Tölatamod nulik skinamalädas

Givobs is sezüki se penot läda H. Wolter, pesedöl plo prämastaifam vpakluba Hannover, spelöl läpolön atoso i bosi »benöfü menad«, äs i devied pentoa at ebinom. Red.

Bevü spirs vönüpa äbinos el »Myrrhe« (latinapüko: murra) kel pägebom ko bizulöf äd as med jönama äd as sanamed plönas difik, pato pägebom lä malädams e viodams skina.

Id in timüps latikum e sägo in nutim äsevon ed aisevon sananämi ela Myrrhe, ye sananäm at no äbinom sätiko pöfüdik bi plog mökama myrrhaleüla pibölüdom, e tö sezükot leülik myrrharona ninöfom lefulniko e löliko stöfinis vobädik.

Binos söl pötekel ä kiemel nemo Flügge A. kel ätimo edatuvom denuliko klänübi mökama leüla ela Myrrhe, e nu binos lebüd kautäla ailabedön in löd ati Myrrhen-Crême ela Flügge A., ibo süpito zidoms fefiledams, fesuepams, vunips e.l.; dols mödik paivitoms, üf foviko kanon gebön velätiki sanamedi. Sanamedin at nemo »A. Flügge's Myrrhen-Crême« eyufom i sägo lä skinamaläds somik kels no pisanoms me valiks sanameds votik.

Gebam krema de Myrrhe as med jönama jenom lä: lüdöf e slitöf skina; lä stenils difik (ledik, blonik, blägik) skina; lä solafiledip, kopedaledip; lä lips maislitöl, muda- e nudaguls vunik.

Gebamaplogam: Gebam krema at binom vemo balik:

1. as med jönama (kosmetikum) ninröbon kremi, in pladi tefik, sleniko ye kudiko ko fined, efe telna jü kilna a del.
2. as sanamedin ninröbon kremi (telna jü kilna a del) lä valiks skinamaläds somik, lä kels skin no binom peviodöl e pevunöl.
3. üf skin binom peviodöl, gebon liabastöfi klinik e müedik, besmivon ati ko mirrhakrem, klinon vunami ko vat lavnik, tegon vuni ko liabastöf pelämököl, fetanon vuni ko liabastöf e.l., e cenon fetanodi somik telna jü kilna a del.

Se Volapük: Gased al pakam Volapüka 1894, Nüm: 4, Pads: 5-6.