Shiyrin ne bar baladay? (Qayıpnazarov)
Kóp oylayman úydiń ishin,
Shette júrsem kóbirek,
Pitse oyǵa alǵan isim,
Elge qaytsam tezirek.
Meni kútken úy ishimdi,
Saw-salamat kórsem men,
Márgiyalı jas gúlimdi,
Qolǵa alıp súysem men.
Erkelese shawıp kelip,
Boylarıma asılıp,
Saǵınıshlı júzin kórip,
Tursam mawqım basılıp.
Shúldir-shúldir sóylep ketse,
Sózi shiyrin qızıqlı,
Sóytip, maǵan inam etse,
Kórsetse kóp qızıqtı.
Qáwmetine kewlim tolıp,
Baqsam ayday júzine,
Názerimdi gúldey bolıp,
Tartsa ábden ózine,
Ísıq júzi gúl-gúl dónse,
Jaynay tússe laladay,
Aqıl-zeyni ziyrek ósse,
Shiyrin ne bar baladay?