Канѡ̑ны, си́рѣчь кни́га пра́вилъ/Пра̑вила лаодікі́йскагѡ собо́ра

Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Пра̑вила свѧта́гѡ помѣ́стнагѡ собо́ра лаодікі́йскагѡ.

Пра́вило а҃.

Свобо́днѡ и҆ зако́ннѡ соедини́вшымсѧ вторы́мъ бра́комъ, а҆ не та́йнѡ совокꙋпи́вшымсѧ, по проше́ствїи непродолжи́тельнагѡ вре́мени, и҆ по ᲂу҆пражне́нїи въ моли́твахъ и҆ постѣ̀, до́лжно, по снисхожде́нїю, дарова́ти ѻ҆бще́нїе.

Пра́вило в҃.

Впа́дающихъ въ разли́чныѧ согрѣшє́нїѧ, и҆ пребыва́ющихъ въ моли́твѣ, и҆сповѣ́данїи и҆ покаѧ́нїи, и҆ ѿ ѕлы́хъ дѣ́лъ соверше́ннѡ ѡ҆браща́ющихсѧ, по́слѣ тогѡ̀ ка́къ по мѣ́рѣ согрѣше́нїѧ дано̀ и҆̀мъ вре́мѧ покаѧ́нїѧ, ра́ди милосе́рдїѧ и҆ бла́гости бж҃їей, вводи́ти въ ѻ҆бще́нїе.

Пра́вило г҃.

Неда́внѡ креще́нныхъ не подоба́етъ производи́ти въ чи́нъ свѧще́нническїй.

Пра́вило д҃.

Посвѧще́нные не должны̀ дава́ти въ ро́стъ и҆ взима́ти ли́хвꙋ, и҆ та́къ называ́ємыѧ и҆мїо́лїи, то́ є҆сть, полови́нный ро́стъ.

Пра́вило є҃.

И҆збра́нїе въ церкѡ́вныѧ сте́пєни не должно̀ бы́ти въ присꙋ́тствїи слꙋ́шающихъ.

Пра́вило ѕ҃.

Не попꙋска́ти є҆ретїка́мъ, коснѣ́ющымъ въ є҆́реси, входи́ти въ до́мъ бж҃їй.

Пра́вило з҃.

Ѡ҆браща́ющихсѧ ѿ є҆́ресей, то́ є҆сть, новатїа́нъ, и҆лѝ фѡтїнїа́нъ, и҆лѝ четыренадесѧ́тникѡвъ, ка́къ ѡ҆глаше́нныхъ, та́къ и҆ вѣ́рныхъ по и҆́хъ мнѣ́нїю, прїима́ти не пре́жде, ка́къ проклѧнꙋ́тъ всѧ́кꙋю є҆́ресь, ѻ҆со́беннѡ же тꙋ̀, въ кото́рой ѻ҆нѝ находи́лись: и҆ тогда̀ ᲂу҆жѐ глаго́лемые ᲂу҆ ни́хъ вѣ́рные, по и҆зꙋче́нїи сѷмво́ла вѣ́ры, да бꙋ́дꙋтъ пома́заны свѧты́мъ мѵ́ромъ, и҆ та́кѡ причаща́ютсѧ свѧты́хъ та̑инъ.

Пра́вило и҃.

Ѡ҆браща́ющихсѧ ѿ є҆́реси та́къ называ́емыхъ фрѵ́гѡвъ, хотѧ́ бы находи́лись въ мни́момъ ᲂу҆ ни́хъ кли́рѣ, и҆ велича́йшими и҆менова́лись, со всѧ́кимъ тща́нїемъ ѡ҆глаша́ти и҆ крести́ти є҆пі́скопамъ и҆ пресвѵ́терамъ це́ркви.

Пра́вило ѳ҃.

