Si̍ng-ging/Mâ-ta̍i/10
Dā̤ 10 Ca̤uⁿ
[edit]10:1 Á̤-so dā̤u se̍h-dī gá̤ meóng-seng, seo̍ i gé̤ng-ba̍ⁿ, ā̤ de̤̍h siá-gûi, buh ā̤ do̤h-lia̍h go̤h cê̤ng ē ci̍h-bīng.
10:2 Se̍h-dī seo̍-dó ē miá gi̍-leo̍h ō̤-dâ̤: táu seo̍h gá̤ sī Sa̤-meóng, ching Bî-deh, gah i hiaⁿ-dī Ang-deh-le̍h; Sa̤-bî-ta̍i ē giô̤ⁿ Ngâ-go̤h, gah i hiaⁿ-dī Io̤h-hāng.
10:3 Hi-li̍h, Ba-do̤-ló̤-mâi, Do̤-mâ, so̍i-lī Mâ-ta̍i, A̍-leh-hi ē giô̤ⁿ Ngâ-go̤h, Leh-ba̍i ching Da̍h-ta̍i.
10:4 Gia-ná náng Sa̤-meóng, léng bā̤ Á̤-so ē Ga-lio̤̍h náng Iú-dāi.
10:5 Á̤-so cha̤-sâi ca̤̍ se̍h-dī náng, heong-nu̍ i, gô̤ng, Ī-bang náng ē dō n̄g-tang giáⁿ, Sah-mâ-lī-a̍ náng ē siáⁿ n̄g-tang di̍h.
10:6 Nō̤ kṳ̍ Î-seh-le̍h co̤̍h, cho̍i pā-beó ē á̤uⁿ.
10:7 Dṳ̂ kṳ̍ ē cí-cā̤, da̤u̍h lé̤ng-dō̤ gô̤ng, Teng-go̤h gṳ̄ng lâ̤u.
10:8 Náng ū bāⁿ, cuh ta̤̍ i do̤h-lia̍h; ū bō̤-bang, cuh sâi i ching-geh; u náng sî, cuh hiu̍ i hói-seng; ū náng keoh gûi pua̍h, cuh ta̤̍ i de̤̍h gùi. Dṳ̂ ing beó so̍-u̍i so keoh náng.
10:9 Ging, ngṳ́ng, dáng, n̄g-tang kn̍g deó dṳ̂ a̤u-dua̍ lē.
10:10 Giáⁿ dō n̄g-tang dua̍ do̤h-léng, n̄g-tang dua̍ n n̄g teo̍ i-ná̤u, n̄g-tang dua̍ á̤, n̄g-tang gio̤̍h tā̤uⁿ; ing ceo̍-gang deh gang-cíng sī ha̍h-gí.
10:11 Beoh-leōng di̍h seo̍h-moi siáⁿ, seo̍h-moi ha̤uⁿ, cuh da̤u̍h cua hn̍g náng sī heô-náng; cuh gah i cá̤ hiô̤, dêng ga̍u lī kṳ̍ sí-cā̤.
10:12 Di̍h náng cho̍-lî, da̤u̍h ta̤̍ i giú bíng-ang.
10:13 I cî seo̍h cô nō̤ ā̤ deh bíng-ang, cuh dṳ̂ sê̤ giú ē bíng-ang dih-dih ga̍u i; nō̤ bā̤ deh bíng-ang, cuh dṳ̂ sê̤ giú ē bíng-ang cíng-céng gui leo̍h dṳ̂ ga̍i.
10:14 Háng n̄g ciah-dāi dṳ̂, n̄g tiaⁿ dṳ̂ ē uā, ga̍u lī kṳ̍ ca̤̍ náng ē cho̍, ca̤̍ náng ē siáⁿ, da̤u̍h heoh kṳ̍ dṳ̂ ko̤ lē o̤ng-nó̤ng.
10:15 Guâ si̍h-cāi gah dṳ̂ gô̤ng, Dng sîng-pua̍ng ē di̍h-cî, Sê̤-do̤-mâ gah Gó̤-mó̤-la̍h ē híng-hua̍h, piāⁿ ca̤̍ gā̤ⁿ siáⁿ ho̤h ā̤ é̤ng-ī siū.
10:16 Guâ sâi dṳ̂ kṳ̍. chā̤uⁿ á̤uⁿ di̍h ló̤ng-geóng: go̍-cheô da̤u̍h cing-léng chā̤uⁿ duā-sió̤, seóng-si̍h chā̤uⁿ ba̍h-gah.
10:17 Nō̤ dṳ̂ da̤u̍h hó̤ng-bī náng: ing i beoh ga̤̍ dṳ̂ kṳ̍ go̤ng-hōi, beng dṳ̂ leo̍h hōi-dn̍g.
10:18 Bi̍ng-chiâⁿ dṳ̂ beoh ing-ūi Guâ ē é̤ng-go̍, keoh náng ga̤̍ kṳ̍ go̤ng-há̤u go̤h-ó̤ng mi̍ng-sá̤ⁿ, hio̤̍ng ca̤̍ náng léng ī-bang náng ceo̍ ci̍ng-ge̍ng.
10:19 Náng ga̤̍ dṳ̂ sí-cā̤, n̄g-sâi gua̍-lṳ̄ gô̤ng seo̍h-moi, he̍h seh-na gô̤ng; sí-cā̤ ga̍u dih-dih seo̍ dṳ̂ ā̤ cai da̤u̍h seh-na gô̤ng.
10:20 Ing n̄g-sī dṳ̂ ga̍i gô̤ng, sī Teng Hū ē Síng, deó dṳ̂ sing-li lē gô̤ng.
