Sluds lasama valikodik telid volapükelas in München
Sluds lasama valikodik telid volapükelas in München 1887, jölul 6 id jü 9 id.
[edit]I. Sluds lasama klänik balid, jölul 7 id: 1) Vögadam gönü mob sembal ko mödug kildilas tel volapükelas plisenik givom slude völadlöfi äs lone plo volapükels valik tala.
Vögadam gönü slud at äbinom vävögik.
2) Pla tonab „῾“ tonab latinik „h“ pagebomöd fälo fa volapükels valik.
Lensum vävögik.
3) Pla tonab jünuik volapükik „h“ (= ch deutik) tonab latinik „q“ pagebomöd füdo fa volapükels valik.
Lensum vävögik.
4) Nems lönik papenomsöd fälo segun lotogaf länas ut, keles lönoms. Penonös volapüko sepüki e betonami vödas at in kläms, a. s. München (Münqen).
Lensum vävögik.
5) Volapükels valik penomsöd fälo vökädis somo: „ä, ö, ü.“ Penam vökädas segun lotogaf de Schleyer no binom pedalöl füdo.
Slud at päläsevamom fa plu ka kildils tel vpelas plisenik.
6) Vpels valik gebomsöd tonabis gletik beginü sets, nems lönik e vöd: God.
Plisenels valik äzepoms sludi at.
II. Sluds lasama klänik telid, jölul 8 id.
7) Bisilab te bal, efe bisilab „ji“ sibinomöd fälo in vp. al bemalön geni jilik menas.
Tefü nims stämavöd alik bemalom bidi nima. Bemalam patik plo nim manik binom bisilab „om“, e plo nim jilik binom bisilab „ji.“
Plu ka kildils tel plisenelas äläsevamoms sludi at.
8) Tanamal „-“ pagebomöd fälo te pötü silabs „li-“ e „-la“, bi silabs tel at no laboms betonami.
Vögadam dö slud at äjenom vävögo.
9) Vip valemik päsepükom tefü finam „o“ ladvelibas licinöl de vöd votik: gebön finami o, ab no cedön finami „ik“ as pöki, if kapälnöf no defom kodü finam „ik“, e loveletön cödati tefü finam „o“ kademe vpa.
Vögadam no äjenom.
10) Vöd „ons“ as pönop pösodik plütik, kel no labom plunumi in kimfal, no sibinomöd fälo in volapük, sod vpels valik gebomsöd fälo pönopi „ol“ (plunum „ols“) pla pönop plütik patik „ons“.
Vögadam äjenom telna ed äjenom alina dub pösods plu ka kildils tel plisenelas gönü slud at. (In vödagam telid pösods te 5 äbinoms ta slud at.)
III. Sluds lasama klänik kilid, jölul 8 id dö stabam kluba valemik.
Lasam evälom 1) söli Schleyer as cifali; 2) söli gab de Tauffkirchen in München as dilekeli; sölis Kniele de Allmendingen, Schnepper de München e Herold (nog) in München as sekretelis kluba valemik.
IV. Sluds lasama klänik folid, jölul 9 id dö stabam kadema volapüka.
Lasam evälom: 1) söli Schleyer as cifali kadema; 2) söli Kerckhoffs as dilekeli; 3) sölis suköl as kademalis: Teixeira plo Bodugän; Iparraguirre plo Spän; Ferretti plo Täl; Winckler plo Nedän; Nilson plo Sued[1]; Dornbusch e Holden plo Nelij; Sprague plo Nolümelop; Rosenberger plo Lusän; Obhlidal e Rylski plo Löstän; Banfi plo Nugän; Bernhaupt plo Sürän; Fieweger, Herold, Schnepper e Kniele plo Deut. — Söle Kerckhoffs git pegivom, välön kademali telid plo Flent. Söl Nilson edenesiom bevüno e söl Fieweger no nog äkanom lensumön du lasam. — Söls votik anik pemoboms ab no peväloms.
Sluds kongefa volapükik in München 1887. Kadem volapüka.
[edit]Jafam kadema volapükik zesüdom netefamiko al konsefön pükabalugi ed al sefomön volapüki. Sikodo kadem pafomom efe ko vobadöf de balul 1 id 1888 kaleda gregorik.
1) cifal.
2) dilekel (pladal cifala).
3) kademals.
4) kademels.
5) kademans.
Valiks at mütoms binön leplobik in volapük ed in cal okas.
Kadem padilom in sekions so mödik, äs glups pükas e glups kuliva sibinoms.
Cifs sekionas at binoms kademels.
Kademals 20 binoms konsälef nabikum cifala e calef löpikün e cödatöl kadema.