На кла́дбища всѧ́кихъ є҆ретїкѡ́въ, и҆лѝ въ та́къ и҆мєнꙋ́емыѧ ᲂу҆ ни́хъ мꙋ́ченичєскїѧ мѣста̀, да не бꙋ́детъ позво́лено церкѡ́внымъ ходи́ти длѧ моли́твы, и҆лѝ длѧ врачева́нїѧ. А҆ ходѧ́щымъ, а҆́ще сꙋ́ть вѣ́рные, бы́ти лише́нными ѻ҆бще́нїѧ церко́внагѡ на нѣ́кое вре́мѧ. Ка́ющихсѧ же и҆ и҆сповѣ́дающихъ, ꙗ҆́кѡ согрѣши́ли, прїима́ти въ ѻ҆бще́нїе.

Пра́вило і҃.

Не до́лжно церкѡ́внымъ, без̾ разбо́ра, совокꙋплѧ́ти дѣте́й свои́хъ бра́чнымъ сою́зомъ съ є҆ретїка́ми.

Пра́вило а҃і.

Не до́лжно поставлѧ́ти въ це́ркви та́къ и҆менꙋ́ємыѧ пресвѵ́терїды (ста̑рицы), и҆лѝ предсѣда́тєльницы.

Пра́вило в҃і.

Е҆пі́скопѡвъ, по сꙋдꙋ̀ митрополі́тѡвъ и҆ ѻ҆кре́стныхъ є҆пі́скопѡвъ, поставлѧ́ти на церко́вное нача́льство, и҆ прито́мъ таки́хъ, кото́рые съ да́внѧгѡ вре́мени и҆спы́таны и҆ въ сло́вѣ вѣ́ры, и҆ въ житїѝ соѻбра́зномъ пра́вомꙋ сло́вꙋ.

Пра́вило г҃і.

Да не бꙋ́детъ позволѧ́емо сбо́рищꙋ наро́да, и҆збира́ти и҆мѣ́ющихъ произвести́сѧ во свѧще́нство.

Пра́вило д҃і.

Въ пра́здникъ па́схи не посыла́ти свѧты́хъ та̑инъ въ и҆ны́е прихо́ды, въ ви́дѣ благослове́нїѧ.

Пра́вило є҃і.

Кромѣ̀ пѣвцє́въ, состоѧ́щихъ въ кли́рѣ, на а҆мвѡ́нъ входѧ́щихъ и҆ по кни́гѣ пою́щихъ, не до́лжно и҆ны́мъ нѣ́котѡрымъ пѣ́ти въ це́ркви.По и҆з̾ѧсне́нїю валсамѡ́на, пра́вило сїѐ запреща́етъ мїрѧ́намъ то́лькѡ восходи́ть на а҆мвѡ́нъ и҆ предначина́ть пѣ́нїе.

Пра́вило ѕ҃і.

Въ сꙋббѡ́тꙋ чита́ти и҆ є҆ѵа́нгелїе съ дрꙋги́ми писа́нїѧми.

Пра́вило з҃і.

Не до́лжно въ церко́вныхъ собра́нїѧхъ ѱалмы̀ совокꙋплѧ́ти непреры́внѡ є҆ди́нъ къ дрꙋго́мꙋ, но чрез̾ промежꙋ́токъ по ѱалмѣ̀ бы́ти чте́нїю.

Пра́вило и҃і.

Е҆ди́но и҆ то́ежде слꙋже́нїе моли́твъ до́лженствꙋетъ бы́ти всегда̀, и҆ на девѧ́томъ часѣ̀ и҆ на вече́рни.

По и҆з̾ѧсне́нїю валсамѡ́на, сїѐ пра́вило пресѣка́етъ безпорѧ́дки нѣ́которыхъ, кото́рые на вече́рни ᲂу҆потреблѧ́ли, све́рхъ при́нѧтыхъ це́рковїю, и҆́ми сами́ми соста́влєнныѧ моли̑твы.

Пра́вило ѳ҃і.

