Идна батыр (Кедра Митрей)/2
| ← Нырысь ёзэз | Идна батыр Кыкетӥ ёзэз Автор: Кедра Митрей |
Куиньметӥ ёзэз → |
| Кылдытон дыр: 1924, поттэмын: 1924. |
Камаш. Поръёс вылэ ветлэммы токма ӧз лу. Асьме улоскы табере нырзэс уз поттылэ.
Домбо. Э-гм!.. Туж шумпотӥсько. Аслым салам бадӟым ваи.
Юсконой. Нош мар каромы на Идна батыртэк табере. Оло, солэсь татын ӧвӧлзэ шӧдыса, выльысь поръёс выламы ӝутскыса лыктозы.
Камаш. Малэсь но кышкам. Ойдо, ӵок, батыр, сьӧд нюлэсъёстӥ йыромыса, мед ветлоз. Калгоназ катьсэ быдтоз. Асьмелы люкетӥсь уз луы.
Домбо. Озьы угось! Солы ӧчкарыса гинэ мон улӥ. Монэ исамес каре вал. Али Домбо но батыре потӥз.
Камаш. Идна саюлаз асьмеды возиз. Со ке сьӧркын ветлыкуз чыртызэ бералтӥз, тӧро инты буш кыле. Туннэ ик асьмелэн батыръяськеммы луэ ни. Шӧдтэк Идна ке бертӥз, асьмеос кытчы пыром? Со йыр луоз. Тодӥсьяськонмы быроз.
Шамардан. Быриз йыры!.. Кытчы пыром, кинлы вералом!..
Камаш. Пересь нюня! Мар луиз?
Шамардан. Кошкы! Кошке сюрес вылысь! (Пегӟыны медэ. Сое куто.)
Юсконой. Ма дэй кӧтад пуксиз.
Шамардан. Лэзе, лэзе!..
Домбо. Вашкала пересьёсмы шат йырзэс кур каро?
Камаш. Паймытӥз…
Шамардан. Пегӟе, пиналъёс! Ӟечез уд адӟе. Кизилие васькиз, васькиз. Дауре пумаз вуиз, мыным ишан йӧтӥз…
Камаш. Номре но ум валаське, пересь.
Шамардан. Кысӥз удмуртъёслэн ӵашъем тылзы. Куасалскоз кужыммы… Э, шузимид тон, Шамардан, ас мӧйы аръёсад! (Пыдъёссэ лёгаса, аслэсьтыз йырсиоссэ кыска.) Озь кулэ мыным вӧтаса сылэме понна. Пересьёс, пересьёс!.. Сыл, тӧлпери! Бурд вылад пуктыса лобӟыты!.. (Ишкалске но пегӟе. Гудырскем куара кылӥське.)
Домбо. Ыр-рр!.. Пиньёсы ик… огзы борды огзы уг йӧтыло ни… Дэрем улам йӧ куштыса кадь кельтӥз.
Блат. Ма урмон шедем та пересьмылы? Монэ лёгаса сямен урдсытӥм кошкиз.
Юсконой. Ачиз тодэ луоз. Солэн визьмаз уд пыр.
Камаш. Вумурт сое кышкатэм.
Блат. Дуннеын ӟечез улон быриз. Идна батыр, оло, ышиз, лэся.
Камаш. Со понна сюлмыд-а шуг?
Чола. Мынам сюлмы пут пилиське ини. Гажан эльёсы! Кема кузпалы мынам сьӧрлон ветлэ. Олокыӵе шуг азьёсы со шедьылэ. Та дырозь иворзэ ӧз на вутты. Пиез но туж мӧзмыса улэ. Юрттэ вал кузпалме утчаны. Батыр — быдэс удмурт калык понна сюлмаськись адями. Пумитаз мыныса, сое тушмон улысь поттоды.
Камаш. Мыльымон калыке мынам ӧвӧл. Идна батыр быремын ке но, коӵо-куака лысьӧмзэ ваёз.
Чола. Эк-ке кек!.. Кинлы куректонме вералом! Та гудыръясь гудыри но кытысь, ма интыысь куаразэ сётэ медам. Витёнтэм шорысь Иднаелэсь шат мылкыдзэ вуттэ. Удъёс ке батырез вунэтӥзы, поръёс-а юрттозы?
