Ванине (2011)/6
[101]
| VI |
Талай уш Дораень Куля ды кенярксозо-цёразо, сараздо ды зярыя реведе башка, кирдить скал. Эсь шкастонзо, те ульнесь Иванонь маштовомадо мейле, зярдо кадовкшнось потяка эйкакш марто, сюракшонть миекшнызе. Ськамонзо стакаль кирдемс сонзэ. Мезе ашти ансяк тикшень анокстамось! Иешкань ютазь чарькодизе: кода стака илязо уле, ловсонь, оень-вельксэнь максыця кардазсот улезэ, сонтемензэ эрямось а эрямо. Лавсьсэ кулдордыцянть, шкань-шкань рангицянть, стякшномо тонавтницянть туртов эрявсь ловсо. Теде башка, мезе путат, сыть инжеть, икелест? Ловсось — те верек ды солавтозь ой, топо, велькс, режнезь ды чапавтозь ловсо... Ушодат прякань панеме, мезе теят ойтеме-топовтомо? Сюкорот? Ойнеть таго улезэ. Велькстэме ды чапамо ловсовтомо модамарень кашаськак а каша, явавтозь каштомсо ловсос пидезь модамартнеяк а модамарть.
Куля васня рамакшнось ведрекш. Скалось сеске эзь «изнявкшно». Шкань ютазь учовсь вазыямозо, ды ярсамопелень кедьгесь сюпалгадсь. Ванинень ловсозо ды эйстэнзэ пидевикс-теевикс ярсамопельтне эзть маштне. Ансяк, цёра, каст, виевгадт, превияк!
...Телень валске. Ашолгадомо а эрязкали. Куля сонзэ а учнияк, сон талай уш пильге лангсо. Тев мельга тев модерди. Вазонть симдизе, скалонть потявтызе, каясь тенст тикше. Кенерсь, теке басом, вельмевтемс толнэ ды уштомс каштомонть, пидемс-панемс ярсамс. Тевть, тевть, а ушодкс тенст, а пе. Чарак, теке урнэ велиця чаро потсо. Веленть истямо эрямонь лувозо, а оргодеват эйстэнзэ.
Часонь нурька налось умок уш эскельдясь сисементь трокс.
[102] Ванине яла уды. «Ох уш те школась! — ёндолнэкс ютась аванзо прява пеняцямонь нолажа мелесь. — Удоволь ды удоволь. Ней сави пувтамс. Удомазояк, маряви, эзь ява. Мекс вейксэсэ а ушодыть уроктнень? Мезень вадрясь, сезнемс пакшатнень удомаст?..»
— Стяк, цёрам, стяк. Шказо уш сисемде ламо. Урокс а (кенерят, саты, панжить сельминеть, — Куля тормошизе бока лангсо, киремезь удыця цёрынензэ лавтовдо ды ютась тевензэ поладомо.
Ванине панжинзе сельмензэ, нузялдозь штавтызе байконь, алга ашо коцткесэ ацазь, вельксэнть ды варштась кедьсэ кандтневиця часонзо лангс. Сельмензэ ёзазь, озась, нолдынзе штапо пильгензэ коникенть чирева. Варштась вакссонзо стулонть лангс — понксонзо а неявить.
— Ава-ай! Понксон косот? — пижакадсь, каятотсь кудонь келес цёрыненть вайгелезэ.
Куля кадызе тевензэ, ютась кудо куншкас, варштась васня кирьмицязь аштиця Ванине лангс, мейле — аксялов. Эскельдясь коникенть ваксс, пульзясь, венстизе кедензэ ды таргинзе «ёмазь» понкстнэнь.
— На, кирдть! — каинзе «муевкстнэнь» цёрыненть кумажа лангс. Ютась каштлангонь чалгавкс ваксс ды лембе «каштом-кайстэ» таргинзе понань цюлканзо, саинзе каштлангсто понань эждезь кемнензэ. Ванине мельде-валдо, кургонь автнезь оршинзе понксонзо. Авазо, тонадозь, комась, тонгинзе пильгезэнзэ цюлкатнень, мельга — кемтнень.
— Ну вот! Ней ютак чамань шлямо. — Куля кедте ветизе цёранзо каштомикелев. — Ужо, иля капша, шлямкаентень васня нуртян лембе ведне.
Авась амольдясь покш кечесэ томбалангсо чугунстонть эждезь ведь ды каизе козонь эрявсь. Путызе тарказонзо кедьгенть, комавтызе цёрыненть прянзо тазанть вельксэс, бульдерь-бульдерь шлизе чаманзо. Саизе стенас понгавтозь нардамонть, эрязкалезь нардтнизе, илязо начко майка мештезэ, чаманзо.
— Ну, ней курокке стувор экшс! Ням-ням... — Куля ве кедьсэнзэ почаксызе цёрыненть прянзо, омбоцесэнть шождынестэ, вечкезь рестядизе икелев.
— Па-панартомо? — тейсь эскелькс-омбоце ды лоткась Ванине.
— Вай, допрок стувтыя. Оршак.
— А ко-косо сон, па-панаром? — пельсоршазь цёрынесь ютась кудо куншкас ды ваннось перьканзо.
Окойники Ванине пурнавсь-сэрнявсь. Кежейстэ, пек кежейстэ вансть лангозонзо «яксинькай» частнэ. Текекс керш кедьсэнзэтнеяк. «Ков маштови зярс таргсемс удомат? Каня а содат, тонавтниця, школась эйсэть учи?» — марявсь, кортасть, превть макссть сынь.
Авазо стувор лангс путсь икелензэ печксезь кши, пачалгсо пандынекс вачказь, тюжа, псиденть сувонь нолдыця модамарень каша. Эзь стувто кандомс пенчкак.
Ванине эцесь-озась стувор экшс.
— Симемакс кашанть марто мезе теть эряви? Чапамо ловсо? — стясь каршонзо, кевкстсь авазо. Учомс эзь саво.
— Э-э.
— Паряк, сахар марто ловсо?
— Э-э.
— Чай, ламбамо чай а кармат?
— Э-э.
— Эно мезе?! — эзь цидярдо, кепедизе вайгелензэ Куля.
— Лакавтозь, мейле кельмевтезь ловсо, — окойники нуднезь ёвтызе мелензэ школьникесь.
Кулянь лоск мерсь оймезэ. Ули истямо ловсозо! Виде, лембе аламнеде ды те зыянось а покш, а кувать озавтомс стопканть кельме ведьс.
...Оршнесть телекс. Авазо витнинзе Ванинень лангсо пальтыненть сормсевксэнзэ, сюлминзе, иляст кельме чама боканзо, шапка пилензэ, ливчанясто чочнинзе повтнень, цюцьк палызе чамаумарьс ды вечкезь, кутьмерьс шождынестэ бонтядезь, мерсь:
— Ну, миньгак аноктано! Чийть! — кудо кенкшенть панжомсто мерсь оршневтицясь. Сонсь эзь лисе.
Куля эрязасто ацызе цёранзо мельга апак пурна кадозь удсема тарканть, путсь кургозонзо Ванинень пачалгсто зярыя пенчть модамарень каша, прядызе стопкасо кадовикс ловсонть. Оршнесь, лиссь кудосто, зэртьсэ пекстызе мельганзо кудыкелькс кенкшенть ды валгсь кузтемаванть. Кадык школань тевензэ тонавтынзе — класстнэнь уштомо якась дюм чоподава, — ялатеке молема. Мелявкст. Каня сынтемест эряват? Сынь, секень вант, улияк эрямось. Сынст эйстэ сон кодавияк.
[104] Школантень ниле кудодо апак пачкоде эрясь Ванинень весемеде вадря ялгазо, Чичав Палю. Кавонест сынь тонавтнить котоце классо, зярс-бути аштесть мик ве парта экшсэ. Мейле тонавтыцяст явинзе. Беряньстэ, маряка, пряст ветясть. Цёрынетнень малавгавтсь, тейсь оякс ве ёнов молиця кой-мезень кувалма уцяскаст. Палюнь тетязо вечкилизе «гуй веденть». Зыянось лиссь мартонзо чадыведь шкасто. Сёлтланга ардомсто ветямчарось тензэ эзь кирдеве, ды тракторось митялкат прась сёлтонть мей ёнксозонзо. Истя Палю кадовсь тетявтомо. Текекс, кода Ваниненьгак, арасть а лелянзо-ялаксонзо, а патянзо-сазоронзо. Ськамонзо. Вейкине эйкакш. Мезеяк а теят: уцясканть икелеть киштеме а кармавтсак, ажия юткскак а совавтсак.
Палю кудосоль. Неявсь, мезе-бути вешни, выр-быр чийни кудованть.
— Тон мекс а школасат? — серьгедсь Ванине ялганстэнь, ансяк кенерсь мельганзо пекстамо кудо кенкшенть.
— Авам эзимим стявто... Мекс тонсь уроконь таркас тесат?
— Ды-ды, теня, истяк, моньгак шкадо мейле а-авам пувтымим, — моткодезь ёвтынзе валтнэнь, кенгелесь Ванине. — Омбоце у-урокс мольтяно. Виде? Вера Сергеевна ялатеке текень ансяк теи — стявтсамам ды, порсонзо раужо лазонтень равтозь, ушодсы моронзо: «Каргин, снова не выучил задание! Каргин, когда будешь готовиться к урокам?!» Содат, Палю, те Веркадонть ды Пифагордонзо школав кинтькак стувтовлия. Ага.
— Монь весе порить, аволь ансяк Верка, — видькстась Палю, сонсь яла мезе-бути мучкась, тей каяви, тов...
—Адя эно, оршик пальтынеть, ды адя! Истя омбоце урокскак а кенертяно.
— Кенертяно.
