Идна батыр (Кедра Митрей)/1
| Идна батыр Нырысь ёзэз Автор: Кедра Митрей |
Кыкетӥ ёзэз → |
| Кылдытон дыр: 1924, поттэмын: 1924. |
Шамардан. Шукырес юн та уй кизилиос ворекъязы, мынам сюлмам уно пӧртэм чурыт кылзэс понӥзы. Син шорам ин ас синзэ усьтылӥз. Кышкыт ӝуа инлэн синмыз! Э, тӥ, нимдэс верантэм пересьёсы, олома сэрен ас выжы калыкты вылэ вождэс ваиськоды? Кизилиен вераськыны валэктэм бере, асьтэлэсь вожваемдэс но тодэ вайытэ вал ук монэ. Гажано сикты писпу куар ӵаштыртэм пыртӥ тӥлесьтыд мылкыддэс сюлмам пыртэ. Паськыт инмысь бамъёсты пиштэ… Уй ортче, ӝоген шунды югытсэ возьматоз. Тодэме калыкелэсь пегӟе, ваньзэ ке али ик верай, вераме паймытоз, кышкатоз. (Шур кузя пыд куара кылӥське.) Вуэ ни кин ке пересьёслэсь мылкыдзэс юаны.
Идна-Батыр (лыктэ). Шулдыр шундыед мед ӝужалоз, Шамардан нюняе!
Шамардан. Шундыелэсь васькемзэ витён даурам вуисько ини. Арлыдме ачим но вунэтӥ. Дас муртлэсь вапумзэ улӥсько ини. Пинал аръёсам сюрес лёгам пытьыме ыштӥ. Сокем уно та дуннеын музъемез коласа ветлӥ. Уртэ, мылкыды табере инъёсын лобало, кизилиез лыдъяло, мертало.
Идна-Батыр. Мар бен верало ни тыныд соос? Ку ожмаськонмылэн пумыз вуоз?
Шамардан. Э, гыдыке, ворекъяло кизилиос, ворекъяло, трос секыт луонзэ верало. Калыклэн тӧроезлэсь куд-огзэ мон уг ват. Учкы тӥни со инмысь васькись кизили шоры… Со кузь быжо кизилиед, сизьым уй-нунал ин вамен выжаса, вашкала пересьёсмылэсь вожваемзэс возьматэ. Ку ожмаськон уж асьмелэн быроз шуса, юаськод. Тани та вож писпу куаръёс гинэ но ӵашето. Кылзӥськы верамзэс! Пересьёс вожзэс ваё — ожмаськондэс куштыса, пӧйшураны кутскиды шуо. Узырмонэз утчаськоды. Узырмон вадес вылады, удмуртъёс, Нукрат кам сьӧрысь тушмонъёс лыкто. Сьӧд пилем кадь соос. Сьӧд нюлэсэз сайкыса, Тӧрогурт доры сюрес выльдо.
Идна-Батыр. Дугды али, пересь! Нош малы медам нюлэс нюнямы тушмонъёсмы шоры тӧлпериоссэ уг лэзь?
Шамардан. Оло сюлмыд-а вакчи луиз, батыр?.. Ожмаськонэз пересьёс витё. Сотэк удмуртъёс азьтэмесь луизы. Чеберъяськыса гинэ, куспазы тупатэк, вожвылъяськыса улыны туртто. Тсс! Кин ке нош лыктэ.
Эжбай (вуэ). Татын ик вылэм. Мырдэм шедьтӥ. Умой-а, пересь!
Шамардан. Ӟеч лу, эке!
Идна-Батыр. Кыӵе мар бен, Эжбай, ужъёсмы мыно?
Эжбай. Ог дасо уй иземез ӧй адӟы на. Пужей сямен ворттылыса, арняен-арняен ивор нуллонам дырме ортчытӥ. Котькуд ласянь удмуртъёс люкасько, ваньзы огкадь дыртыса султо. Туж ичиез мылзы поттэк поръёс вылэ мынны вырӟо. Тӧрогуртэ вуэмез но вань ини. Тонэ адӟемзы потэ.
Идна-Батыр. Мон дась улӥсько. Иське, мын вера, ожмаськонэ потомы ни шуса. Кузь сюресмы асьмелэн. Азьло пересьёсмылы йыбыръялом.
