и҆̀хъ чрез̾ своего̀ дїа́кона. И҆́бо слꙋже́бное лицѐ не подлежи́тъ ᲂу҆коре́нїю и҆ скорѣ́е мо́жетъ донестѝ то̀, что̀ є҆мꙋ̀ порꙋчено̀ бꙋ́детъ. Ѿвѣ́тствовали всѣ̀: и҆ сїѐ да бꙋ́детъ постано́влено.

Пра́вило ѳ҃.

А҆́ще кото́рыѧ ѻ҆́бласти є҆пі́скопы, бра́тꙋ и҆ соепі́скопꙋ своемꙋ̀, доста́вѧтъ прошє́нїѧ: то пребыва́ющїй въ бо́льшемъ гра́дѣ, то́ є҆сть въ митропо́лїи, да препрово́дитъ и҆ дїа́кона и҆́хъ и҆ прошє́нїѧ, да́въ є҆мꙋ̀ и҆ представи́тєльныѧ пи́сьма, то́ є҆сть писа́въ послѣ́довательнѡ къ бра́тїѧмъ и҆ соепі́скопамъ на́шымъ, пребыва́ющымъ въ то̀ вре́мѧ въ тѣ́хъ мѣста́хъ и҆лѝ гра́дахъ, въ кото́рыхъ благочести́вѣйшїй ца́рь ли́чнѡ распорѧжа́етъ ѻ҆бще́ственными дѣла́ми. А҆́ще же кто̀ и҆з̾ є҆пі́скопѡвъ и҆мѣ́етъ дрꙋгѡ́въ во дворѣ̀ царе́вѣ, и҆ восхо́щетъ ѡ҆ че́мъ либо подоба́ющемъ проси́ти: то да не возбрани́тсѧ є҆мꙋ̀, чрез̾ своего̀ дїа́кона и҆ проси́ти и҆ заповѣ́дати и҆̀мъ, да подадꙋ́тъ є҆мꙋ̀ въ є҆гѡ̀ проше́нїи благꙋ́ю по́мощь. Приходѧ́щїе же въ ри́мъ, ка́къ вы́ше рече́но мно́ю, прошє́нїѧ, котѡ́рыѧ и҆мѣ́ютъ принестѝ ца́рю, должны̀ представлѧ́ти возлю́бленномꙋ бра́тꙋ на́шемꙋ и҆ соепі́скопꙋ і҆ꙋ́лїю, да пе́рвѣе разсмо́тритъ, не сꙋ́ть ли нѣ́кїѧ и҆з̾ ни́хъ безсты́дны, и҆ пото́мъ по́слетъ ѻ҆́ныѧ въ во́инскїй ста́нъ, присовокꙋплѧ́ѧ и҆ своѐ предста́тельство и҆ попече́нїе. Всѣ̀ є҆пі́скопы ѿвѣ́тствовали, ꙗ҆́кѡ ᲂу҆го́дно и҆̀мъ сїѐ, и҆ прили́чнѣйшїй є҆́сть совѣ́тъ се́й.

Пра́вило і҃.

