Soederberg Jesus Barabbas Capitulo 11

Capitulo 11

Ubi Jesus se dirigeva postea e que eveniva finalmente de ille, io non sape nihil de isto. Io nunquam le videva de novo.

Ma quando io veniva in visita a mi citate natal Tiberias duo annos plus tarde e passava ibi alcun menses, io apprendeva con grande surprisa que inter le vetere amicos e partisanos de Jesus in Galilea existeva un credentia general e firme que ille habeva essite crucifigite. Post reflecter plus profundemente, io tamen trovava assatis natural que un tal credentia habeva emergite -- si, io comprendeva que illo simplemente debeva haber emergite. Nulle de illos qui esseva le plus proxime a Jesus e qui ora es appellate su discipulos e apostolos habeva essite presente durante le processo, e illes non poteva saper o mesmo imaginar que Pilato le habeva pardonate. Le piscator Simon e un par de alteres, como io eveniva a saper, se habeva occultate alicubi in le vicinitate del citate. Illes habeva vidite de longe como le cruces esseva erigite sur le collina del execution -- un elevation un pauco al nord del citate -- e como le prisioneros qui habeva essite condemnate pro homicidio e piliage durante le tumulto al placia del templo, habeva essite crucifigite. E naturalmente illes non poteva imaginar pro un momento que Jesus, le chef del tumulto, non esseva inter illes. Illes poteva vermente dicer in bon fide que illes habeva vidite con lor proprie oculos como Jesus esseva crucifigite.

Un bon numero de illos qui habeva essite le plus proxime a Jesus continuava tamen a remaner unite e formava un sorta de fraternitate, que se appellava »le sanctos», e le piscator Simon esseva naturalmente le chef principal de iste gruppo. Ma lo que vermente me surprendeva era que etiam un par del fratres de Jesus, qui non habeva credite in ille antea, ora se habeva unite al »sanctos». Le explication era que on credeva que Jesus habeva resuscitate del mortos, e con isto on considerava provate que ille vermente esseva le Filio de Deo, ben que certemente Elias, qui nunquam habeva morite ma habeva ascendite vivente al celo in un carro ardente, non esseva pro isto credite esser le Filio de Deo.

Que Jesus habeva resuscitate del mortos esseva tamen attestate per personas digne de fide. Le piscator Simon jurava que ille le habeva vidite vivente, como ille camminava e stava hic sur le terra, e que Jesus mesmo habeva mangiate un par de pisces frite que Simon le habeva offerite; e un par de sorores credente inter le sanctos le habeva etiam vidite. Postea alteres naturalmente non voleva esser inferior, e tosto il habeva multos qui le habeva vidite. Assi que iste cosa esseva completemente clar.