Ванине (2011)/7
[127]
| VII |
Зяро иля тапаря, зяро иля калавто, шкань анеявикс суресь чиезь чии сурот юткова. Сон сезневемат, кикендямот ды тапавомат а соды. Истя эрямоськак. Кие ёвтасы, зярдо ды мезестэ сон ушодовсь? Кинь превс сы, зярдо прядови? Кияк, покш превтнеяк, поптнеде башка, а соды. Те ансяк сынь тандавтнить-яволявтнить пень самосо. Вейкесь сакшны мельс, вейкесь виде: куломась поладови чачомасо, чачомсто чачи куломась.
Прок исяк Каргин Ванине тешкстакшнызе моросо, гайги вайгельсэ, эрьгела ёжосо чачома чинзэ, кавксоце классонь прядоманзо. Маряви чиде икеле, эскельдят — тосат. Вармакс сестэ ливтнесь «ковроня» мотоцикласонзо Кузвелень цитни сельме кудотнень икельга, тандавтнесь ютыцятнень ды кинть ланга лытыця саразтнэнь зэртьсэнзэ. Прок исяк те весе ульнесь, ютасть вана, теке мельцек-мельцек уиця пельть, ниле иеть. Мезть сындест, нилетнеде, кортамс? Эрямо пингензэ ломанесь эрясы — а редясы! Ниле кизэть ды зняронь туро телеть... Профессиянь максыця Эрьмезьвелень училищась, конань малава велень эрицятне умок лемдизь «трактористэнь школакс», аволь кувать [128] колхозонь паксятнесэ важодемась, армиясо погононь кандтнема иетне кадовсть удалов, теевсть ледстнемакс.
Кавто иеть якась «атьванень» кунсолозь, кавто иеть ярснесь ушманонь келей-домка соргавкссто. Пенгедезь шужонь кашадо, перловкадо, альмась байтяк. Кудов ве чискак эзизь нолдтне. Окойники прядовсь, кадык аволь свал, стройсэ, кармавтома вайгелень марязь, якамо шказо. Нолдызь. Чинь-вень ютазь чугункань кива ардтницясь ускизе станциянтень, косто саекшнызе урендямо-служамо. Тестэ Эрьмезьвелес ардсь сынст ёнов молиця стака машинасо. Ардсь, мезе абунгавтызе, асфальтсо валозь киява. Туемстэнзэ арасель. Тетянзо чачома велестэ сыргась ялго. Мезе неть колмо-ниле вайгельпетне истямо кива ушманонь канст марто ломанентень!
Комсь иеде икеле теке киванть эскелякшнось Каргин Ваня, Ванинень тетязо. Сон, прязонзо понгавтозь, кандокшнось эйдиненстэнь лавське. Арась, эзь кандово тензэ те кенярксто пешксе кансткесь, сонзэ таркас се талай кизэнь чистэнть совакшнось Дораень юртс аёвтавишка ризкс.
«Кода ней сынь тосо? Кода авам? Кода Алькань Нату? Мезе од, кодат од кулят велесэнть?» — шешксть ушманонть превсэ кевкстематне кудов ветиця, чинть каршо суликакс цитниця асфальтсо вельтязь киванть эскелязь. Кедень кемсэ. Эскели келейстэ, сиземань апак маря. Вайгельпе, омбоце... Пильгензэ путни кемевиксстэ. Кода эно лиякс — ушман, солдат! Теяк виде, аволь умок «кирнявтсь» комсь иензэ трокс. Панжовома шка!
Эзь юта часошкаяк, Ванине пачкодсь Кузвелень куншкасо, рацяня тополь ало колхозонь конторанть икелев. Кузтемпесэнзэ эземсэнть, редизе, кода икелеяк, качамо нильнесть, калякасть эсь ютковаст ниле-вете сыре цёраломанть. Кой-конатнень вакссо нувсесть «ялгаст» — мандонест. Икелест мадезь аштесь — учось мезеяк каить, — раужо-ашо пона пине. Малазост, теке басом, васолдо сыцясь эзь юта, капшась кудов. «Шумбрат, чачома веле! Ульть шумбра, тополь! Уледе шумбрат, истя содавикс кудот! Весе истя, кода ульнесь, теке эзинек явовкшнояк кавто иес!» — эль эзть либоркстне кельпрястонзо кенярксов, налксиця ёжомарямодонть валтнэ.
Вана чачома кудоськак! «То-топавтызе, вантаяк, авам умонь мелензэ — вельтявтызе чапонть лазсо... — тешкстызе, малав пачкодезь, кудов велявтыцясь. — А вана апак арто коняксозо аламнеде, маряви, чополгадсь. Содави, пиземетне-сувтне кавто иень перть [129] озадо эзть аште. Сень кис чачома пизэнь вальманзо ваныть икелекс валдосто, паронь арсезь, кода туемстэньгак».
Варминень зэхельденть аванзо озавтовт килеесь лыйкадсь тарадсонзо. Истя ашо рунго, кувака черь чувтось шумбракстнесь сыця-мурдыця од азоронзо марто.
...Куля абунгадсь: а сёрма самодонзо, а телеграмма — ды вант вана! Апак учо цёранзо самодо кецнемадонть цяк эзь аймельгадо. Чарькодик эрь, теке менельстэ прась! Стёжна рунго, келей лавтов, кепететсь сэрьскак. Вант, вант, мерят аволь цёразояк! Полавтовсь. А уш оршазь, оршазь кода мазыйстэ! Кителень повтне цитнезь цитнить, погонтнэ седеяк келейгавтыть лавтовонзо. Туекшнэсь цёрынекс, мурдась — алкуксонь, вийсэ эцезь маралякс!
— Вай, Ванине, вай, цёрынем! — вайкснезевсь авась, эль Ванине кенерсь мельганзо пекстамо кудо кенкшенть. Сон эскельдясь цёранзо каршо ды поводевсь кирьгазонзо. — Вай, цёрынем, вай, какинем, а содаваткак, касыть кода! Ну, прядовсть учнеман. Учовить-учовить. А кемевияк...
Азоравась талакадсь, эзь сода мезес кундамс, мезе теемс васняяк. Юты тей, юты — тов. Ве тевс авторды, омбоцес...
— О-оймак, оймак, авай, весе вадря. О-окойники кудосан, окойники вейсэ! Теке ко-ковгак эзинь тукшнояк — кудосонть мезеяк эзь полавтово, весе, ванан, таркаваст, — кайсемстэ, мейле кудованть весть-кавксть ютазь, мельга-мельцек путнесь валтнэнь сыцясь. — Те-теке он неян, казарматнеде мейле — кудосан.
— Ну, те паро, Ванине. Оймсят куш сындест, неть самай казарматнеде. Вейсэнь ярсамотнедеяк... Чистэ чис — некеть. Истя? Каня а налкставить? Оймсят. Ну, мейле уш вансынек. Пекеть вачсь? А содан мезде каванямскак. Содавлиньгак... Ужо, ужо алнэть куш рестан... Те а кувать!
— Ча-чапамо ловсодо, авай, ярсавлинь. Ули?
— Ули. Ну, кода эно? Тон озак, озак стувор экшс. Таркат эзик стувто? Мон нейке... — валонзо ёвтазь, авась эрязкалезь лиссь кудыкелев.
Лип шкань ютазь стуворонть лангс «састь» весе, мезть каштомсольть, якшамкайсэльть, вишказемсэльть.
— Ярсак, ярсак, Ванине! Кавто иеть пекеть эзик пештне кудонь ярсамкайсэ. Порть, — анелясь цёранзо Куля, вановтонзо эзизе сайне цёранзо эйстэ, вансь мелензэ.
— Па-пароль, авай, ярсамдо икеле нолдамс аламошка... — [130] марямга ёвтызе мелензэ васолдо сыцясь кедезэнзэ пенчень саемстэ.
— Мезе-мезе?! — полавтовсь вайгелезэ, сеске эзь чарькоде каваницясь мезде кортамось.
— Ме-мерян, сядошка граммат пароль копордамс, тешкстамс самом, — панжизе Ванине «нолдамс» валонть зэмензэ.
— Иля арсеяк. Ярсак оно! — казямо вайгельсэ путызе тарказонзо цёранзо. — Истят валт монень иля ёвтне!
— Ка-кадык эно истя, авай, — эзь кежиявто, муст-муст пеедезь мерсь аванзо каршо ды венстизе пенчензэ ваканонтень.
— Ней тонеть оймсема васняяк. Ну мейле уш вансынек. Ну тевтнеде, цёрам, кавто иень перть таштавсть... уф, а ёвтавияк. Тень витнема, тонань... Те эдь аволь кода ошсо, ну, тонсь содат, — потась аламнеде марязденть апарось, чамдсь потмонзо Куля, цёранзо каршо озадо аштезь ды лангозонзо кецнезь ванозь.