Подоба́етъ во пе́рвыхъ, по бесѣ́дахъ є҆пі́скопскихъ, ѻ҆со́бѡ твори́ти моли́твꙋ ѡ҆б̾ ѡ҆глаше́нныхъ, а҆ по и҆зше́ствїи ѡ҆глаше́нныхъ, бы́ти моли́твѣ ѡ҆ ка́ющихсѧ: когда́ же и҆ сїѝ прїи́дꙋтъ под̾ рꙋ́кꙋ, и҆ ѿи́дꙋтъ, тогда̀ соверша́ти моли̑твы вѣ́рныхъ трѝ: є҆ди́нꙋ, то́ є҆сть пе́рвꙋю, въ молча́нїи, вторꙋ́ю же и҆ тре́тїю съ возглаше́нїемъ и҆сполнѧ́ти. Посе́мъ ᲂу҆жѐ ми́ръ подава́ти, и҆ когда̀ пресвѵ́теры дадꙋ́тъ ми́ръ є҆пі́скопꙋ, тогда̀ и҆ мїрѧ́намъ взаи́мнѡ ми́ръ подава́ти, и҆ та́кѡ соверша́ти свѧто́е приноше́нїе. И҆ є҆ди́нымъ то́кмѡ ѡ҆свѧщє́ннымъ позво́лено входи́ти въ ѻ҆лта́рь, и҆ та́мѡ прїѡбща́тисѧ.

Пра́вило к҃.

Не подоба́етъ дїа́конꙋ сидѣ́ти въ присꙋ́тствїи пресвѵ́тера, но съ повелѣ́нїемъ пресвѵ́тера сѣ́сти. Подо́бнѡ и҆ дїа́конамъ, и҆мѣ́ти че́сть ѿ ѵ҆подїа́конѡвъ и҆ ѿ всѣ́хъ приче́тникѡвъ.

Пра́вило к҃а.

Ѵ҆подїа́конамъ не подоба́етъ бы́ти на мѣ́стѣ дїа́конѡвъ, и҆ каса́тисѧ свѧще́нныхъ сосꙋ́дѡвъ.

Пра́вило к҃в.

Не до́лжно ни́зшемꙋ слꙋжи́телю церко́вномꙋ ѻ҆ра́рь носи́ти, ни двє́ри ѡ҆ставлѧ́ти.

Пра́вило к҃г.

Не до́лжно чтеца́мъ и҆лѝ пѣвца́мъ ѻ҆ра́рь носи́ти, и҆ та́кѡ чита́ти и҆ пѣ́ти.

Пра́вило к҃д.

Не подоба́етъ ѡ҆свѧще́нномꙋ лицꙋ̀, ѿ пресвѵ́тера до дїа́кона, и҆ пото́мъ комꙋ́ либо и҆з̾ церко́внагѡ чи́на, да́же до ѵ҆подїа́конѡвъ, и҆лѝ чтецє́въ, и҆лѝ пѣвцє́въ, и҆лѝ заклина́телей, и҆лѝ две́рникѡвъ, и҆лѝ и҆з̾ мона́шескагѡ чи́на, въ корче́мницꙋ входи́ти.

Пра́вило к҃є.

Не подоба́етъ ѵ҆подїа́конꙋ раздава́ти хлѣ́бъ, и҆лѝ благословлѧ́ти ча́шꙋ.

Пра́вило к҃ѕ.

Не произведє́ннымъ ѿ є҆пі́скопа, не до́лжно заклина́ти ни въ це́рквахъ, ни въ дома́хъ.

Пра́вило к҃з.

Не подоба́етъ ѡ҆свѧщє́ннымъ ли́цамъ, и҆лѝ приче́тникамъ, и҆лѝ мїрѧ́намъ, призыва́ємымъ на трапе́зꙋ любвѝ, ᲂу҆носи́ти ѿ неѧ̀ ча̑сти: и҆́бо си́мъ причинѧ́етсѧ ѡ҆скорбле́нїе церко́вномꙋ чи́нꙋ.

Пра́вило к҃и.

