Si̍ng-ging/Mâ-ta̍i/11
Dā̤ 11 Ca̤uⁿ
[edit]11:1 Á̤-so heong-nu̍ se̍h-dī meóng-seng lâ̤u, cuh lī hiô̤, kṳ̍ go̤h siáⁿ dé̤ng-dō̤, go̤̍ náng.
11:2 Io̤h-hāng deó gang-lî, tiaⁿ-mói Gi-do̤h sê̤ ceo̍ ē seō, cuh sâi n n̄g gá̤ meóng-seng lí,
11:3 ka̍ng Á̤-so gô̤ng, Gai-dng lí ē sī Dṳ̂ ā, he̍h sī guâ-go̤h-náng ho̤h-da̤u̍h n’g beh-náng lē?
11:4 Á̤-so i̍ng i gô̤ng, Cio̤ng dṳ̂ sê̤ kua̍ⁿ-gi̍ng sê̤ tiaⁿ-mói ē, kṳ̍ gah Io̤h-hāng gô̤ng:
11:5 Cuh sī chaⁿ-má ā̤, kua̍ⁿ gi̍ng, ko-ko̤ ā̤ giáⁿ, bō̤-bang ā̤ ching-geh, hī-láng ā̤ tiaⁿ-mói, sî-náng ā̤ hói-seng, châng ē náng ā̤ tiaⁿ-mói ho̤h-ing.
11:6 Háng náng beó ia̍ng-ki̍ Guâ, cuh ū ho̤h-ki̍,
11:7 Io̤h-hāng meóng-seng kṳ̍ āu, Á̤-so cuh gṳ̂ Io̤h-hāng gah ce̤̍ng-náng gô̤ng, Dṳ̂ sá̤ⁿ-di̍h kṳ̍ iâ-guā, a̍i-dí kua̍ⁿ seo̍h-moi lē? kua̍ⁿ ló-châu keoh boiⁿ choi dôiⁿ-dāng lō̤?
11:8 Dṳ̂ chōi kṳ̍, a̍i-dí kua̍ⁿ seo̍h-moi lē? kua̍ⁿ náng sē̤ng heô ē i-ná̤u lō̤? nō̤ ca̤̍ sē̤ng heô i-ná̤u ē sī deó hó̤ng-ge̤ng lē.
11:9 Bíng ah-na dṳ̂ chōi kṳ̍, sī aidi kua̍ⁿ seo̍h-moi lē? sī a̍i-dí kua̍ⁿ seng-di lō̤? Guâ si̍h-lo̤̍h gah dṳ̂ gô̤ng, I ho̤h ā̤ duā leo̍h seng-di.
11:10 Si̍ng-ging ū gi̍ gô̤ng, Guâ sâi Guâ ē seo̍-ciâ deó Dṳ̂ táu-sá̤ⁿ, ta̤̍h siu-cîng Dṳ̂ ē dō; ca̤̍ uā cuh sī cî ca̤̍ náng.
11:11 Guâ si̍h-cāi gah dṳ̂ gô̤ng, háng sîng-ná̤u-náng sê̤ saⁿ ē, bōi ū ā̤ duā leo̍h Si-sâ̤-lâ̤ Io̤h-hāng; nō̤ diō̤ teng-go̤h da̍i sa̤̍ ē ho̤h ā̤ duā leo̍h i.
11:12 Cé̤ng Si-sâ̤-lâ̤ Io̤h-hāng ga̍u da, náng deo mêng-li̍h a̍i deh teng-go̤h, ca̤̍ teng-go̤h keoh mêng-li̍h ē náng deh kṳ̍.
11:13 Ing ce̤̍ng seng-di gah leo̍h-hah ṳ̄-ngé̤ng ē seō, ga̍u Io̤h-hāng cî.
11:14 Cio̤̍h-seo dṳ̂ ngōi siū Guâ ē uā, gai-dng lí ē Î-lī-a̍, cuh sī ca̤̍ náng.
11:15 Háng náng ū hī-kang ā̤ tiaⁿ ē, cuh da̤u̍h tiaⁿ.
11:16 Ca̤̍ sa̤̍-gang Guâ ā̤ ta̤̍h seo̍h-moi pih-piāⁿ i lē? Kô̤-bî da̍i-giô̤ⁿ sē̤ deó ga̤-dō, ga̤̍u i dó̤ng-bang ē náng gô̤ng,
11:17 Guâ beóng de̍h, dṳ̂ n̄g ta̤̍u-bû; guâ ha̤̍u dṳ̂ cha̤̍uⁿ kô-cheh ē geo, dṳ̂ n̄g tí-ko̤h.
