Валда ян/1929/03/Арелясайнек сьоронеконь урматнень эзда
Арелясайнек сьоронеконь урматнень эзда
Партияс и Совецкай Правительствась сембе мастороньконь эряйхненьди макстть кеме задача — маластонь 5 кизотнень эзда кеподемс миннь паксяванок сьоронь шачемать 30—35 процентти молемс. Те задачать тиеманцты оцюста лезды сьоронь гастяйхнень мархта тюремась, конат эрь кизоне юмафтыхть миннь паксяванок сьорода 30 проц. молемс.
Минь ширесонок сембонда пелькс сьоронь урмакс арси содукась (толу прясь). Ингольдень Пензань губерняса содукась суроть шачеманц кирфнезе 20%—с, пинемть — 7 проц., тозерть — 15 проц..
Эрь куд азорти тьожденяста лувови, мзяра осал канды содукась—толпрясь, сонь паксянь видефсонза. Содукать эзда видьмотнень ароптомасна тундань видем кампаниять сембода оцю задачац.
Пяк сидеста видеф пинемонь и суронь прява, розть и тозерть колазга тофт аф эряхть, синь эземозост арай равжа содлаца пуль. Кой кона кизотнень эзда тяфтама равжа пульда эряй сяшкава лама, што теляма йоткова равжа пульсь кеподи туцякс.
Равжа пульсь уленьди сьороть йоткса сяс, мес сон урмаесь содукаса (толу пряса). Соцукась — пяк пелькс и педи сьоронь урма. Сон урмаяфнесыне сембе сьоротнень, но башка пяк педи суроти, конац пяк урмаясь-ни.
Мекпяльдень кизотнень содукась вииста пець пинемти, тозерти и розьти. Сьороть йоткса равжа пульсь — се толу прять содукать ушотксоц-видьмоц.
Кода сьороти педи содукась
Сьороть урядамста и тялямста толу прясь срады пулькс и тьоженца педи шумбра видьмоти. Видема пингста, сьороти педьф пульсь пови модать потмос и к‘да товсь кармай лисема то сон педи теенза. Аньцек тозерти содукась педи панжема пингста.
Кода жа тюрема сьоронь содукать мархта?
Тянь колга эряви ароптомс аэрфтомс видьмотнень эзда содукать, штоба сон афольхце гасте видьмотнень штамста видемада инголя ведь мархта формалинца.
Штоба штамос видьмотнень формалинца эряви:
Шуфтонь боцькас или парьс каямс фке бутылка ару апак шоряк формалин и лангонзонза каямс 15 ведарка ведь, можна кельмоса.
Можна 3 ведарка вец каямс фке шкалька формалин. Тяда меля цебярьста сортировандаф или поньжафтф видьмось каяма кеме кескавс и нолдама аноклаф формалин ведти. Кескавса видьмотне шорсемат, штоба сембе начкольхть, и тяда меле таргамат парьста и ветть кольгомс кирдемат парьть вельксса. Тянь мельгя видьмотне кандомат латалу или кудинголи, вельхтямс кескавса или ватоласа и кирдемс 2 частт. Сяда меле видьмотне эрявихть обязательна эшкс васц срафтомс келеняс ватола или брезент ланкс и кирдемс кеськомозост.
Коськома васць, киякссь, кескафне или ватолась, конатнень ланкса ацафт видьмотне эрявихть начфтомс формалин веца. Штамда и коськомда меля видьмотне ароптомс аф эрявихть, те тиема инголькиге. Формалинць видьмоть аф гастясы и касоманц аф кирцы.
Формалинць пяк вии ведькс ащи яд, конац курок коськи, тянь колга сон эряви кирдемс кемоста пантф посудаса. Видьмонь штамс аноклаф формалин ведьц эряви нолдамс тевс эстакиге и аф кадондомс омбоце шити. Фке бутылка формалинць саты 50—70 пуд сьоронь штамс, к‘да штама кармайхть сембе обществась или лама кудазор.
Содукась можна машфтомс и коське способса
Начка способса (формалинца меднай купорозса) видьмонь штамась, миннь вастцонок пингста васьфни кой-кона шоряфкст. Сяс, тяниень пингть кармасть содукать толупре видьмонь машфтома коське способса.
1. Ведь аф кирьди косьфтаф меднай купорозса.
2. Парижскай сенемса.
3. Углекислай меднай купорозса и ст. тов.
Коське способса мярьгоньдихть штамс суронь розень и тозеронь видьмотнень. Коське способса видьмось можна штамс лама врема видемада инголя.
Коське способса штаф видьмотне коданга аф макссемат ярхцамс ломаненьди и жуватаньди.
Коське способса штамать колга кизефтесть аргрономть.
К‘да аф саты формалинць то видьмонь штамс новляйхть меднай купорос (лиякс сенемь кевь). Сонь формалинтть лаца шорьсесазь ведь мархта, 3 ведарка ветти 1 фунт купорос. Видьмотне новлявихть кескавса ветти и тоса кирдемат 5 минутт, а сальде косьфтамат.
Но купорозса видьмонь штамась сяда стака и сонь мархтонза эряви работамс сяда пелезь и новляма сон лувозь, а то можна гастямс видьмотнень лисемасна. Фке фунт меднай купорозсь саты 20 пуд сьоронь штамс.
Кода лядяма видьмонь штама тевсь и кодама сьора инголькиге эряви штамс
Видьмонь штамась лувондови оцю тевкс и сонь вятемац путневи Рикнень, велень советтнень, агронопнень и видема кампаниянь уполномоченнайхнень ланкс.
Эряви марстонь пуромкска эрь велева, поселкава азондомс сонь копганза и кеподемс лифхтемс приговор видьмонь штамать колга и кочкафтомс уполномоченнай.
Васенця эрявихть ярмакфтома штамс сортовай видьмотне контрактованнай хозяйствава, видьмонь кирди союзть и коопхлебсоюзть вельде и сяда беднай велэряйхнень, колхоснень и кооперативнай организациятнень вельде. Иляды велэряйхнень видьмосна штамат ярмак ланкс 12 трьошнек центнерть инкса.
Видьмонь штама тевти терневихть велень активсь, осоавиахимонь ячейкатне, комсомолсь, избачне и учительхне.