Syrotka (Wjela)
Hraju sebi hrajachu
Na wsy dźěćata;
Madlenka bě k rowniku
Bjez towařškow šła.
Swjaty wječor zazwoni
Po wsy, po polu;
Domoj sebi maćeřki
Dźěči wołachu.
Srjedź dwej' rowow sedźeše
Blěda Madlenka,
Ronjo z wóckow krjepjele
Wboha syrota.
"Domoj pój," njewoła
Nan k njej ani mać;
"Tu je jeju komorka;
Při nimaj chcu spać." -
W směrkach jandźel přišedši
Wza ju sobu sej. -
W zbožnym raju jandźelki
Lubje hraju z njej.
Z nanom zas' a z maćeřku
Zraduje so nět,
Zabywši we wjeselu
křiwdy połny swět.
- Author: Jan Wjela (public domain)
- Source: http://texty.citanka.cz/pata/sc1-30.html
- Note: Stary prawopis