Paväloms se nets valik ma num volapükelas neta tefik. Cif kademalas binom dilekel kadema.
Cödats omas getoms valüdi dub zep cifala.
Pükaglup alik labom kademeli e sekioni bal plo glup alik kuliva, keli pladalom.
Pükaglups lüena leigik kuliva laboms en numi leigik nen tefod netäta.
Sugiv kademelas binom, konsefön balugi püka e kudön, das fomam vödas nulik jenom segun plisips tikavik e balugik volapüka.
Diseinü atos spodoms balvoto e ko kademef votik.
Mobs omsik pacödatoms fa kademalef.
Kademans, kelas num palonom ma ned, sefomoms volapüki ünü nol e kan patik omas. Spodoms balvoto e ko kademels okas e väloms yufavobelis gebik okes. Cifs sekionas omsik binoms kademels tefik.
Vobs omsik goloms al kademelefi.
Nets valik tala lölik pavüdoms al dilsumam len vobs kadema. Pops ota püka netik u melakik pakosumoms in pükaglups. Mieds bolitik no pakonsidoms.
As sam:
1) Deut, Löstän deutapükik, Jveiz deutapükik.
2) Flent, Beljän flentapükik, Jveiz flentapükik.
3) Täl, Tirolän sulüdik, Jveiz tälapükik, Dalmatän e. l. (läns valik püka tälik).
4) Nelij, Nolümelop, Talop, Lenidän.
5) Spän, Melop zenodik e sulüdik dilo.
6) Bodugän, Basil e lemän Sulümelopa.
7) Nedän e Vesünidän (Beljän dilo.)
8) Dän, Norveg, Silän.
9) Lusän.
10) Glik, Mazedän, Kretän.
11) Sved e Finän dilo.
12) Nugän.
13) Polänels.
14) Ceqels.
15) Serbänels, koazänels, slavonels.
16) Slovenels.
17) Baskels.
18) Estän.
19) Tükän.
20) Cinän.
Noted: Rumänels, bulgänels, finänels, yapänels, räbänels, persänels e. l. no nog laboms glamati volapüka. Kadem olensumom yumis latikum. — Dub kosum somik e dub dinad, das pekulivöls vola lölik kolkömoms in Yulop, vob kadema podunom lepatiko in Yulop e spod pobalükom levemo.
Volapük odagetom völadi e veüti valikodik oka te in fal at, if nol gebom omi e penom vestigis oka in volapük nemedamo plo vol lölik.
Kludo volapük mütom pasefomön noe plo melak e ted soi plo nol e lekan.
Ab bi tableds dabalik nola laboms ninöfi legletik, tableds te lepalefik däloms paklubön in glup bal. Glup alik labomös kademeli bal as cifi e kademanis ma ned.
Glups kulivas pakosumoms in mod suköl, as sam:
1) Godav relas valik.
2) Gitav, ninikü glügagitav, sapav gita, jenabuk gita, yusit, fanübadins e gitav valemo.
3) Tatav, konom netik, finan, kön, kalem.
4) Medinav menas e nimas, käl sauna e maläda.
5) Menav (Anthropologie), nimav (Zoologie).
6) Planav, gadem, lanedatav, fotav.
7) „Geognosie“, „Geologie“, minav, meinav.
8) „Geodäsie“ e mafav.
9) Kiem, pötekem.
10) Netav e taled.
11) Sapav.
12) Pükav, literat e jenabuk kuliva.
13) Dadukav e jul.
14) Jenav, güf, bukakonlet, bäledatav, skötav.
15) Gletav, füsüd, stelav.
16) Nols buma e nügenela; lelod; cin.
17) Melav, tolad, pot, telegaf, telefon, geb leloda.
18) Dins kuta e legata; bolit.
19) Gov tatacalas, polen.
20) Lekan, feb lekanik; jenabuk lekana.
21) Dustod, ted, feb.
22) Leböb; fösef.
23) Gasedem e bükem.
24) Militem; sküls kopik (Sport).
25) Möl, nafem.
Kongef kademefa zitom in yel kilid alik, beginü jölul ötüpü ed ötopü kongef kluba valemik.
Kademals laboms vögodi sludöl, kademels e kademans te vögodi konsälöl.
Sluds kademalas nedoms mödanumi 2/3 e pamaniföfoms te in kongef.
Kadem it onomom kuladikumo lefulami bagafas 6 & 7 statudas.
Leiko kadem it ojafom statudis kuladik oka, e nunom omis pezepöl fa cifal kongefe.
