Si̍ng-ging/Mâ-ta̍i/7
Dā̤ 7 Ca̤uⁿ
[edit]7:1 N̄g-tang gî-leōng náng, cuh bā̤ gi̍ng gî-leōng; dṳ̂ gî-leōng náng saⁿ seo̍h-moi ā̤uⁿ, cuh gi̍ng gî-leōng iā ching-chā̤uⁿ na.
7:2 Dṳ̂ ta̤̍h seo̍h-moi liō̤ng ná̤u náng, náng iā ta̤̍h seo̍h-moi liō̤ng ná̤u dṳ̂.
7:3 Dṳ̂ hiaⁿ-dī ma̍h-ciu ū sa̤̍-châu, dṳ̂ kua̍ⁿ-gi̍ng; nō̤ ga̍i ma̍h-ciu ū duā-chó̤, n̄g gi̍ng-gah, seh-na lē?
7:4 Dṳ̂ ma̍h-ciu do̤-ng ū duā-chó̤, deoh-leo ā̤ gah hiaⁿ-dī gô̤ng, dêng guâ ta̤̍ dṳ̂ ma̤̍h kṳ̍ ma̍h-ciu do̤-ng ē sa̤̍-châu lē?
7:5 Gô̤ heô ē náng ā! da̤u̍h ceo̍-sa̤ⁿ ma̤̍h kṳ̍ ga̍i ma̍h-ciu do̤-ng ē duā-chó̤, cia̍ⁿ ā̤ hêng-hēng kua̍ⁿ-gi̍ng ma̤̍h kṳ̍ hiaⁿ-dī ma̍h-ciu do̤-ng ē sa̤̍-châu.
7:6 N̄g-tang ta̤̍h ching-geh ē mo̍ih-nō̤ hi̍ng keoh gâu; n̄g-tang ta̤̍h beô-co hi̍ng keoh dṳ; giaⁿ lē i ko̤ do̤̍h ca̤̍ mo̍ih-nō̤ chia-dôiⁿ-sing gō̤ dṳ̂.
7:7 Giú cuh dih-dih keoh dû; cho̍i cuh dih-dih gṳ̄-da̤u̍h; pā-mói cuh dih-dih ta̤̍ dṳ̂ kui.
7:8 Ing háng giú ē náng cuh ā̤ deh; cho̍i ē náng cuh ā̤ gṳ̄-da̤u̍h; pā-mói ē náng cuh ā̤ ta̤̍ i kui.
7:9 Dṳ̂-go̤h-náng do̤-ng, hn̍g-náng ū giô̤ⁿ teô biâⁿ, kêng ta̤̍h sa̤u̍h-táu keoh i?
7:10 Teô hṳ́, kêng tah duā-sió̤ keoh i lē?
7:11 Dṳ̂-go̤h-náng sui-céng meô gái, deo cai tah heô ē mo̍ih-nō̤ keoh dṳ̂ giô̤ⁿ , hó̤-ho̤̍ng dṳ̂ deó ting ē Teng-Hū, n̄g ge̍ng-ge̍ng ta̤̍h heô ē mo̍ih-nō̤ seo̍ keoh giú I ē náng lō̤?
7:12 Go̍-cheô dṳ̂ a̍i-dí náng seh-na ka̍ng-dāi dṳ̂, iā da̤u̍h ah-na ka̍ng-dāi náng, ca̤̍ sī leo̍h-hah gah seng-di ē dāi-cî.
7:13 Dṳ̂-go̤h-náng da̤u̍h di̍h cā-mói; ing-ūi îng ga̍u be̍h-mó̤ng, ca̤̍ mói kuā, ca̤̍ dō kua̍ⁿg, di̍h kṳ̍ ē nang sā̤.
7:14 Nō̤ i̍ng ga̍u ṳ̂ng-seng, ca̤̍ mói cā, ca̤̍ dō sa̤̍, deh ē náng câ̤u.
7:15 Da̤u̍h sa̤̍-cī hó̤ng-bī gô̤ seng-di, i ching-gṳ̄ng dṳ̂, gōi-mi̍ng chā̤uⁿ míng-á̤uⁿ, dōi-sing si̍h-si̍h sī chái-ló̤ng.
7:16 Kua̍ⁿ i ē go̍ih-cî, cuh ā̤ beh i. Chi̍-châu do̤-ng deoh-leo ū bú-leó dia̍ng lē? Ci̍h-lá̤ do̤-ng deoh-leo ū bú-hua-gô̤ dia̍ng lē?
7:17 Háng heô ē chiu̍ geh heô ē go̍ih-cî, gái ē chiu̍ geh gái ē go̍ih-cî.
7:18 Heô ē chiu̍ bā̤ geh gái ē go̍ih-cî; gái ē chiu̍ bā̤ geh heô ē go̍ih-cî.
7:19 Háng chiu̍ bā̤ geh heô i go̍ih-cî, cuh dâ̤ⁿ i hi̍ng hôi lē.
7:20 Go̍-cheô ing i sê̤ geh ē go̍ih-cî cuh ā̤ beh i.
7:21 Háng náng ching Guâ gô̤ng Cṳ̂ ā, Cṳ̂ ā, ca̤̍ náng bōi dih-dih deo ā̤ di̍h teng-go̤h; nō̤ ū bíng Guâ Teng-Hū cî-i̍ ē náng, cuh ā̤ di̍h kṳ̍.
7:22 Hṳ̂ seo̍h di̍h beoh ū cīng sā̤ náng gah Guâ gô̤ng, Cṳ̂ ā, Cṳ̂ ā, guâ meh n̄g-sī to̤h Dṳ̂ ē miá dé̤ng-ga̍u, to̤h Dṳ̂ ē miá de̤̍h gûi, to̤h Dṳ̂ ē miá kuā-kuā héng geo̍-ā̤uⁿ ē cái-néng lō̤?
7:23 Hṳ̂ seo̍h sí guâ cuh míng-míng gah i gô̤ng, Guâ deo n̄g-beh dṳ̂; dṳ̂ ceo̍ gái ē náng da̤u̍h lī Guâ kṳ̍.
7:24 Go̍-cheô háng tiaⁿ Guâ ca̤̍ uā cuh kṳ̍ ceo̍ ē náng, guâ piāⁿ i sī di̍-hā̤ ē náng, kî cho̍ deó duā-sa̤u̍h mi̍ng-dêng.
7:25 Hō leo̍h, eó-cûi láu, boiⁿ choi, pā ca̤̍ cho̍ bā̤ deô; ing dā̤-gi deó duā-sa̤u̍h mi̍ng-dêng ā.
7:26 Háng tiaⁿ Guâ ca̤̍ uā, cuh beó kṳ̍ ceo̍ ē náng, piāⁿ i sī gṳ́-ngō̤ng ē náng, kî cho̍ deó sua-dā̤ mi̍ng-dêng.
7:27 Hō leo̍h, eó-cûi láu, boiⁿ choi, pā ca̤̍ cho̍ cuh deô kṳ̍; ca̤̍ deô sī cīng duā ā.
7:28 Á̤-so ca̤̍ uā gô̤ng lâ̤u, ce̤̍ng-náng gí-ī I ē ga̍u-heo̍ng;
7:29 ing I go̤̍ náng chā̤uⁿ ū gé̤ng-ba̍ⁿ ē náng, n̄g chā̤uⁿ ta̍h-cṳ-náng.