Shoqalaq qumı (Qayıpnazarov)
Úyir bolǵan jerim bala kúnimnen,
Tanıysań da meni tanıs únimnen,
Esinen shıǵıppan degendey bolıp,
Kórineseń ótken sayın túbińnen.
Umıtarman ba hasla Shoqalaq qumı,
Kisilerdiń koyın baǵıp xár jılı,
Jalań ayak suwıqqa qatıp kelgende,
Tabanıma tiygenińdi jıp-jıllı.
Jerge kók shıqqanda tebendey ǵawlap,
Oynaǵan waǵımda kumıńa awnap,
Qalay umıtarman geyde shańǵıtıp,
Esken samalıńdı shashımdı tawlap.
Qula dúzde panalaǵan úyimdey,
Seni heshkim súymegendi ózimdey,
Tóbeńdegi sayalaǵan jıńǵılım,
Kózge ısıq kóp jasaǵan gújimdey.
Keshe átirapıń jatsa qulazıp,
Búgin kórsem turmıs ketken ulasıp,
Keń qushagıń paxta káni bolıptı,
Qaladay shoq awılım tur jarasıp.