— Кода кенертяно, шказо несак зяро? — Ванине кепедизе керш кедензэ, шаштызе ожапенть ды прясонзо-вановтсонзо невтсь часонзо лангс.
— Мон счас, — мыркстась Палю пеень пачк ды седеяк эрязасто кундась вешнеме цюлканзо-мезензэ, оршнеме-карсеме. Меельцекс каподинзе эземс ёртозь книганзо-тетрадензэ, шикадинзе юдминезэнзэ, автордась стувор лангсто кшипечть, ды эрязкалезь лиссть кудостонть. Истя кавто оят сыргасть школав. Молемаськак, мерема, эйзэнзэ минутат.
Омбоце урококс котоце классо улемаль литературантень. Тарказонзо путызь Ванинень «вечкевикс» предметэнзэ — [105] геометриянть. Литературань ветицясь, пачтясть, ормалгадсь. Секскак уроконзо полавтызь те самай геометриясонть. Панжовсь кенкшесь, ды классонтень уезь уйсь чикоркай, пачкат ютыця вайгелень азоравась, Вера Сергеевна. Шержейсэ токазь валдо черензэ валанясто судрязь удалов. Кодазь кавто пулонзо нолдазь аволь копорьганзо, а пурназь прякасмозонзо, мерят, кандтни каштаз. Яки сельмукшсо. Весе содыть, Вера Сергеевнань сельмензэ тюсост аволь вейкеть: витесь чоподасэнь, кершесь — прок кенерсь сэря, тюжала. Текеде, келя, кадовськак сыре тейтерекс. Келят... Кодат ансяк а эрсить... Кие содасы алкуксонь тувталонть? Ломанесь сон рузонь, сакшны Петровка вишка велестэ, содык азё, кода ды мезе ульнесь мартонзо. Содамскак, видьстэ меремс, эйкакштненень а мезекс.
Ванине уроксонть мари эсь прянзо шождасто, апак пеле, соды: Вера Сергеевна кевкстнемензэ а карми. Уроконтень жо улемаль литературань! Апак ёвта полавтызь лиясо. «Кевкстиндерясамам, мон сеске тензэ: «Мон а содылинь, карми геометрия!» Истя лисськак, тонавтыцясь эзизе стявто. Тешкстынзе журналозонзо кить арасть, ды ушодсь од тема. «Таго теке, — безардезь арсезевсь Ванине. — Биссектрисат, диагональть, эллипст, идемевсь саевлинзе! Эрзянь кельсэ истят валткак арасть, ёвтамстот келезэть пуворькс тееви».
Колмоце урок.
Евгений Васильевич, историянь тонавтыцясь, аволь сэрей, теине лавтов цёраломанесь, тескень, Кузвелень, фамилиязо Ледяйкин. Ёвтни, теке ойсэ вадни, куншка пингень шкань рыцарень турниртнэде. Рыцартнень кшнинь оршамопельдест, койтнеде, конатнень эрявсь кирдемс верень валовтыця налксеманть шкасто, изницянтень казнедест. «Мезекс сынь монень, неть рыцартне-мыцартне? — чийнесть Ванинень удемсормсевксканзо мельтне. — Кодамо монень тев, кодат оршавксост ульнесть неть тюрьгантнэнь?.. Куншка пингть, умонь пингть, эрьва кодат цётавкст... Прят таргози эйстэст...» Евгений Васильевич та-кодамо тувталонь коряс «рыцарень» темастонзо шаштсь ды кармась ёвтнеме рузонь цартнень-императортнэнь лемест: Иван Грозный, Владимир, Петр, Александр, Ольга, Екатерина, Мария, Павел, Иосиф... Кунсолыть тонавтницятне — карво ливти, маряви.
Лиссь оно кода: Ваня, Иван — лемесь аволь эрзянь. Аволь рузоньгак. Сон — евреень. Рузокс ютавтови «дар Божий», эрзякс, лисни, — «Пазонь казне». «О-оно кода!» — цяк эзь мене [106] кунсолыцянть кургсто. Грузинтнэ, Евгений Васильевичень валонзо коряс, мерить Ванядо — Вано, армянтнэ — Аванес, немецтне — Иоган, Украинань ломантне Иванка... «Те, сави меремс, мон — Пазонь цёра?» — абунгадсь ды эсь пачканзо раказевсь те мельденть Ванине. Владимир лемесь, маряка, пачкодсь Скандинавиянь кодамо-бути масторсто. Сон малавгак эзь тееве рузонь — «владеть» ды «мир» валтнэстэ. Ёвтавияк лиякс — Вольдемир. Игорь, Елена, Ольга, Петр, Павел, Евгений ды лия лемтнеяк аволь рузонь. «Те вана лия тевесь. Ули мезе кунсоломс, — тешкстызе эськанзо Ванине. — Ёвтнияк Евгений Васильевич вадрясто, кой-кува мик эрзякс. Кунсолат кунсоловлить!..»
Урокось ютась — эзь марявояк.
...Чокшне. Кудонь-ушонь тевтне аравтневсть-путневсть таркаваст. Куля аравтызе тарказонзо пряханзо ды озась пакарензэ экшс штердеме. Понань суринеть свал улест. Эно мейстэ кармат кодамо лембень кирдий цюлкат-варьгат? Увнозевсь сэтьме, пилень вадяшиця увномасо штердиця ялгазо. Ванинеяк псаканть марто налксемадо мейле панжинзе книганзо-тетрадензэ. Ансяк оймевиезэ кувать аштемс велькссэст эзь сато. Апак пекстне, кода понгсь айгинзе «школань тевензэ» стувор пес ды одс верендясь псаканть марто налксеме. Карькске пес сюлмась пуворязь-сюворязь конёв панкске, чаравты сень перьканзо — псакалевкскесь панси, бажи кундамс чийневтевиця конёвонь «чееренть».
Порведьсэ ваднезь-ашолгавтозь голландкась явась а умок. Кудосонть лембе. Потолокстонть нурьги «Ильичень лампочказо». Валдо, аволь кода войнань иетнестэ, керосинэнь содсо содыявтницятнень шкасто. Раужосто уштнематнеде, сод потсо эрямотнеде ледстнемскак а мезть. Се ульнесь умок, кадовсь ледстнемакс книгань ёнкскетнева. Ней ловнок, штердть, стак зяро мелеть, викшнек нильтякадомазот — сельметь а сизить.
— Ванине, — апак учо колызе каштмолеманть, пряханть моронзо чокшнень штердицясь. — Тон мекс течи араселить васень уроксо? Татьяна Михайловна тень пеняцясь.
— Чичав Па-палюнень совсинь. Вейсэ моликсэлинек. Эзинек кенере. Апак совсеяк аволинь кенере, — идесь прянзо Ванине.
— Вай, те кода истя?! — седе стамбаро чаразевсь пряханть нарозо.
— Ку-кувать удовтымик...
Куля општ мерсь.
— А-а.
— Кисэть визькс савкшны кирдемс. Урокс а якамсте апарось ансяк кадовськак, — моцькастонть сурсонзо сэлень ноцорямсто яла мурнесь Куля цёранзо. — Чарькодить?
— Чарькодинь. Ва-валске шкастонзо стявтомак.
Чатьмонема. Салава моры удомань савтыця моронзо пряхась. Чары нарозо. Ванине кадызе псаканть, налкставсь. Озась коникезэнзэ.
— Авай, мекс улкоть урокто мейле Ду-дунай Шурик, прок кежень пачк мерсь тень «муинькай»? — копачизе пряхань ирнэманть Ванинень човине, пшти вайгелезэ.
Авидечиденть, эйкакшонзо покордамодонть Кулянь рунгова ютась кельме соркс, марявсь, прок сельгеть чамазонзо. «Те а виде, те а виде!» — серьгедсь марязь валтнэде седеезэ. Теке марто, куродызь янксемат, эсь прянь чумокс марямо: мекс эзизь тешкстакшно эсь шкастонзо Иван марто эрямост велень советсэ, эзть теекшне тосо эрявикс конёв. Пачканзо ёзнынекс ютазденть кувакасто таргизе оймензэ ды нусманясто ушодызе ёвтнеманзо:
— Зяро, Верепаз, кежть, зяро нулгодьксчи ломантнесэ! Ну, весе велесь соды: тетять марто иеде ламо эринек мирдекс-никс. Кидеяк эзинек кекшне, эзинек визде. Ну, мезде? А мезде. Эринек тетять марто вейкенек-вейкенек вечкезь, мелень ванозь, ве лувсо. Мартонзо ютавтозь иесь эрямосон ульнесь ды кадовсь весемеде валдо шкакс. Секскак, цёрам, виздемс тонеть а мезде. Марязь валонть седей малас иляк нолда. Весе неть лавгамот. Аволь ванькс ойме ломанень кургсто маризе ялгат те валонть. Ну, Шурик — эйкакш, ламо мезе а чарькоди. Маризе те валонть ды мездеяк берянде апак арсе ёвтызе тонеть. Ну, мезть а эрсить! Ёртык превстэть.
— Авай, кодамоль тетям лангс ванозь? — кевкстизе Ванине аванзо мадемадо икеле кайсемстэ.
— Ну, мон уш теть ёвтнинь, ды аволь весть! — пейдезевсь Куля. — Лангс ваномс аволь алкинетнедель, аламнеде туторо кутьмерель, сэнь сельмель, валдо чама киськель, черензэяк валдольть. Истятольть муюконзояк. Ну, мезе теть поладксокс ёвтамс? Улевельгак седе вишкине версе турвазо, мазый улевель. Турвась колась мазычинзэ. Вай, ды мезть мон валт памордян?! [108] Вадря — кадовсь фотозо. Саик альбомонть ды вант. Вишкине, виде, фотокарточкась, ды мезе теят, лия эзь кадово, Весе?