Statuds pemoböl in nüm 77 & 78 vpableda de söl Schleyer e bagafs tefamik kadema flentik pogeboms as stabam kadema vpik.
Välam kademalas pabükipom kongefe.
Kademalef välom kademelis ed i segun mob kademelas kademanis ma ned e segun § 4 e 5.
Cifal zepom omis.
Kadem lonom nomis, segun kels steifals dinitas: „plofed, löpitidel e tidel“ paxamoms.
Plofed paxamom e pamobom fa kademal sembal e padanemom fa cifal.
Löpitidels e tidels paxamoms fa „xamels“ e padanemoms fa „cifels“ netik.
„Xamels“ pajafoms fa cifal.
Segivs kadema pagüvoms fa cifal se läpols monik kopanalas kluba valemik.
Sluds kongefa volapükik in München 1887. Volapükaklub valemik.
[edit]Al sefön finaniko sibini kadema volapükik, al labön zenodapünu balugik e tugedik steifamas volapükik plo tal lölik, al pakön volapüki ko näm e sek gletikün, volapükaklub valemik pafünom, efe ko vobadöf de balul balid 1888 (kaleda gregorik).
Steifam lebalik kluba valemik binom pläg e pakam volapüka. Steifams bolitik, netik e relik binoms pösekiköl. Kopanals kluba valemik binoms volapükels valik genas bofik.
Ciföp oma binom lödöp cifala, kel binom i cifal kadema. Cifal labom büri zenodik, kela kopanals binoms:
1. dilekel (pladal cifala),
2. sekretels kil.
Pösods at fol e leiko güvamans otas paväloms fa kongef, kel zitom in yel alik kilid ötüpü ed ötopü kongef kadema. Binoms cifef volapükakluba valemik, kel zisumom volapükaklubis valik e volapükelis dabalik tala.
Ats zisumoms klubis länas dabalik, a. s. volapükaklub jünuik Flenta, Späna e. l. Bisiedel otas panemom cifel, pavälom fa net okik e nedom zepami cifala. (Ciföps binoms lödöps cifelas.)
Ats zisumoms volapükelis lödöpa bal, a. s. volapükaklub in Nürnberg, in Bordeaux. Bisiedels otas panemoms cifs.
Kopanals kluba dabalik kanoms binön pösods valik nestenik genas bofik, kels efinoms lifayeli 16id, soin lons läna daloms osi.
Kopanal alik kluba valemik pelom väyelo frani bal u fenigis deutik jöls (golüdavalut) — efe balul balid e velul balid zimis 50 u fenigis 40 — as stimasoledi cifala ed al mesedön büri zenodik ed al güvön segivis kadema.
Klubs dabalik tekoms läpolis at kopanalas oksik e potoms omis (telul 1id e jölul 1id) cifale nemedamo u dub länafetanog, kö som sibinom.
I lised kopanalas (if mögos: nem, cal e löd kuladik), pezepöl as velätik fa cifel, papotom ko läpols väyelik cifale.
Klub alik labom giti:
1) sedön legateli bal plo kopanals a tels al kongef, kö legatel alik labom siedi e vögodi. Lemäns bevü tels e fols, fols e mäls e. l. no pakonsidoms. Klubs vedöl, kels no nog suämoms kopanalis leodik bals, no laboms giti vögodön. Ab git at lönom nog klubes bäledik, ifi pelunoms poso jü kopanals kil;
2) mobön bosi komü kongef.
Kongef te kanom cödatön dö sekikam kluba sembal. Klub pesekiköl labom giti, belatön kongefi nilikün. Ab ünü tüp at klub pesekiköl labom ni gitis ni bligis.
Lasum e setlid libavilik se klub valemik jenoms dub lenun penädik cifa al cifel, kel lovegivom lenuni at dilekele kluba valemik.
Kongef no binom lasam bekonsälöl, sod sludöl. Sluds oma binoms lons plo volapükels valik tala e panosoms te dub kongef votik.
Vüdams al kongef mütoms jenön al klubs valik ko pesevam delaleoda, efe latiküno muls kil büfü kongef. Sluds valik kongefa nedoms mödugi kildilas tel vögodas valik pegitöl segun §. 4 e 5.
Kongef leodik zitom in yel alik kilid. Te kongef leodik labom giti:
1. zepön nunodi kilyelik;
2. välön cifefi kluba valemik e güvamanis;
3. votön statudis;
4. sludön dö nosam kluba valemik.
Zu kongef pläleodik kanom pabevokön, efe
1. sukü slud cifefa kluba valemik;
2. sukü mob kildila bal klubas valik tala, pegitölas vögodön.