Не подоба́етъ въ хра́махъ гдⷭ҇нихъ и҆лѝ въ цр҃квахъ соверша́ти, та́къ и҆менꙋ́ємыѧ, трапє́зы любвѝ, и҆ въ до́мѣ бж҃їемъ ꙗ҆́сти, и҆ возлежа́нїе твори́ти.

Пра́вило к҃ѳ.

Не подоба́етъ хрїстїа́намъ і҆ꙋде́йствовати, и҆ въ сꙋббѡ́тꙋ пра́здновати, но дѣ́лати и҆̀мъ въ се́й де́нь: а҆ де́нь воскре́сный преимꙋ́щественнѡ пра́здновати, а҆́ще мо́гꙋтъ, ꙗ҆́кѡ хрїстїа́намъ. А҆́ще же ѡ҆брѧ́щꙋтсѧ і҆ꙋде́йствꙋющїе: да бꙋ́дꙋтъ а҆на́ѳема ѿ хрⷭ҇та̀.

Пра́вило л҃.

Не подоба́етъ ѡ҆свѧще́нномꙋ лицꙋ̀, и҆лѝ приче́тникꙋ, и҆лѝ мона́хꙋ, мы́тисѧ въ ба́нѣ съ же́нами, нижѐ всѧ́комꙋ хрїстїа́нинꙋ и҆лѝ мїрѧни́нꙋ: и҆́бо сїѐ є҆́сть пе́рвое ѡ҆бвине́нїе ѿ ꙗ҆зы́чникѡвъ.

Пра́вило л҃а.

Не подоба́етъ со всѧ́кимъ є҆ретїко́мъ заключа́ти бра́чный сою́зъ, и҆лѝ ѿдава́ти таковы̑мъ сынѡ́въ и҆лѝ дще́рей, но па́че бра́ти ѿ ни́хъ, а҆́ще ѡ҆бѣща́ютсѧ хрїстїа́нами бы́ти.

Пра́вило л҃в.

Не подоба́етъ ѿ є҆ретїкѡ́въ принима́ти благословє́нїѧ, кото́рыѧ сꙋ́ть сꙋеслѡ́вїѧ па́че, не́жели благословє́нїѧ.

Пра́вило л҃г.

Не подоба́етъ моли́тисѧ съ є҆ретїко́мъ, и҆лѝ ѿщепе́нцемъ.

Пра́вило л҃д.

Всѧ́комꙋ хрїстїани́нꙋ не подоба́етъ ѡ҆ставлѧ́ти мꙋ́ченикѡвъ хрⷭ҇то́выхъ, и҆ ѿходи́ти ко лжемꙋ́ченикамъ, кото́рые, то́ є҆сть, ᲂу҆ є҆ретїкѡ́въ нахо́дѧтсѧ, и҆лѝ са́ми є҆ретїка́ми бы́ли. И҆́бо сїѝ ᲂу҆далены̀ ѿ бг҃а: тогѡ̀ ра́ди прибѣга́ющїе къ ни́мъ да бꙋ́дꙋтъ под̾ клѧ́твою.

Пра́вило л҃є.

Не подоба́етъ хрїстїа́намъ ѡ҆ставлѧ́ти це́рковь бж҃їю, и҆ ѿходи́ти, и҆ а҆́гг҃лѡвъ и҆менова́ти, и҆ твори́ти собра̑нїѧ. Сїѐ ѿве́ржено. Тогѡ̀ ра́ди, а҆́ще кто̀ ѡ҆брѧ́щетсѧ ᲂу҆пражнѧ́ющимсѧ въ таково́мъ та́йномъ і҆дѡлослꙋже́нїи, да бꙋ́детъ а҆на́ѳема: поне́же ѡ҆ста́вилъ гдⷭ҇а на́шего і҆и҃са хрⷭ҇та̀, сн҃а бж҃їѧ, и҆ пристꙋпи́лъ къ і҆дѡлослꙋже́нїю.Ѡ҆сꙋжда́ютсѧ є҆ретїкѝ, не молѧ́щїесѧ бг҃ꙋ и҆ хрⷭ҇тꙋ̀, а҆ то́лькѡ а҆́гг҃ламъ, а҆́ки бы творца́мъ и҆ прави́телѧмъ мі́ра.

