Soqiyo, lutf ayla, to‘ldur boda birla jomni...
Soqiyo, lutf ayla, to‘ldur boda birla jomni,
To chiqorg‘ayman ko‘nguldin kulfati ayyomni.
Jur’a no‘sh aylab visoli orzusi bazmida,
Mastliqdin bilmag‘ayman subh birla shomni.
Hajr dashtida etib devonalig‘ni ixtiyor,
Tashladim tandin libosi nang birla nomni.
Jilvasini yod etib gulshan aro siymobdek,
Topmadim hargiz ko‘ngulda sabr ila oromni.
Suv berib ashkim nami birla vujudim bog‘ig‘a
Ko‘zlari fikrida tiktim donai bodomni.
Ishq dashtini yo‘li garchi uzog‘u ham maxuf,
Yor vasli ka’basig‘a bog‘ladim ehromni.
Olam ichra bu tiriklik uyqu ermish yo xayol,
Tark etgil, ey ko‘ngul, shodu g‘ami avhomni.
Bulbuloso nola et, Uzlat, ko‘ngulni bog‘ida
To sabo yetkursa vasli yordin payg‘emni.
|
This work was published before January 1, 1929, and is in the public domain worldwide because the author died at least 100 years ago. |