10:21 Dng hṳ̂ seo̍h sí, ā-hiaⁿ beoh ga̤̍ ā-dī, ló̤-bō̤ beoh ga̤̍ giô̤ⁿ kṳ̍ sî; giô̤ⁿ iā bā-kî hāi ló̤-bō̤ ná̤u-lâ̤ kṳ̍ sî.
10:22 Bi̍ng-chiâⁿ dṳ̂ ing-ūi Guâ ē miá, ā̤ keoh ce̤̍ng-náng hiáng-hṳ̄ng; nō̤ ta̤̍u-dâ̤ ā̤ neông-dāi, ca̤̍ náng ā̤ deh-giu̍.
10:23 Dṳ̂ deó ca̤̍ siáⁿ keoh náng de̤̍h, cuh câu kṳ̍ beh-siáⁿ, Guâ si̍h-cāi gah dṳ̂ gô̤ng; Î-seh-le̍h go̤h siáⁿ dṳ̂ giáⁿ bōi ta̍u, nō̤ Cíng-Ceô lí lâ̤u.
10:24 Meóng-seng bā̤ ió̤ⁿ seng-saⁿ; nó-cái bā̤ ió̤ⁿ cô-náng. Meóng-seng chā̤uⁿ seng-saⁿ, nó-cái chā̤uⁿ cô-náng, cuh ce̤h-i̍ lâ̤u.
10:25 Náng gi̍-céng ga̤̍u ga-diô̤ng ceo̍ Beh-sa̤-bo̤h, hó̤-ho̤̍ng seo̍h cho̤ ē náng lō̤?
10:26 Go̍-cheô n̄g-sâi giaⁿ i; ing bōi ū kn̍g bā̤ lo̍ chōi; a̍ng bā̤ keoh náng cai ē.
10:27 Guâ leo̍h a̍ng do̤-ng cî-diâng dṳ̂ ē uā, dṳ̂ cuh hēng-hēng kṳ̍ gô̤ng: pah hī-kang-dau gah dṳ̂ gô̤ng ē, cuh da̤u̍h deó cho̍-dêng kṳ̍ dóiⁿ.
10:28 Náng ā̤ tái ne̤̍h-tâ̤, bā̤ tái léng-heóng, dṳ̂ n̄g-sâi giaⁿ i: nō̤ ā̤ sâi ne̤̍h-tâ̤ léng léng-heóng díng-leóng leo̍h dā̤-ge̤̍h, dṳ̂ cuh da̤u̍h giaⁿ i.
10:29 Nn̄g-táu cia̍ⁿ-giô̤ⁿ, n̄g-sī seo̍h heong ngṳ́ng ā̤ bâ̤ dih lí lō̤? nō̤ dṳ̂ Teng-Hū n̄g kêng, seo̍h táu iā bā̤ la̍u leo̍h dā̤-lō̤.
10:30 Dṳ̂ táu-hōi iā î-ging deo sa̤̍u lâ̤u.
10:31 Go̍-cheô n̄g-sâi giaⁿl dṳ̂ co̤̍ng ā̤ ceong-gu̍i hiô̤-sā̤ cia̍-giô̤ⁿ.
10:32 Háng deó náng-sá̤ⁿ nīng Guâ, Guâ deó Guâ Teng-Hū mi̍ng-sá̤ⁿ, iā dih-dih nīng i.
10:33 Háng deó náng-sá̤ⁿ n̄g nīng Guâ, Guâ deó Guâ Teng-Hū mi̍ng-sá̤ⁿ, iā dih-dih n̄g nīng i.
10:34 Dṳ̂ n̄g-tang sua̍ⁿ Guâ lí sâi sa̤̍-ga̍i ta̍i-bíng, sī sâi sa̤̍-ga̍i dāng deo-bing.
10:35 Ing Guâ lí, giô̤ⁿ cuh se̤ i ló̤-bō̤, sîng-ná̤u-giô̤ⁿ se̤ i ná̤u-lâ̤, sîng-mū se̤ i dah-go̤.
10:36 Nō̤ náng ē siú-de̍h cuh sī i ga-se̤̍h.
10:37 Náng sā̤u ló̤ bō̤ ná̤u-lâ̤ ho̤h ā̤ geo̍-bāng Guâ, cuh n̄g de̤̍ng ceo̍ Guâ ē meóng-seng; náng sā̤u náng-dṳ̂-giô̤ⁿ ho̤h ā̤ geo̍-bāng Guâ, n̄g de̤̍ng ceo̍ Guâ ē meóng-seng.
10:38 Náng n̄g iāⁿ si̍h-cī-ga̍ do̍i Guâ, iā ng de̤̍ng ceo̍ Guâ ē meóng-seng.
10:39 Náng deh da̤u̍h ua̍h-miā, ceong-ceong ā̤ sih kṳ̍; nō̤ ing-ūi Guâ sih kṳ̍ ua̍h-miā, buh ā̤ deh da̤u̍h.
10:40 Náng ciah-dāi dṳ̂, cuh sī ciah-dāi Guâ, ciah-dāi Guâ, cuh sī ciah-dāi sâi Guâ lí ē Teng-Hū.
10:41 Náng ciah-dāi seng-di, ing i sī seng-di cuh dih-dih deh seng-di ē siô̤ng-seo̍; ciah-dāi gī-cíng, ing i sī gī-cíng, cuh dih-dih deh gī-cíng ē siô̤ng-seô.
10:42 Ū náng nō̤ ta̤̍h seo̍h boi cûi keoh Guâ meóng-seng da̍i sa̤̍ ē seo̍h gá̤ sia̍h, ing i sī ceo̍ meóng-seng; Guâ si̍h-cāi gah dṳ̂ gô̤ng, ca̤̍ náng dih-dih ā̤ deh siô̤ng-seo̍.