Подоба́етъ со всѧ́кою то́чностїю и҆ тща́нїемъ наблюда́ти, да бога́тый кто́ либо, и҆лѝ ᲂу҆че́ный, ѿ свѣ́тскагѡ слꙋже́нїѧ, ᲂу҆досто́иваемый є҆пі́скопомъ бы́ти, не пре́жде поставлѧ́етсѧ, ра́звѣ когда̀ соверши́тъ слꙋжє́нїѧ чтеца̀ и҆ дїа́кона, и҆ пресвѵ́тера, дабы̀ проходѧ̀ чрез̾ ка́ждꙋю сте́пень, а҆́ще досто́йнымъ призна́нъ бꙋ́детъ, мо́гъ взы́ти на высотꙋ̀ є҆пі́скопства. Ѻ҆чеви́дно же, что̀ длѧ ка́ждой сте́пени чи́на до́лжно бы́ть предоста́влено не сли́шкомъ ма́лое вре́мѧ, въ продолже́нїе кото́рагѡ моглѝ бы ᲂу҆смо́трены бы́ти є҆гѡ̀ вѣ́ра, благонра́вїе, постоѧ́нство и҆ кро́тость, и҆ ѻ҆́нъ, бы́въ при́знанъ досто́йнымъ бж҃е́ственнагѡ свѧще́нства, полꙋчи́лъ бы велича́йшꙋю че́сть. И҆́бо не прили́чно, дерзнове́нно и҆ легкомы́сленно пристꙋпа́ти къ томꙋ̀, что́бы поспѣ́шнѡ поставлѧ́ти и҆лѝ є҆пі́скопа, и҆лѝ пресвѵ́тера, и҆лѝ дїа́кона: и҆ ни зна́нїе, ни поведе́нїе не дае́тъ на сїѐ пра́ва. Поне́же такова́го по справедли́вости почлѝ бы весьма̀ но́вымъ, и҆ не ᲂу҆твержде́ннымъ, наипа́че, когда̀ и҆ блаже́ннѣйшїй а҆пⷭ҇лъ, кото́рый ᲂу҆чи́телемъ ꙗ҆зы́кѡвъ бы́лъ, ꙗ҆влѧ́етсѧ возбранѧ́ющимъ ско́рыѧ поставлє́нїѧ въ церкѡ́вныѧ сте́пени: поели́кꙋ дозна́нїе въ должа́йшее вре́мѧ достовѣ́рнѣе показа́ти мо́жетъ и҆ поведе́нїе и҆ нра́въ ка́ждагѡ. Реклѝ всѣ̀, ꙗ҆́кѡ и҆̀мъ сїѐ ᲂу҆го́дно, и҆ сегѡ̀ нарꙋша́ти ѿню́дь не до́лжно.

Пра́вило а҃і.

Е҆пі́скопъ, когда̀ ѿ є҆ди́нагѡ гра́да прехо́дитъ въ дрꙋгі́й гра́дъ, и҆лѝ ѿ є҆ди́ныѧ ѻ҆́бласти въ дрꙋгꙋ́ю ѻ҆́бласть, ра́ди тщесла́вїѧ подвиза́ѧсѧ ѡ҆ со́бственной похвалѣ̀ и҆лѝ ѡ҆ соверше́нїи бг҃ослꙋже́нїѧ съ вѧ́щшею ва́жностїю, и҆ хо́щетъ пребы́ти та́мѡ до́лгое вре́мѧ, тогда̀ ка́къ є҆пі́скопъ тогѡ̀ гра́да не и҆скꙋ́сенъ въ ᲂу҆че́нїи: да не пренебрега́етъ є҆гѡ̀ и҆ да не проповѣ́дꙋетъ ча́стѡ, тща́сѧ постыди́ти и҆ ᲂу҆ничижи́ти лицѐ мѣ́стнагѡ є҆пі́скопа. И҆́бо се́й предло́гъ ѻ҆быкнове́ннѡ произво́дитъ смѧтє́нїѧ, и҆ таково́ю хи́тростїю є҆пі́скопъ стара́етсѧ чꙋ́ждый престо́лъ себѣ̀ преѡбрꙋчи́ти и҆ восхи́тити, не коле́блѧсь ѡ҆ста́вити порꙋче́ннꙋю себѣ̀ це́рковь и҆ прейтѝ во и҆нꙋ́ю. И҆та́къ до́лжно на сїѐ ѡ҆предѣли́ти и҆звѣ́стное вре́мѧ: поели́кꙋ и҆ не принима́ти є҆пі́скопа показа́лось бы дѣ́ломъ не человѣколю́бнымъ и҆ жесто́кимъ. При се́мъ воспомѧни́те, что̀ въ предше́ствовавшее вре́мѧ ѻ҆тцы̀ на́ши ѡ҆предѣли́ли: а҆́ще кто̀ мїрѧни́нъ, пребыва́ѧ во гра́дѣ, въ трѝ воскре́сные днѝ, въ продолже́нїе тре́хъ седми́цъ, не прїи́детъ въ собра́нїе, да бꙋ́детъ ᲂу҆дале́нъ ѿ ѻ҆бще́нїѧ церко́внагѡ. И҆та́къ а҆́ще сїѐ постано́влено ѡ҆ мїрѧ́нахъ, то не до́лжно, не прили́чно, и҆ не поле́зно є҆пі́скопꙋ, не и҆мѣ́ющемꙋ никако́й ва́жной нꙋ́жды и҆лѝ дѣ́ла трꙋ́днагѡ, ѡ҆ставлѧ́ти це́рковь свою̀ на вре́мѧ бо́лѣе продолжи́тельное, и҆ ѡ҆горча́ти ввѣ́ренный є҆мꙋ̀ наро́дъ. Всѣ̀ є҆пі́скопы реклѝ: и҆ сїѐ мнѣ́нїе весьма̀ прили́чно.

