Toyǵa keldik (Qayıpnazarov)
Toyǵa keldik, tanıs, bilis, dos keldi,
Bári kuwanıshlı, bári xosh keldi.
Ádebiyat aqsaqalın qutlıqlap,
Qálem keldi, kaǵaz keldi, yosh keldi.
Súysinip tıńlaǵan shiyrin sózińdi,
Inileriń basa shıqqan izińdi,
Jolmurza aǵa, usı úlkei toy kúni,
Shın júrekten qutlıqlaydı ózińdi.
Jırımızǵa jırdan qostıń úlesti,
Geroylarıń biziń menen bir ósti,
«Palwan qız»dı tınlap Japaq baqsıdan,
Oqıǵanbız «Qız ketken»di, «Gúresáti.
«Aygúl-Abat»ıńnıń dańqı jayıldı,
Kórmegen ármandá, kórgen qayıldı.
Esheyinde sózge dilwar bolsa da,
Maqtawǵa áz eken shayır shayırdı.
Ósken eliń óńirińe taqtı gúl,
Qálemińniń qámbil bolǵan waqtı bul.
Jazǵan jırı jol tapsa hár júrekke,
Ádebiyat soldatınıń baxtı bul.
Toyǵa keldik, tanıs, bilis, dos keldi,
Bári kuwanıshlı, bári xosh keldi.
Ádebiyat aqsaqalın qutlıqlap,
Qálem keldi, qaǵaz keldi, yosh keldi.