Si̍ng-ging/Mâ-ta̍i/9
Dā̤ 9 Ca̤uⁿ
[edit]9:1 Á̤-so sā̤uⁿ-seóng, dō̤ geo̍ hâi, ga̍u beông-sing ē siáⁿ.
9:2 Ū ā náng gng bāⁿ ho̤ng-kiú, deô míng-chíng ē náng ciū Á̤-so, Á̤-so gi̍ng i-go̤h-náng ū se̍ng, cuh gah bāⁿ ho̤ng-kiú ē náng gô̤ng, Sâ̤u-ceô, ang0sing; dṳ̂ cōi sia̍ lâ̤u.
9:3 Ū gûi gá̤ ta̍h-cṳ-náng sing lē siô̤ng ca̤̍ náng gô̤ng seh-do̤̍h ē uā.
9:4 Á̤-so cai i i̍-seo̍, cuh gô̤ng, Dṳ̂ sing lē seh-na ceóng ca̤̍ gái lē?
9:5 He̍h gô̤ng, Dṳ̂ ē cōi sia̍ kṳ̍; he̍h gô̤ng, Dṳ̂ bā-kî giáⁿ, sa̤̍ ngn hāng deoh-seo̍h hāng é̤ng-ī lē?
9:6 Da de̍h-de̍h sâi dṳ̂ cai Cíng-seô deó sa̤̍-sā̤uⁿ ū gé̤ng-ba̍ⁿ sia̍-cōi, ciūgah bāⁿ ho̤ng-kiú ē náng gô̤ng, Bā-kî, ta̤̍h dṳ̂ ē po-ga̍i kṳ̍-cho̍.
9:7 I cuh bā-kî, kṳ̍ cho̍.
9:8 Ce̤̍ng-náng kua̍ⁿ-gi̍ng cuh gí-de̍h, deo ching-cha̍ng Siō̤ng-Da̤̍, ing Siō̤ng-Da̤̍ ū ta̤̍h ah-na ē gé̤ng-ba̍ⁿ seo̍ keoh náng.
9:9 Á̤-so iú hṳ̂-hiô̤ kṳ̍, kua̍ⁿ-gi̍ng seo̍h gá̤ náng, miá Mâ-ta̍i, sē̤ so̍i-guang lē, gá̤h i gô̤ng, Lí do̍i guâ; i cuh bā-kî do̍i Á̤-so.
9:10 Á̤-so sē̤ deó Mâ-ta̍i cho̍-lî, ū cīng-sā̤ so̍i-lī léng cōi-náng lí, gah Á̤-so léng meóng-seng cá̤ sē̤.
9:11 Hah-lī-se̤̍ náng kua̍ⁿ-gi̍ng, cuh ka̍ng Á̤-so ē meóng-seng gô̤ng, seh-na dṳ̂ ē Seng-saⁿ gah so̍i-lī cōi-náng cá̤ sia̍h lē?
9:12 Á̤-so tiaⁿ-mói, cuh gô̤ng, Gió̤ng-co̤̍ng ē náng, n̄g-sâi ē̤ng i-seng, nō̤ ū bāⁿ, cuh da̤u̍h ē̤ng i.
9:13 Si̍ng-ging gô̤ng, Guâ a̍i-dí kô̤-léng, n̄g a̍i-dí ca̤̍-seō; dṳ̂ da̤u̍h kṳ̍ eo̍h ca̤̍ uā, ing Guâ lí, n̄g-sī ca̤u gī-cíng, sī ca̤u cōi-cíng hôi-cōi gâi-go̤̍.
9:14 Hṳ̂ seo̍h sí Io̤h-hāng ē meóng-seng lí gi̍ng Á̤-so, gô̤ng, Guâ-go̤h-náng hah Hah-lī-se̤̍ náng sí-sió̤ng gi̍ng-sia̍h, nō̤ Dṳ̂ meóng-seng beó gi̍ng-sia̍h, se̤̍h-na lē?
9:15 Á̤-so ing i gô̤ng, Sing-náng gah hō̤-hî sing-náng ē náng-kā cá̤ diō̤, ca̤̍ hō̤-hî sing-náng ē náng-kā meh ū sio̤ng-sing lō̤? Nō̤ hā̤u-lái sing-náng lī-be̍h i kṳ̍, ca̤̍ sí-cā̤ cuh ū gi̍ng-sia̍h.
9:16 Bōi ū náng sâi sing-bo̍ bô gū ē i ná̤u; ing sê̤ bô ē sing-bo̍, huâng ā̤ tiā ca̤̍ gū-so̤ⁿ, nō̤ ca̤̍ sio̤̍-sōi iú-ga lī-hāi.
9:17 Bōi ū náng sâi gū ē pói-dē̤ dâ̤u sing ē ciû; giaⁿ ca̤̍ dē̤ pua̍, ciû lāu, cuh léng dē̤ iā gái kṳ̍; nō̤ sâi sing ē dē̤ dâ̤u sing ē ciû, cuh n̄g hāng deo ā̤ bô̤-cé̤ng.