Пра́вило л҃ѕ.

Не подоба́етъ ѡ҆свѧщє́ннымъ и҆лѝ приче́тникамъ, бы́ти волше́бниками, и҆лѝ ѡ҆баѧ́телѧми, и҆лѝ числогада́телѧми, и҆лѝ а҆строло́гами, и҆лѝ дѣ́лати та́къ и҆менꙋ́ємыѧ предохрани́лища, котѡ́рыѧ сꙋ́ть ᲂу҆́зы дꙋ́шъ и҆́хъ. Носѧ́щихъ же ѻ҆́ныѧ повелѣ́ли мы̀ и҆зверга́ти и҆з̾ це́ркви.

Пра́вило л҃з.

Не до́лжно принима́ти пра́здничные да́ры, посыла́емые ѿ і҆ꙋде́євъ, и҆лѝ є҆ретїкѡ́въ, нижѐ пра́здновати съ ни́ми.

Пра́вило л҃и.

Не до́лжно принима́ти ѿ і҆ꙋде́євъ ѻ҆прѣсно́ки, и҆лѝ прїѡбща́тисѧ нече́стїѧмъ и҆́хъ.

Пра́вило л҃ѳ.

Не до́лжно пра́здновати съ ꙗ҆зы́чниками и҆ прїѡбща́тисѧ безбо́жїю и҆́хъ.

Пра́вило м҃.

Е҆пі́скопамъ, на собо́ръ призыва́емымъ, не подоба́етъ небрещѝ, но и҆тѝ и҆ вразꙋмлѧ́ти, и҆лѝ вразꙋмлѧ́тисѧ ко благоꙋстрое́нїю це́ркви, и҆ про́чагѡ. А҆́ще же пренебреже́тъ таковы́й, то са́мъ себѐ ѡ҆бвини́тъ: ра́звѣ а҆́ще по болѣ́зни ѡ҆ста́нетсѧ.

Пра́вило м҃а.

Ѡ҆свѧще́нномꙋ, и҆лѝ приче́тникꙋ не до́лжно пꙋтеше́ствовати без̾ пра́вильныѧ гра́маты ѿ є҆пі́скопа.

Пра́вило м҃в.

Ѡ҆свѧще́нномꙋ, и҆лѝ приче́тникꙋ не до́лжно пꙋтеше́ствовати без̾ повелѣ́нїѧ є҆пі́скопа.

Пра́вило м҃г.

Не подоба́етъ слꙋга́мъ церкѡ́внымъ и҆ на ма́лое вре́мѧ ѡ҆ставлѧ́ти двє́ри, дабы̀ въ молитвосло́вїи ᲂу҆пражнѧ́тисѧ.

Пра́вило м҃д.

Не подоба́етъ женѣ̀ въ ѻ҆лта́рь входи́ти.

Пра́вило м҃є.

По двꙋ́хъ седми́цахъ четыредесѧ́тницы, не до́лжно принима́ти къ креще́нїю.

Пра́вило сїѐ ѿно́ситсѧ къ креще́нїю во́зрастныхъ, кото́рое, по дре́внемꙋ ѻ҆бы́чаю, соверша́лось въ вели́кꙋю сꙋббѡ́тꙋ. Кто̀ снача́ла четыредесѧ́тницы, и҆лѝ по кра́йней мѣ́рѣ, въ тече́нїи двꙋ́хъ пе́рвыхъ недѣ́ль є҆ѧ̀, не и҆з̾ѧви́лъ рѣши́тельнагѡ жела́нїѧ принѧ́ть креще́нїе, и҆ не на́чалъ гото́витьсѧ: того̀ пра́вило не позволѧ́етъ принима́ть къ креще́нїю въ сїю̀ четыредесѧ́тницꙋ, а҆ ѡ҆жида́ть дальнѣ́йшагѡ ᲂу҆смотре́нїѧ є҆гѡ̀ ᲂу҆се́рдїѧ къ вѣ́рѣ.