Пра́вило в҃і.

Нѣ́которые и҆з̾ бра́тїй и҆ соепі́скопѡвъ во гра́дахъ, въ кото́рые ѻ҆нѝ поставлѧ́ютсѧ во є҆пі́скопы, и҆мѣ́ютъ, пови́димомꙋ, ѻ҆́чень ма́лꙋю со́бственность и҆̀мъ принадлежа́щꙋю, а҆ въ дрꙋги́хъ мѣста́хъ стѧжа̑нїѧ вели̑кїѧ, и҆з̾ кото́рыхъ мо́гꙋтъ вспомоществова́ти бѣ̑днымъ. Полага́ю, что̀, є҆́стьли ѻ҆нѝ восхотѧ́тъ прїитѝ въ своѝ владѣ̑нїѧ, и҆ произвестѝ собра́нїе плодѡ́въ, то надлежи́тъ позво́лити и҆̀мъ сїѐ съ тѣ́мъ, что́бы ѻ҆нѝ трѝ воскре́сные днѝ, то́ є҆сть трѝ седми́цы пребыва́ли въ свои́хъ владѣ́нїѧхъ, но что́бы въ ближа́йшей це́ркви, въ кото́рой соверша́етъ слꙋ́жбꙋ пресвѵ́теръ, присꙋ́тствовали и҆ слꙋжи́ли, да не ꙗ҆вѧ́тсѧ ѡ҆стаю́щимисѧ без̾ церко́внагѡ бг҃ослꙋже́нїѧ, и҆ что́бы не ча́стѡ приходи́ли во гра́дъ, въ кото́ромъ є҆́сть є҆пі́скопъ. И҆́бо таковы́мъ ѻ҆́бразомъ и҆ со́бствєнныѧ и҆́хъ дѣла̀ не поте́рпѧтъ никако́гѡ вреда̀ ѿ и҆́хъ ѿсꙋ́тствїѧ, и҆ ѻ҆чеви́днѡ и҆збѣ́гнꙋтъ ѻ҆нѝ ѡ҆бвине́нїѧ въ го́рдости и҆ тщесла́вїи. Всѣ̀ є҆пі́скопы реклѝ: ᲂу҆го́дно и҆ сїѐ постановле́нїе.

Пра́вило г҃і.

Ѻ҆сі́й є҆пі́скопъ ре́къ: а҆́ще кто̀, дїа́конъ, и҆лѝ пресвѵ́теръ, и҆лѝ кто́ либо и҆з̾ приче́тникѡвъ бꙋ́детъ лише́нъ ѻ҆бще́нїѧ церко́внагѡ, и҆ прибѣ́гнетъ къ и҆но́мꙋ є҆пі́скопꙋ зна́ющемꙋ є҆го̀, зна́ющемꙋ и҆ то̀, что̀ ѻ҆́нъ свои́мъ є҆пі́скопомъ ᲂу҆дале́нъ ѿ ѻ҆бще́нїѧ: не подоба́етъ, съ ѻ҆би́дою длѧ є҆пі́скопа и҆ бра́та своегѡ̀, подава́ти є҆мꙋ̀ ѻ҆бще́нїе. А҆́ще же де́рзнетъ сїѐ сотвори́ти: да зна́етъ, что̀ подверга́етъ себѐ ѿвѣ́тꙋ пред̾ є҆пі́скопами, когда̀ ѻ҆нѝ соберꙋ́тсѧ.

Пра́вило д҃і.