— Тейсынек, авай, весе тейсынек! Иля ме-мелявто, — мерсь ярсыцясь кургозонзо пешксе пенченть кандомсто. — Тантей я-ямось!
— Пирявксонть васняяк...
— Эряви, авай, монь койсэ, тешкстамс самом, серьгедемс кой-кинь, — апак учо полавтызе кортамо лувонть исень ушманось ярсамонзо прядозь, — «шлямс» эряви, кода кортыть... Чичав Палю ковгак эзь оргоде? Колхозсо?
Ванине нардызе аванзо максовт чевте нардамосо чаманзо, стясь чикорк-чикорк вальма юткс понгавтозь чавачамонть каршо ды зепстэнзэ таргазь сурсемнесэ судринзе валдо тюс, нурькинестэ, солдатокс наразь черензэ. Кончтась, чиремтинзе турванзо ды озась аванзо ваксс, голландка ёжос.
— Ну, кода а эряви, эряви, — апак капша, апак кавтолдо сась Куля ве мельс цёранзо марто. «Витнематнеде», «пирявкстонть» прок мерезьгак арасель, ютасть неть валтнэ Ванинень пилензэ вакска. — Инжеть тердема. Палюдо кевкстнят? Теске, ковгак эзь ёма, эзь сэста.
— Ва-васняяк тердьсынек сонзэ. Э-эно кода? Ялгам. Самай малавикс. А стувтомат Солаень Микань, Дунаень Шурикень, Пайчань Валерань, Индял Миколень, Важдаень Юрикень... Э-эно кода? Весе ми-минь ве пизэнь.
— Улезэ ютксонок иньават — авам. Улиндеряй кудосо, сазором Люба, ну и... — скимазь вайгельсэ ледстинзе Куля весемеде малавиксэнзэ лемест.
— Ну-у, истя улезэяк, кодат тердемат, — нулновтызе прянзо авазо.
Неть кортамотнеде мейле ават-цёрат ушодсть ледстнеме аволь ве иень перть велесэнть полавтовкстнэде: кие кулось, чачтась, урьвакстсь, явсь, тусь-сась... Ушодсть Верепестэ ды аламонь-аламонь, ледстнезь, прядызь эсь Пичепесэст; ютасть весе веленть ланга.
... Шканть таргсеме эзть карма. Куля весе дарманонзо-виензэ путсь — ютавтомс «чокшненть» келейстэ ды весень мельс туемга. «Ломанть ютавтнить — мекс монень а ютавтомс? Ну, мезе, каня мон лиятнеде берянян? Лавшан? Кажочисэ эрицян? Арась-арась, кортамот, келя, Куля зобня, тужо, цёлак, иляст лисе!» — кирдсь мельсэнзэ анокстамотнень перть. Рамась лавкасто зяро-бути «ашо» вина, стомась-пансь «палыцядонть» сонськак. Печкевтсь реве. Каршо чистэнть путсь чапакс. Валскестэнть стясь чоподава, мель путсь, кундась панеме прякат: чурькань-морковонь ды суронь ямкс марто пангонь... Панема истят, лекстят — чинедест пешкедят. Сёксь, утомонь-кавонь пештема шка. Секскак ули мезе путомс стувор лангс. Шкатнеяк полавтовсть. Аволь кода войнань ды мельганзо ирныця чаво пеке иетнестэ. Ули, ули ней мезде ожодемс тутманть, кольневтемс седеенть.
Аравтозь чиденть зярыя шкадо икеле, чокшнеланга, озасть ават-цёрат голландканть ёжос кинонь ваномо. Куля видькстась цёранстэнь:
— Арсян теть самот кувалма мезеяк каземс. Мезе — яла кавтолдан. Мон ар...
— Вадряль магнитофон, магнитола рамамс. Ламонь улить. Пароль... — икельдизе Ванине аванзо, телевизорстонть вановтонзо апак сае.
— Те таго мезе истямось? — стясь Куля цёранзо вакссто ды сонськак а соды мекс, ютась моргас.
— А-а содат? Мо-моли радио ёнов. Лангс ванозь. Сонзэ вельде сёрмадови морыцянть, кортыцянть вайгелезэ. Меремс, сёрмадсынек тонь вайгелеть — мейле кунсолок. Эсь кортамот кармат кунсоломо! Каня те а дюния?! Чарькодить? — ваныцясь матрызе «зоронть» вайгелензэ ды поладызе ёвтнеманзо мезе те истямось.
— Ды-ды эрьва ко-кодат улить. Сехте аламо... Ха! Таго реклама! — колавсь ваныцянть ёжозо, натой кежтнеде пси токизе, стявсь таркастонзо.
Марязь числадонть Куля лепштинзе турванзо.
— Ну, те ков истя... Теяк виде: оно, ранги икелеть — ахолдась авазо кедьсэнзэ кувтолдыця телевизоронть ёнов, — ули таштыне радиола, улить пластинкаткак... Паряк, кодамояк оршамопель раматано? А? Оршамс теть а мезе...
— Арась, авай. Монень магнитола эряви. Эйзэнзэ сёрмадан морот, кодат мелезэнь туить. Мейле кунсолок... Тонь кор-кортамоткак, вайгелеть сёрмадса, — эзь арсе потамо, аштесь эсь валонзо лангсо Ванине.
— Ну, а эсенек лавкасо улить? — нолдынзе ведьметнень «исень ушманонть» авазо.
— А-арасть. Ансяк Эрьмезьвелесэ. Ютан, варштаса. Паряк, седе изнявикс питнеяк кочкан... Ха! Таго, анамаз токавлизе, реклама! — Ванине машнетезь стясь, лепштизе лоткавтнема повненть ды лиссь ушов. Кудонть пештизе кашт.
Кулянь мелезэль рамамс цёранстэнь паро, раужо эли чопода-тюжа тюс костюм. Каня мазы — велеванть якамс лыткасо? Таштомсть, вишкалгадсть икеленсетне. Сонзэ коряс эзь лисе, стяко лажнось седеезэ. Мельстэнзэ штелькст кадовсть. Савсь рамамс те самай рангиця-морыця «налкшкенть». Рамасть, виде, шкань ютазь кой-мезе лангскак.
...Ават-цёрат арсесть ламо инжеть а серьгедемс. Тердемс весемеде малавикстнэнь. Кавтошка стуворт. Зяро превть эзть яжа, кода свал, «малавикстнэде» пурнавсть кавтошкань таркас зяро — цяк кельгсть кудонтень. Содавикст, эсь буень ломанть, каршо шабрат, вакссо эрицят... Сенень а ёвтат — ордады, тонань а серьгедьсак — покордави, мери, ломанькс а путыть. Веле. Тесэ весе малавикст. Ванинень армияв саемстэнзэ зняро арасельть. Те — сестэ. Эрямось, мерема, аламнеде лияталь.
...Васня кортамотне стувортнэнь экшсэ мольсть, кода свал эрси, састыне, вайгелень апак нолдтне, тертязь, куш аламнеде ды вейкень-вейкень кунсолозь. Омбоце, седеяк колмоце цяркадонть мейле сынь совасть вийс, кармасть «кирнявтнеме», кунсолыцятне аламолгадсть, сень кис байтяк муевсть ламодояк [133] ламонь содыцят... Шалттонть кудопотмось теевсь тандавтозь мекшень пувозокс. Седеяк пек истямокс марявсь ве ёндо, ушосто кунсолозь. Бизнэмась шкань-шкань сезневсь пилень киневтиця, таркань-таркань аволь ве лувсо морамосо. Тень лангс апак вано, эрьвась эсь мельсэнзэ морась весемеде парсте, весемеде мазыйстэ. Седе сеедьстэ гайгсть рузонь морот. Ловт, апак лотксе «бом-бом-бом...» онгсь-рангсь, куш пиле варязот нупонть эцек, рамазь магнитофонось.
Кой-кить цёратнеде кенерсть «псилгадомо». Секе тев лиснить кузтемпес экшендямо-таргамо. Кортнематне, чарькодеви, лавтовсо погон марто яксемань шкатнеде: кие-косо ютавтынзе, кодат кежеельть эли седеймарицяльть, симицяльть эли аволь ульнесть ушмодеест. Ванинеяк лиссь кортыцятнень юткс. Ушманокс улемадонзо ёвтнесь кедьсэнзэ ахолязь, пильге лангсо кирдевсь аволь кемевикстэ.
Ушосонть прок аволь сёкськак, лембе. Калярдыцятне кудос совамо а эрязкалить. Човсить-валакавтнить келест «оеннойкс» улема шкадост.
— Монь, монь уш-ушмодеем, монь взво-взводноем ульнесь — во! — мерсь Ванине пупорькшниця кельсэ ды невтизе вить кедень кепедезь-видемтезь пельканзо. — Мо-молоток, аволь прявт!
— М-хы! Те мезень кис истя шнат лейтенантот? — кие-бути каясь трокс вал.