— Аволь, аволь! Кодамоль сон, ёвтыка, ло-ломань марто? Ко-кортакшоволь? Кежеель?
Цёрынесь эцесь экше, зярс эзизе эжде рунгосонзо, вельксэнть алов, мадсь бока лангс, кирьмицявсь. — Я-я-якшамо... Аванзо пряхазо, маризе, дирнемеде лоткась, кунсолось кавтотнень ютксо чокшнень кортамонть, авань ды эйкакшонь вайгельтнень. Аламос аштезь поладызе сэтьме моронзо.
— Ну, кода теть меремс... Эрьвантень Пазось максы аволь ансяк вадря. Беряндентькак венсти байтяк. Вадря, ломаненть превсэ-мельсэ улиндеряй седе ламо пародонть. Кецнек. Ансяк, теня, лиякскак эрси! Тетять обуцясо весемеде питнейкс ловинь валонь кирдеманть ды кренч ведень авечкеманть. Аволь симемс, сельмензэ икелевгак илязо понгоне! Вай, стувтокшныя: вечкевкшнесь тень тевс правтомазо! Озадо аштемат эзь сода. Котьми, котьми... Рожоми — ярсамонзояк стувтсы. Вана истямоль тетят. Кортакшоволь? Ну, кода меремс... Седе ламо кортась аволь кельсэ — кедьсэ, тевсэ. Кежеель? Ну, кода теть меремс... Кинь сынь арасть? А эрявить сыргавтнемс. Тетят вана маштсь кирдемест. Монгак бажинь, а вельмевтнемс. Секскак нурькине эрямо пингенек перть пси кортамот эзть кирвазекшне. Ну, ульнесть кой-кодат пелькстамот, аволь тевтеме. Ну, мезть а эрсить эрямосонть? Кежиявтнемас вана, носкозь чатьмонемас эзинек пачколе. Вейкенек-вейкенек марязь эринек.
Чары апак капша пряхань чарось, чии ды понави сурекс понань сэльнесь. Лувсонзо, аламонь-аламонь, шкань-шкань лотксезь, штердицянть кургсто певерить ёвтнемань валтнэ.
...Тагояк, цёрам, тевень вечкемадонзо. Важодинек, содат, скалонь фермасо. Мон потявтынь. Тетят иешкадо ламо вансь стада. Кемат, скалонок теке полавтокшнызь, сеске ламолгадсь ловсост! Вана теть ваныця! Вана теть тевень вечкема! Мейле аравтызь фермань прявтокс. Содат кода тевенек туекшнесть?! Ну-у... кортамс а мезть, маштсь Иван ломань марто ве мельс прамо, секс тевензэяк мольсть.
— Фамилиязо тетянь ульнесь Ка-каргин. Содан. Ёвтнить. Моньгак Каргин! — кецнезь мерсь, сертизе аванзо ёвтнеманть Ванине; варштась каршонзо чопода вальмантень, прок тосо алкукскак сёрмадозель ды кортавсь фамилиядонзо.
— Тонеть вельсоветсэ лия фамилия максыксэльть — васень [109] мирдень, Вачаев Николай Фёдоровичень, Дорай Миколень. Мон мартонзо сёрмадозелинь. Секс тонтькак лемдиксэлидизь сонзэ фамилиясо. Сон, мон уш кода-бути ледстния, кулось. Стакаль ормазо. Фронтсто сакшнось томбавозь. Кеменьшка иеть мартонзо эринек. Пароль ломанесь. Тевень вечкицяль, кода тетят.
Куля шаштызе пряханзо седе малав. Чатьмонезевсь. Лип шкань ютазь поладызе ёвтнеманзо:
— Ильведькс, цёрам, теинек, эзинек сёрмадсто сестэ тетять марто полаксчинек. Вай, кода тень эряволь теемс! Ну, кода меремс. .. Васня теемаль явомань конёв Вачаев Миколь марто. Сестэ саволь якамс судга-кува, ардтнемс буйкуншкав. Эрявкшнось шка. Минек яла сон эзь сатно, ков-бути, минськак эзинек сода, чиезь чиинек. Секскак те тевесь эзь яксевтеве. Истят мельтькак превсэнек эрясть: каня тевесь конёвсо, кирьксаня печатьсэ? Эринек мелень ванозь, вечкезь. Ну, мезекс, марявсь, неть эрьва кодат конёв панкстнэ? Ну, мезть ней теде янксемс. Паро, тешкставты — тинь Каргинэкс. Куш, кода кортыть, тевесь аволь лемсэ...
— Ялатеке, — каясь трокс вал, колызе аванзо кортамонзо таркасо аштицясь, — Каргин фамилиясь седе вадря, нармунень. А те — Вачаев, «вачо», «вачо пеке», «вачо сельме»... М-хы!
— Ну тон иля мелявто тень кувалма. Кода меремс, аволь аламо майсемат савсь печтямс вачочиденть. Миненек, минденек икеле эрицятнененьгак. Таргоземат, превстэ лисемат, куломат... Мезть ансяк арасельть! Охо-хо, мезть теде ледстнемс! Вачаев лемесь — ледстнема сындест. Андомс, трямс прят, а куломс — те васень мелявкс. Секскак иля визде монь фамилиядонгак. Удомат эзь са? Мадтяно, паряк, а?
Куля стясь таркастонзо, видемтизе рунгонзо. Путызе тарказонзо пакаренть, аравтызе стена ёжос пряханть ды ютась цёрынензэ ваксс. Витизе вельксэнзэ, комась ды чмок палызе «покольнензэ» чамаумарьс.
— Мадть. Монгак мадян.
Куля мадстизе толонть, кайсесь, штавтызе вельксэнть ды чиремсь, зярс экше, эсь тарказонзо. Чико-о-орк пеняцязь мерсть келей коникенть пружинанзо сталмодонзо. Теевсь кашт. Кудонь чоподантень сеске совась вальмаванть ожола пешксе ковонть кельме вановтозо. Валдосонзо ацызе стуворлангонть, кияксонть. Совась каштмолезь, теке эжнеме, ды теевсь, мереват, општонть ванстыцякс. Кие редявлизе, аволь мадстевгак сельмень кериця, потолокс понгавтозь лампочканть валдозо? «Вай, ды истямо [110] коввалдо совсесь весть Иван марто мадемстэнек! — ледсь мелезэнзэ умонь весь. — Умок те ульнесь, а стувтомс, вантака, а стувтови!»
— Авай, мотоцикла тень рамат? — апак учо дильнезевсь — лазызе каштмолемань ушодксонть, тандавтызе ковонть Ванинень човине вайгелезэ.
— Мадть, матедевть! Саты, ванды кортасынек, — музгордезь, мельтеме мерсь каршонзо авазо.
— Рамат-арась? Ёвтык валот, — содась, кода свал, эсензэ, эзь арсеяк кунсоломо аванзо кармавтома валонть велькс потсо аштиця Ванине.
— Ну, валске, валске кортасынек, — таго ледстизе мелензэ Куля. — Вай, тон ансяк котоце классо тонавтнят ды уш мотоцикладо арсят! Кодат мотоциклат, каст куш аламнеде! Лесопедэть ули? Ули. Ну и ардтнек! Касат, прядсыть кавксо классот, сестэ уш...
— Да-а-а, те оно зяро учома! Палюнь авазо, содан, алтась рамамс, — кодаяк эзь оймаво, яла нернесь «мотонь» вечкицясь.
— Ну, кадык алтась! Те сынст тевесь. А мезть ломань лангс ваномс, — пелькстазевсть удомань таркас ават-цёрат. — Теяк. Неть самай «циклатне» чулгоневить эрьва чистэ. Содат теде?
— Содан.
— Эно мекс педить? Ярмактнедеяк арсемаль. Ну, косто зняротнень сайсынь? Верде сынь а певерить.
— Сюракшонть мисынек...
Куля апторгадсь. Сеске эзь муе мезе тень каршо меремскак. Мезе-мезе, истят валт эзь учне. Сынь пшти сардокс сялговсть седеезэнзэ. Эзь кирдеве — превсэнзэ кивчкадсь мель аламнеде тонавтомс назойгалицянть.
— Арсят-арась мезде кортат? Превсэть? Ну, тон мезе, марчонь кшиде арсят ярсамо? Ну, мезе мерят? А? Истя вана. Мадть, мотоциклист, мадть, зяроцеде уш мерян! Вай, авакай, удомамгак штатотсь мартот, — вайкстась, ускизе вельксэнь пенть ды копачизе прянзо.
Вень чоподась редявиксстэ тустомгадсь. Тенень лездась пелесь, конань келей раужо сёлмонзо арасть вальмава апак визде ваныця покш сувтеме чама ковонть икелев. Тешттнень лангсо покшонть мелезэль ваномс сиземадо оймсицятнень лангс, ванстомс сынст удомаст ды теньсэ лездамс таштамс од вийть топавтомс сыця чинь тевтнень. Арась, чоподасэнь пелесь теемс тень эзь максо, кардызе ваномадо.
[111] Курок Дораень кудопотмост, эйсэнзэ мелявкстнэ-кеняркстнэ, кортамотне ваясть удомань каштмолемань отьмас. Кудонть эрицянзо, кода лиятнеяк, валгсть валскень самс келей-келей, шкань а содыця масторонтень, конадо ломантне мерить Тоначи. Кинь превскак а совси, сон, удомась, — эйзэнзэ совсема. Тосо арась а рай, а ад. Арасть сынь, содави, Тосояк.