А҆́ще ѡ҆брѧ́щетсѧ нѣ́кїй є҆пі́скопъ, скло́нный ко гнѣ́вꙋ [что̀ въ таково́мъ мꙋ́жѣ не должно̀ и҆мѣ́ти мѣ́ста], и҆ внеза́пнѡ бы́въ раздраже́нъ на пресвѵ́тера, и҆лѝ дїа́кона, восхо́щетъ и҆зри́нꙋти нѣ́коего и҆з̾ цр҃кви: подоба́етъ предохране́нїе ᲂу҆потреби́ти, да не то́тчасъ таковы́й бꙋ́детъ ѡ҆сꙋжда́емъ и҆ лиша́емъ ѻ҆бще́нїѧ. Всѣ̀ є҆пі́скопы реклѝ: и҆зверга́емый да и҆мѣ́етъ пра́во прибѣ́гнꙋти къ є҆пі́скопꙋ митропо́лїи тоѧ́ же ѻ҆́бласти. А҆́ще же є҆пі́скопа митропо́лїи нѣ́тъ на мѣ́стѣ, прибѣ́гнꙋти къ сосѣ́дственномꙋ є҆пі́скопꙋ и҆ проси́ти, да со тща́нїемъ и҆зслѣ́дꙋетсѧ дѣ́ло. И҆́бо не до́лжно загражда́ти слꙋ́ха ѿ просѧ́щихъ. А҆ є҆пі́скопъ ѻ҆́ный, пра́веднѡ и҆лѝ непра́веднѡ и҆зве́ргшїй такова́го, благодꙋ́шнѡ сноси́ти до́лженъ, да бꙋ́детъ и҆зслѣ́дованїе дѣ́ла, и҆ пригово́ръ є҆гѡ̀ и҆лѝ подтвержде́нъ бꙋ́детъ, и҆лѝ полꙋ́читъ и҆справле́нїе. По пре́жде не́жели тща́тельнѡ и҆ вѣ́рнѡ и҆зслѣ́дованы всѣ̀ ѡ҆бстоѧ́тєльства, ѿлꙋче́нный ѿ ѻ҆бще́нїѧ до разсмотрѣ́нїѧ дѣ́ла, не до́лженъ присвоѧ́ти себѣ̀ ѡ҆бще́нїѧ. А҆́ще же соше́дшесѧ нѣ́которые и҆з̾ кли́ра ᲂу҆ви́дѧтъ въ не́мъ пренебреже́нїе вла́сти и҆ надме́нность: то [поели́кꙋ не прили́чно попꙋска́ти ѻ҆би́дꙋ и҆лѝ непра́ведное порица́нїе] долженствꙋ́ютъ нѣ́сколькѡ сꙋро́выми и҆ тѧ́жкими слова́ми ѡ҆браща́ти є҆го̀ къ порѧ́дкꙋ, да соблюда́етсѧ поко́рность и҆ повинове́нїе повелѣва́ющемꙋ до́лжное. И҆́бо ка́къ є҆пі́скопъ ѡ҆бѧ́занъ ꙗ҆влѧ́ти подчинє́ннымъ и҆́скреннюю любо́вь и҆ расположе́нїе: таковы́мъ же ѻ҆́бразомъ, и҆ слꙋжа́щїе ѡ҆бѧ́заны непритво́рнѡ и҆сполнѧ́ти до́лгъ слꙋже́нїѧ є҆пі́скопамъ.

Пра́вило є҃і.

А҆́ще кото́рый є҆пі́скопъ, и҆з̾ и҆на́гѡ предѣ́ла чꙋжда́го слꙋжи́телѧ це́ркви восхо́щетъ поста́вити на какꙋ́ю либо сте́пень, без̾ соизволе́нїѧ є҆гѡ̀ є҆пі́скопа: то таково́е поставле́нїе да почита́етсѧ недѣйстви́тельнымъ и҆ нетве́рдымъ. А҆́ще же нѣ́которые сїѐ позво́лѧтъ себѣ̀: то ѿ бра́тїй и҆ соепі́скопѡвъ должны̀ бы́ти ᲂу҆вѣщава́емы, и҆ и҆справлѧ́емы. Реклѝ всѣ̀: и҆ сїѐ ѡ҆предѣле́нїе да бꙋ́детъ непоколеби́мо.