Пра́вило м҃ѕ.

Креща́ємымъ до́лжно и҆зꙋча́ти вѣ́рꙋ, и҆ въ пѧ́тый де́нь седми́цы дава́ти ѿвѣ́тъ є҆пі́скопꙋ, и҆лѝ пресвѵ́терамъ.

Пра́вило м҃з.

Въ болѣ́зни прїѧ́вшымъ креще́нїе, и҆ пото́мъ полꙋчи́вшымъ здра́вїе, подоба́етъ и҆зꙋча́ти вѣ́рꙋ, и҆ познава́ти, ꙗ҆́кѡ бж҃е́ственнагѡ да́ра сподо́билисѧ.

Пра́вило м҃и.

Подоба́етъ просвѣща́ємымъ бы́ти помазꙋ́ємымъ пома́занїемъ небе́снымъ, и҆ бы́ти прича́стниками ца́рствїѧ бж҃їѧ.

Пра́вило м҃ѳ.

Не подоба́етъ въ четыредесѧ́тницꙋ приноси́ти свѧты́й хлѣ́бъ, ра́звѣ то́кмѡ въ сꙋббѡ́тꙋ, и҆ въ де́нь воскре́сный.То́ є҆сть: не должна̀ бы́ть по́лнаѧ лїтꙋргі́а. Но мо́жетъ бы́ть лїтꙋргі́а преждеѡсвѧще́нныхъ дарѡ́въ, по н҃в пра́вилꙋ шеста́гѡ вселе́нскагѡ собо́ра.

Пра́вило н҃.

Въ четверто́къ послѣ́днїѧ седми́цы четыредесѧ́тницы не подоба́етъ разрѣша́ти по́стъ, и҆ всю̀ четыредесѧ́тницꙋ безче́ствовати: но до́лжно во всю̀ четыредесѧ́тницꙋ пости́тисѧ съ сꙋхоѧде́нїемъ.

Пра́вило н҃а.

Не подоба́етъ въ четыредесѧ́тницꙋ днѝ рожде́нїѧ мꙋ́ченикѡвъ пра́здновати, но соверша́ти па́мѧть ст҃ы́хъ мꙋ́ченикѡвъ въ сꙋббѡ́ты и҆ въ днѝ воскре́сные.

Пра́вило н҃в.

Не подоба́етъ въ четыредесѧ́тницꙋ соверша́ти бра́ки, и҆лѝ пра́здновати днѝ рожде́нїѧ.

Пра́вило н҃г.

Не подоба́етъ хрїстїа́намъ, на бра́ки ходѧ́щымъ, скака́ти и҆лѝ плѧса́ти, но скро́мнѡ вечерѧ́ти и҆ ѡ҆бѣ́дати, ка́къ прили́чно хрїстїа́намъ.

Пра́вило н҃д.

Не подоба́етъ ѡ҆свѧщє́ннымъ, и҆лѝ приче́тникамъ зрѣ́ти позо́рищныѧ представлє́нїѧ на бра́кахъ и҆лѝ на пи́ршествахъ: но пре́жде вхожде́нїѧ позо́рищныхъ ли́цъ востава́ти и҆̀мъ и҆ ѿходи́ти.

Пра́вило н҃є.

Не подоба́етъ ѡ҆свѧщє́ннымъ, и҆лѝ приче́тникамъ, слага́ѧсѧ, дѣ́лати пи́ршєства, ни да́же мїрѧ́намъ.

Пра́вило н҃ѕ.

