· · · soweli Kisa · · ·
· tenpo weka la jan lawa li lon · soweli ona li pimeja li jo e lukin laso li pona mute tawa ona · tenpo ale la jan lawa en soweli li lon poka · jan li tawa la soweli kin li tawa · jan li lon ilo tawa pona ona la soweli kin li lon ona ·
· tenpo wan la jan lawa li toki e ni → "a · soweli o · lon mi la lon sina li pona a · sina ken musi lon poka pi soweli lili sama · mi ken musi lon poka sina taso" ·
· soweli li pana e luka ona lon luka jan · "o weka e pilin ike sina · pilin ike li pona e ala · mi alasa e nasin pona" ·
· lon la soweli li alasa · ona tu li kama lon tomo la soweli li tawa ma kasi li toki e wile tawa kon wawa · tenpo poka la jan sin li kama tan jan lawa · lukin la ona li pona sama telo lete sama suno · pilin pi jan lawa li kama pona mute a · jan sin li lukin e soweli e tawa wawa ona · ona li wile ala lape lon poka ala soweli ·
· tenpo li tawa · jan li awen sin · taso soweli li kama suli · tenpo pimeja ale la jan awen pi jan sin li alasa e soweli li pana e ona lon poki lape pi jan sin · taso tenpo wan la ona li ken ala alasa · jan pali ale li alasa wawa a tan ni → ona li kama jo e ona la jan lawa li pana e pona mute tawa ona · ona li alasa lon poki pi lili mute a · ona li alasa lon monsi lipu a · ona li alasa lon ale a · taso ona li kama ala lukin · soweli li tawa weka · ala li sona e ni → ona li wile ala wile poka sin lon tenpo kama ·
· tenpo mute a li tawa · jan sin li kama sin ala li kama lawa · ona li musi lon ma kasi kepeken sike · pakala la ona li tawa mute e sike la ona li tawa insa kasi · jan li tawa wawa tawa ona li alasa e ona la ona li kute e toki · "jan Inkipe o · jan Inkipe o · sina sona ala e mi anu seme · mi soweli olin sina Kisa" ·
· jan lawa Inkipe li toki tawa ona · "taso mi olin ala e soweli a" · ona li pilin nasa · ona li sona ala e tenpo weka ni ·
· soweli li toki sin · "sina sona ala e tenpo lape pi mi tu anu seme · mi lon ala poka sina la sina mu tan pilin ike · a · jan li sona ala e tenpo pi sin ona sama ala soweli · mi la mi awen sona e poki lape mi · mi lon tomo la mi ken tawa ona" ·
· jan li wile sona e ni → "ni la sina kama weka tan seme" · soweli li wile toki · taso jan pali pi jan lawa li kama li lukin e soweli nasa ni la soweli li tawa kasi li weka ·
· jan li pilin ike mute tan ni · tenpo pimeja la ona li toki e kama tawa mama ona ·
· mama li toki e ni → "toki soweli li lon a · mi wile lukin sin e ona · ken la ona li kama sin lon tenpo ante · ni li kama la o tawa mi e ona" ·
· tenpo suno kama li seli mute · ni la jan lawa lili li toki e ni → ona li wile musi lon ma kasi · ona li lete tan ni → kasi li len e ma tan suno · jan awen ona li kama lon poka ona · taso ona li awen mute ala li kama lape lon poka telo · ni la jan lili li pilin pona mute li tawa weka · wile ona la ona li lukin e jan lili nasa suwi · taso ike la ni li kama ala · jan ike jaki pi suli mute li kama tan tomo lupa ona li toki e ni → jan lili o tawa lon poka ona · jan lili li pilin monsuta tan suli ona tan jaki ona · ona li wile e ni → tenpo pini la ona li weka ala tan jan awen · taso ona li kute ala e jan suli la ni li pona e ala · ni la ona li kute li tawa lon poka ·
· ona li tawa mute a · jan lili li kama wawa ala li kama mu tan pilin ike ·
· jan suli li lukin e ona li toki tawa ona · "mu sina li ike tawa mi · taso sina wile mu la mi ken tan e pilin ike sina" · ona li kama jo e ilo kipisi li weka e anpa pi noka tu ona li poki e ona li tawa weka ·
· jan lili Inkipe li awen lon ma li pilin wawa e pakala noka · ona li toki e ni lon lawa → jan ala li sona e lon ona la ona li moli lon ni anu seme · tenpo mute li tawa · ona li sama tenpo sike mute a tawa ona · taso lon la ona li lon tenpo suno sama · ona li kute e sike pi ilo tawa · ni la ona li mu wawa ·
· ona li kute e toki · "mi kama" · tenpo lili la ilo li tawa kasi · soweli Kisa li lawa e ona · ona li linja monsi e soweli tawa la soweli li tawa wawa · ona Kisa li lukin e jan lili lon ma li tawa anpa tawa ona · ona li kama jo e jan li pana e ona lon ilo li tawa e ona tawa tomo lili ona ·