— Аволь лей-лейтенант, тагояк мерян, — мо-молоток! Нежединь буль-бульдозерсэ. Ага. Со-содак текень: сокаряк ды со-сокаряк, теке максазей, модасонть. Чинь-чоп кшнинь зэ-зэрть потсо. Ага. Ты-тынсь со-содатадо, тевесь аволь шож-шождынетнеде. Тевем монь ко-кодамоль? Ков кучсамизь, тов молян. Со-содак вейке — устав, — «Кунсолан!»
Весть взводноенек мерсь па-панемс «тех-техникам» вейке, сонзэ меремга, «войнань объектс». Ага. Мон мезе? Мон — сол-солдат. Объект тык объект! Монень ко-кодамо тев? Пания «тех-никам» мерезь таркантень. Ага. Чоп мо-мода-а-сонть айгшинь. Чопоньпелев са-сась начальникем, ну взводноем, ко-кодамо-бути гражданской марто.
Кедьсэ ахолязь-невтнезь мерсть лоткавтомс «коймем». Лоткавтыя, лисинь-валгинь кабинастонть. Ага. Ва-валгинь. Мерсть: «Течис саты». Адя, келя, мар-мартонок. Мон мезе? Мон — ушман, солдат. «Кунсолан!» — рангстынь каршо. Сеске, кода мерезь, «мадстия» бульдозерэм ды дубор-дубор мельгаст. Ага.
[134] ...Ну-нурькинестэ, мезе ансяк, цёрат, сту-стуворонть лангсо арасель! Кирзовка ансяк арасель! Ха-ха-ха... — раказевсь ёвтницясь. — А уш винатне, а уш винатне! Ага. Рю-рюмкам чаво эзь кадново. Эно кода? Мон — солдат. Взводноем эйстэ эзинь лияле. Ага. Ну-нурькинестэ, теевинь нулакс. Тоско, «объектс», казармань таркас, удомояк кадымизь. Ага. Се каванямкась ульнесь, а стувтса, васенцекс. Мейле... Истят «об-объекттнэде» урендемам перть — ловомс сурон а сатыть. Эрьвасо кай-кайсесть кирьгава. Симть ле-лепиямозот. Вадря-я-ль взводноем. Ага. Службам — седеяк.
Ёвтницясь меельцекс кувакасто таргизе оймензэ, ноцковтсь папиросань качамо ды ёртызе «поцевксэнть» кузтемпенть ужос путозь ведрантень, цюх тозонь сельгсь мельганзо. Варштась ялганзо лангс ды янксезь ёвтызе мелензэ:
— Эх, ш-шкат ульнесть! Кода тонь, Па-Палю, ютась «родинантень» долконь максомат? Ко-кода мон, «объектка» максазеекс? Эли «калаш» кандтнить? — меельце валтнэнь Ванине ёвтынзе пеедькшнезь.
— Мхы, мон, чей, аволь тонь кондямолинь, алкуксонь ушманонь лем кандтнинь! БМП ветсинь. БМП! Тешкстык? Те теть аволь «койме». Те «боевая машина»... То-то, — прянь шназь, раксезь- згилязь, скирдызе седе марямга умонь ялганзо Палю.
— Ге-генерал эсь-эсеть БМП-сэ эзить усксе? Толведь мельга эйсэнзэ эзить цюхае? Ми-минек частьсэ танксо зярыяксть якасть «ашо» мельга. Во! — эзь пота, таго кепедизе Ванине вить кедензэ, видемтизе покш суронзо, пандызе Палюнень текеньсэ.
— Усксинь, — апак кавтолдо, каштансто, мик кончтась, мерсь кевкстеманть каршо «генералонь усксицясь», — «палыцянть» мельгаяк идемевсесь пансимим. Мезень кис, мерема, «губаскак» понгонинь...
— Сехте лембе таркасо урендинь-служинь, цёрат, мон, — видькстась эчке, келей, прок таргозезь, чама Индял Миколь, — вачо пеке ушмант андынь, пидицякс-паницякс ульнинь. Монстемень... тынк БМП-тне таркастосткак а сыргавить.
— О-о-о!
— Истя-а-а... Мезе виде — виде, — каятотсть вайгельть.
— Па-паро, паро, цёрат, адядо стувор экшс, мо-морамо! — тердинзе таргицятнень «чокшненть» поладомо сонзэ теицязо ды васенцекс эскельдясь кудо кенкшенть ёнов. Мельганзо увол-авол совасть лиятнеяк.
...Клубсо невтевсь кодамо-бути кинокартина. Ченькстэнть-[135]палыйденть «пси» цёратне пачкодсть сонзэ прядовома малава. Фойесэнть комсешка од ломанть налксесть доминосо, седе ве ёно — картасо, мезде-бути кортнесть, кие-бути снартнесь, ды мезеяк эзь лисе, седямо гармониясо. Ванинень весе вийсэнзэ рангиця магнитофонозо нардазь нардынзе тесэнь гайттнень. Путызе сонзэ келей стувор лангс, ды лоцьк озась Важдай Юра ялганзо марто шашкасо налксеме. Пиже-ожо вайгельсэ «фононзо» айгизе ваксозонзо. Ансяк ушодсть повнетнень шаштнеме, «яксеме», кинось прядовсь. Келес панжовсь кавтов панжтневиця кенкшесь, ды ваныцятне ушодсть ошмом лисеме залстонть. Ванине кепедизе «лазстонть» прянзо, ды, пачканзо гувк ютыця псиденть эрязкалезь токнозевсь седеезэ: весе марто вейсэ, ваны, лиси, сеске содызе... Алькань Нату. Аванть прясо якстере апокшке балягинесэ почодозь чоподасэнь шаль, чирева мазылгавтозь цёкинесэ, келей, мик копачавсть лавтовонзояк. Лип меремас цёранть кирьгапарезэ теиньгадсь, стакасто лекстявсь. Улевельгак «апак тока», эсь превсэ, паряк, кирдевлизе, аволизе нолда «псинзэ», аволь пизякадо, покордазь ёжонтень оля аволь максо. Ней вана, чопик стясь таркастонзо, эль эзизе сявордо стуворонть шашканек-мезнек ды карциганокс ливтясь Натунь каршо. Магнитофонось эль эзь пра, тейсь општ.
— Шу-шумбрат, Нату! Лоткак аламос. Кортамс эряви, — псистэ лекстясь кирьгапарьс эциця ченьксэнь корсяня чинесэ аванть чамас. Валтнэнь ёвтазь, путызе келей стака кедькоморонзо сонзэ лавтовс.
Нату, Ванинеде сэрьс эль алкине, кувтолк варштась икелень вечкеманзо лангс, меремс мезеяк эзь мере, ютыксэль, поладыксэлизе кинзэ.
— Саик кедеть! — кизырьгадсь, рангстась аванть мельга молицясь, вензав, аламнеде тутора кутьмере, неявсь Натудо седе сыре цёрась. — Саик, мерян!
Лисицятне, удалдо нежедезь,тохмадизь колмонест кенкштэнть ве ёнов.
— Ки-кие тон? Тонь кодамо тев? Оргодть икельдень! — серьгедсь верьга вайгельть Ванине аванть кис пшкадицянтень, стясь, теке тюрьган атякш, каршонзо. Вить кедьсэнзэ бажась лавтовдо кирдемс Натунь.
— Мон теть невтян кие! — ацирьгадозь пижакадсь асодавикс цёрась ды чочинзе кувака кедензэ Ванинень мештьс.
— Миша, Миша! — тандадсь, пижакадсь Нату. — Кадык, адя седе курок! — лоткавтсь, сайсь, усксь цёранть, явсь, секень вант, тюрьгадыцятнень. — Сон, неят, иредьстэ!
[136] А те, а тона сонзэ эзть маря. Эрьвань сельмсэ палсь кежень тол, конанть пингстэ превтне, седе сеедьстэ, тертявкшныть. Цёратне анокольть разедемс, норгсемс, «ичемс» вейкест-вейкест.
Палю, Важдай Юра, ды Солай Мика эрязасто кундызь Ванинень кавалалдо ды «лутызь» ятстонзо. Натут-Мишат лиятнень мельга лиссть клубстонть. Ванине, стакасто лексезь, ютась кадозь тарказонзо, новольсь стулонтень. Каршонзо, мусть таркат, озасть Мика ды Важдай Юрик, лиякс — Рыжой. Юрик поладыксэлизе налксеманть. Эзь лисе. Кодат налксемат’ Седеезэ Ванинень аноколь кирнявтомс мештьстэнзэ. Тейсь мельде-валдо вейке-кавто «эскелькст» ды машнетезь аволдынзе ожасонзо раужо ды ашо повнетнень лазнэнть лангсто.