* * *
Мотоциклань рамамодо кортамось кадовсь удалов, таштомсь, мелесь вана эзь стувтово, кадык ютаськак се чокшнеденть мейле иеде ламо, сон эрясь чатьмонезь-кекшезь эсензэ эрямосо. Таго, кода сестэяк, виртнес-вирьпулотнес совась тюжа-ожо тюсонь явшиця сёксесь, таго киртявсть читнень кувалмост ды редявиксстэ экшендсь коштось. Эрямонь леесь, кода а васолга чудиця Инелеесь, лотксемат а соды. Дораень кудосо шкастонзо стякшнось вейкесь ды ушолесь топавтомо кудонь-кардонь тевензэ; омбоцесь, удоманзо явавтомадо мейле, пурнамо-сэрнямо школав. Мелявкст валскень, мелявкст чинь, чокшнень... Сынст эйсэ маряви эрямонть смустезэ, сонзэ, кадык аволь свал ламбамо, танстезэ. Арасть сынь — арась, а путови, а стявтови эрямось.
... Ванине ансяк пекстызе мельганзо кудо кенкшенть, вырновтызе коникс книга марто школань юдманзо, каизе лангстонзо ды ёртызе мельганзо куртканзо, дуборсо ютась икелев, телевизоронть ваксс. Чанк лепштизе эрявикс повненть — нолдтнемкайненть.
Кудонь чатьмонеманть сеске кшувавтызь калгодо ды кельме, электричества вельде теезь-виевгавтозь валт-вайгельть. Покш бассейнасо невтевсть уйнемань та-кодат пелькстамот. Эрьва уйницясь бажась уемс тешкстазь ютконть седе нурька, седе аламо шкас, эрьвась правтсь, вийть эзь вансто васенцекс улемантень. Ведесь бассейнасонть ванькс ды сэндеяк сэнь. Лангозонзо ванозь, Ванинень мельс сакшнось мель-ёжо: нейке кайсемс ды булдырк кирнявтомс эйзэнзэ. Теке тештинеть цивтордыть уемстэ теевиця ведень байгинетне. Мазый ведесь, мазыйть тештинетне, тейтертне, пелькстамонь прявтось. Ванат, сельметь а саевить экранстонть!
Ванине вансь.
Уйницятнень полавтызь тиграт-леопардт. Ушодовсь невтнема-ёвтнема лембе ёнга эриця пачатнеде: левть, тиграт, гепардт, гиенат... Кода а ваномс? Косто неевлить [112] телевидениявтомо? Ёвтневи сынст эрямодост-раштамодост, ярсамопельдест, обуцядост, седе сеедьстэ ледстневить валтнэ «экология», «аламолгадыть», «чуростовастневить»... Кодат, абунгадат, неть лембе мастортнэсэ покшт-сэрейть чувттнэ! Кодат сюпавт тосонь лейтне-эрьктне ведьсэ эрицясо!
Ванине яла ваны.
Шкась таркасонзо а ашти. Тигратнень-мезтнень таркас совасть экранонтень меште видьга невтевицят ава ды цёра. Сынь ушодсть ёвтнеме масторонть келес ды лия мастортнэва теевиця паро ды кажов тевтнеде — кулят.
«Нилинзе» Ванине ёвтницятнень валост-кортамост пестэ-пес.
Ваны эйкакшось кувтолдыця сэнь суликанть лангс кургонь автезь, пели теемс сырк, а муи вийть лутамс эйстэнзэ вановтонзо. Стувтызе ярсамонзояк. Теемс тень, видеяк, а шожда. Ансяк тюстнэ мезе аштить! Якстереть, пижеть, ожот... Кода а ваномс? Ваны, ваны, прок кияк муинзе. Ды окойники ушодовсь футболось.
Ванине ваны, ваны, ваны... Эзизе маря аванзо совамонтькак. Зяро шка ютавтсь кевензазь аштезь ве таркасо — кода эзь кезгеме, — а соды.
— Тон ярсыть? — кевкстизе ваныця цёрынензэ Куля кайсемстэ. Сон каинзе колошанзо, понгавтызе тулос эсензэ ды Ванинень куртканзо. — Ну, саты теть полгарьгавтнемс сельметь, кши оно керсек, пенчть-мезть анокстак.
— У-ужо, прядсызь ва! — валонзо нильнезь, мокнозь мерсь Ванине, экранстонть вановтонзо апак перьгавто. Прок педязь педясь эйзэнзэ.
— Иля учояк. Неть понкстомо альгачтне чокшнень перть кармить чийнеме. Теемс тенст а мезе! Айгорт, чийнить, бринькаить пильгсэст, тев а муить, — лавсаинзе «айгортнэнь» Куля каштомикелев совамсто. — Лоткавтык, лоткавтык. Каня теветь арасть?
Ванине марикскак эзь тее. Таймазкадозь-колдовазь аштесь «сэнь сельменть» икеле ды вансь, пельсь полавтомс лекстямонзояк, кедень оскань пансицятнень лангс. Кода налксить, чийнить, кирнявтнить, кода голт тейнить! Ванат вановлить. Кода рангить тыц пешксе трибунатне!
Куля эзь карма ярсамо, эзь учово тензэ «лаборкаенть» лоткавтомазояк. Сон саизе моргасто потявтома ведранзо, оршизе свалшкань «кухайканзо», тонгсь сэрей колошат ды лиссь [113] кардазъютконь тевензэ тееме. Котьмась байтяк. Тень андома-симдема, тонань... Меельцекс потявтызе скалонть ды совась ловсо ведранзо марто кудос.
Телевизорось цярнось пурьгинекс.
«Эзимим кунсоло! Эзизе лоткавто лаборкаенть», — пштикс ютась совицянть пачк неезденть-марязденть. Ванине яла тетьксесь сельмензэ, теке мукорь аштесь «телекенть» икеле. Мезе несь, мезде кортавсь-невтневсь-салынзе варма, совасть ве пилева, лиссть омбоцева. Эряви-арась конаськак невтевикстнэстэ, эзь сода. Содась вейке: ваномс ды ваномс, ваномс ды мезеяк а неемс, аштемс ды мезеяк а теемс, сельмть микшнемс икелензэ певтеме полавтневиця, ламо, эрьва кодамо тюсонь картинкатненень.
— Лоткавтсак-арась?! — серьгедсь Куля ведранзо марто каштомикелев совамсто. — Мекс мезеяк эзить анокста ярсамс?
Каршо — оскань кучкорицятнень лангс ваныцятнень, «сэредицятнень» шкань-шкань увныця вайгелест. У-у-у, а-а-а...
Азоравась педизе ловсонть ды кайсизе колмо литрань суликань банкава. Кадсь зяро-бути симемс нейке. Нуртясь, эзизе стувто, пильгензэ перька чарыця-велиця псакантень. Сонгак ломанькс важодеманзо кис веши, секень вант, ангорятанзат.
Ванине, окойники, «лепиявтызе» прядомань ды сиземань а содыця чинек-венек рангицянть-морыцянть, кандсь пенчть-пеельть ды озась стуворонть экшс «эсензэ», свалшкань тарказонзо. Авазо таргась каштомсто ды путсь ярсамопель.
... — Ну, кода, оинем-дугинем, кундатано тевс? — пшкадсь Куля, теке ломаннень, пряхантень ды аравтызе коникензэ каршо. Ярсамодо мейле паро ёжосо, мельспаросо озась штердеме. Ней — пона, а зярдо-бути... Ледсть мелезэнзэ тунь лия, умонь-умонь, мушконь-пазень штердема шкатне. Те ульнесь войнанть ушодовомадо икеле ды мейле. Зяро тевть мушконть марто сюлмавозельть! Канстенть видема, таргама, пазенть башка ваявтома, таргама ведьстэ, костяма, чалгама... Колхозонь «трестанть» чалгамо усксесть заводов. Мушкостонть эрявсь тейнемс моцькат, мейле судрямс, штердемс, теемс кесакт, велямс, урадомс, лиямс, кодамс, коцтонть ашолгавтомс, костямс... А ушодкс, а пе! Аволь эйпаро, эчке книга лисевель, кундавольгак кияк сёрмадомо штердемань-кодамонь, умонь шкань оршамопелень анокстамонь тевтнеде. Питнейде питней улевель сон. Кадоволь ледстнемакс умонь шкань эрямодонть, печтязь стакачитнеде, кудоютконь тевтнеде. Паряк, улияк истямо книга? Улиндеряй, — пек паро!
[114] Кулянь пряхазо ушодызе сэтьме, апак капша моравикс кувака моронзо. Теке, мерят, псака мурны. Ноцори авась, чудезь чуди суронзо юткова чова сэльгинесь.
Цёразо чукадинзе юдмастонзо стуворс книганзо-тетрадензэ. Кундась уроконзо тееме. Варштась ве книгас — пекстызе, варштась омбоцес — сеньгак арасель мелезэ ловномс. Зяро-бути тешкст тейсь тетрадезэнзэ ды уцор-уцор стясь стуворонть экшстэ. Нолдызе телевизоронть, лоцьк озась голландка ваксс каршонзо. Минекс-сюнокс оршнезь телекень морыцятне нардазь нардызь кшнинь вайгельсэст пряханть моронзо.
Куля тарск тейсь.
— Ну, мекс истя пек нолдык? — рангстась штердицясь пурьгинень зэртенть изнязь. — Вишкалгавтык седе! Пиленьгак потомсть.
Ванине ютась ды лавшовгавтызе «ящикенть» зэрнеманзо.
— Мекс-бути урокот куроксто теевсть, — тевензэ апак кадо серьгедсь авась экранс ваныцянтень.
— М-макссть аламо, — кивчкаиця «сельмстэнть» вановтонзо апак сае, мунзазь ёвтазь кавто валсо идизе прянзо Ванине.
— Зяроце чи уш «аламо». Ну, зярдо эно макснесть ламо? Тонь яла аламо. Пиледе а усковат телевизоронть эйстэ, — эзь ойма, эзинзе сае превс цёранзо валтнэнь Куля.
