Yoshıp ótermen (Qayıpnazarov)
Qırq jıllıq joldasım qálemim menen,
Úlkenge kishige ádebim menen,
Jas jigittey shıyraq qádemim menen,
Talay asıwlardan asıp ótermen.
Sóz marjanın dóretermen dás berse,
Oqıǵanlar kewli tolsa, xosh kórse,
Xalqım kótermelep ilham, yosh berse,
Tolqınlı dáryaday tasıp ótermen.
Júrisseń jaqınlar alıslar bolsa,
Wájlesseń sheshiler tarıslar bolsa,
Shayırlıq sınalar jarıslar bolsa,
Men de kóptiń izin basıp ótermen.
Sır sandıq ashılıp sırlanar bolsa,
Gózzallıq tillerde jırlanar bolsa,
Gáwhar sóz ǵaznaǵa jıynalar bolsa,
Men de úlesimdi qosıp ótermen.
Aqıl-parasatı kir shalmas kúndey,
Naqıl-násiyatı tot baspas dúrdey,
Meni yadǵa alar, umıtpas birdey,
Xalıqqa kókiregimdi ashıp ótermen.
Ómirimniń urqanı tursa gúl atıp,
Ilham perilerin shayqap oyatıp,
Shiyrin sózler tawıp jurtqa unatıp,
Ele tilden dúrler shashıp ótermen.
Búlbiller sayrasa shámen baǵ bolsa,
Bárha tuwrı sóyler tilim saw bolsa,
Alda asıw qıyın asqar taw bolsa,
Xalqım qanat berse ushıp ótermen.
Heni ərman etsem, bári pitip tur,
Zamanım baxtıma xızmet etip tur,
Sazın sherte bilsem, sáwbet etip tur,
Kewlim párwaz áylep yoshıp ótermen.