«Вал, вал макснесь, кувака пуло! — чарасть-велясть, чийнесть удем сормсевксканзо ледстнематне аволь пек умонь шкадонть. — Вал макснесь учомс, кемевтсь, киненьгак а лиси. Учок... Лисни, те самай вензав алясь мирдезэ. Неяви, аволь минек велень. Костонь? Кода муизе? Оно кодамо бурина. Эх, Нату, Нату! Э-эзик кирде валот... Кемть тыненк, тейтертненень... Кона ёндо каяты тантей чине, тынь тов...»
— Паряк, поладсынек, — сезинзе нусманя арсеманзо лия ялгазо, Солаень Мика, кона аштесь вакссонзо. — Од ковол а ушодтано, а? Вана, мон уш повнетненьгак аравтнинь. Тон ушодыцясь. Эрь тейть эскелькс. Ну? Мекс чатьмонят?
Ванине чатьмонезь таго шаштынзе-човоринзе «озавтнезь» повнетнень, нежедизе прянзо кедь коморонзо лангс, таго куродызь некеть арсематне. «Ва-вана сон кодамо, эрямось. Кие лангскак иля кеме. Иля кеме. Весе, весе манчить. Ансяк эсеть лангс кемть. Ага, лиякс кодаяк а эряват... Ёмавтсак сонзэ, те кемеманть, мерть, ёмить».
* * *
Уш чикуншка малава, окойники, Ванинень удомазо явась. Сон стясь ды, кургонь автнезь, апак оршне совась моргас чаманзо шлямо.
— Ванине, самодот мейле уш ков ютась, оно зяро, тевскак, мерема, кундамаль, — ледстизе Куля цёранстэнь. Сонсь тенсесь киякс.
— Ке-нерян, а-авай! Рузтнэ кода кортыть? «Тевесь аволь верьгиз, вирев а оргоди»... — ёвтынзе Ванине содавикс валтнэнь, чаманзо нардамсто киртыжс понгавтозь чавачамонть каршо [137] аштезь. «Нарамо а карман»... — сась мельс.
— Маринь, колхозс сась од трактор. Паряк, пшкадеме, макссызь теть? — каятотсь тенстензэ ужос путомсто Кулянь вайгелезэ.
— Оно ков тон! Те-теде, а-авай, иля арсеяк. Одонть, арсемскак а мезть, макссызь кувать важодицянень, кинь тракторозо весемеде та-ташто. Ага. Секскак... — стувор экшс уцор-уцор озамсто, превть макссь аванстэнь. Варштась удалонзо вальма сельмеванть ушов. — Авай, пекем нурьгамсь! Мезе течи карми?
— Ужо аламос... Ну, молиндерян прявтонтень монсь? Тонь таркас? Ну, кода тон тень лангс ванат? — лиссь Куля пенч-вакан марто каштомикельде ды, сельмеде сельмс ванозь, кевкстизе цёранзо.
— Мо-мольть, бе-берянесь а ули. Ага. Пшкадть прявтонтень, — ярсамо учицясь ёвтызе мелензэ. — Олясь, авай, тонь.
— Ярсамс рестынь тувонь куя марто керсезь модарькинеть. Тон вечкат. Зярс кши керсек. Сизинь. Чаран, чаран... Тунь эзинь ойсе. Ды теке теезьгак мезеяк арась... Ну, тон пирявксонтень зярдо кундат? — кедензэ нулынесэ нардамсто поладызе цёранзо марто кортамонзо Куля, — допрок, ну, допрок наксадсь. Тонсь неят. Секень вант, сявори!
— Виде, авай. Ансяк тень тур... тень туртов эрявить кой-кодат кар-кармот-курмот. Палманть, пайметь, цицинат... Ага.
— Ну, тон каня сынст эзить нее? Латалот. Эсктнеяк анокт. Покшт, вишкинеть... — мерсь каваницясь цёранзо икелев лазнэ лангс покш пачалгонть путомсто.
Куля, чоподава ушодозь ботамодонть сизезь, озась голландка ваксс аравтозь эземнентень оймензэ таргамо. «Седе мейле ярсан, кенерян. Васня Ванинень андома», — чачсь ды ёмась прясонзо мелесь.
— Неинь... — мерсь ярсыцясь, поревксэнзэ нилезь.
— Ну, эно мезть кевкстнят?
— Мо-мон неинь ан-ансяк ологат.
— Ологатнень тона песэ мезть? Тумотне. Мезекс сынь анокстазь?
Ванине чатьмонезевсь. Лоткась каволямодояк, сускинзе турванзо.
— Теня, лез-лездыця эряви... — панжовсь кургозо.
— Мезекс? Каня ськамот а стявтови. Ну кода истя? — кевкстицясь нежедизе кутьмерензэ голландканть ашо лембе чамазонзо.
— Мезень стакась? Палманнетне? Сынь тонеть — налкшкеть. Лиятнеде кортамскак а мезть. Шождапеть, ванан, вешнят, вана мезе! А! Пазось мартот! Мук ялга, ансяк витнек. Визькс ломанде, — мельтеме, машнетезь мерсь Куля, стясь ды юрк совась моргас. Тевтне лужалицят а вечкить.
— Чичав Палюнь тердьса! — Ванине серьгедсь мельганзо. Сонсь апак капша ожодсь пеке.
— Кинь мелеть, ансяк аволь Палюнь. Те симагаенть кудом маласкак аволия нолда, кирьгапардензэ башка мелявксонзо арасть, — каятотсь голландкань тона ёндо аванзо кежтнеде кшникс жойниця вайгелезэ.
— Па-паро, саты ялгань эйсэ рудазсо ваднемс... Симагай... Тон некшник? — пшкадсь Ванине аванстэнь, мик путызе пенчензэяк, лоткась ярсамодо.
— Ну, кода эзия некшне! Ды зяроксть! Весе велесь теде соды. Эзь стувтово, ды зярдояк а стувтови армиядо икелень мотоцикласо ардтнеманкак. Ансяк те мезе ашти! Мейле вастома чокшнестэтькак трескакшнось нулакс, — голландканть велькска ливтясть лужанясто ёвтазь аванть валонзо; мельгаст апак учо марямга ильсезевсь.
Ильсицянть икельга стясь-аравтовсь чоподасо почодозь эрязь пингезэ, ды истямокс, марявсь тензэ, кадови латяня сыречис. Састь икелензэ, чарькодевсть а истя теезь, нолажа эскельксэнзэ, конатне малавгавтызь кинть кельме латко чирентень. Теке басом, та-косто сась вановтонзо икелев домка, келей, летьке кельмесэ лексиця, раужо модасо пирязь те самай калмось. «Инешки, те мезес истя?» — мик тандадсь эсь арсемань керьмедензэ.
Кодамокс сы сон, песь, ормадо пешксе сыречись, седеяк — зярдо, теде Куля эзь сода. А соды кияк. Мезе, алкукскак, теевель ломаненть марто, кодамо кива туевель эрямозо, содавольгак: истямо-истямо иестэ, истямо-истямо маней эли сумборя чистэ-чассто туят Тов? Эрязасто, виень апак вансто важодеме? Мельде-валдонь, «ялатекень» лувсо эрямо? Эли, паряк, ваяволь нузяксчинь бутрав ведентень? Арась, превсэ эзть аравтневе Кулянень икеле шкань пелькстнэнь «танстест», таркаст. Седеезэ вана, буволдомс а савкшны, содась: паро, валдо чить-петь учомс а кона ёндо.
Палюдо аванзо кургсто марязь валтнэнь каршо Ванине мезеяк седе тов эзь мере. Мезе мерят? Сон авадонзо парсте содасы. Ялгазо... Содасы...
— Вай, ну кода теть а визькс? Ансяк стить, ловт, чикуншкава, ней таго... — эзь кирдеве Куля. Сон мусь од тев: ушодсь васня летьке, сеске коське нуласо вальматнень нардтнеме. Ливезькадсть мекс-бути...
— Ка-каня мон чу-чуман — эзь явавтово! Авай, пирявксонтень ван-ванды кундан. Ага. — мерсь кургонь автницясь коник вакссо стулонть ёнов ютамсто.
— Аволь ванды, а течи. Ну, марить? — кармавтсь Куля, сонсь педясь, кадынзе вальматненьгак, мелень путозь Ванинень удсема тарканзо ацамо. Тонадсь. Вишка пингстэнзэ саезь тень теи. Ацасы, витнесы, мейле кедьгетнень шлямо-нардамо кунды, лопавтнеме-муськеме ушоды, мейле...
— Ва-ванды, авай, тейсынек. Ага, — марикскак эзь тее, прок ёвтазьгак арасель «течи» валось, апак тално, сорк эзь тее, мерсь Ванине каршо. Аванзо меревксэнзэ топавтомо эзь арсеяк.
— Ну, сестэ чийнек азё прявтонтень. Сынь истямо мельс: эстень молемс, авадря. Тон азё, цёрат. Паряк, муи теть таркине. Колхозось покш...