Не подоба́етъ пресвѵ́терамъ пре́жде вхо́да є҆пі́скопа входи́ти и҆ сидѣ́ти въ ѻ҆лтарѣ̀, но съ є҆пі́скопомъ входи́ти, кромѣ̀ слꙋ́чаѧ, когда̀ є҆пі́скопъ не́мощенъ и҆лѝ въ ѿсꙋ́тствїи.

Пра́вило н҃з.

Не подоба́етъ въ ма́лыхъ гра́дахъ и҆ се́лахъ поставлѧ́ти є҆пі́скопѡвъ, но перїоде́ѵтѡвъ: а҆ поста́влєннымъ ᲂу҆жѐ пре́жде, ничегѡ̀ не твори́ти без̾ во́ли є҆пі́скопа гра́да. Та́кожде и҆ пресвѵ́терамъ ничегѡ̀ не твори́ти без̾ во́ли є҆пі́скопа.

Пра́вило н҃и.

Не подоба́етъ є҆пі́скопамъ, и҆лѝ пресвѵ́терамъ, соверша́ти приноше́нїе въ дома́хъ.

Пра́вило н҃ѳ.

Не подоба́етъ въ це́ркви глаго́лати ѱалмы̀ не свѧще́нные, и҆лѝ кни̑ги не ѡ҆предѣлє́нныѧ пра́виломъ, но то́кмѡ въ пра́вилахъ ѡ҆зна́чєнныѧ кни́ги ве́тхагѡ и҆ но́вагѡ завѣ́та.

Пра́вило ѯ҃.

Чита́ти подоба́етъ кни́ги сїѝ, ве́тхагѡ завѣ́та: а҃, бытїѐ мі́ра. в҃, и҆схо́дъ и҆з̾ є҆гѵ́пта. г҃, леѵі́тъ. д҃, чи́сла. є҃, второзако́нїе. ѕ҃, і҆исꙋ́съ наѵи́нъ. з҃, сꙋдїѝ, рꙋ́ѳь. и҃, є҆сѳи́рь. ѳ҃, ца́рствъ пе́рваѧ и҆ втора́ѧ. і҃, ца́рствъ тре́тїѧ и҆ четве́ртаѧ. а҃і, паралїпо́менонъ пе́рваѧ и҆ втора́ѧ. в҃і, є҆́здры пе́рваѧ и҆ втора́ѧ. г҃і, кни́га ѱалмѡ́въ ста̀ пѧти́десѧти. д҃і, при̑тчи соломѡ́на. є҃і, є҆кклисїа́стъ. ѕ҃і, пѣ́снь пѣ́сней. з҃і, і҆́ѡвъ. и҃і, двана́десѧть проро́кѡвъ. ѳ҃і, и҆са́їа. к҃, і҆еремі́а, варꙋ́хъ, пла́чь и҆ посла́нїе. к҃а, і҆езекі́иль. к҃в, данїи́лъ. Но́вагѡ же завѣ́та, є҆ѵⷢ҇лїй четы́ре: ѿ матѳе́а, ѿ ма́рка, ѿ лꙋкѝ, ѿ і҆ѡа́нна, дѣѧ̑нїѧ а҆пⷭ҇льскїѧ, посла́нїй собо́рныхъ се́дмь сі́и: і҆а́кѡва є҆ди́но, петра̀ два̀, і҆ѡа́нна трѝ, і҆ꙋ́ды є҆ди́но: посла́нїй па́ѵловыхъ четырена́десѧть, къ ри́млѧнѡмъ є҆ди́но, къ корі́нѳѧнѡмъ два̀, къ гала́тѡмъ є҆ди́но, къ є҆фесе́ємъ є҆ди́но, къ фїлїпписі́ємъ є҆ди́но, къ колосса́ємъ є҆ди́но, къ солꙋ́нѧнѡмъ два̀, къ є҆вре́ємъ є҆ди́но, къ тїмоѳе́ю два̀, къ ті́тꙋ є҆ди́но, и҆ къ фїлимо́нꙋ є҆ди́но.