Shımbayım (Qayıpnazarov)
Jeńisińdi qutlıqlap baqsam júzińe,
Táriypińdi aytsam, nansa sózime,
Jaslıǵımday qımbatlısań ózime,
Kózime bir parsha aysań Shımbayım.
Qudiyar shabandoz kókpar tartqan jer,
Ógiz jıraw «Alpamıs»tı aytqan jer,
Qıssaxanlar qıssa oqıp qaytqan jer,
Dástúrlerge tolı jaysań Shımbayım.
Doshım palwan toyda gúres tutqan jer,
Juwabıy qızları sózden utqan jer,
Diyqanları qıtshılıqtı qurtqan jer,
Írǵalǵan daqılǵa baysań Shımbayım.
Uzaqtan kóriner Shımbaydıń morı,
Ústinen jol berer Óteniń sorı,
Isti bárjay eter jigittiń zorı,
Jolda júk qaldırmas narsań Shımbayım.
Kegeyli boyına aq tawlar turǵız,
Miynet maydanınan tabılar ul-qız,
Aldıńǵılar bolsa shamshıraq—juldız,
Sen de bir jaǵında barsań Shımbayım.
Atızda paxtalar tolıp atırǵan,
Bul baxıt basıńa qonıp atırǵan,
Xár kúni elimde bolıp atırǵan,
Jeńis sazlarına tarsań Shımbayım.
Atı shıqqan Shımbay dese Shımbaysań,
Jazı-qısı miynet dese tınbaysań.
Wáde berseg sezdi eki qılmaysań,
Is penen sózi bir erseń Shımbayım.
Uqıbıńdı hám kúshińdi shıńlaysan,
Jerdiń tilin bilip, jerdi tıńlaysań,
Shigit sepseń gúzde altın jıynaysań.
Ázelden ataqlı elseń Shımbayım.
Sende palwan jigitler bar júrekli.
Súmbil shashlı qızlar bar som bilekli,
Shayırǵa erlikti jırlaw kerekli,
Ǵáziyne baylıqqa kánseń Shımbayım.