Si̍ng-ging/Mâ-ta̍i/8
Dā̤ 8 Ca̤uⁿ
[edit]8:1 Á̤-so leo̍h suaⁿ, ce̤̍ng-náng do̍i I.
8:2 Ū ā gô-lô̤ lí ba̍i I, gô̤ng, Cṳ̂ nō̤ kêng, cuh ā̤ tā-gā̤ guâ.
8:3 Á̤-so cheong chiû eh i, gô̤ng, Guâ kêng, dṳ̂ ā̤ tā-gā̤; i bō̤-bang cih-keh tā-gā̤.
8:4 Á̤-so gah i gô̤ng Sa̤̍-cī, n̄g-tang gah náng gô̤ng; nō̤ kṳ̍ gi̍ng ca̤̍-si, sâi i ngiāng dṳ̂ sing-tâ̤, buh he̤̍ng Mó̤-sa̤ sê̤ mīng ē lâ̤-beo̍h, ta̤̍h ceo̍ ci̍ng-ge̍ng leo̍h ce̤̍ng-náng.
8:5 Á̤-so di̍h Gia-beh-nó̤ng sí-cā̤, ū ā bā-cô̤ng ciū I, gô̤ng,
8:6 Cṳ̂ ā, Guâ nó-cái hāng ho̤ng-kiú ē bāⁿ, deô deó cho̍ lē, cīng tia̍ⁿ.
8:7 Á̤-so gah i gô̤ng, Guâ kṳ̍ do̤h-lia̍h i.
8:8 Bā-cô̤ng i̍ng gô̤ng, Cṳ̂, ga̍u guâ cho̍ lē, guâ n̄g-gô̤ⁿ dng: nō̤ giú Cṳ̂ huah seo̍h gu̍ uā, guâ nó-cái dih-dih ā̤ heô.
8:9 Ing guâ sī se̤̍h náng guâng-ō̤, iā ū bing se̤̍h guâ guâng-ō̤: ga̤̍u cî seo̍h gá̤, kṳ̍, i cuh kṳ̍; ga̤̍u hṳ̂ seo̍h gá̤, lí, i cuh lí; heong-nu̍ guâ nó-cái, Ceo̍ ca̤̍ seō, i cuh ceo̍.
8:10 Á̤-so tiaⁿ-mói ca̤̍ uā, cuh gí-ī i, cuh gah gṳng-súi ē náng gô̤ng, Guâ si̍h-cāi gah dṳ̂ gô̤ng, cuh nō̤ Î-seh-le̍h do̤-ng, Guâ bōi kua̍ⁿ-gi̍ng ū ching-chā̤uⁿ na ē se̍ng.
8:11 Guâ ca̍i gah dṳ̂ gô̤ng, Cé̤ng dang cé̤ng sai, beoh ū cīng sā̤ náng lí, gah A̍-beh-la̍h-hâng, Î-sah, Ngâ-go̤h cá̤ sē̤ leo̍h teng-go̤h;
8:12 nō̤ ca̤̍ go̤h ē bā-sa̍ⁿ, beoh de̤̍h cheoh ga̍u guā-li̍ heh-a̍ng ē ūi-chṳ̍; deó hṳ̂-hiô̤ dih-dih hâu gō̤ chu̍i kî.
8:13 Á̤-so gah bā-cô̤ng gô̤ng, Meô kṳ̍; bíng dṳ̂ ē se̍ng, ā̤ ta̤̍ dṳ̂ siáⁿ-ciū. I nó-cái cih-keh cuh heô kṳ̍.
8:14 Á̤-so kṳ̍ Bî-deh cho̍ lē, kua̍ⁿ-gi̍ng i dā̤uⁿ-n̂g deô po, hāng ce̍h-bāⁿ.
8:15 Á̤-so mo i ē chiû, cehbang cuh te̤̍ kṳ̍; ca̤̍ sîng-ná̤u-náng cuh bā-kî, seō-hā̤u I.
8:16 Ha̍u ting beoh a̍ng, ū náng chio̤̍ cīng sā̤ keoh gûi pua̍h ē náng, lí gi̍ng Á̤-so; Á̤-so nō̤ ē̤ng uā de̤̍h gûi; léng do̤h-lia̍h heô ló̤ng-cô̤ng pua̍-bāⁿ ē náng.
