Vpamuf in vol (1)

Belgän: Vp. mostepom ze gudiko in län at. Tidüps nulik pagivoms anu in Gent, Ledeberg e in tops smalik anik.

Löstän: Vpaklub zenodik plo Stirän in Graz epübom yelanunodi dö klubayel telid 1893. Nunod panindilom in nunod dö klubadunöf linedik e sevedik, dö stad käda, dö bukakonlet e ninom fino lisedi kopanalas. Klub emostepom gudiko i in klubayel telid e numom nu kopanalis 71, bevü ats i spodöl. Klub estitamom tidüpis kil du yel efegolöl. Spod ko klubs votik e vpans sevedik ebinom vemo zilik. Plo volasetopam in Chicago klub esedom fotogafoti gletik zifa Graz, nemalisedi kopanalas e monaläpoloti. Sevälef pafomom anu se söls at: plof. Karl Zetter cif, dl. med. Ernst Kollar penädan, lelötan l. r. Ludwig Zamponi kädan e bukakonletan, odl. fil. Karl Ludwig e potarevidel l. r. Josef Vaczulik läsiedels. Penädam jünuik e tidel kluba söl Karl Ludwig, kel emutom lüvön zifi demü studs oka, pamobom pötü lasam valemik kluba (balul 27) as stimakopanal demü melids gletik oma tefü stabam e plöb kluba.

Deutän: Vpaklub Hannover elabom glelasami ayelik balul 12. Pötü cifefavälam peväloms s. Max Wahren as cif, bi cif jünuik s. Steffens no evilom denu lensumön cali demü tumöd vobas votik, s. Fr. Wolf as penädan, s. K. Göritz as kädan, vl. Marie Hogrefe as jibukakonletan, vl. Anna Bültemann as jiläsiedan. In mulalasam suköl, telul 2, pesludos bevü votikos: no pübön büfuiko ladetabuki telid demü kod pesagöl löpo, ye pübön vpagasedi lönik nunog mälna a yel, kel sötom pagivön glato kopanales valik. Gits e bligs kopanalas spodöl pelonoms votiko. Zu prämasteifalams pomekoms fa klub desnu tel- u kilna a yel. Präms 3-5 polonoms (a segun stad käda e num dilsumelas); präms obinoms boneds pepelöl vpagasedas e buks vpaliterata. Dilsumam binom glatik plo kopanels leodik e födöl kluba. Ye i kopanals spodöl e bonedans gaseda obsik okanoms dilsumön,. if ninsedoms togo ko prämavob ot tefik potamäki nepegeböl läna omsik völadü potamon, kel mutom papelön plo peneds. (Prämasugiv balid e noets kuladikum popüboms in nüm suköl.)

Se Volapük: Gased al pakam Volapüka 1894, Nüm: 1, Pads: 6-7.