Vpamuf in vol (4)

Söl datuvel vpa Schleyer pestimom dub diped e kön de volasetopot in Chicago. Benovipi ladlikün obas söle datuvel demü sikam at!

Zülag n. 9 kadema bevünetik vpa ninom te dili govamik. Segun §2 söl plofed Valeriano Mazzanti (Preside del R. Istituto Nautico di Gaeta, Italia) pevälom as kmal plo Tälän. Segun §3 vpaklubs de Audenaarde, Blankenberghe, Dendermonde, Gent, Looten Hulle e Waerschoot moboms söli J. Waegenaere in Kortryk as kmali plo Belgän. Segun §7 num yüfelas kma pemödom jü 34 e pösods u klubs 4 enunoms vipi, yufön kmi, al getön zülagis kma.

Deutän: Vpaklub Hannover. Egetobs liedo plo prämastaifam balid vobis te nemödik. Prämi balid (boned vpagaseda valemik) egetom söl Charles P. Emerson in Augusta, Me., Nolümelop plo penot: »Tölatamod nulik skinamalädas«. Penot: »Bids kil jimanas», lekonil sansibarik, peposkonöl fa F. Meister, pelovepolöl fa Schindler Josef in Neusatz, Nugän, peprämom kilido ko bukil ninöl lovepoli so bizugik märas jönikün popa deutik fa plof. dl. Lederer.

Klub egetom legivoti völadü maks ze 25 de söl P. P. Wallon in Bobrek-Beuthen O/S. Klub sepükom atoso legivele leladik dani ladlikün oka plo födam at steifamas oka gönü pakam vpadöla.

Nedän: Lasam valemik 5id kluba valemik nedänik ezitom mälul 14. in s'Gravenhage. Sluds veütikün ebinoms: Votön seti lätik bagafa 28. statudas also: Dunayel alik dulom des balul I. jü balsetelul lätik. Gletön bledili kluba »Nuns blefik se vpavol« jü glet telna nuik. Söl E. F. L. Haastert as cif e vl. C. W. Eck as jiläsiedel pedenuväloms e pla söl L. den Hartog, kel no evipom denuväli, söl J. G. M. Reijnders in Delft as sekretan balid-kädan. Lasam valemik suköl ozitom in Rotterdam. Düp malid glefid ezitom e poso damatelam yofapleda: »In välasälun klada balid»« fa kopanals kil kluba.

Se Volapük: Gased al pakam Volapüka 1894, Nüm: 4, Pads: 3-4.