11:18 Ing Io̤h-hāng lí, n̄g sia̍h, n̄g chōi, náng cuh gô̤ng, I keoh gûi pua̍h.
11:19 Cíng-Ceô lí, iā sia̍h iā chōi, náng buh gô̤ng, I sī tang sia̍h ho̤̍ ciû, sī so̍i-lī gah cōi-náng e béng-iû! Bí-do̤̍h iû-dō̤ ē náng dih-dih ta̤̍h iû-dō̤ ceo̍ da̤u̍h.
11:20 Á̤-so beh-céng deó ca̤̍ gûi gá̤ siáⁿ lī-li̍, ceo̍ gûi ā̤uⁿ ē cái-néng, nō̤ i ga̍u bôi n̄g-kêng hôi-âi, go̍-cheô hṳ̂ seo̍h sí ceh-bī i, gô̤ng,
11:21 Go̤-la̍h-si̍ng ā, dṳ̂ ū cai-hō̤ ā! Beh-se̤̍-dāi ā, dṳ̂ ū cai-hō̤ ā: ing Guâ leo̍h dṳ̂ de̤ng-gang sê̤ ceo̍ ē duā cái-néng, seh-seô ū ceo̍ leo̍h Chui-ló̤ Sa̤-deo̍ng, i cuh cô̤-cô̤ sē̤ng muá-so̤ⁿ, dó hôi-hu hôi-cōi, gâi-go̤̍ lâ̤u.
11:22 Guâ si̍h-cāi gah dṳ̂ gô̤ng, Dng sîng-pua̍ng ē di̍h-cî, Chui-ló̤ Sa̤-deo̍ng ē híng-hua̍h, piāⁿ dṳ̂ ē híng-hua̍h ho̤h ā̤ é̤ng-ī siū.
11:23 Gia-beh-nó̤ng ā! dṳ̂ beh-céng sā̤uⁿ ga̍u ting, î-hā̤u dih-dih dūi leo̍h dā̤-ge̤̍h; ing leo̍h dṳ̂ do̤-ng sê̤ ceo̍ duā cái-néng ē seō, seh-seô ū ceo̍ deó Sê̤-do̤-mâ, cuh ca̤̍ siáⁿ ga̍u da ho̤h diō.
11:24 Guâ si̍h-cāi gah dṳ̂ gô̤ng, Dng sîng-pua̍ng ē di̍h-cî, Sê̤-do̤-mâ híng-hua̍h, piāⁿ dṳ̂ ē híng-hua̍h ho̤h ā̤ é̤ng-ī siū.
11:25 Dng ca̤̍ sí-cā̤, Á̤-so gô̤ng, Teng-Hū ā, ting dā̤ ē Cṳ̂ ā, Guâ ching-ca̍ng Dṳ̂, ing Dṳ̂ cia-ba̤̍ ca̤̍ dō̤-lî n̄g keoh di̍-hā̤ gah cho̤ng-míng ē náng cai, cuh hēng keoh da̍i-giô̤ⁿ cai.
11:26 Teng-Hū ā, cia̍ⁿ sī, ing Dṳ̂ ē i̍-seo̍ gô̤-céng sī ah-na.
11:27 Māng-beo̍h iú Teng-Hū seō keoh Guâ: Teng-Hū î-gōi, beó náng beh Giô̤ⁿ, Giô̤ⁿ gah Giô̤ⁿ sê̤ huaⁿ-hí cî-diâng ē náng î-gōi, iā beó náng beh Teng-Hū.
11:28 Háng náng ló̤-kô do̤ⁿ dāng, da̤u̍h lí Guâ ciâ, Guâ cuh seo̍ dṳ̂ bíng-ang.
11:29 Guâ sing eong-hó̤, ciú-nôi, kiang-hṳ; dṳ̂ da̤u̍h iāⁿ Guâ ē chia-do̤ⁿ lí eo̍h Guâ, cuh dṳ̂ sing dih-dih deh bíng-ang.
11:30 Ing Guâ ē chia-do̤ⁿ sī heô-iāⁿ, Guâ ē do̤̍ⁿ sī king.