Пра́вило ѕ҃і.

А҆е́тїй є҆пі́скопъ ре́къ: не без̾извѣ́стно ва́мъ, какова̀ и҆ ско́ль вели́ка ѳессалонїкі́йскаѧ митропо́лїѧ. Ча́стѡ прихо́дѧтъ въ ѻ҆́нꙋю и҆з̾ и҆ны́хъ є҆па́рхїи пресвѵ́теры и҆ дїа́коны, и҆ недово́льствꙋѧсь кратковре́меннымъ пребыва́нїемъ ѡ҆стаю́тсѧ, и҆ всегда́шнее жи́тельство та́мѡ и҆мѣ́ютъ, и҆лѝ є҆два̀ по́слѣ весьма̀ до́лгагѡ вре́мени принꙋждены̀ быва́ютъ возбрати́тисѧ къ свои́мъ це́рквамъ. И҆ та́къ и҆ ѡ҆ си́хъ ѡ҆предѣле́нїю бы́ти до́лжно. Ѻ҆сі́й є҆пі́скопъ сказа́лъ: тѣ̀ ѡ҆предѣлє́нїѧ, какі́ѧ постано́влены ѿноси́тельнѡ є҆пі́скопѡвъ, да сохранѧ́ютсѧ и҆ ѿноси́тельнѡ си́хъ ли́цъ.

Пра́вило з҃і.

А҆́ще кото́рый є҆пі́скопъ, претерпѣ́въ наси́лїе, непра́веднѡ и҆зве́рженъ бꙋ́детъ, и҆лѝ за своѝ позна̑нїѧ, и҆лѝ за и҆сповѣ́данїе каѳолі́ческїѧ це́ркви, и҆лѝ за то̀, что̀ защища́лъ и҆́стинꙋ, и҆, и҆збѣга́ѧ ѻ҆па́сности, бꙋ́дꙋчи неви́ненъ и҆ ѡ҆бвине́нїю подве́рженъ, прїи́детъ во и҆ны́й гра́дъ: то заблагоразсꙋждено̀, да не возбранѧ́етсѧ є҆мꙋ̀ пребыва́ти та́мѡ, доко́лѣ не возврати́тсѧ, и҆лѝ возмо́жетъ ѡ҆брѣстѝ и҆збавле́нїе ѿ нанесе́нныѧ є҆мꙋ̀ ѻ҆би́ды. И҆́бо же́стоко и҆ весьма̀ тѧ́жко бы́ло бы не прїима́ти на́мъ претерпѣ́вшагѡ непра́ведное и҆згна́нїе: напро́тивъ тогѡ̀ съ ѻ҆со́беннымъ благорасположе́нїемъ и҆ дрꙋжелю́бїемъ до́лжно прїима́ти такова́го.

Пра́вило и҃і.

Гаѵде́нтїй є҆пі́скопъ ре́къ: зна́еши, бра́те а҆е́тїе, что̀ при поставле́нїи твое́мъ во є҆пі́скопа процвѣта́лъ ми́ръ. Дабы̀ не ѡ҆ста́лось нѣ́кїихъ слѣдѡ́въ разномы́слїѧ ѡ҆ слꙋжи́телѧхъ цр҃кви, бла́го бы́ти мни́тсѧ, и҆ поста́вленныхъ мꙋсе́емъ и҆ є҆ѵтѷхїа́номъ, поели́кꙋ въ ѻ҆́ныхъ никакі́ѧ вины̀ не ѡ҆брѣта́лось, всѣ́хъ прїима́ти.

