Watan-Anamız (Qayıpnazarov)
Shın baxıttıń besigine bólenip,
Altın besiktiń ishinde terbelip,
Shad turmısta shaǵlap ósip atırmız,
Burın hesh kórmegen qızıqtı kórip.
Usı shad kewilli, nurlı ómirge,
Tariyxta bolmaǵan jańa dáwirge,
Gúl kibi gúllengen Watanda ósip,
Biz jetistik bul baxıtlı dáwirde.
Baxıtlımız, shıqtıq shadlıq shıńına,
Kóp qızıqtı kórdik shadlıq shıńında,
Biyik shıńda biziń Watan-anamız,
Shad bolıp jasaymız kúnniń nurında.
Biz ullı Watanda óstik erjetip,
Denemiz tolıstı boyǵa kúsh pitip,
Álpeshlep ósirgen Watanımızǵa,
Kóp xizmet isleymiz, zor miynet etip.