· soweli li pali e supa lape ko tan poki ko lili · jan li moku e telo soweli li tawa supa ni tan wawa ala · soweli li kama jo e lipu kasi li telo e ona li pana e ona lon kipisi · wawa la ona li kama pana ala e pilin ike la jan li kama pilin pona ·
· soweli li toki · "tenpo ni la o lape · mi weka lon tenpo lili · mi pini wawa e lupa la ala li ken pakala e sina" · taso jan li kama lape lon toki · soweli li kama lawa e ilo li tawa lupa pi jan suli ·
· ona li awen e ilo lon poka kasi li tawa lupa tomo li kute e ni → jan suli li moku li toki tawa jan olin ona ·
· "tenpo ken la mi o moli e ona · jan lili li ken weka tan jo mi la jan ante ale li kama pilin e ni → mi nasa li wawa ala" · jan suli en jan olin li toki mute e ike pi jan lili ni li lukin ala e ni → soweli Kisa li tawa poki pi seli moku li pana e ko namako mute mute a lon ona ·
· jan suli li moku e ona la ona li mu · "pakala · mi wile e telo mute a" ·
· jan olin li pilin sama · "mi kin · ni li tan moku pakala ni anu seme" ·
· jan suli li toki sin · "mi o moku e telo · ala la mi kama moli" · ona li weka wawa tan tomo lon poka pi jan olin li tawa linja telo ·
· soweli li kama alasa lon tomo li kama lukin e noka pi jan Inkipe lon anpa pi linja kasi · ona li pana e ona lon ilo li tawa tomo ona e ona ·
· jan li wile mute e kama ona · ona li ken ala lape tan pilin monsuta ·
· soweli li open e lupa la jan li mu wawa · "sina lon a" · soweli li kama lon insa li jo e anpa noka jan e len ona ·
· "tenpo lili a la noka sina li kama pona" · ona li kama wan e ona e noka kepeken linja kasi wawa pi jan suli ·
· ona li awen toki · "sina ken ala kepeken noka ni lon tenpo poka · taso sina pali pona la ken la mi ken pana e sina lon tomo sina lon tenpo pi weka mute ala" ·
· ona li ni · ilo soweli li tawa tomo lawa · mama tu pi jan lili li lukin e ona li toki e ni → "soweli o · sina weka e jan mi tan ike la mi o pana e ijo pona ale tawa sina" ·
· "ni li ken lon tenpo kama" · soweli li toki e ni taso li tawa weka ·
· jan lili li pilin ike tan weka soweli · ona li wile ala moku li wile ala e len pi pona mute tan mama ona ·
· mama li toki len · "ona li awen pilin ike la ona li kama moli · taso mi alasa ante e ni kepeken nasin ale anu seme li ken ala"
· "kepeken ala nasin olin" · mama ante li toki · ni la ona li alasa e jan mute pi pona mute li wile e ni → jan lili o olin e wan tan ona ·
· ona li toki insa mute · pini la ona li kama wile e jan · lukin ona li sama telo pi ma kasi · linja lawa ona li sama mani suno · mama ona li lawa e ma poka la mama pi jan Inkipe li pilin pona tan wile ni · ona li kama e tenpo moku suli ·
· jan Inkipe li kama lon wan olin la soweli Kisa li kama a · jan lili li tawa wawa tawa ona li jo e ona ·
· soweli li toki · "mi wile e ijo pona mi ni → tenpo pimeja ni la mi wile lape lon poka sina" ·
· "ni taso anu seme" · jan lili li pilin nasa tan ni ·
· "ni taso a" · lape li pini la soweli li lon ala · taso jan lawa ante pi pona mute lukin li lon ·
· ona li toki e tan · "kon wawa li soweli e mi e mama mi · mi wile kama jan la mi o pali e pona ni → jan ala li pali sama lon tenpo pini · mama mi li alasa e ijo sin li ken ala pini pona e alasa li kama moli · taso tan sina la mi ken" ·
· ni la jan ale li pilin pona mute · jan lawa sin li awen lon tomo pi jan Inkipe · tenpo kama la ona kin li kama lon wan olin li kama lawa e ma ante ·
|
This work is available under the Creative Commons CC0 1.0 Universal Public Domain Dedication.
The person who associated a work with this deed has dedicated the work to the public domain by waiving all of his or her rights to the work worldwide under copyright law, including all related and neighboring rights, to the extent allowed by law. You can copy, modify, distribute and perform the work, even for commercial purposes, all without asking permission. |