Ванине чатьмонсь. Вансь футбол. Мейле панжсь лия канал. Келей лавтов, квадрат ёнов молиця чама цёра морась моро. Марявсь, кургонзо келейстэ панжомсто амзордасы ды нильсы керш кедьсэнзэ кирдевикс микрофононть. Сонсь чавсь, прок айгор, бажась пилысэнзэ чувомс варя. Удалонзо кирнявтнесть, теке обезьгант, минекс-сюнокс менчевсть ды тулдаскавтнесть пукшост эль оршнезь ават-авинеть. Весе, мезе невтеви-ёвтневи каналтнэсэ ды программатнесэ, рузокс. Те масторсонть теке лия кельть арасть!
Куля нувсезевсь. Прязо стакалгадсь. Пряха нарозо кармась велямо-дирнеме стамбаро ды лотксезь-лотксезь, сизезь. «Арась, те а штердема», — сась мельс ды стясь. Айгизе колмо пилысэ «оинензэ» тарказонзо. Путызе ваксозонзо эземнес пакарентькак. Ютась голландканть ашо «стенанзо» малас. Озась. Вейсэ Ванине марто педявтызе вановтонзо экрансонть визьксэст невтниця морыця-киштиця аватнес. Ушодовсь од программа: кармасть эй лангсо санькасо кирякстнеме. Истя ливчанясто, эрязасто, истя шождынестэ ды мазыйстэ ардтнить! Вармакс ливтнить. Кода ансяк а менчевить! Натой а кемевияк. Вановтот а саеви, ванат вановлить.
[115] А тюстнэ, тюстнэ кодат! Каня путовить пиземчирьке ваксс? Секень вант, а неицяськак несынзе. Кода истямо мазычинть а ваномс?
Шкась неть морыцятнень-тёкаицятнень, футболтнэнь-мезтнень лангс а ваны. Азярдо. Сон моли, бути а чии. Ават-цёрат яла тетьксить сельмест. Стувтызь частнэньгак. Кулянь сельмекерензэ, окойники маризе, кармасть стакалгалеме.
... Валскестэнть кудонь азоравась сыргозсь-стясь, кода свал, ашолгадозь. Удомазо, тешкстызе эськанзо, эзь ява. Марясь ёжонзо аволь ёнсто. «Те а тев — лужалемс зняро, сельмть микшнемс, ваномс мазыльнеть. Сокоргадаткак...» — содавтызе мелесь удома тарканзо пурнамсто.
— Ванине, шказо сисемде ламо, стяк! — омбоцеде уш ледстизе авась цёранстэнь.
А сырк, а тарск.
— Ванине, пурнамс шказо! — серьгедсь вайгелень кепедезь. Ютась, эзь кирдеве корозо, коникензэ ваксс ды лыйк-лайк ноцковтызе удыцянть лангсто тавадксонть.
Ламбамо удомасо удыцянтень туемс ульнесь а ков — мерсь «вы-ы-й» ды озась, штапо пильгензэ нолдынзе коникенть чирева. Лип-лип варштась аванзо лангс. «Мекс пувтымик, мекс а максат тень удомс?» — кортасть стявтозь сельмензэ.
Куля цопадинзе стул лангсто кургонь автницянть оршамкаензэ ды эрязкалезь ёртынзе нувсицянть элес.
— Курок, курок седе! — мерсь машнетезь ды капшазь мекев совась моргас валскень тевензэ поладомо.
Ванине мельде-валдо оршнесь, начтызе-нардызе чаманзо ды эцесь стувор экшс ярсамо...
* * *
— Авай, мекс те шкас арась радиоланок? — апак учо сась Ванинень превс кевкстемась школав сыргамодо икеле.
Чатьмонема.
Кудосто лиссть вейсэ. Куля пекстызе мельганзо кузтемпень кенкшенть.
Ушосонть шумбрачинь казиця сёксень экше. Модась ялатеке зярс кизэнь, эзь кельме. Кудост икеле килеесь певерди, теке сельведть, сырнекс цитниця кизэнь перть таштавт сюпавчинзэ. Ават-цёрат кашторк-кашторк ютасть алганзо ды сайсть ёнкс школав. Вейкесь тонавтнеме, омбоцесь важодеме, шлицянь-нардыцянь тевензэ тееме.
— Авай, ка-каня эзик марсе те-те валонть? Ней уш сон ламонь ули...
— Марсемс марсия ды кода-бути...
— Кода теть ёвтнемс? Те теке жо па-патефонось, ансяк электричествань. Пластинкатне некеть. Куш чинек-венек морот кунсолок. Зярдо эряви, нолдасак.
— Вадря... Телевизорось аламо? Омбоце эрь,.. Вейкесь ранги, омбоце поводи эйзэнзэ... Ну, а питнезэ? Зяро ваткить кисэнзэ? — кевкстизе Куля, питнеденть икелевгак пелезь.
— Э-эрьва кодат улить. Весемеде а-аламо...
Марязь цифрадонть школав молицян ть мик киртявсть эскельксэнзэ. Кундатотсь келезэ. Чатьмонемадо мейле мерсь:
— Вельть уш акепедсвикс...
— Ме-мезень те ламо! Кодаяк, аламонь-аламонь.
— Самай «кодаяксонть» тевесь. Ну, паро, карматано арсеме. Школадо мейле соватано лавкав. Сынь улить минек лавкасо?
— У-улить...
* * *
... Дораень Ваниненень марявсь а учови шкась, зярдо прядсы кавксоце классонзо, ды авазо рамасы, эзизе стувто кортамонть, кавто иеде икеле алтазенть. Онстонзояк некшнесь: сон мотоцикласонзо вармакс цюхаи Кузвелень куротнень-петнень кувалт, валдо сельме кудотнень икельга ды кшувавтни ки лангсо поксариця саразтнэнь. «Те кинь, кинь истямо набой, мездеяк а пелиця цёрась? Кинь альгачось?» — кармить исковамо вальмалга мандонест лангс нежедезь аштиця, вейкест-вейкест кулясо каваниця сыре ломантне.
Шкась а соды ве таркасо ботамот. Те ломанесь онкстни—зяро ютась, зяро кадовсь. Тевсэ-мелявкссо, аволь свал ильведькстэме, кадовсь удалов Ванинень эрямосо котоце классось, мельганзо — сисемецесь. Эзь марявояк теевсь ютазекс, кутьмере удало аштицякс кавксоцеськак. Шка... Сон чувто пряс кузнемат а соды.
Куля сась мельс тешкстамс цёранзо кавксоце классонь прядоманть, покштянь покштянок кортавксост коряс, таргазь стуворсо, неень кельсэ — эрьмев, сюпав стольсэ. Кажось а покш — прядомадонть мейле ютасть кавто ковт. Серьгедема зяро а зяро инжеть. Омбоце тувталгак тенень ули: седейнильксэнстэнь [117] топодить кеветее. Пежеть лиси — а тешкстамс истят покш, истят редявикс уликсчитнень! «Каня мон лиятнеде берянян? Чей, аволь меельце ломанян», — кирдсь превсэнзэ идема мельть.
...Кизэнь сэтьме чокшне. Чипаесь талай уш мусь сэтьме чевте удома тарка ды оймси, а лексияк, чинь-чоп псилгалезь важодемадонзо. Менель сэньштенть ланга аламонь-аламонь таргавсь сундерькс шкань чопода тюс сувне. Сон сравтневсь кудотнень-латотнень юткова-велькска. Вальматнень мельга-мельцек кивчк-кивчк содавтынзе валдо. Ней аволь кода икеле — цивтордсть, теке саразонь сельме, олгсо вельтязь кудотнесэ содонь нолдыця лампинетне. Сонзэ, типелькаенть, талай уш максызь музейс, талай полавтызе «ильиченсесь».
...Дораень кудост, сонзэ юртавазо, стенанзо-потолокозо кунсолыть цёрынень ды тейтернень чольдердыця вайгельть. Чоледить прок сёксень ушодовомсто кесакс пурнавозь озязт. Чив-чив-чив, чив-чив-чив... Ванине серьгединзе класстонть малавикс ялганзо. Кеменьшканест пурнавсть. Аштесть кавонзазь стувор экшсэ ды пеедькшнезь-мизолдозь кортнесть эсест юткова школань-кудонь тевдест ды лиядо-мезде.
Азораванть стомамонзо стяко эзть ёма — анокставсь-пурнавсь покшчинь эйпаро столь-стувор: палнэнь-палнэнь керсезь тувонь куя марто рестазь модамарть, пуштань алт, стопкава кайсезь чапамо ловсо, бальцянонь лапужа вакашкева ватксезь-керсезь селёдка. Мазылгавтыть стуворонть ваканс вачказь палонь-пал керсезь апельсинтнэ. Седеяк мазылгавтсть сонзэ Кулянь прякатне. Ашо почтонь, чевть, теке поспангот, сывтест топонь. Мерема, котьмамс, эвтемс мартост савсь аволь аламо, сень кис кургсот каладозь каладыть. Те неяви келей шаванятнестэ печттнень аламолгадоманть коряскак.
Эзь кемеве Кулянень — сась шка, пурназь стуворот эль а лондады эрьва кодамо ярсамо- ды симемапельтнеде. Каня арсевкшнесь од шкастонзо, войнань иетнестэ ды мейлеяк, истямокс тееви эрямось? Покш, а стувтовиця чикс ульнесь, зярдо стуворонть куншкас чуросто-зярдо пачколекшнесь кудонть келес тантейстэ качадыця, алкуксонь розень кшинь копша. Седе икеле, зярыя иень перть, лангсонзольть, кшинть таркас, лопань сюкорнэть, модамарень эли сюва марто човорязь кшинь кондямо паневкст. Ямось пиципалаксонь, марч эли эльденачко лопань, ансяк ашолгавтневсь, петневсь, кинь ульнесь скалозо, ловсынесэ. Вай, седе паро сеть умонь иетнеде, се пайстомо эрямодонть, [118] сеть пиштематнеде а ледстнемскак! А мезть седей калавтнемс. Ульнесь истя, ней — лиякс. Памшак, вачиндеряй пекеть, симть, начтыть, коськиндеряйть турват, мезе мелезэть леди.