Кушья. Эн бӧрды, Чола кенаке! Эльёс ке батырзэс куштӥзы, мӧйы Кушья тӧролэсь ӟеч ужъёссэ уг вунэты. Вань пиналъёсы мынам. Юмалэсь на соос. Векчи, няркыт кужымзэс батырлы сётны дась уло. Мыном, кенаке. Чурыт мылкыдо, лекен малпась муртэз, оло, тол гудыри но шуккоз.
Ожмег. Сылэ на ӧжыт, кышноос! Батыр сярысь малпаськон дыр вуэмын. Зэм ик Идналы тушмонъёс сюрессэ пытсамен бертыны уг быгаты, луоз. Калыкез бордаз ичи, сюресэз кузь, тодмонтэм сюрес.
Эжбай. Юрттоно, юрттоно, эшъёс.
Блат. Иське, мон но дасясько мынны.
Камаш. Идна батырез утчан кисырскем ноныез дыатонлы укшалоз. Идна ӧвӧл бере, музон выль но ӟеч тӧро возьыны быгатом.
Ожмег. Камаш! Куаретэмысь дугды!.. Уд ке дугдӥськы, йырдэ пилё! Валасько мон ӟичыяськемдэ. Астэ тӧро лыдъяны ымыд вазе. Кин тонэ бырйиз, кин тонэ быръёз? Поръёсты удмурт калык вылэ узатыса возид. Ожмаськон дыр вуса, Тӧрогуртэ, ож дорысь кыдёке палэнскид. Шымырскем сюлад визь-ноддэ тыр. Туж тупалоз.
Камаш. Мон… мон, Ожмег батыр, тыныд умой мед луоз шуисько вал. Быдэс уд выжымы тонэ яратэ. Туннэ ик тонэ батыре быръёзы. Мон тынад юрттӥсед лусал. Идна ке вуоно, кытчы мон кариськом. Тӧрогуртэ но пыраны уз лэзьылэ.
Ожмег. Ма сыӵе мултэс силёен вераськод. Мыном, эльёс, батырмес утчалом.
Эжбай. Шудтэм кылид, уд калыке! Сюр-вай улэмед вайяськиз (кошке).
Блат. Уд выжылэсь тузкем муртъёс! Кызьы музъем чида на. (Эжбаез уйса мынэ, собере ӵош вераськыса кошко.)
Домбо. Ма шуод на табере?
Камаш. Мон сое ик витисько вал. Ойдо мед пазяськозы. Асьмелы буш кылёз.
Шамардан. Чилясь тыл! Гудыри мумы чилясь тылзэ возьматэ. Дыраз удмуртъёс ужатозы чилясь тылэз… Ой, йыры! Пороми ни бергаса! Ӵашъем тылы, чилясь тылы! Огез кысӥз, кыктэтӥез ӝуаз. Кутэ, кутэ, удмуртъёс, чилясь тылэз! Со бордысь тӥляд шудды потоз. Инметӥ лобаны бурд шедьтэ! Сотэк шудды убир интыын улоз. Чилясь тыл, ӵашъем тыл!!! (Бызьса кошке.)
Ожмег. Тодмантэм нюлэсъёс шоретӥ олокинлэн вашкала аръёсын ӵогылэм сюресъёсыз кузя ветлӥськом. Пӧртэм-пӧртэм шуръёс музъем ымнырез, писпу выжыосты гылтыса бызё.
Эжбай. Калыкмес сьӧрамы курадӟытыса нуллӥськом. Куке шедьтом-а меда батырмес?
Ожмег. Та дырозь бадӟым тыос вылтӥ уясь ӵӧжъёсын, сикъёстӥ лобась сялаосын но луд кечен кӧтмес тырса улӥм. Сиён понна азьпалан но ум ёрме кадь потэ. Удмурт калыкмылэсь люкиським. Соиз гинэ малпаськонэ вуттэ.
Эжбай. Тазьы лыдтэм шуръёсты выжаса ветлэммы, нимзэс валантэм писпуос пӧлтӥ пыр потаммылэн шумпотонэз но луысал вал, Идна батырен ке пумиськысалмы.
Ожмег. Батырен пумиськытозь ветломы. Баблес йырсиосы пурысьтаны кутскытозь но батырез утчало, пыдъюме гинэ мед чидалоз. Нош иськавынъёсмы та сярысь кызьы малпало? Сьӧрамы лыктэм калыкмы осконтэмесь ӧвӧл кадь потэ.
Эжбай. Мынам сямен ужмес пумаз вуттоно.
Забир. Сьӧрамы ваем калыкмы одӥгтэм батыр понна сюлмасько: кереттэк, кыл-куара поттытэк, уродзэ но, ӟечсэ но чидалозы шуса, оскисько.