Тушмонэз вормон понна вашкала пересьёслэсь улэмзэс тодэ ваёно.
Зол-а ӝуа на ӵашъем тылыд?
Шамардан. Сыӵе тыл трос сиён куре. Ляб ӝуаны ӧдъямез мыным ишан ваёз, асьме калыкмылэсь но улэмзэ шугомытоз…
Идна-Батыр. Пересь нюня! Сюлмы шуг мынам. Оло, нош ик-а сьӧрам нуоно пинал пиос ас мугоренызы сьӧсьёсты, кионъёсты сюдыны сюрозы. Мугор ик кепыр потэ.
Шамардан. Тӧро ке астэ шуиськод, тодыса ул: ожмаськон, тушмон калыкез вормон, адями сӥльвирез аслыз курбон куре. Тынэсьтыд но кизилидэ та кылем уй мон юн эскери. Туж зол со дырекъяз, кысэ-ӝуа, кысэ-ӝуа… (Сьӧрлось гумыен шудэм куара кылӥське.) Тӥни вирсэртэм ожлэн куараез пеле пыре, со ӟырдась сюлэмез эктытэ, омырез сэзъялтэ.
Идна-Батыр. Тон туж мӧйы адями, Шамардан. Та ож гумылэсь куаразэ кылыса, аилэсь верам кылъёссэ тодам ваисько. Зэм-а удмуртъёс Ватка шурлэн ныр йылаз улӥллям?
Шамардан. Отын асьме выжымы толон улӥз. Валлян нош Нукрат кам сьӧрын аръёссэ ортчытӥз. Солэсь но азьло асьме удмурт выжымы нуназе палан шуныт интыосын, вань камъёслэн огинэ зарезе васьконназы пудо вордыса улэмын. Мийым вал со. Мон понна нунал лыд даурен лыдъяське.
Идна-Батыр. Мынам поръёсты сяна нокинэ адӟылэме ӧвӧл на. Пересьёс ӟучъёсын ожмаськыны вуылӥллям, лэся. Кышкытэсь но, ӟичы кадь пӧяськисесь но вылӥллям соос. Озь кылэме вань верамзыя.
Шамардан. Мон ачим соос вылэ ожен ветлылӥ. Удмуртъёслы пегӟоно луиз вуж интыысь. Бадӟым мугоро, андан изьыен, корт жильыё дэрем дӥсяса оже соос пырало, зарни-азвесь вылазы кисьтаське, пукыӵ веньлэсь ыргон пулъёсын шобырско. Кужмо калык со. Корт гумыысь куара зын ӵын поттыса, мертчись узвесен пазяло. Соосын пумиськемлэсь возькылы.
Идна. Тон озьы ке но шуиськод, кӧты мынам уг чида. Одӥгзэ гинэ коть жильыё дэремзэс ки улэ шедьтоно. Со вылысен, оло, удмуртъёсмес но корт дӥсен дӥсяса нуллыны дышомы. Мылкыд вань дыръя, мукет уно пӧртэм калыкъёсын вуз сётонэз-басьянэз но выльдоно. Вузэн вошъяськон калыклэсь улонзэ капчиятэ.
Шамардан. Вормод ке пельпумад ӝутыны, уг алӥськы. Кӧтпушкыд гинэ андан кадь мед луоз, йырысьтыд визьдэ эн ышты.
Ожмег. Вуим дорад, тӧро.
Эжбай. Ваньмыз калыкмы люкаськизы ини.
Блат. Э, валъёсы мынам юсь кадь бызьыло.
Идна. Умой, эшъёсы. Вырӟом ини, гажан иськавынъёсы.
Шамардан. Чырткемесь на-а, пиналъёсы?
Трос кузя. Чырткемесь!.. туж таза!.. Ӟеч-бур, пересь нюня!
Домбо. Ачим верало, пересь. Чагыр ошпи мес кунян, бурыз пельыз палляназ! (Серекъя. Мукетъёсыз но, куд-огез кӧтурдэсъёссэс кутса серекъяло.)
Камаш (Домболы). Кытысь потӥд тон, ву шукы?