— Весе пурнавсть? — зяроцеде уш пшкадсь Куля моргасто лисемстэ цёранстэнь. Сон аштесь озадо педсек-педсек аравтозь стувортнэнь песэ, пазаватнень ало.
— Весе тесэть, авай, ушодт! — серьгедсь Ванине таркастонзо весенень марямга. Лангсонзо ашо панар. Понксонзо дюм раужот. Олгонь тюс кувака черензэ судрязь удалов. Од цёра!
Авазо, вайгелензэ марязь, эскельдясь стуворонть пес. Цёранзо ваксс. Кургозо мизолды, сельмензэ цитнить, чамазо кувтолды. Лангсонзо валдосэнь ковта. Мештьсэнзэ эрьге керькст. А меряткак, иензэ байтяк таштавсть! Ванат, чиезь чийни каштомикельде кудо куншкас, кардазс, тосто мекев. Теке арасельтькак те чокшнеденть икеле нулакс сизевтиця, дарманонь саиця кавто читне-ветне.
— Эйкакшт, ну, тынь содатадо, мезень кувалма пурнавинек. Ну, васняяк, прядынк тедедень тонавтнсманк, прядынк кавксоце классонть. Те покш тев. Кие вадрясто, кис аволь пек, кавксо иетне эскелявсть. Ну... а теде башка... Кие ёвтасы, мезень кувалма пурнавинек?
— Содатано! — каятотсть вейсэ зярыя вайгельть.
— Виде. Течи Ваниненень топодсть... кеветее! — яволявтсь Куля, ансяк энгамсть вайгельтне.
Кудонть пештизе цяпамонь шалт.
— Ды сонзэ пиледе ноцоряма! — эзь кенере скимеме шалтось, рангстась кие-бути.
— Виде, виде! — каятотсь эрьва ёндо, кемекстызь ёвтазь меленть ламот.
— Виде, — мизолдозь мерсь, ве мельс прась серьгедицятнень марто Куля, сонсь вансь икелензэ аштицятнень лангс, — ноцорннк кода эряви! Монь кисэяк. Ну, кие кунды тень топавтомо?
Инжетне шалнозевсть. Эрьва ёндо гайгезевсть вайгельть:
— Дунаень Шурик!
— Шорянь Надя!
— Алькань Нату!
— Солаень Мика!
— Важдаень Юрик!
— Люда!
— Монь койсэ, парсте повсесынзе пилензэ явозь кудонь [119] тейтерест... Люда! Дораень Люда! — мерсь-серьгедсь кие-бути.
— А туи, — мелензэ ёвтызе Куля. — Эряви, эйкакшт, цёра, седе марямга човсезэ.
— Мон сонзэ киштевтьса! — стясь, эцесь пелькстамонтень Чичав Палю, Ванинень весемеде малавикс ялгазо. Мизолксось кургозонзо а кельги, турванзо тетькевсть пилестэ пилес. — Пелян пилевтеме илязо кадово ялганок. А чумондсамам?
— Арась, арась!
— Ойсэ, ойсэ седе курокке ваднить пилеть, Ванине!
— Ды седе парсте! — муевсть превспутыцят.
Палю лиссь таркастонзо ды ойсезь аштицятнень удалга чижк-чижк ютась кирдажонзо ваксс. Стясь удалонзо, кундызе кавто пиледе ды невтсь, прок снартни кепедемс потолокс.
— Каст, Ванине, сэрьс, сэрьс, — арсесь паро верев ускомсто, мейле кавксть-колмоксть ноцковтызе леменькаенть пиледе кавто ёнов: — аволь ансяк сэрьс, каст келескак, келескак, келескак. Истя вана, истя. Эсенек пельдеяк, Ванине, аватькак.
Ванине пиже-ожо вайгельсэ цирнезевсь, куш пилеть потомдыть, — каня алкукс сэредькстэнть, каня пеедькшнезь.
Каятотсть ракамонь ды цяпамонь увт.
— Превскак касозо, — поладынзе Палюнь валонзо, ансяк кудось општ мерсь, авазо.
— Виде, Куля патяй, виде! Ды сон уш нейгак «академик», — пейдезевсь Палю. — Я, дух стувтокшныя, чачома чи марто, Ванине! Казян теть книга. Ох, маштовомо теть карми! Вансак ва. Лемезэ вант вана: «Автомобильные Дороги СССР». Нерькстык ков увтян? Во-во! Ардтнек, Ванине, кува мелеть.
Палю озась тарказонзо. Озась Ванинеяк. Книганть венстизе аванстэнь.
Куля — дошуз азорава — аштесь стядо якстере ужосо, стуворонть песэ, вансь, теке нарвицька ципаканзо мельга, топавтсь эйкакштнень мелест, важов, сыреж ломанькс ветясь «чокшненть».
— Ванодояк кода шкастонзо казизе книганть, — кортазевсь Куля, эль кенерсть таркаваст ойсеме цёратне, оймасть, — истямо эрявикс казне казсь! Те, ёвтаса, вана мекс: Ванине цёрам туртов, чачома чинзэ кувалма, казян... мотоцикла!
— Ура!!! — пешкедсь, лаказевсь кудось пиле варяс эциця вайгельтнеде. Сынь эзть кельге стенатнень юткс. Ламот цяпасть стядо.
— Вант, билеттэме иля ойсевте!
— Ха-ха-ха...
— Ва, вармантень иля сасаво!
— Прававтомо, содак, иля лисне!
— Виде, виде!
— Милициятне сеске кершатадызь!
— «Ковровец», Куля патяй?
— Сон, сон...
— «Иж»-сь... э-э-э...
— Содан, содан.
Кудопотмось шалнозь шалнось. Чадыведекс. Кортасть верьга вайгельть, пеедькшнезь, эрьгелезь, теке мерят истямо эль кепедевикс питнень рамавкс тейсть эрьванень.
— Ярсадо, ярсадо, — марсевсь лиятнень ютксо Кулянь лийканя-валаня вайгелезэ, — ванатопонь прякат, вана брага. Арсян, сонгак удалась. Човов, тантей, натой корцьк мери. Ярсадо, ярсадо!
... Кудоютконь покшчинь «чокшнесь» ютась эзь марявояк. Меельцекс Куля каванинзе инжетнень шоколадонь ламбамкай марто тантейстэ качадыця чайсэ. Симсть апак капша, псинть пувсезь. Теде мейле лодор-лодор стякшность таркастост, ёвтасть сюкпря сыреж азоравантень ды мельцек-мельцек лиссть пси кудостонть. Ванине лиссь ильтемест. Кудось мерсь општ. Инжетнень мельга кадовсть чаво ды пельсчаво, апак сэве, кадозь ярсавкс марто кедьгеть. Эрявсь, содави, сынст пурнамс, шлямс лембе веднесэ, нардтнемс коське ванькс нардамосо ды путнемс таркаваст. Шабратненень эрявсь кандомс омбоце стуворонть.
Ванине совась мекев. Ве панарнэсэ. Апак корта, эрязкалезь кармась пурнамо-сэрнямо, седе лембестэ оршнеме.
— А-авай, косо пиджаком, а? Вешнян, вешнян,.. — кудованть тей-тов яказь, машнетезь пшкадсь Ванине.
— Мейле мусынек. Эрьга лездак аламнеде уряд теемс, — мерсь Куля цёранстэнь. — Несак зяро тевтнеде?
— Тонськак урядасыть. Монень клубов молема! Седе курок. Косо-о-о пиджаком?.. Авай, па-паряк, мусак? Те-теке ведьс ваясь, — Ванине чийнезь чийнесь кудованть, варштнесь аксялов, каштлангс, лиснесь кудыкелев, яла вешнесь оршамопелензэ.
Куля марязденть кезгемсь, лоткась пенчтнень-вакантнэнь пурнамодояк. «Тонськак урядасыть...» — цийнесть пилесэнзэ валтнэ. Зяро мель ды мелявкст путсь те «чачома чинтень», зяро [121] ярмакт, вий-илык ютавтсь-путсь, мотоциклась ансяк мезе ашти... ды вана тень кис истямо питне. «Тонськак урядасыть. Пельчасошка котьмавлинек ды весе. Прядовлинь монсь. Ней вана...» — кирдевсть превсэнзэ оймень сюморгавтыця мельтне, соласть седейсэнзэ чокшнень перть налксиця паро ёжотне. Нардтнинзе лавтовонзо трокс каязь нардамосонть кедензэ ды чатьмонезь лиссь кудыкелев. Сеске велявтсь мекев. Вить кедьсэнзэ кирдсь оршамопеленть. Ёртызе сонзэ учиця цёранстэнь ды кундась тевезэнзэ — пурнамо покш кастрюляс аванькс, оев кедьгетнень, омбоце кастрюляс — кадозь ярсамопельтнень.
Эзь правто валгак. Кинень? Пилевтеме стенатненень?
...Окойники, пенчтнень-вакантнэнь марто ведьсэ пулькамось, нардтнемань, таркаваст путнемань мелявкстнэ прядовсть. Левштапось путовсь тарказонзо. Савсь тенсемс, мейле натой шлямскак кияксонть. Шкась мольсь, тевтне таргавсть пелеведе мейлес.
