Tayma sen
Jigit:
Tip-tik qáddin dúzegen,
Shámen ishin bezegen,
Nesip etse územen,
Gúl bolsań, gúl jayna sen.
Qız:
Saǵındırǵan kúnlerde,
Mawjıraǵan túnlerde,
Jawdıraǵan gúllerde,
Búlbil bolsań, sayra sen.
Jigit:
Juldızlı tún-ay bolsań,
Payızlı bir jay bolsań,
Ómirlikke say bolsań,
Bekkem wáde bayla sen.
Qız:
Sap júrekke ot qoysań,
Aynımasqa shárt qoysań,
Sózde turar márt bolsań,
Lebizińnen tayma sen.
Ekewi:
Gúl bolsań, gúl jayna sen,
Búlbil bolsań sayra sen,
Bekkem wáde bayla sen,
Lebizińnen tayma sen.