Yolcu ğarip

by Noman Çelebicihan

Latin script

Ay, munarıñ sil yüzüñden, menden ışıq qısqanma
Men bir ğarip yolcu edim, qaldım qara dağlarda.
Yol şaşırdım, kün aşırdım sağa baqıp ağlar da,
Ah çekemen, aç yüzüñni meni yaman köz sanma!

Aç yüzüñni, saç nuruñnı! Uçurımlar, qayalar
Işıq alsın, aydınlansın, kölgeleri silinsin!
Topraq-topman qardaş iseñ, köksüñdeki kök taşlar
Ğranitler qara yerge ayna bolıp körünsin!

Yüregime sırdaş iseñ, közümdeki şu yaşlar
Çiçeklerge tökecegiñ o çıqlarğa qarışsın;
Tañ yıldızı doğar eken, elbet, meni o bekler,
Saç nuruñnı, yolcu ğarip asretine qavuşsın!