Домбо. Ма тӧроос ӧтем бере, кызьы уд поты.
Камаш. Ачид тӧро кариськы: косъяськемзэс витёно уз луы.
Блат. Визьмыз ке тырмысал, тӧро лусал.
Эжбай. Мышласянь али но со батыр; пельпумъёсыз ик ма пасьта — паймымон.
Идна. Я, кенешом, иськавынъёсы. Куазь югыт вуиз. Умой-а бадӟым тӥръёсты шеремын? Золэсь на-а пукыӵъёстылэн сюмысъёссы? Удмурт выжы калыклэн ӧвӧлтэ някырскемын кужымез?
Ожмег. Ожмаськон тӥрлыкмы туж ӝикыт.
Блат. Милям сюмысэз вал изнэс воштэ.
Юсконой. Кылскелэ, тӧроос. Тон но, Идна-батыр, верамме пеляд пон. Алигем гинэ Тӧрогуртэ поръёслэн азьветлӥсьёссы вуизы. Тӥледын вераськыны соос ыстэмын, шуо.
Идна. Ма тӧлъя асьме доры вуиллям соос? Мае витё?
Юсконой. Ожмаськемысь дугдэ ни, шуо, лэся, соос. Тӥни вуо ни асьсэос но.
Камаш. Э, мар кадь шӧтэмъёс лыкто!
Пор. Шунды ӝужам палан пӧйшураса улӥсь, таза уд калыклэн тӧроез! Музъем сюлэм шорын улӥсь пор калыклэсь тыныд кузьымзэ ваиськом. Та пичи саламмес тынад пыд азяд пуктӥськом.
Идна. Мар ужмуген тӥлед удмурт музъем вылэ вамыштоно луиз? Дуннелэн шораз улӥськом шуса батыръяськись поръёслы мар милем йыбыръяськон йӧтӥз?
Пор. Етӥз Майдан тӧромы, тӥлед салам лэзьыса, куспамы ожмаськонмес быдтомы ни шуса, курыны косӥз.
Ожмег. Кин вылады султэ вал! Асьтэос ожмаськонэн йыринтӥськоды.
Эжбай. Сыӵе ке небыт кылъёсты, кин поръёсты ми пала вырӟытӥз? Кылӥське, сьӧд пилем кадь ми выламы лыктӥськоды, сьӧд нюлэсэз сайкиськоды.
Домбо. Э-гм!.. Пазьгизы, лэся, пень кыл йылады! Пурӟем дуринчиос!
Идна. Ми уртче улыны турттӥськом. Кема чидамы. Нош малы поръёс выламы лыкто?
Пор. Батыр! Оло номре уд тодӥськы, оло тодыса астэ валантэме кариськод. Одӥг ар коть дугдылӥзы ни-а удъёс милемды быӵкемысь, шокчыны йӧскадь эрик уд сётылӥське.
Мукетыз пор. Кылзӥське ваньды, удмуртъёс! Ми туж бадӟым уж сярысь вераськыны дорады лыктӥмы. Милям музъем выламы олома шаеръёсысь бигеръёс вуизы. Арысь аре соос милемды пыдло нюлэсэ донго. Удъёс! люкаломе огинэ кужыммес. Куспамы люконмы ӧвӧл ни. Нюлэс пумтэм на, ваньмылы тырмоз. Огинын сайкомы, сузяломы, кулэ ке луиз, ю кизёмы.
Пор. Азьло ик мыноме ӵош, бигеръёслэсь асьме доры сюрессэс пытсаломе.
Идна. Дано куноосы! Ушъяно ужен тӥ лыктӥллям. Ваньмыз удмурт выжыослэн йыръёссы огкылысь ке кариськизы, оло, тӥляд верам кылдыя ужмес тупатыны быгатом.
Блат. Уртче улэмлэсь ма ӟеч вань. Туж ик ке но поръёслы йыры кур, тупан вадесэ вуоз дыр.
Ожмег. Оскалтом улыса.
Эжбай. Чидалом ӧжыт.
