Shashı súmbil (Qayıpnazarov)
Men jaqsı kórer edim,
Ashılıp turǵan gúldi.
Bir kúnleri úyime,
Qulpı dónip gúl keldi.
Bul gúldi baǵdan úzip,
Gúldey bir qız ákeldi.
Bir buwat gúlge qosıp,
Jaslıǵımdı ákeldi.
Sonnan beri jaspan men,
Sonnan beri kewlim jas.
Gúlge qaray sol kúnnen,
Júrek etedi talwas.
Xosh iyisli shoq gúlden,
Boldım endi kóz almas.
Kóz aldımnan ketpeydi,
Gúl ákelgen qalem qas.
Samal esse shayqalıp,
Ájayıp dóner gúl de.
Júregime ot salıp,
Kózime túser kúnde.
Jilwa eger nurlanıp,
Túsime ener túnde.
Turar nazlı ırǵalıp,
Bolarman gúlge bende.
Qıyalımda jaynaydı,
Jawdırasıp túrli gúl.
Jupar atıp óser ol,
Shaqasına túspes zil.
Júregimde jasaydı.
Ottay ısıq eki gúl.
Biri bolsa baǵ gúli,
Birewi shashı súmbil.