Toladı kewlim (Qayıpnazarov)
«Álipbe» den baslap oqıǵan kúnler,
Bilim shıńın gózlep shulǵıǵan kúnler,
Bir birewdi kórsek túsedi eske,
Kózime eleslep ótedi áste.
Waqıt ótti, talay oqıwlar pitti,
Jasımız, oyımız tolısıp ketti,
Buyra shashımızǵa aq aralastı,
Bul aq basımızǵa tán aq jarastı.
Oqıǵan jıllardıń alıp esesin,
Islep júrmiz eldiń tapsırǵan isin,
Xızmetimiz xalıqqa jarasa jaqsı,
Basıp ótken jolǵa qarasa jaqsı.
Sonda islerimiz kórinse kózge,
Miynetkesh adam dep súyinse bizge,
Bolǵanı emes pe, boladı bálkim,
Usılardı oylap toladı kewlim.