Камаш. Кыл сётэ мыным но вазьыны! Мон ас выжыеным поръёслы матын улӥсько. Мынам соослы сюлмы ӟырдаса улэ. Мынам ик пиналъёсы поръёсын туннэ но ожмасько. Нош кызьы медам тӧромылэн возьытэз ӧвӧл. Солы мон паймисько. Удъёс поръёсын одӥг нёжетӥ ноку но уз мынэ. Ваньзэ кужыммес али соос вылэ султытӥм. Уд дугдылэ, удмуртъёс, порен ожмаськемысь!
Чола. Мусо батыре! Учкы нуны пиед шоры. Ожмаськон уж ӟечсэ уз вай. Улэмез гинэ сюр-вай мынытэ. Уно мумытэм-айытэм нуныос кылемын. Бӧрдо соос, бӧрдо, трос курадӟонэз адӟо! Ож сое лэсьтэ. Шумпотыса, сюлэмзэ капчиятыса, чебер ымнырме, таза веськыт мугорме чагыр синъёсыныд учкиськод. Кузпалъёс, музьыос ожын бырыса, нылкышнолэн чебер ымнырыз кисырске, изэсь гурезь йыл кадь шакырес луэ, таза мугорыз губырске… Гажан удмуртъёсы! Ваньдылэн вань нылъёсты, кышноосты. Соосты тодады вае, собере гинэ ожмаськон сярысь вераське.
Пор. Тупаломы кадь потэ, батыр.
Мукетыз пор. Кык пумо калыклэсь пукыӵъёссэ ог кыретӥ лэзьыса, бигерез но пазьгытом.
Шамардан. Э-ке-кек!.. Кызьы медам ӝужась шундылэсь синды уг мальды? Кытчы сюлэм пуштэс тыриды? Тон но-а, Идна-батыр, тӧроысьтыд кышномурт интые пуксёд. Верам кылъёстэ кылыса, выремдэ адӟыса — солы лэсятӥсько… Озьы уз лу, удъёс! Синмам сялӟе, пиналъёс, мынам вераме ке зэме ӧз пыр. Туннэ асьтэ кужымен поръёслы бигерез вормыны юрттоды, ӵуказе поръёс тӥледыз согозы. Удлэн инмар куазез асьмелэсь Майданэн уртче кариськеммес уз чида. Вуж бубаос, вашкала пересьёс сылон интымес куашкатыса, вожваемзэс возьматозы.
Домбо. Зэм верад ук, пересь! Ӵемонам ик пыӵаз. Ы-гы-гы!.. Эктэме ик потэ.
Камаш. Нюлэс нюняез но вашкала пересьёсты адӟисе ваисько. Ку медам, кудӥз удмуртъёслэн батырзы пор калыкен уртче улон сярысь малпалляз. Оло, тон, Идна-батыр, соослэсь вылтӥе потӥд-а, кожаськод. Тодымтэ, валамтэ бигеръёсын ожмаськыны медыса, сюлэмдэ шат буйгатыны чакласькод. Поръёс йырдэ поромыто, пограмдэ витё. Мынам выжые тон вылад туннэ нуналысен юриськыны ӧдъялоз…
Пор. Батыр! Майданлэн кузьымез пыд азяд.
Мукетыз пор. Тынэсьтыд верам кылдэ витиськом.
Идна. Кылы мынам тӥлед чурыт луоз. Пересьёслэсь сямзэс куштэме уг луы. Эльёсылэн, кылсярысь, Камашлэн выжы калыкез каль но тӥледын ожмаськемысь дугдымтэ. Ми пала поръёсты кӧчыны ум лэзе. Бигер калык вылэ асьмелы ӵош ожен мынны сюресмы уг тупа. Кузьымдэс Майдандылы берлань нуэ — ми ум басьтӥське.
Пор. Та ке берло кылыд, ми но со нялтас вералом на. Кык ласянь поръёс шымыртэмын луозы. Сокем шуге-леке вуэм калык гондыр кужымзэ поттоз. Озьы ке — ожмаськом, быгатэмъя ӵабъялом. Берад аслыд йырдэ кормано медаз лу.
Чола (бӧрдэ). Чигиз сюлмы!.. чигиз сюлмы! чигиз пушкы!..
Шамардан. Сӥё-дано удмурт калыклэн зол ӝуа ӵашъем тылыз! Ворекъяло кизилиос, дырекъяло!
Нырысетӥ ёзлэн пумыз.