8:17 ca̤̍ sī i̍ng-ngiāng seng-di I-se̤̍-a̍ ē uā, gô̤ng, I dng guâ-go̤h-náng ē kô, do̤ⁿ guâ-go̤h-náng ē bāⁿ.
8:18 Á̤-so gi̍ng cīng sā̤ náng úi I beông-sing, cuh ga̤̍u meóng-seng cá̤ dō̤ⁿ geo̍ hn’g-bá̤ⁿ ngiō.
8:19 Ū ā ta̍h-cṳ-náng lí gah Á̤-so gô̤ng, Seng-saⁿ ā, beó leōng Dṳ̂ kṳ̍ deoh-leo ūi-chṳ̍, guâ beoh do̍i Dṳ̂.
8:20 Á̤-so gah i gô̤ng, Hó-lí ū o̤̍ng, ko̤ng-ki̍ do̤-ng ē câ̤u ū siu̍, nō̤ Cíng-Ceô beó kua̍-táu ē ūi-chṳ̍.
8:21 Buh seo̍h gá̤ meóng-seng gah Á̤-so gô̤ng, Cṳ̂ ā, é̤ng guâ sa̤ⁿ hói-táu kṳ̍ bái-co̤̍ng guâ ló̤-bō̤.
8:22 Á̤-so gô̤ng, Dṳ̂ do̍i Guâ; cāi i sî-náng bái-co̤̍ng i ē sî-náng.
8:23 Á̤-so sā̤uⁿ seóng, meóng-seng do̍i I.
8:24 Hâi lē gó̤ng-ho̤ng heoh-céng gang duā kî, lō̤ng pua̍h geo̍ seóng: Á̤-so hiô̤ keo̍ng.
8:25 Meóng-seng lí ga̤̍u I châⁿ, gô̤ng, Cṳ̂ ā, giu̍ guâ; guâ-go̤h-náng beoh beó leō ā!
8:26 Á̤-so gô̤ng, Sâ̤u-se̍ng ē náng, seh-na giaⁿ lē? Cuh bā-kî huā boiⁿ gah hâi; cih-keh duā bíng-cīng kṳ̍.
8:27 Ce̤̍ng-náng duā gí-ī, gô̤ng, I sī seo̍h-moi náng lē? boiⁿ gah hâi iā seōng I ā!
8:28 Gi̍-céng dō̤ geo̍ hn’g-bá̤ⁿ ngiō̤, ga̍u Geh-geh-sa dā̤-ho̤ng, gṳ̄-la̤u̍h ⁿ̄g gá̤ náng keoh gûi pua̍h, iú mo̍ lē chōi, cīng o̤h-cíng, î-di̍ beó náng gô̤ⁿ gng-geo̍ ca̤̍ dō.
8:29 Ca̤̍ keoh gûi pua̍h ē náng cuh huā gô̤ng, Siō̤ng-Da̤̍-Ceô Á̤-so, guâ gah dṳ̂ seo̍h-moi gang-geo̍? Sí-cā̤ bōi ga̍u, Dṳ̂ lí ciâ sâi guâ siū kô lō̤?
8:30 Lī hiô̤ hōiⁿ, ū seo̍h dīng dṳ no̤̍ hiô̤ sia̍h.
8:31 Gûi cuh giú gô̤ng, Dṳ̂ nō̤ beoh de̤̍h guâ chōi, cuh é̤ng guâ di̍h kṳ̍ dṳ-geóng.
8:32 Á̤-so gô̤ng, Kṳ̍. Gûi cuh lī ca̤̍ náng, di̍h kṳ̍ dṳ-geóng lē; seo̍h dīng ē dṳ heoh-céng câu leo̍h suaⁿ-bo, ta̤̍u hâi-lē, keoh cûi ci̍ng sî.
8:33 Chi̍ dṳ ē náng câu kṳ̍ di̍h siáⁿ, cio̤ng ca̤̍ seō, léng ca̤̍ náng keoh gûi pua̍h ē cíng-iú, deo gô̤ng keoh náng tiaⁿ.
8:34 To̤ng-siáⁿ ē náng deo chōi cī Á̤-so, gi̍ng I, giú I lī ca̤̍ dā̤-ho̤ng.