9:18 Á̤-so gô̤ng ca̤̍ uā, dû-dû ū seo̍h gá̤ lô̤ dia lí ba̍i I, gô̤ng, Guâ sîng-ná̤u-giô̤ⁿ no̤̍ sî: chiâⁿ Dû lí, ē̤ng chiû mo i, i cuh ā̤ ua̍h.
9:19 Á̤-so bā-kî do̍i i kṳ̍; meóng-seng cá̤ giáⁿ.
9:20 Ū ā sîng-ná̤u-náng deh hā̤-lā̤u ē bāⁿ se̍h-dī níng lâ̤u, do̍i Á̤-so bo̍i-āu, mo I i-ná̤u-gṳ.
9:21 Sing lē siô̤ng gô̤ng, Guâ nō̤-î mo I i-ná̤u, cuh ā̤ heô.
9:22 Á̤-so po̤ⁿ-dôiⁿ-táu a̤̍ i, gô̤ng, Sîng-ná̤u-giô̤ⁿ ang-sing; dṳ̂ ē se̍ng ū do̤h-lia̍h dṳ̂ heô kṳ̍ lâ̤u. Cé̤ng caî sí-cā̤, sîng-ná̤u-náng cuh heô kṳ̍.
9:23 Á̤-so di̍h ca̤̍ lô̤-dia cho̍ lē, kua̍ⁿ-gi̍ng choi-sa̤u ē náng, léng ce̤̍ng-náng gī-huā-huā;
9:24 cuh gah i gô̤ng, Te̤̍ kṳ̍: ca̤̍ sîng-ná̤u-giô̤ⁿ n̄g-sī sî, sī keo̍ng. Go̤h-náng cuh cha̤̍u I.
9:25 Gi̍-céng sâi ce̤̍ng-náng chōi , Á̤-so cuh di̍h kṳ̍, keng sîng-ná̤u-giô̤ⁿ ē chiû; sîng-ná̤u-giô̤ⁿ cuh bā-kî.
9:26 Ca̤̍ seō cuh ió̤ng-sé̤ng leo̍h hiô̤ dā̤-ho̤ng.
9:27 Á̤-so iú hṳ̂-hiô̤ giáⁿ kṳ̍, ū gn̄g gá̤ chaⁿ-má ē náng do̍i I āu-li̍, huā gô̤ng, Dāi-bi̍h ē giô̤ⁿ-seong, kô̤-léng guâ-go̤h-náng.
9:28 Á̤-so gi̍-céng di̍h cho̍, ca̤̍ chaⁿ-má ā cuh ciū I; Á̤-so gah i gô̤ng, Dṳ̂ ū se̍ng Guâ ā̤ ceo̍ ca̤̍ seō lō̤? Chaⁿ-má ā i̍ng gô̤ng, Cṳ̂, guâ se̍ng.
9:29 Á̤-so cuh mo i ma̍h-ciu, gô̤ng, Bíng dṳ̂ ē se̍ng ā̤ ta̤̍ dṳ̂ siáⁿ-ciū.
9:30 I ma̍h-ciu cuh gng-eng. Á̤-so ngiáng-ngiáng gîng-ga̍i i, gô̤ng, Da̤u̍h sa̤̍-cī, n̄g-tang sâi náng cai ca̤̍.
9:31 Nō̤ ca̤̍ ggn̄g gá̤ náng chōi, muâ-muâ dóiⁿ I ē miá leo̍h ciâ dā̤-ho̤ng.
9:32 Dng I Chōi kṳ̍ sí-cā̤ , ū náng dua̍ ō̤-kâu, buh keoh gûi pua̍h ē náng ciū Á̤-so.
9:33 Gûi siū de̤̍h chōi, ca̤̍ ō̤-kâu cuh ā̤ gô̤ng-uā: ce̤̍ng-náng duā gí-ī, gô̤ng, Î-seh-le̍h do̤-ng, cé̤ng-lái bōi kua̍ⁿging ū ah-na ē seō.
9:34 Nō̤ Hah-lī-se̤̍ náng gô̤ng, I sī ciā gûi-ó̤ng de̤̍h gûi ā.
9:35 Á̤-so cuh muâ-muâ giáⁿ go̤h siáⁿ go̤h ha̤uⁿ, deó hōi-dńg lē go̤̍ náng, dóiⁿ teng-go̤h ho̤h-ing, do̤h-lia̍h bā-sa̍ⁿ go̤h cê̤ng ē ci̍h gah bāⁿ-tia̍ⁿ.
9:36 Kua̍ⁿ-gi̍ng ce̤̍ng-náng, cuh kô̤-léng i, ing i keh-kui lī-sa̍ng, chā̤uⁿ á̤uⁿ beó n’g á̤uⁿ ē náng seōh-ā̤uⁿ.
9:37 Cuh gah I meóng-seng gô̤ng, Diú sā̤, ceo̍ gang ē náng câ̤u.
9:38 Go̍-cheô da̤u̍h giú chéng-cô sâi ceo̍-gang ē náng kṳ̍ guā ca̤̍ diū.