Ѻ҆сі́й є҆пі́скопъ ре́къ: моеѧ̀ мѣ́рности мнѣ́нїе таково̀: поели́кꙋ долженствꙋ́емъ бы́ти миролюби́вы и҆ терпѣли́вы, и҆ дово́льное ко всѣ́мъ и҆мѣ́ти милосе́рдїе: то произведе́нныхъ ѻ҆дна́жды въ при́чтъ церко́вный нѣ́которыми бра́тїѧми на́шими, тогда̀ то́кмѡ не прїима́ти, когда̀ не восхотѧ́тъ возврати́тисѧ къ це́рквамъ, къ кото́рымъ наречены̀ бы́ли. Е҆ѵтѷхїа́нъ же да не присвоѧ́етъ себѣ̀ нижѐ и҆́мени є҆пі́скопа: нижѐ мꙋсе́й да не почита́етсѧ є҆пі́скопомъ. А҆́ще же ѻ҆бще́нїѧ въ чи́нѣ мїрѧ́нъ проси́ти бꙋ́дꙋтъ: въ се́мъ не до́лжно и҆̀мъ ѿка́зывати. Реклѝ всѣ̀: согла́сны.

Пра́вило ѳ҃і.

Гаѵде́нтїй є҆пі́скопъ ре́къ: сі́и спаси́тельныѧ и҆ благоразсꙋ́дныѧ постановлє́нїѧ, и҆ на́шемꙋ свѧще́нническомꙋ досто́инствꙋ прили̑чныѧ, и҆ ᲂу҆гѡ́дныѧ бг҃ꙋ и҆ человѣ́камъ, не возмо́гꙋтъ ᲂу҆держа́ти си́лы и҆ крѣ́пости своеѧ̀, а҆́ще произнесє́нныѧ рѣшє́нїѧ не бꙋ́дꙋтъ сопровождены̀ стра́хомъ. И҆́бо мы̀ и҆ са́ми зна́емъ, что̀ нерѣ́дкѡ по причи́нѣ безсты́дства немно́гихъ, бж҃е́ственное и҆ досточти́мое и҆́мѧ свѧще́нства подверга́лось пренебреже́нїю. И҆ та́къ, а҆́ще кто̀, въ проти́вность при́знанномꙋ всѣ́ми, де́рзнетъ что́ либо и҆но́е твори́ти, стара́ѧсь ᲂу҆гожда́ти го́рдости и҆ тщесла́вїю па́че, не́жели бг҃ꙋ: то́тъ да зна́етъ ᲂу҆жѐ, что̀ ѻ҆́нъ поставлѧ́етъ себѧ̀ пови́ннымъ сꙋде́бномꙋ ѿвѣ́тꙋ, и҆ терѧ́етъ че́сть и҆ досто́инство є҆пі́скопа. Всѣ̀ ѿвѣща́ли: сїѐ мнѣ́нїе прили́чно, и҆ на́мъ ᲂу҆го́дно.

Пра́вило к҃.

Сїе́ же наипа́че до́знано и҆ и҆спо́лнено бꙋ́детъ таковы́мъ ѻ҆́бразомъ: є҆́стьли ка́ждый и҆з̾ на́съ, поста́вленныхъ є҆пі́скопами на припꙋ́тїѧхъ, и҆лѝ на пꙋтѧ́хъ во́дныхъ, ᲂу҆ви́дѣвъ є҆пі́скопа, вопроша́ти бꙋ́детъ ѡ҆ причи́нѣ мимоше́ствїѧ, и҆ кꙋда̀ направлѧ́етъ ѻ҆́нъ пꙋ́ть. И҆ а҆́ще ᲂу҆вѣ́даетъ, что̀ ѻ҆́нъ ше́ствꙋетъ въ во́инскїй ста́нъ: то да вопро́ситъ по разрѧ́дамъ вы́ше постано́влєннымъ. И҆ а҆́ще и҆́детъ бꙋ́дꙋчи зва́нъ: то и҆дꙋ́щемꙋ є҆мꙋ̀ никако́гѡ препѧ́тствїѧ да не бꙋ́детъ. А҆́ще же, по тщесла́вїю, ка́къ пре́жде рече́но любвѝ ва́шей, и҆лѝ по про́сьбамъ нѣ́которыхъ, поспѣша́етъ въ во́инскїй ста́нъ: то ни на гра́матахъ є҆гѡ̀ да подпи́шетъ, нижѐ да соѡбща́етсѧ съ таковы́мъ. Всѣ̀ ѿвѣ́тствовали: да бꙋ́детъ ѡ҆предѣлено̀ и҆ сїѐ.