In fal alik tefs pösludöl mütoms panotön. Cifef kluba valemik mütom labön mobis at latiküno muls fol büfü kongef. Kongef zitom beginü jölul. Pük kongefa binomöd volapük.
Cifef labom bligi cifön klubi e pladalön omi senediko. Cödatom yegis valik no pöbükipöl pato kongefe. Lonom leodi jäfas. In vögodams mödug balik (vögods kil) cödatom.
Penods e pesevams valiks kluba mütoms padisopenön fa cifal u dilekel e sekretel bal u luüno kopanal bal volapükakluba valemik. Cifal e dilekel kanoms papladalön fa kopanal votik cifefa in fals neleta.
Cifef lautom väyelo nunodi segun e stabü nunods länafetanogas, eventuo if ats defoms — klubas dabalik. Nünom in kilul omi (äs i kudadinis votik kluba, kels laboms nitedi valemik) klubes valik dub „volapükabled zenodik“.
Bevokom kongefi pelonöl in §. 6 latiküno muls kil büfü koköm e kosiadom yegis pöblinöl al kongef.
Lenunodom kongefe dunöfi oka dü tüp efegolöl, sosus plotog kongefa büfoik peliladom.
Länafetanogs noganoms e cifoms klubis länas oksik e medoms melaki bevü ats e cifef kluba valemik. Cifel sedom väyelo in telul nunodi dö dunöf oka e dö pakam volapüka in län oka cifefe kluba valemik. Lägivom lisedi klubas valik, kel ninom lenuni suamik kopanalas leodik e pläleodik e födelas klubas. — Lemäno §. 3 statudas at e „valemikos“ pelägivöl lonoms vobadami omik.
Bagaf 3 e „valemikos“ penemöl binoms i mafamik plo vobadam klubas. Zu klubs lautoms nunodi kuladik dö dunöf oksik e dö mosteps volapüka in ziläk okas e sedoms omi cifele balul yela alik.
Komedam e pakam vpa binom blig tugedik klubas valik. Klubs sifomsöd vpi in jul, in cals valik, in dils ut tala, kels laboms kulivi e melaki; mütoms nitedön e dagetön vätopo pösodis flunöl, al valön vpi.
Pöfüd vpa glofom dub pak. Vp. odagetom veüti plo vol, if puvalom.
Vp. no erivom zeili e diseini oka, jüs tim et ukömom:
1) kü nolel alik kanom liladön vobukis e timapenädis calablodas oka netas valik in volapük, keli sevom pos lenadam du mul bal;
2) kü tedel melakom ko vol lölik yufü vp. fümik;
3) kü tävel kanom visitön nefikulo läni alik, bi volapükon in lelod, in naf, in loted ed in lemacems.
Jü tim et vp. binom te gälodam siämik. Sikodo steifobsöd valikosi, voto olabobsöv nosi.
No fögetonös kolunis, pato utis, kels no nog laboms püki kulivik plo melak. Klubs e pösods dabalik kanoms spodön diseinü atos ko konsals, pesedels, tedels, e flens lödöl in koluns. Dut e ledul olaboms seki.
1) Volapükaklub valemik öned cifal binom dugel lölika mufa vpik. Me „vpabled zenodik“ nunom cödatis kadema i klubadinis kluba, leodi jäfas cifefa, vödis nulik pejaföl, mostepis vätopik.
2) Klubs netik (länafetanogs) bevolekoms komedami vpa. valemo. Steifoms nüdlanami vpa. in juls, pato in lejuls, juls dustoda e teda, realas, kuliva geilikum e. l.
Binoms zenod mufa vpik in läns okas. Födoms jafami klubas patik in zifs, zifils, bizifs, pags dub laltügs in gaseds e dub pükatels skilik. Dunöf omas binom noganöl e paköl.
3. Klubs dabalik tidoms vpi, e steifoms pakami vpa in zilaks valik zifas, so das vp. sölom in jul, famül. sogs, jäfs, vätopo. No fögetomsöd vomis e yunefi, kels laboms nitedi mödik plo vp.
Nitedomsöd plo vp. kleri, melakacalelis, tedelis, tidelis. Stitamomsöd tidüpis glatik maniföfik e patik. Penomsöd laltügis e notedis dö vp., pato beginü tidüps. Julels vpa. nütlidomsöd in klub, dub kel petidoms, e kevobomsöd, pakön e komedön vpi.
Küpets (fonät: ‚Wikisource’)
[edit]- ↑ Bükapök pla el Sved.
Se Cogabled volapükelas 1887, Nüm: 9, Pads: 71, Nüm: 10, Pads: 79–80, Nüm: 11, Pads: 87–88.