Votafomam e bafomam kaleda
Kudadin paxämöl nu fa nolavaklubs mödik in läns difik binom votafomam kaleda.
Stem e lektin enüloms so vemo pöpis valik das nedoms balikön, bafomön valikosi kel kanos pagebön plo fetans bevünetik. Potaklub valemik e monaklub pejafoms kodü ned at. Bafomam kaleda binom dil nulik vobada at püda e balifa kela volapük löfik obas obinom lefulam. Yeg at mütom sikodo nitedön obis.
Du yel 1884id, nets valik esedoms palesedelis al kongef in Washington (Pebaltats, Nolümelop), kelöp ejäfon düpi valemik.
Stelavaklub flentik estitom äyelo steifalami tefü votafomam kaleda “Gregorik„ pageböl nu fa nets pekulivöl ti valik. Pelorel steifalama ebinom söl Gaston Armelin kela ployeg, do kodom kalede nuik votamis te neveütik, yed dalofom bizugis gletik.
Stabs sita pemoböl binoms: vig de dels vel e kilamul de vigs balsekil u de dels zülsebal: mul balid kilamula alik ninöl delis kilsebal, muls telid e kilid laböl delis kils. Sikodo yel äninomöv velätiko folna vigis balsekil de dels vel, o. b. delis kiltum mälsefol.
Ab, bi dul yela mütom egelo leigön tüpi zigonama lölik tala zi zol, e bi zigonam at zitom du dels kiltum mälselul e za foldil bal, ozesüdos läpladön vayelo deli bal kel, al no distukon leodi mulas, popladom bevü del lätik balsetelula e del balid balula.
Me sit at kilamuls valik, e kludo yels valik obeginoms egelo dub vigadel ot.
Niludobsöd, a. s. das balul balid, o. b. del balid kilamula balid, zitom telüdelo: kialmuls valik ninöl velätiko delis zülsebal u vigs balsekil, del balid folula, velula e balsula ozitom i telüdelo balul, folul, velul e balsul laböl alim delis kilsebal, telul, lulul, jölul e balsebalul (ko dels kils alim) obeginoms lulüdelo; fino kilul, mäzul, zülul e balsetelul (leigo ko dels kils alim) obeginoms velüdelo.
Kodü leig kilamulas pepleseföl me läpladam vayelik de del bal e vafoyelik de dels tel, leodam at odenuzitom nefino.
Lensum kaledasita at fa nets valik äbinomöv pöfüdikün.
Se Volapükabled Tälik 1888, Nüm: 8, Pad: 60.
Se Volapük: Gased bevünetik tedelik, nolik, literatik e gälodik 1888, Nüm: 8, Pads: 64-65.