Tem lifik

Notedonös. Lovepolots suköl in Volapük, fa redakel, "Dis Viols" e "Tem Lifik" papüboms dälü lautel dl. Oliver Wendell Holmes, de Boston, Pebaltats. Kanon tuvön liänis rigädik in nelijänapük, in "Plofed len Göledatab" e "Monosölel Göledataba" spetivo.

Glol valik Jafela olik palogom,
No te in vol lita kiöp
Sölal ebumom tloni omik
Flamöl, no te in tal diso,
Ko mels pezümöl kels kömoms e goloms,
E nisuls nenumik, glünik e solik:
Ninlogolöd bumoti olik milagik -
Ye sap tenüpik binom otik!

Lut smufik e dusik ko vatalubels äs peb,
Rönom müröl da ninovags pesävöl,
Flums kelas püpunik paklilöl spidoms
Glutöl ko led nulik e liflikum,
Dü lut bänöl tifom mofo
Lodi valik pedeiläföl atas,
Ed ats peledöl dub flam Nata
Lengonoms se fons vamik lada.

Slaf at peböl no dalom begön
Takedi, aitrilöl du vob okik,
Dü, skutam ledik sebunom zio
Al fulön filadi pevivöl de rüds
Kel dedilom tuvati lifa glutöl
In bäns nenumik kluziföl, skutam
Flämöl täno dilis deiläföl
Gegoulom al tuvön ladi peböl,

Ab logolöd bumoti sevedik muföl,
Pavamöl dub flam egelo otik,
Mabis lifik e flegis stenüdik
Ko tan nidöl e lefad silefik,
E pefetanöl al jains geidöl Lisala
Dub lins lemödik in kets dlemöl,
Alim pegavöl me zon fada
Kel malom omi as namät masela.

Logolöd stali vietik jiniko,
Peflökom de köls velnik lita,
Ye stalil nonik, kodü fäd anik,
Opölom in glöps at so klilik.
Lilolöd meli rölinöl tona,
Zilagöl zü jops e kanads pesvilöl,
Mufom lani stilik dub lil
E blinom musigi süla ete.

Notedolöd glöpi peslitöl kel labom
Tiki valik in plifs klänafulik,
Kel senom trili fibikün senama
E lelitom mofo vili sölöl;
Tikolöd dö vol tepik kel lödom
Pekiköl in ziöbs dagik e tufik!
Lelitastalis nämäla kelis fejutom
Ve fads omik äs rüds de glät.

O Fat! dälolös löfe godik
Mekön temis at klänik Olik!
Ven bäled nosöl e steif fenöl
Epüroms mönis klivöl lifa,
Ven daeg rölinom sus logs e lan
E kölüms lätik falik deüloms,
Fömolös püfi misalik, keli
Vamol koliedo, in föms sülik!

Se Kosmopolan 1891, Nüm: 1, Pads: 7.