— Ко-кодамояк прявтнэнь течи, авай, а мо-молян! Са-самодон мейле ковгак эзь юта. Ойм-оймсемс эряви. Течи, кортазь, мольтяно калс. Ага. Палю марто. Кундсемапельть, алтымат-мезть, сон мусь. Па-палю-молоток! Паряк, сайсынек Важдаень Юртаеньгак, Рудикень. Авай, мекс тензэ истя мерить — Рудик?
— Инешкипаз, — ансяк мерськак Куля, оршнесь-тейсь ды чатьмонезь лиссь ушов. «Берянь нежем, ковгак а маштови, лавшо, теке, маряви, армиясь истямокс теизе. Мезе, мезе теемс...» — каразь карась превсэнзэ те апаро мелесь, кона сеедьстэ понгони-совси тозонь.
* * *
Ушосонть иенть пелькстамо шказо. Телесь уцорсо эци, сёксеськак пря а максы, мокшнат невтни, а нолды. Прась лов. Мерят, сась ды озась ашо шубань кандтницясь тундос. Я, юты чи-кавто, ванат, кадовить кельме шубадонзо ды ваньксчидензэ ансяк панкст. Эли сыньгак а ванстовить. Арась, педе-пес эзть прядово сёксенть лембень дарманонзо! Ванат, зярскак [140] раужолгавтсынзе паксятнень-виртнень. А кенерят тонадомо те тюсонтень, чилисема ёнов алга уиця пельтне таго педить сувтнеме ловонь почт. Пелькстамо. Кие-кинь изни... Кие-кинь лепшти... Пертьпелькссэнть, мерема, кода эсенек, ломантнень, ютксо.
.. .Чипаенть аволь тусто пель удалга валгома шкасто Ванине, Палю ды Важдай Юрик-Рудик, окойники пачкодсть кудов. Начкт, рудазовт. Эль кирдевить пильге лангсо. Баксорсо, Пильгест рудаздонть апак коцькере, апак нардтне панжизь кенкшенть ды колдор-колдор совасть кудос.
Сынст неезь, Кулянь эль эзть чополгадо превензэ, чувтомсь кудо куншкас. Эзь сода мезе меремс, мезе теемс, кода улемс. Повсемс? Эли, паряк, васня эстензэ килькш анокстамс?
— А-авай, ва-вана теть калт, — невтсь Ванине ведразонзо, — калт, ага! На-натой нуч-нучкат кавто понгсть, ага, — калонь кундсицянть эль велявтневсь келезэ.
— Вай, авакай! Те косо истя лекиде?! — сась ёжос Куля. — Ванодо, ванодо, кие ёнов мольтядо! Ну, мезе, мезе теемс?! Инешки, куш Тон лездак, — чавсь пря, аноколь апародонть раздемс черензэ авась.
— А-авай, иля сёвно. Ва-вана калт кандынек!
— А эрявить калоткак! Максыть оно Чичавонь анамазонтень эли Рудикнень, кадык трескасызь. — Куля вийсэ автордызе Ванинень кедьстэ чаводо пешксе ведранть ды нерьгстызе Палюнь мештьс. Тона эль эзь пра. — На эно, назола, кирдть!
— А-авай истя а эряви. Тон покордат ялган эйсэ, — мокнось, яжась кельсэнзэ Ванине прянзо кавто ёнов чиртнезь. Цяк кирдевсь пильге лангсо, кемстэнзэ чудсь рудазов ведь. Лиятненьгак текель урядост.
— Мон тенк невтян «а эряви»! Лиседе нейке кудостон. Чиненкак тесэ илязо уле. Аволидизь нейгак! — Куля невтсь кедьсэнзэ кенкшенть пелев, эскельдясь каршост. Кежтнеде, покордамодонть нардавсь чамастонзо мазычизэяк.
Палю, тей-тов чиремкшнезь, чатьмонсь. Кончтнесь, прок чаула, сельмсэнзэ, панжтнесь, нолсесь начко турванзо ды яла снартнесь мезе-бути ёвтамс.
Куля ютась ютковаст, келес панжизе кудо кенкшенть ды рестединзе кутьмерьс икелензэ чатазь аштиця рудаз потсо Палюнь ды Рудикень.
— А ну тестэ! — теке басом, рангстась пиже-ожо вайгельсэ. — Чалгавксонкак тей иляст кадово! Аволь ломанень понат... — [141] барцадизе «инжетнень» мельга кенкшенть.
— А-авай, Палю па-паро цёрась. Тон стяко-о-о па-паник. Ага.
Мон ванды, мон, мон молян прявтонтень. Вансак ва. Молян. Ага. — Сонськак эзь сода мезть кортась, мотордсь калс якицясь.
Куля валгак эзь правто. Совась моргас, автордызе эекс понгавтозь нардамонть, ды озась чапамо, седеень човсиця ёжонзо, потмонзо чамдомо нардамонтень. Кинень лиянень? Кинень молят? Кие лезды? Мезень лезэсь, ёвтниндерясыть ризксэть кинень-бути? Сонзэ кондятнэде ней велесэнть...
* * *
...Павел Андреевич Валкужов талай уш кирди кедьсэнзэ вейсхозонь ведьметнень, саинзе сынст Григорий Павлович Паксеваткинэнь куломадо мейле. Войнанть прядомадо мейле, тонась иеть, аволь ие, аволь омбоцеяк кирдсь сынст нардевстэ! Теяк кедьстэнзэ а нолдтни, теяк, малав весе содыть, аволь лавшо понкс. Секскак Кузвелень вейсхозось, кода икелеяк, свал вадрятнень ютксо. Прявтось — прявт. Сонензэ ламо неема, маряма, содама. Сондензэ ламо-мезе ашти. Секскак валскень чоподава Павел Андреевич кенерсь ардтнеме весе ферматнева, талайс кирдевсь тувонсесэнть. Мейле пачколесь скалонь фермав. Эрявсь варштамс, кода андовить-симдевить ды потявтовить сюракштне. Тесэяк кирдевсь. Тень а истя теить, тонань. Яла эрьванть кармавтома, эрьвантень мерема, невтема. Вайгельгак, савкшны, куш тензэ те а вечкеви, кепсемс. А тукшны, а тукшны те мелезэнзэ! Бажи ёвтамс мелензэ ломанентень валсо-кавтосо. Меремс омбоцеде, ледстямс — те аволь сонзэ обуцясо. Ды ков молят, сави. «Оймевтеметь... — аволь весть, аволь кавкстькак содавтнизе предэнть те седеень кельмевтиця мелесь. — Мезеяк тенст а эряви».
Ветямкудос пачкодсь ансяк ологань сэрьсэ чинзэ кепедевема шкантень. Кода эзь капша, седе икеле эзь саво. Совась. Максызь тензэ топавтозь тевтнеде куля марто конёв лопанть. Панжизе кабинетэнзэ. Кайсеме эзь карма. Озась. Васняяк аравтызе сельмензэ икелев конёвонть. Ютась цифратнень ланга. Парсте теезь тевтнень лемест каршо путнесь пекинеть, чавкинесэ тешкстынзе икелев молицятнень фамилияст. Лепштневсть турванзо, чиремтнесь прянзо «берянь цифратнеде». «А-а, таго те Письмаркинэсь!» — лиссь аволь кургстонзо, седейстэнзэ. Вастовсть Письмартнэнь кондят, удалов ускицят, лияткак. «Пулост пурдтнемат!» — мерсь [142] эськанзо Андреич, стуворонть экшстэ стямсто, тонгизе теке шкастонть потмо зепезэнзэ конёв панкскенть, мельганзо — ручканть. Варштась каршонзо стенас понгавтозь чувтонь футлярсо, суликань кенкшке марто тикаиця частнэнь лангс, лиссь стуворонзо экшстэ ды эскельдякшнось туеме.
Те шкастонть апак маряво панжовсь ашосто артозь кенкшесь ды, ловт, конядо коняс эртевсь Каргин Иван марто.
— Павел Андреич, мон-мон тонеть, — талакадомадонть васенцекс, апак шумбракстне, пшкадсь Ванине.
— Монень — улезэ монень. Паро. Шкам, виде, арась ды уш кодаяк. Озак ва, — тердизе якицянть-сыцянть колхозонь прявтось ды сонськак озась эсь тарказонзо стуворонть экшс. Велькссэнзэ стенас понгавтозь покш, мазый кундосо Ленинэнь портретэзэ, эйсэнзэ Ильич ловны газета. — Мезе, Ваня, ёвтавлить? Кунсолан.
— Ды мо-он, Павел Андреич, ва-важодемадо. Прядынь, содат, трактористэнь-машинистэнь училища. Эряви, арсян, тевс кундамс. Оно уш зярдо сынь армиясто. Саты лужалемс кудосо. Мелем важодемс чарынькай тракторсо.