Аволь ансяк чокшнень, чинзэ перть стомамотнеяк кадовсть удалов. Куля сизезь озась стуворонть экшс ды кувакасто таргизе оймензэ. Кепедизе вановтонзо ужосо пазаватнень пелев. Аштесь-тейсь, виень путозь, састо стясь таркастонзо ды венстизе кедензэ эйстэст вейкенть удалов. Таргизе тосто Ванинень почкокс тапардазь кавксоце классонь прядомадо «грамотанзо». Некшнизе, кирдтнизе сельмензэ икеле сеске максомадонзо мейлеяк. Ней, теке кияк кармавтызе, одс сась мелезэ варштамс те мазыйстэ печатазь конёвонть лангс. Саизе, одс озась тарказонзо ды каштор-каштор калавтызе-панжизе почконть. «Каргин Иван Иванович», — васняяк эртевсь вановтозо верьга, кедьсэ сёрмадозь валтнэнь эйс. «Иванович... Инешкипаз, мекс истямо казямоль седееть, мекс саик Иванонь, мезекс сон Тонеть эрявсь... — арсезевсь ды саизе нусманя, седеень сянгордыця ёжо. — Мекс эзить максо вейсэ кастомс эйденек?» Неть мельтнеде седеяк каладсь седей ёжозо. Вановтонзо сялгавтызе верде алов тешкстнезь «питнетнень» лангс. «Ванькс колмот, — мерсь эськанзо Куля. — Ков сынст марто? Вейксэце класос? Мезекс? Сынст таштамо? Вейксэцеденть а мезть арсемскак. Прястоткак, ава, ёртык. Ужока... Вай, ды мезть превть яжан?! Трактористэнь школав седе тов ильтяса. Ну, мезень берянесь? Самай верезэ. Профессиязо карми. Тракторист... Каня, кувака черь, теде арсекшныть васенцеде васенце класс ильтемстэнзэ? Вай, вантака, вантака — ансяк колмот! Куш вейкешка ниле кадоволь юткозост. Арась, вейкеяк [122] арась. Аволизеяк сае Пазось Иванонь, лиятат тевенек улевельть, содазь лиятат. Ней вана...»
Куля нежедсь керш кедьсэнзэ стуворонть пес ды видемтизе рунгонзо. Эскельдясь, венстизе кедензэ пазаватнень ёнов ды путызе тарказонзо нусманячинь сыремтиця конёвонть. Кайсиксэль. Эзь карма. Кодат мадемат, курок ашолгадомо карми. Ансяк вана Ванине... Косо? Кува те шкас азгонди? Мезе теи? Берянь мартонзо мезеяк илязо лисе... Кеветее тензэ. Эрьва ков неть иетне эцегядызь. Вант ды вант. Цёракс кенереме кармась. Эно кува, кува зярс злыдарди? Эрьва кодат арсемат эцесть превзэнзэ, эйстэст стувтызе удоманть самонзояк.
Окойники ушосто марявсть эскелькст, глянкадсь кудыкелькс кенкшень циндересь: «Учовсь, сась!» — капшазевсь лайнемадонть аванть седеезэ. Выр-выр каинзе лангстонзо юбканзо-ковтанзо ды эцесь велькс алов, прок умок уш таркасонзоль.
...Шкась мольсь. Аштемковось ды мельганзо медьковось кецневтсть весень пси чисэст ды шкастонзо молиця сэтьме пиземесэст. Кода ансяк а невтни прянзо менельксэсь! Тикшень урядамо шкасто менелень сэньштесь эзь правто пезеря петнявкскеяк. Ледть, костяк, уск, капак, анокстак тикше, велень эриця! Тедеде, меревксэнь коряс, учовсь сюронь паро норов. Кемевсь: паксятне казить, совавтыть эрьва кудос менть. Ансяк вана умарьковось ушодовсь тандавтнемасо — зярыя чить мельга-мельцек мольсть рисниця-поцердиця, шкань-шкань виев, весемень начтыця пиземеть, эзть максо урядамс кастозенть. Вадря, кирдевсь менельксэнть аксунгалемазо а кувать, аволь тарго-омбоце. Курок пелематнень — наксавтсызь ледезенть — полавтызь кеняркст. Ковонть омбоце пелькс малава менелесь теке марясь, мезе эряви, састь маней пси чить. Урядак, пивсэк, понжавтт, кшинь кастыця!
Шкантень ялатеке — пиземеть, цярахмант, манейть-опанят, наксадыть-арась паксясот розтне-кснавтне... — сон эсензэ соды, айгинзе кизэнь колмо ковтнень ды серьгедизе тонавтнемань ушодкс ковонть. Ванинень классто ламот поладызь тонавтнемаст седе тов, ютасть вейксэцес. Дораень Ванине, Чичавонь Палю ды зярыя лия цёрынеть ды тейтернеть ушодсть яксеме-тонавтнеме профессиянь училищав. Паро, сон Ванинень тетянзо велесэ, Эрьмезьвелесэ. Те Кузвелестэ, видьстэ-видьстэ пелеве ёнов эскелязь, колмо-ниле вайгельпень ютко. Мекев-васов, чарькодеви, сисем-кавксо. Мезе те од ломаннень, сисем-кавксо [123] вайгельпетне? Шлямочистэ ды таргочистэ а тонавтнить, кудосат. Каня берянь? Теде башка, зяро-бути пандытькак. Теяк зепть а разди. «Тракторист... — яла оймавтнесь эсь прянзо Куля, бажась нардамс превстэнзэ ёжонь калавтыця мельтнень. — Ну, мейле мезе — тракторист? Эно кие, ялгакай, карми важодеме, теевиндеряйть весе прохвессорокс? Кие карми сокамо-видеме колхозонь паксятнень?... Пошань Оло? Ну, мезень тесэ берянесь?»
Виде, ветень кундсицятнень эйстэяк кой-кить колхоздо васов эзть кирнявто. Истяткак Кузвелесэ улить... Ансяк колмотне эрьва косо колмот. Ды уш пря пек а эряви чавомс! Эрямосонть эрьва мезть эрсить. Лиясто ванат — пиже, цинсть алга сокардат — сырне. Цитни — а вановаткак. Эрси, содазь, мекевлангкак. Лангс ванозь, валонзо кунсолозь, сельмть сявадсты — кшни, соват потмозонзо — макшо. Каня аламо «пуло» мартотнестэ прявтонь эземс ойсить? Прянзо лиясь эйстэст истя кепедьсы, киньгак перьканзо а неи. Эрямось — човоркс, эрьва мейсэ сюпав.
«Ну, кадык колмотнень коряс седе сэрей класос эзь кузе, — аволь весть совсесь Кулянь превс навола мелесь, — сень кис, уш нейке оно кода чарькоди машинатнес, мезе яжави мотоцикласонзо, сельмень конязь витнесы, киненьгак а пшкали. Туить, туить училищасо тевензэ! Тетянь ёнкс, кода а туить? А мезть кавтолдомс. Колмот... Сынст мартояк киненьгак улема».
Куля бажась, мель путсь кемемс ды кемсь: Ванинень эрямозо туи виде-келей, паряк, кой-кува аволь валаняяк, кива. Кодамо ава, мерема, а арси истямо киде тяканзо туртов? Эно мезень кис путы зняро вийть, печти мелявкст? Теке марто эзизе кадно, кирдевсь мештьсэнзэ, прок сыявтыця сардо, кодамо-бути кекшевезь ёжо, мень-бути пелема.
...Ванинень чачома чидензэ мейле ютась ковдо ламо. Кулянь апак учо, кода-бути сеске, тердизь велень Советэв. Пачтицясь тувталдонть мезеяк эзь сода. Тердить — молема. Оршнесь «ломанькс»: эрьва чинь домка колошатнень таркас карсесь кедень раужо тюс аволь сэрей кочкаря котат, оршизе ашо балягинесэ «пургсезь» чоподасэнь кувака ожа платиянзо. Судринзе-пурнынзе черензэ. Сюлмась од, вестькак апак муське ашо паця. Пурнамсто эвтсть удемсэнзэ, теке коткудавт, эзизь кадно кевкстематне: «Мекс, мезекс тенст истя эряван? Паряк, мезеяк школань тевтнень кувалма? Каявксон каязь. Пеняцямот лангозон эзинь марсе. Эно мезень кис? Кодамо чумочи теинь?»
Велень прявтось кувака, мендявозь, теке кавалонь нерь, [124] судо, раужо черь од цёраломанесь, талай шканзо лангс апак вано, таркасонзоль. Вастызе Кулянь мелень ванозь. Мик стясь. Мизолдозь арсесь шумбрат-парт ды невтсь стуворонзо каршо стулонть лангс. Тердезенть мельга озась сонськак.
— Кода шумбрачись, Акулина Семёновна? — пшкадсь нупалень азорось икелензэ аштицянть сельмс ванозь, прок эйсэст сёрмадозель ды неявсь, мезде арси, кодамо сонзэ ёжозо.
— Па-пасиба, а пеняцян, — нурькинестэ, пелезь мерсь Куля.
— Те — васняяк. Шумбрачиде питней мезеяк арась. Э-э-х, мезть кортамс! Ёмавтындерясак — а рамасак, — путнесь апак капша валтнэнь «начальник ялгась», сонсь сокарясь, вешнесь мезе-бути стувор потсо конёвтнень ютксто. — Вана, вана, муевсь! Тевесь, Акулина Семёновна, оно мейсэ. Ютазь вестэнть цёрат пелеведе мейлес кода маштсь пансесь велеванть мотоцикласо. Зэртесь ломантненень удомс эзь максо. Кавонест, ульнесть. Цёрат, значит, Каргин, ды Чичавонь Ёгань Палюзо. Содаса тень. Идемевсь, аволь эйкакш! Кавонест, стал быть, «налксесть». Монськак мария. Ды те эно чумось аволь покш. Ушолемскак, стал быть, а эряволь. Ломань томбась — вана мейсэ берянесь. Паро эзь маштово. Томбавсь ансяк аламнеде. Тандадськак, значит. Седе покш зыян теевельгак?.. — чопода черь цёрась прядызе ёвтнеманзо. Раужо сельмензэ ды теке тюсонь муёконзо кувалма сон мольсь чикуншка ёнксотнень ёнов.
