Vödem redaka (1932:1, p.3-4)
Pos tak in Volapükamuf dü yels mödik künobs dönu ad pübön gasedi nulik‚ kel okälälon dins veütik tefü datuvot jönik ela ‚Schleyer‛.
Lunüpo äliloy nemödikosi u nosi dö Volapük: kosädamedöm bevünetik ün 1879 fa pädan: ‚J. M. Schleyer‛ pedatiköl‚ kel suniko pos daved oka äkosgolon gloratimi, kel edulon dü yels ti 15.
Kods, kels estöpons Volapükamufi, si! kels jiniko emoükons oni lölöfiko, ebinons mödik‚ ab veütikün atas äbinon teläl gretik‚ kel päkodon bevü slopans lanälik Volapüka dub Volapükakongred kilid tö ‚Paris‛. Kongred at sevabo pejenükon ta vil ela ‚Schleyer‛ e neföro pedasevon fa om.
Posä ‚Schleyer‛ ijonom me jafot oka, vio kosädapük bevünetik äkanon pastukön‚ no äbinos plu fikulik ad datikön me geb stamädas votik e yümotas votik volapükis nulik. Pos Volapük kluo volapüks nulik vemo mödiks epubons‚ de kels as veütiküns mutons panemön els ‚Esperanto, Nov Esperanto, Ido, Idiom neutral, Mondolingvo, Lingua internacional, Myrana‚Nov Latin, Interlingua, Lengua catolica‛. Nonik pükas at ye kanon pleidülön dö pluam baluga, kurata u neuda leigodü Volapük ela ‚Schleyer‛‚ de kel patöfs at ebo binons süperods oka. Atose daloy bo kodidön, das Volapük no enepubon‚ e das nu igo lägon ad süikön dönu pianiko se stad glömäda jinik. Slopans fiedikün ona no eperons löfi oksik pro Volapük‚ e ven levüd ätonon ad kobikön dis stän ona, mödikans ebalons okis ad primön dönu komipi pro Volapük, ad jelodön gitätis onik ed ad födön paki ona.
Flens vönädik Volapüka etuvons slopanis nulik. Num slopanas nu gretikumon te nevifiko, ab spelobs, das num at suniko ovedon gretikum. Ad stütön e födön mufi at, neodobs tani, kel kobotanon obis. Tan at nog defon; demü kod at esludobs ad pübön gasedili at ad kälälön veütadinis Volapüka ela ‚Schleyer‛ ed utis Volapükanas.
Mutobs primön smaliko - gased olabon ün tim balidkömöl te padis fol a nüm - ab spelobs, das Volapükaflens obsik ostütons steifi obas‚ e das ofägükons obes dup slopükam lebonedanas nulik ad gretükumön gasedili obas.
Gasede egivobs tiädi: „Vpagased pro Nedänapükans“‚ bi balido muton binön jäfidot ela „Volapükaklub valemik Nedänik“‚ e telido bi steif obas muton binön, das i in püks votik gaseds somik popübons‚ kels omutons vedön jäfidots votikas Volapükaklubas valemik netik. Näi gaseds somik in natapüks pübabiks, neodobs i draniko zänagasedi‚ kel omuton palautön löliko in Volapük. Dü tim ye, das gaseds somik no nog dabinons, gebidükobs gasedi obsik i Volapükanes länas votik. Sekü slud at dil te smalik gaseda polauton in Nedänapük e dil gretikum in Volapük.
Ini gased obsik polasumons, sotefä spad odalon atosi, nunis valik dö Volapük e muf oka in lomän e foginän‚ nunodis kobikamas, nemis limanas Volapükakluba valemik Nedänik‚ nemis pösodas länas valik, kels vipons spodön Volapüko‚ yegedis in e dö Volapük, spodadilädi, nunädi lebukas Volapükik, e r.
Gased opubon büfiko balna a muls tel. Desinobs ye ad pübön nümis mäl yeloda balid at nog ünü kaledayel at. Suäm leboneda büfiko pelonon pro Nedän ad fl. Ned. 2‚-- e pro läns votik ad fl. Ned. 2‚25 a yelod. Limans kluba getons glato gasedi.
Nüm balid at poseagivon mö num gretik‚ ab nüms sököl popotons te utanes, kels ulebonedons gasedi at ed utanes, kels binons u vedons limans Volapükakluba valemik Nedänik. Limanamamon suämon fl. Ned. 2‚50 a yel.
Spelobs, das gased at pogetedonös fa alan böniäliko, e das odagetonös flenis mödik! Fovo komandobs obes mu vemo lüpotami yegedas smalik e nunas.
Vobädonös gased at i, das Volapük aiplu osevädikon, ed aiplu ovogikon‚ sodas olabülon dönu pladi, keli ilabon semanaedo, ed ad kel rigao labon gitäti! Täno dial ela ‚Schleyer‛ semanaedo ojenöfikon, sevabo: das odalabobs me Volapük püki, kel valemo pagebon as kosädamedöm bevünetik.
REDAK.
Volapükaklub valemik Nedänik: Doküms
Se Volapükagased pro Nedänapükans 1932, Nüm: 1, Pads: 3-4.