— «Беларусьсэ», мерят? Тык-тык... А лиси, цёра, видьстэ мерян. Эрьвасо ломань. Киньгак а панят. Вана мезе, Ваня. Ули азортомо «дизель». Аволь ташто. Вейке альгач поршнянзо «том-бинзе». Пурнасак, тонь ули. Поршнятнень-мезтнень мусынек. Янксеме а кармат. Вана истя.
— Ме-мелем монь чарынькайсэ важодемс, — одс ледстизе энялдоманзо валскень инжесь, каршонзо аштицянть сельмс варштазь.
— Мезе арась — арась. Тейть мерезенть. Седе вадря карми. Тосо вансынек. Паряк, сы шка, таркаяк лиси. Сестэ апак кавтолдо озат руль экшс. Туи? — таго частнэнь лангс варштазь, коськестэ мизолдозь, мерсь прявтось таркастонзо эрязасто стямсто.
— Туи, — прявтонть мельга стямсто, текекс, нувара вайгельсэ ёвтызе мелензэ Ванине, ды кавонест лиссть аволь келей-кувака кабинетстэнть.
Истя ушодовсь Каргин Иванонь, Дораень Ванинень, покш, эсь мельсэ-превсэ эриця ломанень эрямозо. Курок валось ёвтави, ансяк а курок тевесь топавтови. «ДТ»-нть марто савсь котьмамс талайс. Те арась, тона вешнема, кодаяк а муеви, а шкась ве таркасо а шешки, оймсемат а соды, моли. Ансяк сюронь урядамо шканть пес витневсь алтазесь. Велень эрямосонть те шкась весемеде стака. Тевтнеде кирьга видьга. Тундонь видемась — те [143] кизэнь тевтнень, паряк, кеменце пельксэст. Кастозенть эряви аволь ансяк нуемс-пивсэмс, эряви ускомс, миемс, эряви арсемс, вийть путомс сы иень менстентеньгак — видемс лов алов видематнень, сокамс тундонень модатнень. Велень содыця атятне кортыть: тундонь сокамось — а сокамо. Виде, потмаксос виде. Секскак эрявсь кепедемс тедийтнень алов моданть. Сёксень васень ковось лемдезь таштамковокс. Ялатеке весемеде таштыцясь, видькстама, — умарьковось, сон утомтнень-кавтнень васень пештицяст, сон васень андыцясь, шумбрачинь максыцясь. Петьксэкс лия ярсамопельтненень, соды аксялга чийниця пакшаськак, ашти кшись. Сонтемензэ а тей — а тов, сывельямдо, котлетадо-мезде сонтемензэ а ярсат. Сон — весементь лангсо прявт.
Менельксэсь маней, коське, сыця сёкстенть а ледстнияк. А ледстнить эйстэнзэ а чувттнэ, а куракштне-тояратне. Нуемась-урядамось вейсэнь хозяйствасонть моли зэрнезь. Прядовома малава яжавкшнось ансяк ве комбайна, сененьгак кавто чинь перть муевсть асатыкс пелькст, ды вельмевтизь. Нуицятнень мельга олгоськак апак пупорькшне усксеви ве таркас. «Беларусьтне» теке коткудавт ардтнить паксятнева. Усксезесь капави шкань апак таргсе, косо сянгосо, косо тракторсо. Тингелангтнеяк тевтеме а аштить: сортировкатне ютко шкат а содыть, чинек-венек понжавтови, таркава кайсеви, ков эряви усксеви сюрось. Мезеяк а мерят, Кузвелесэ маштыть важодеме! Аволь ашо кедть.
«Варяв таркакс» паксянь тевтнесэ кадовкшнось кельмевкс алов сокамось. Кепедемс зяро мода — те весемеде ламо виень, уштомапелень «сэвиця» тев. Те — эрьвась соды — сы иень менсть, норов, те — сюро, кукуруза, модамарть, тикше... Эрявить тень туртов гусеница лангсо ды лия стака тракторт. Сынь а сатныть. Уликстнэяк сеедьстэ а шкастонзо колсевить. Куш рангт! Секскак механикентень, сонстензэ Павел Андреичнень савкшны эрьва кува ардтнемс, нернемс, вешнемс эрявикс пелькст. Савкшны путнемс суликаткак. Кода эно! Ней сонтемензэ, чапамовтомонть, кардаз удаловгак а лисят. Паро, Ванинень тракторозо урнозевсь, сась-совась важодемань лувонтень седе а ков шкастонзо.
... Чинь-чоп цёрась сокась Вирьчирень паксясо. Тевезэ мольсь, «айгорозо» урнозь урнось, усксь, велявтсь раужо, «оев» моданть виень апак вансто. Паксясь таргавсь виде кувака лехакс. Велепестэ саезь омбоцес, вирь чирес, кавто вайгельпень малава. Вант икелев ды ансяк эль-эль ноцковтнек эсеть ёнов ветямонь шаштолматнень, илязо туеве машинат витев эли кершев. Тей — тов, тей—тов... [144] Соказь гектартнэнь велявтозь велявтыть лемехтне, истямо паксясо чинь нормась топавтови седе шождасто ды курок.
Чипаесь сась мельс прядомс чинь-чопонь мелявксонзо, путомс тенст тешкс. «Саты течис!» — мерсь эсь пачканзо, арсезевсь ды аламонь-аламонь якстере паргокс поводевсь модачиренть вельксс. Эзь капша, вансь-кочкась седе чевте, сэтьме оймсема тарка. «Шказо, шказо, моненьгак сыргамс», — якстере, алов ваныця «паргонть» лангс варштазь арсезевсь Ванине. Ютась тов, виренть пелев, ды мекев, теньсэ прядызе икельксэнзэ. Мейле кепедизе «пулонзо», истя мерить понгавтневиця плугонтень, ды цяр-цяр, шождачинь марязь, сыргась «дизельсэнзэ» кудов. Пельчасошкаяк эзь юта — сон уш парксоль.
Ансяк аравтызе псистэ лексиця «пачанзо» лиятнень юткс, мадстизе моторонть ды валгсь кабинастонть, теке мода потсто лиссь ды сась ваксозонзо Чичав ялгазо.
— Ха, ды тон течи алкуксонь сокий, герой! — вадовкс каявсь эйзэнзэ, кундась кедензэ лепштнеме, сюворямо, теке мерят ие-кавто эзизе некшне ялганзо Палю. — Чоподадо чоподас равтат! Вал максан — прявтось шнатанзат.
— Ды ко-кодамо уш «ерой», кода корты Севастьяныч, сизинь, теке верьгиз, — видькстась Ванине, — пе-пекеськак урны-поти.
— Неян, аволь сокоран. Сиземадо ормаменстесь, содак, вейке. Несак? — невтизе, пелевидьга таргизе понкс вить зепстэнзэ ашо пря бутылканть. Валонзо ёвтамсто тюжа чама киське Палюнь турванзо «киштевтиця» ёжодонть тетькевсть чамань келес.
— А карман, — ёвтызе мелензэ Ванине. «Ашо прянь» азорось, марязь валтнэде абунгадсь, истят сон эзь марсе. — Васня куш кудов ютан, аламнеде шлян-нардан. Несак, ванат, зяро мода лангсон?
— Мейле шлят, кенерят! — содась эсензэ, лепштясь, вал эзь максо ёвтамс Палю. — Тон, арсят, тонтеметь а панжови?
— Ну, эно у-улезэ мезеяк кургс каямс... — мельтеме, безардезь мерсь марязенть каршо. Ансяк кудов эзь сыргаво, яла кавтолдсь.
— Адя, адя, иля менчеве, аволь од тейтерят, а колават! Мезекс теть кортавтомань валтнэ? — иердемазо Ванинень эзь цидярдово, комавтовсь. Палю саизе ялганзо кавалалдо, ды сыргасть, куш тонань арасель мелезэ, тракторонь парконть васоло ужонзо пелев. Тосо кассть ниле-вете рацяня кальцилигинеть ды ломанень сэрьсэ кирмалавт. Вадря-я таркась! Сельмс а каяты. Вети тов [145] чикерь-микерь менчевиця яннэнь кондямо. Содавикс «вирьпулынесь»! А стувтнить сонзэ. Оно озамо таркакс кирьпецтнеяк, лиятнень ланга каязь лазпеськак кортыть эрявиксчидензэ. Аволь ансяк Палю, лияткак «прянь витнеме» тей чопавтнить. А стяко «ловажавтомо кельтне» лемдизь колхозонь «здравпунктокс».
— Ну, мезе ней истя — а кодамояк кедьге, а пей алов мезеяк путомс, — яла эзь вечкеве, яла янксесь, музгордсь Ванине.
— Ха! Тон кодаяк а оймат. Ботнат, теке яксиця чапакс. На, кирдть! — таргась теке басом омбоце зепстэнзэ мокшнашка якстере чама умарь. — Лырнат, а мезе сускомс, вана! Озак!