— А кеман, — мерсь эль марямга Куля. Чамазо ловташкадсь. — А кеман, Ванине аволь истятнэде. Марявлинь ардтнемадонзо.
— Берянь, Акулина Семёновна, — а кемат. Аволить кеме ды кемеват. Вана конёвось. Путянь Петя сёрмадызе. Те сонзэ гамадизе-томбизе цёрат. Вана вант. Паро, монь лемс сёрминенть кандызе. Путя атянь содаса. Лия таркавгак а пели, зэрнсвти. Милицияс, стал быть, кандовлнзеяк? Истямо куляяк тень ёвтасть: «мотоциклисттнэ» аламнеде токазельть... Значит, истя.
Прявтось кортась сэтьместэ. Кедьсэнзэ эзь ахоля, кирдсь эйсэст стуворонть лангсо.
— Ванине? Симезель? — Куля абунгадомадонть ды, кода марявсь тензэ, авидечиденть мик аламнеде тарск тейсь, сельмензэ покшолгадсть. — Тетязо петнявкскеяк эзь сайне кургозонзо, монгак лангозонзояк аволинь вано, ды Ванине копордазь?! Вай, вай, мезе моли! А кеман!
— Оймак! Седе сэтьместэ. Лаказь, стал быть, мезеяк а лиси. Вана мезе, кевкстника, значит, эсензэ, ульнесь-арасель истямо [125] тев, симезельть-аволь? — превть макссь стенас понгавтозь Ленинэнь портретэнзэ ало аштиця тонол раужо черь, чакш чама, мендявозь судо велень азорось.
— Кевкстнемеяк а карман. Монь Валинем аволь истятнэде. Те весе кортамот лангозонок. Вай, вай зяро кежть ломантнесэ! — эзь пота, эзь арсеяк оймамодо, псилгалесь, идесь цёрынензэ Куля.
— Вант, иляк кевкстне. Те тонь тевесь. Сестэ, значит, конёвонть ильтяса лия таркав. Кевкстнемест карми милиция. Чичавонсентькак. Сень, злыднянть, содаса. Шабранок. Содан, допрок акирдевикс. Аванзо мезекскак а путы. Уды, ярсы, значит, саразт мотоцикласонзо панси. Весе тевензэ. ...Арсекшнынь, значит, истя: васов а нолдамс те апаро кулянть. Эсенек ютксо, значит, ладясынек. Тон оно мезе теят. Те кода истя, Акулина Семёновна? Мон мартот апторгадынь, — апак эрязкале, сэтьме вайгельсэ ды киртязь валкерькссэ превс путсь аванть цёрась.
Куля — мезеяк эзь мере, стясь ды чатьмонезь лиссь, покордазевкс прянзо марязь, нупальстэнть. Стувтызе мельганзо пекстамс кенкшентькак. «Вай, авакай! Ну, мезе, мезе теемс? Молема Путянь Петянень. Нейке. Каня те алкукс ульнесь? — яла эзь кеме, яла кавтолдсь сон. — Вай, вай, мезес эртевинь!»
Штапо пря, келей коня, пачк сормсевезь чама Петя атя кудосоль. Аштесь эземне лангсо вальмало. Теке учось Кулянь. Шумбракстнесть, ды атясь тердизе сыцянть озамс ваксозонзо. Мандонензэ аравтызе лия таркас. Кевкстнеме, — мезть яки-паки, эзь карма. Чарькодсь. Учомскак эзь саво. Куля озамодо эзь арсеяк, ёвтнизе велень Советс тердтнеманзо, прявтонть валсонзо томбавомадонть.
— Петя леляй, те весе алкукс истя ульнесь? — прядызе кевкстемасо ёвтнеманзо.
— Тон исень вень апародонть? Охо-хо-хо... — стакасто укстась Петя атя. — Мон вана мезе меревлинь: а истя, а истя, кхе-кхе, кода монень маряви, кастадо эйкакшонк. Иля покордаво. Мезекс, ёвтык, эрявсь рамамс теть те драндулетэнть? Мезень эрявиксэзэ? Цёрат, ловт, кхе-кхе, эйкакш, нолго туло — тон тензэ истямо питней казне. Яла савттадо, яла кольневттядо! Каня те, кхе-кхе, пачтянзат парос? Мон урьвань лангс ванозь истя кортан. Иляк сае эсеть лангс. Цяк а кумажа лангсо якси пакшанзо икельга, савты — пе а соды. Секс мон истя, кхе-кхе, кортангак. Рашкондавтсынк лангозонк, учок мейле пельдест мелень ванома... Ломанькскак путомо а кармить. Урьвам монь... Кортак-иля, сон, кхе-кхе, [126] эсензэ. Марикскак а теи. А монь, а мирдензэ.
Куля эзь кирдеве, эзь учово, зярдо прядовить атянть «превей валонзо». «Весе тонавтыть, весе бажить превть максомс, прок монсень дух арасть», — эськанзо макссь питне марязентень.
— Тон эно, Петя леляй, ёвтык мезе ульнесь?
— Мезе... Якинь, кхе-кхе, тейтерень туртов. Атава тикше усксть. Эрявсь, кхе-кхе, лездамс. Тей-тов — шкась таргавсь пелеве малас. Молян кедьстэст куринканть кувалт келей киванть. Вить чиреванзо. Васня, кхе-кхе, сасымим, ёндолкс ютась вакскан, урнозь-цярнозь, валдосонзо сокоргавтыця мотоцикла. Мельганзо — цюх омбоце. Кинь сынь, содыть азё. Ве. Чопода. Ды читькак... Ламонь одтнэстэ уш а содан. Омбоцесь, вакскан цярнозь ардомсто, зыбердимим рульпесэнзэ бокас. Эзинь кирдеве пильге лангсо, тур-тар прынь. Ну, арсезевинь, кхе-кхе, ирдезэнь ловнынзе вардонь нона! Стиль. Штюп-кап мештем, карязон, бокан. Прок, сынь мельс, таркаваст, сюк Верепаз. Псинзэ пачк, кхе-кхе, эзь маряво. Шкань ютазь пачкодсь. Ирдезэнь, аламнеде токавсть. Мадемстэ пек маряви сэредьксэсь ды зярдо керш бокам лангс велявтан. Вана истя, кхе-кхе, ульнесь. Те эно кадык. Эртевельгак эйзэнь? ...Ланга, охо-хо-хо, ланга нолдтнетядо эйкакшонк! Эзть содаво кить ульнесть. Чопода. Валскестэнть шабратне тень, кхе-кхе, ёвтнизь кинь азаргалицятне. Валскень самс, ратажт, эзть максо удомс. Пелевеле майсевтсть «трататасост». Те кода истя?! Ков маштови?
— Паряк, аволь сыньгак? — нокась идемс чумонь теицятнень Куля.
— И-и-и, иля корта! Велесэнть, содан, истят «налкшкеть» ансяк кавтонь — Дораень ды Чичавонь. Шабратнеяк, кхе-кхе, кемекстызь арсемам. Сынь, тонь ды Чичавонь альгачось, теекшнызьгак веленть келес зыкатанть.
— Вай, кодамо апаро лиссь! Ужокая, паряк, Эрьмезьвелестэ китькак сакшность? Мезе сыненст колмо-ниле вайгельпетне, — кавтолдозь, яла кемезь — лиссь ильведькс, — пшкадсь Куля.
— Арась, Куля. Мон, кхе-кхе, кевкстнинь уш кой-кинь ялгадост.
— А содан, Петя леляй, мезе теемскак. Тарка а муян, — ризнэзь, эль а сельведень пачк, мерсь авась.
— Мезе... Конёвонтень ки а максомс. Мон ванды ютан, сайса мекев. Чей, минь ве велень. А эйкакшот марто кортнек. Кортнек седе калгодосто.
[127] ...Куля прянь нолдазь, стака мельтнеде сизезь, стамбаро мольсь Верепестэ Пичепев, кудов. Киньгак эзь нее, эзь маря. Валгиця чипаесь вансь сиземадонть якстере сельмсэнзэ эскелицянть кутьмерьс. Секс аванть икеле мольсь сулеезэ. Сонзэ, менелень прявтонть, эзь талновто, кодат сэпей ёжот чевелить аванть седеензэ. Ледстнематне эрямонь перть теезь ильведькстнэде, янксематне сиземань апак сода куйгельдсть Кулянь прясо. «Ванине симезь? Кеветее иесэ теевемс содавиксэкс кренч веденть марто? Вай, вай... Ну, паряк, те весе келят-мелят? Сынь лиясто допрок чаво таркасто лиснить. Вай, пелян, а «келят»! Чичавнень чиема. Прядсынь чокшнень тевень ды — сыненст. Паряк, нейке, а? Ужо, иля капша. Секень вант, кудосояк а ули. Васня Ванине марто кортнян, эряви весементь исковамс, мейле уш Палюс пачкодян... Улиндеряй алкукс? Визьксэсь зярошка! Дораень Кулянь цёразо — симагай!.. Ды тон истя мезть, симагай... Ну, варчизе, манявсь весть, мекс уш истя пря чавомс?»
Мелявтозь-арсезь, Куля ютась каль куракшсо кавто ёнга пирязь-вельтязь, кизна коське лейненть трокс, лиссь покш, фермав молиця кинтень ды курок пачкодсь кудов.