Кушья. Э, быдӟым кудоосы, сюлмы шугомыса улэ ук! Малы меда мон дуно кенакетэк кыли. Уг чидаськы ук, уг чидаськы таӵе куректонэлы!
Эжбай. Ма карод на бен, туклячие! Инвулэн, вылды, сыӵе косэмез луэ.
Кушья. Озь ке озь но, малы медам чик сьӧлыктэм нунылэсь йырзэ быдтӥзы. Мон азям ик порлэн пукыӵысь лэзем черсэз со нунылэсь сюлэмзэ портыса потӥз ук. Со шукыресэз адӟыса, кызьы меда пыд йылам сылыны ворми на! Со интые монэ, пересь муртэз, мед мекалтозы вал. Вож-вож уд быриз, ӵужектэм пересь кылиз… Эк, куректӥсько ук!
Забир. Мазэ тодод сыӵе ужлэсь. Пересьёс доры вазь кошкыса, асьмелэсь шудогем со луоз.
Кушья. Чола кенак, шӧтэм куараен кеськыса, някырскем нунызэ юн-юн гадь мурыосаз ӟыгыртӥз, соку ик синкылиосыз шурен киськыны ӧдъязы. Отчы ик бен ассэ но Чолаез поръёс котыртӥзы.
Ожмег. Шудэдлэсь вамен уд выж. Со быдӟа, вылды, вашкала пересьёсмылэн батыр пилы улны косэмзы вал. Ки улысь Чолаез поръёслы сётэммы понна батыр асьмелы тау уз шуы, дыр.
Эжбай. Бен со гинэ поръёс кие ӧз кыль ук. Кӧня эшъёсмы жуммыса погразы, коранэ шедизы. Асьмелэн мӧзмеммы паймымон. Котрак котыртэмын вал асьмеос.
Нюлэсысь куара. Удмуртъёс!.. Эльёс!.. Дась луэ!.. Дась улэ!.. Дасяське-э!!
Ожмег. Мар луиз?!
Эжбай. Умойтэм та уж.
Забир. Шӧтэм кесяське.
Куара. Татчы лыктэлэ!.. мон пала-а!
Кушья. Ой, сюлмы тэтча!.. Нош лэся поръёс.
Ожмег. Учкыны ветлы, Забир выны.
Забир. Сьӧрам, иськавынъёсы! (Кивалтос кутэ, бызьса кошке. Со бӧрсьы дасо мурт мынэ.)
Ожмег. Котрам люкаське, пиналъёс! Возьматэ кужымдэс, син улысьтыды кенердэс эн ыштылэ.
Куара. Татчы, татчы! Дора-ам!
Куараос (котькуд ласянь). Эн сётске! Зол возьке!
Кушья. Ку медам та ожлэн пумыз-йылыз вуоз?
Эжбай. Кин сюлмо, пиналъёс! Сьӧрам! (Кошке, юн дыртыса; тросэз бӧрсяз бызе.)
Ожмег. Нюлэскась калык ожтэк уг ул. Быремед ке уг пот, эн аналскы.
Куараос. Батыр, батыр!.. Идна батыр! Ӟеч лу! Шудбур ваись, шудбур сётӥсь!
Ожмег. Э, инмаре куазе, мае кылӥсько.
Куараос. Улэп на батырмы! Сӥ-бурмы бордамы улэ!
Ожмег. Чырткем-а, Идна тӧро!
Идна. Туж умой, эшъёсы!
Куараос. Удмурт калык нош батыр, кужмо!
Идна. Гажан калык, мусо выжые! Татын пумиськемез ку тодод вал. Уйвӧтын но тае уд адӟылы. Монтэк Тӧрогуртын, уд выжы музъем вылын улэмдэс бӧрысь юало. Аслэсьтым мукет калык пӧлтӥ бергамме мадё.
Куараос. Вера, вера я, — кылэммы потэ.
Идна. Ожмаськыса поръёсты вормем бере, тӥледын люкиськыса, ас бордам кутэм муртъёсыным Кам кузя паськыт пыжъёс вылын ми нуназе пала васькимы. Кема сьӧд нюлэсъёс пӧлтӥ пӧйшураса ветлӥмы. Собере шимес лудъёс вылэ потӥмы. Син сузёнтэм паськыт, ӵошкыт шаеръёсы вуим. Соку чорыгаса кӧтмес тырылӥм. Куке-соку дырыз вуиз, пӧртэм-пӧртэм выжы калыкъёсын пумиськылӥм. Отын но татын пӧйшураса люкам куосмес вошъямы. Табере асьмелэн вуз котырен вошъяськон азьпалан. Адӟылымтэ ушъямон тӥрлыкъёсты адӟимы, сьӧрамы но басьтӥмы. Со вылысен улэммес тупатом, поръёсты но азьпалтыса, кыдёке ортчом.