Ванине саизе венстезь умаренть ды чатьмонезь, мельтеме озась кавто кирпець лангс каязь-аравтозь лазнэнть лангс.
— Истя эно, Павел Григорьевич, — лемсэ-тетялемсэ мерсь эстензэ Палю ды панжадо бутылка неренть тонгизе кургозонзо. Озамо эзь арсеяк. Гилк-гилк-гилк чамдызе кедьгенть пелензэ, кувакасто лекстясь ды кецявтызе Ванинень. — Те, ялгай, тонь изнявксот кис!
Кадовомс ялгадонзо Ванинень мелезэ арасель. Лангозонзо ванозь, сыремсь сонгак: «костизе» Палюкс чопода-пиже суликанть петнявкскень пес. Сётор-сётор поризе пелензэ умаренть. Эзь лезда. Вачо пекеденть симезесь сеске кирнявтсь пряс. Прядызе умарь пельксэнть.
— Истя эрявольгак! — шнызе Палю «костицянть» каршо озамсто. — Менчевемскак а эряволь! Кавто ломаньс бутылка... Улевель мезде кортамс!
Ушодсть теде-тонадо калякамо. Мезде? Мезть кевкстнемс теде? Потмаксос ваныцятнень, превест ёмавтыцятнень кортнемаст вейке: кие косто мукшнось, кодамо, зяро, кода кудов пачкодсь, мейсэ «похмелэнзэ» оймавтызе... Валпаргост сынст теке. Лабордсть теде-тонадо талай.
Ансяк сыргамо, «здравпунктс» варштась парконь ванстыцясь. Сеяк аволь «ськамонзоль». Сеяк вал, омбоце... Шкась седеяк таргавсь.
...Куля прядынзе кардонь-кардазонь эрьва чинь тевензэ ды совась кудос. Каинзе лангстонзо ды понгавтынзе кенкш вакссо тулос кардазъютконь оршавксонзо. Каясь ланганзо халат, кундась, эзь лекстяяк, кудоютконсетнес — стуворонь пурнамо. Моргасто ливтсь кши, пеель, пенчть-вакант...
«Шказо уш аштень чокшнень, яла арась, — совсесь прязонзо седеень скириця-китордовтыця мелесь. — Ну, косо, кодат сокамот [146] те шкане, Инешкипаз?! Мезеяк эзь лисе? Мезть ансяк а тейневить неть трактортнэнь марто... Олёбань Гриша оно «Беларусьсэнзэ» латкс прась-велявтсь, Бозань Иван тракторсонзо чадыведь шкава эрьке потмаксос тусь... Охо-хо-о, ну, каня трактортнэ-кшнитне чумот? Каня сындест ёмить ломантне? Чумось, эвсь нилевлизе, превень костиця ведесь! Кренч ведесь — вана кажонь эрькесь. Гришаяк, Ивангак, менель мастор тенст, анокольть нолштамс самай те чинев веденть скал ваце лангстояк... Мезень танстесь эйсэнзэ? Мекс теке сёксень укскат медьс педить эйзэнзэ? Ну, содык, содык азё, кува те шкас азгонди...»
Кузтемпестэ каятотсть кашторкст, чалгавкст.
«Окойники!» — лембе ёжине эждизе, ютась Кулянь седеензэ пачк.
Совась Ванине. Авазо сеске редизе — «токазь».
— Ну, косолить те шкас? — стуворонть вакссо каршонзо стядо аштезь, вайгелень апак кепсе кевкстизе совицянть. Кедензэ кирдсь рунгонзо кувалт. Кежтне, вечкемась, янксемась потсонзо лаказь лакасть.
— Па-паксясолинь.
— Мезе тосо те шкас теить? Киштить?
— Со-сокинь...
— Косо кельварянть пештик? Паксясо?
— Па-паксясо, паксясо, кадомак! — кепедизе вайгелензэ аванзо каршо.
— Таго а ломань пона Палю марто вастневить?
— Саты, меринь теть! — серьгедсь Ванине аванзо лангс, ды теске, кудо кенкшенть икеле уцорсо каизе лангстонзо рудазов-оев, сэксэв комбинезононзо. — Я-ярсамс анокстак. Пе-пекем вачсь.
— Ярсак, мезе муят! — эзь кирдеве, ацирьгадозь серьгедсь Куля ды вырчк лиссь кудостонть. «Верепаз, каня арсевкшнесь — истямос пачкодян? Кодамо сэтьме, кунсолыця, ёжонь мариця ульнесь! Виде, ордалемань обуцязояк ульнесь, невтнесь иерачинзэ... Ды те эно умок-умок ульнесь. Ней? Ледстнемскак стака. Ну зярдо, кодамо шкасто а истя чалгавкшнынь мартонзо? Кодамо сехте покш ильведьксэм? Мейсэ чумом? А тетязо, а васень мирдем Миколь, Дораень кие-лия, а эсенек пельде винас правтыцят маласояк арасельть. Ванине вана... Мейсэ тевесь, косто саевсь те педий ормась? Кодамо варма кандызе? Армиясь эзь лезда? Мезе теемс? Пшкадемс предэнтень? Зыян а теян, лезды? А мезе, бути молемс парторгонтень?..»
[147]
* * *
Потмура, оймень пидий кевкстематне велязь велясть превсэнзэ, зярс прянь нолдазь, ризнэзь якась пиреванзо ды пачколесь уманзо песэ латкиненть чирес. Вансь зярс-бути потмаксканзо эль марямга шольниця чудикерьксэнть лангс. «Вана кинь эрямозо паро. Вейкень соды: чуди, чуди...» — эськанзо мерсь Куля. Велявтсь кудов. Оршнесь седе ванькскестэ, ды, цёранзо лангс апак варшта, эрязасто лиссь ушов: сайсь мель ютамс, мезе илязо лисе, вадря-берянь, Павел Андреевичнень, вельхозонь прявтонтень. Сон эсест велень. Мелензэ ваныть. Содасынзе эрицятнень вишкинестэ саезь сыретнес. Соды мейсэ лекси, кода эри-пишти велесэнть эрьва кудраськесь-семиясь. Содась Куля: симагайтне, мезе парось, теке толдо пелить эйстэнзэ. Понгат — кирдть. «Сусктанзат» истя — а стувтсак зярдояк. Секс Куля, талаень шканть лангс апак вано, кирди ки сонзэ пелев.
«Содан, вензэ лангс ванозь, а ён якамс кудова, а мазы. Мадсть уш, секень вант. Ды ков молят, сави. Ну, чей, эсенек ломанесь, — коткудавокс эвтсть арсематне. — Мезень лезкс максы? Тетявтомо кастовкс, мезть кортамс. Улевельгак Иван... А мезть ней теде ледстнемс... Мезе арась — арась. А велявтсак. Куш кеменьшка эли натой ветешка иеть эрявлинек вейсэ! Сыньгак ламо максовольть. Арась, эзинзе максо Пазось. Ие, ансяк ие максокшнось. Ну, мезе мерят? Тетявтомо трязь пакша! Акирдевикс. «Тетявтомо», — те валось ансяк мезе ашти.
Ковгак эзь туе Павел Андреевич? Командировкав, лияв-ков... Стардаса? Авадря, содазь, нильтякавтнемс. Истя-истя... Ансяк кинень, сондензэ башка, пшкадемс тень? А кинень. Ванинень тетянзо малавикстнэ омбо велень. Косот сынь? Кить? Паряк, Дорайнень? Стяконь валт. Кие мон, ды Ваняяк, сыненст? Икелень, умонь урьва. Эйкакшось Каргин... Аволь сынст видьмень... Ансяк сонзэ, Павел Андреевичень, лангс кемемась. Лездавиндеряй...»
Истя арсезь, майсезь-кавтолдозь, Куля пачкодсь хозяйствань азоронть, лиятнеде мейсэяк а явовиця, шиферсэ вельтязь кудонзо видьс.
...Валскестэнть, цяк кенерсь Ванине само «парков», бригадань прявтось мерсь нейке, шкань апак таргсе молемс тензэ ветямкудов. Мерсь — тердизе прявтось. Мезе, молема... Вана контораськак. Сеске совамс тердицянтень эзь саво. Кабинетэнть кенкшензэ икеле ульнесть зярыя учицят. Куроксто сась сонзэ чиполазояк.
Совицясь топавтызе мерезенть. Саизе прястонзо картузонзо. Озась, ве вал эзь правто прявтонть каршо. Учось.
— Исяк талай чокшне тенек кудос сакшнось ават. Содат теде? Тевесь, мерема, тунь а тень эйсэ — содат эли арась. Тон мекс эйсэнзэ мезекскак а путат? Сон оймензэ максы тонеть, а тон... Сеедьстэ кудов сакшнат иредьстэ. Вешнят, кие канды... Теде аволь ансяк авать пельде марсинь. Иляк чумондо. Велесь аволь ош, мезеяк а кекшат. Арсят, мезе теят? Ансяк армиясто сыть. Допрок одат. Мезес седе тов пачкодят? Арсят-арась?
