Takoto rawa iho ki te po,
E huihui ana mai o tatou wairua,
Kia piri, kia tata mai ki taku taha.
Matatū tonu ake,
ka maranga kei runga,
Whitirere ki te ao,
tirotiro kau au.
A, me he wairua atua
te tarehutanga iho.
E te manawa
i raro kapakapa, tū kei runga!
Homai he mata
kia haea ki taku kiri;
Taku kiri tirohanga mai nei
e aku tamariki nei.
Mauria atu ra, e Whiro,
Aku toto, aku tahe,
aku parapara tapu;
Kia kite mai koutou ko ahau ra tena.
E kimi ana i te ara,
I haere ai taku pokai
tara ki te tonga;
Tēnā ka paea
nga hiwi maunga ki a Ngati Hau
Ko te rongo pai tena i a koutou;
He rongo toa mai, hau ana
ki te taha-tū o te rangi!
Tē puta to rongo toa,
ka pēhia mai e Whanganui.
He toa e whaiatia ko te potiki
na Tu-whawairi-hau!
Kia ata whakaputa;
Tena ano ra nga tamariki toa
na Rakamaomao.
Kei te rangi, e haere ana;
na Motai-tangata-rau.
Takahia atu ra nga tuaone
kei Matahiwi ra!
Ko to tinana i noho atu;
Ko to rongo i tuku mai,
I wani mai runga o nga maunga;
Tae rawa mai ki ahau e noho atu
nei i te kainga
Kia whakatauki au i konei,
Aue! Taukiri, e!
|
Takoto rawa iho ki Te Po,
E huihui ana mai o tatou wairua
Kia piri, kia tata mai ki taku taha.
Matatu tonu ake,
ka maranga kai runga;
Whiti rere ki te ao,
tirotiro kau au.
A, me he wairua atua
te tarehutanga iho!
E te manawa i roto,
kapakapa tu ana,
ka maranga kai runga e!
Homai he mata
kia haea ki taku rae,
Taku pane whainga mai
e aku hoa.
Kia mauria atu ra, e Kawe,
na Ture te aroha
me te Rongopai hoki e
Kia kite mai koutou ko ahau ra tēnei
A, e whai mai ana i te ara
i haere ai te maungarongo
ki Te Tai Rawhiti
Tēna ka paea
nga hiwi maunga ki Tiwhanui.
Ko te rongo pai tena i a koutou,
He rongo toa mai,
kai ana ki te tahatu o te rangi!
Kati, ka puta to rongo toa,
kai pēhia mai e te ture.
He toa ano koe,
me whakamutu te mauahara ē.
Kia ata whakaputa,
tēnē ano ra nga tamariki toa
na Te Kotahitanga,
Kai te rangi e haere ana!
Nga kupu o te rangimarie,
takahia turanga
rori kai Kaingaroa.
Ko to tinana i noho atu,
ko to rongo i piki mai,
i wani mai i runga o nga maunga,
Tae ana mai ki ahau
e noho atu nei i te kainga
Kia whakatauki au i konei,
Aue! Taukiri, e!
|