Кушья. Э, гыдыке-мусое, шӧдэ-а меда сюлмыд нуныедлэсь быремзэ.
Эжбай. Кытысь таӵе дӥсь шедьтӥд?
Идна. Дуно уг сылы та. Каньылэн, лякытэн тупатскыса воштэмын. Вить сёрку но дас гондыркуэн тырмытӥзы. Бордам ветлэм адямиосы пӧлам али дуриськыны дышемез но вань ини. Ю киземез учкылыса паймимы. Асьмелы но со туж тупа вылэм. Ичи гинэ ӟегез но сезьыез сяна асьмеос кизьылыны дышымтэ вал. Табере трос пумо кидысмы луоз. Со бордысь ужаны валалом.
Удмурт. Нош кӧня чебер буртчин ваиськом. Тани ма быдӟа кесэгез.
Ожмег. Кылонтэм ужъёс сярысь вераськод. Син адӟем бере осконо луэ.
Кушья. Синмаськи ни мон талы. Кыӵе гинэ таза киосын та куэмын, вылды. Мар интыын вешаса-нуныяса будэм нылъёслэн та ужамзы. Кытын ке отын таӵе чебер дӥсь но нулло ук майбыръёс.
Идна. Нош Тӧрогуртмы кызьы улэ? Уг-а выльдӥськы ожмаськон. Пиналъёс кызьы будо?
Кушья (ас понназ). Вералом-а, ум-а? Вералом-а?! Уг чидаськы!
Ожмег. Тӧрогуртэ Камаш кылиз. Асьмеос ӧвӧл дыръя со тӧрояське. Отчы Блатэз но мон кельтӥ. Блатлэн тонэ утчаны мынэмез потэ вал, кельтоно лась: Тӧрогуртэз но возьмась кужым кулэ. Удмурт карамы улэмез тодыны понна ас адямиосме мон отчы келяй; нуналысь нуналэ берлань вуэмзэс витисько.
Кушья. Верано, лэся… Кызьы бен вератэк.
Идна. Мае верамед потэ, туклячие?
Эжбай. Супыльтэ со.
Ожмег. Ми бордын, Идна батыр, тынад гажан кышноед но потэм вал.
Идна. Кытын бен со?
Эжбай. Чидатскы, тӧро.
Идна. Сюрес вылын кулӥз-а?
Ожмег. Со дырозь вуымтэ на, ӧз кулы со, ӧз но висьы…
Кушья. Поръёс талазы, батыре. (Бӧрдыны кутске.)
Идна. Поръёс?!. Кызьы озь?
Ожмег. Тонэ утчаса ветлонамы поръёс шоры вадьсаськимы. Ожмаськон куспын Чола кенак висъяськыны шедем.
Идна. Эн вера ни! Валасько ни табере. (Пограм кызьпу вылэ пуксе, йырзэ киосыныз кутэ, пельпумъёсыз сэзъялско.)
Эжбай. Мынам со мыдлань уже луэ, мынам возьманы быгатымтэе.
Кушья (бӧрдыса). Э, Чола кенаке, кытын меда тон!
Идна (султэ). Эн вузы, туклячи!.. Батыр сюлэмез секыт иворен тӥямысь дугдэлэ. Озьы ке луэмын, нош ик ожмаськонэ потомы. Мае возьмаса татын пукомы на. Бертоме, пиналъёс! Тӧрогуртын кужыммес ватсаса, поръёс вылэ мыном. Ойдолэ, вырӟом!
Удмурт. Али ик дась луо. Та буртчин кесэгъёсме гинэ бинё.
Идна (кесэгзэ кутса). Удмуртлэн ужез — ожмаськон луоз. Кыз, ньылпу буртчиндэ кесялоз, андан тӥрлэсь та вузэд удмурт мугорез уз возьма. (Кесэгзэ вылэ ӝутэ.) Мед сисьмоз та татын, нюр тыпу пӧлын! (Пыд улаз куштэ, лёга.) Дыртэлэ, пиналъёс! Мыном, мыном, мыном!!!
Ваньмыз (кесько). Мыном!!! (Котькытысь со куара кылӥське.)