— Ды-ды мон, — мезе-бути мериксэль чумочинь теицясь. Валонзо трокс каявсь, поладызе «моралензэ» прявтось:
— Кодаткак «монт»! Истя парс а пачкодят, содак! Мезе теят, кортыть, секень неят. Пеняцяк эсеть лангс. Аволь эйкакшат, чарькодят: суликань потмаксос ваныцятне парс а пачколить. Велесэнек эйстэст тонстеметькак сатыть. Ней тон... Аванзо а кунсолы, а! Ават тонь — сырнень ломань. Тон оно мезе теят, рудаз марто эйсэнзэ човорят. Сонзэ ды... эсеть, — прявтонть кортавксозо аламнеде лиякстомсь, меельце валонзо ёвтынзе тандавтнезь: — Понгат — кирдть. Содак, локшом ваткиця. Нетян омбоцеде — пеняцяк эсеть лангс. Весе! Чийть важодеме!
Ванине стясь велень покшонть стуворонзо каршо путозь стулонть лангсто ды прянь нолдазь, чатьмонезь лиссь аволь покш, ванькс кабинетстэнть.
«Монь кортамотне тензэ, кода сельмукшт сокор максазеентень, — арсезевсь Павел Андреевич, ансяк кенерсь пекставомо лисицянть мельга кенкшесь,—вейкине эйкакш, кассь тетявтомо. Кона ёндо паронть учомс? Школасо важодемстэнь истятнэнь, «вейкенькатнень», марто савкшнось аволь аламо телькемекшнеме. Эрьва кодат вастневсть ды вастневить. Кой-конатнень потсо кирдеви кеж, кеж тетянзо эли аванзо лангс, весемень лангс. Мекс покордызь. Стака-а-ат... Вейкине, кассь тетявтомо... Чуросто, мерема, чуросто аравтневить истятнэ видечинь килангс, кой-конат ансяк ушолить эрямо «ломанькс». Виев «палыцясь», идемевсь! Ялатеке зыянонть лепштяма! Эрьва ёндо, эрьва кода. Ведьметнень кирдемат. Кодамо илязо уле, куш кемень улест [149] гуенть прянзо, каршонзо молема. Мокшнань сювордазьгак. Максы мезеяк превень максомам Каргиннэнь? Эрьгинешкань туро ды максы, лезды...»
* * *
Весть, кавто-колмо ковонь ютазь, вейсхозонь конторасо «цёракс» кортамодонть мейле, тельня уш, Ванинень «дизельсэнзэ» кучизь вирев. Кузвелень вейке эрицянень эрявсь чапомс чапо, путомс кудо.
Теле. Читне нурькинеть. Паро, менелесь ванькс. Куш несыть чипаенть кончтнеманзо, ды седе келейгадыть перькат ёнкстнэ. Сумборя шкасто тевтне лиятат: вановтот киртятыть, шкадо икеле ушоды чопотеме.
Мурдасть вирьстэ, ускизь чочктнень уш сундерькс малава. Самодост мейле азорось лездыцятнень каванинзе лоподемазост. Велень кой: пандомс лездамонь, виень путомань кис аволь ярмакт, а прамос-сезевемас андомс-симдемс. Умонь, сон, те илась. Содасть велень эрицятне, аволь вадрятнеде сон, ды ков молят, косто сайсыть неть самай ярмактнень? Содасть тедеяк: лездась сон аволь вейке пингень перть идемс ломантнень куломадо-мезде, вачочиде, ванстсь ормадо-тарводо. Содасть: вейсэ, ансяк вейсэ изнявить стакачитне. «Берякадсь» те паро илась гуй веденть чудикерьксэкс чудемадонзо.
Истя лиссь нейгак. Ванинеяк «вирде мейле» мамштась эйень парсте. Тракторонть парков панемстэ Верепень курова телень кись апак учо теиньгадсь, ды ДТ-зэ «палызе» мездеяк а содыця, сэтьместэ аштиця электричествань палманенть. Лыйнезевсть уськтне. Паро, эзь сяворе. Машинанть вана томбавсь «конязо», радиаторось ушодсь кольгеме. Улевельгак «ведьметнень» экшсэ аштицясь «эсь превсэ», сеске лоткавтовлизе моторонть. Сон, тень таркас, покш нурдо марто тракторонть аламнеде потавтызе ды, теке мезеяк эзь теевгак, поладыксэлизе кинзэ. Ды уш кодат поладомат... ведтеме! Ютась зяро-бути шка, весть-кавксть чих-пых «кешнясь» ды лоткась урномадо. Алезэ маштсь. Энгамсь. «Эсь превсэ...» Улевельгак истя, васня сявордовлизь, козонь эряви, чочктнень, мейле ветицясь «лишмензэ» путовлизе гаражс, а уш седе тов арсевель стувор экшс озамодонть. Тень тееме Ванине эзь карма. Нузялдсь. Эрявсь пельвайгельпешка ютамс нурдонь киява ялго! Стувороськак, а мезть буволдомс, а весть сакшнось превзэнзэ.
[150] Омбоце чистэнть янгазь тракторонть ускизь парков. Мездеяк апак корта, Ванинень кедьстэ саизь. Техникань прявтось, механикесь, ёвтась мель колхозонь прявтонтень — пандовтомс. Арсизь-теизь ды састь лия мельс: Куля, чарькодеви, истят ярмакт костояк а муи, яжицянтькак сынь эзть усксеве... Эно кие лутазь панксонть педявтсы-стасы? Кие-кие... Весень вийсэ, вейсэнь зепсэ, вейсхоз, содави.
Зярыя таргонь перть Ванине «чаулат чавнось» кудосо. Аволь ансяк чить, ветькак ёзась, валакавтнесь «озамо тарканзо», тетьксесь сельмензэ телевизоронть икеле. Кой-зярдо пачколесь, кие тердьсы, мезеньгак тееме: пенгень лазномо, пильсеме, ловонь урядамо, навозонь ливтнеме, пирямо, латонь стявтомо... Тевтнеде велесэ тельняяк куш сёлт сёлтак. Пандома питнесь, эрьвась соды, теке — кши, ямт-кашат, палыця ведь... Нурькинестэ ёвтазь, стопка. Авазо васня сёвнось, ацирьгалесь, музгордсь неть яксематнень-«важодематнень» кисэ. Пачколесь эрдек-стамоскак. Кода ансяк эзизе снартне кардамс «покольнензэ» эвсень, превень-рунгонь наксавтыця ормадонть — стяко. Эрьва «банядо» мейле, мик чирьстэ ёвтазь валдонть, Ванине тейсь весе мекевланг, правтсь, пря чавсь, костояк ды муемс гуйведенть, начтомс-ёрвалдомс кирьгапаренть. Аламонь-аламонь сонгак кармась ваномо цёранзо «номертнэнь» лангс сельме понань пачк. Чарькодизе: ацирьгалемадонзо, седеень раздемадонзо мезеяк а полавтови. Секскак весе апаротнень, ризкстнэнь-мелявкстнэнь ды янксематнень кирдсь мештьсэнзэ. Васня ульнесь тензэ визькс шабратнень, содавикстнэнь икеле. Шкань ютазь та-кода тененьгак тонадсь. Мезес ансяк, видеяк, а тонады ломанесь! Ков молят, эрямось кармавтындерятанзат — тонадат.
Окойники, кавтошка ковонь ютазь, Павел Андреевич мерсь саемс Каргинэнь кудодеень-плотникень бригадас. Содась, теньсэ а полавтсак коронзо. Мейсэ лиясо, кода, превс икелень педагогонтень эзь саеве. «Паряк, узеренть «танстезэ» аламнеде превиявтсы», — чачсь кемемань мельне прявтонть прясо. Теке марто содась: тесэ, те бригадасонть, чапамось сонсь кургс эци. «Тувось, — кирдсь мельсэ валмеревксэнть, — рудаз эрьва косто муи». Тесэ сонзэ вешнемскак а эряви. Бригадась путнесь ды витнесь-петнесь аволь ансяк колхозонь фермат-мезть, стявтнесь кудот-кардазт Кузвелень эрицятнененьгак. Пачколить, кадык чуросто, Эрьмезьвелевгак. Те эли тона азорось, малав свал, пандома питненть юткс совавтнесь андомантькак. Юткозонзо, [151] ярсамонть молеманзо кис, — те самай «стопканть». Нурькинестэ ёвтазь, кудонь путыцясь андсь-симдсь, зярс важодсть кедьсэнзэ кудодейтне. Прядомга седе сюпавсто каванявкшновить. Паневицядонть путневи, кинень зяро увтяви.
Вана косо, вана кие марто исень трактористэсь, апак урьваксто, допрок од цёрась ушодсь важодеме.