Jump to content

Se̿ng-géng/Mǎ-tuo̿i Hŭ-éng/13

Add links
From Wikisource

[ 34 ]

Di̿ 13 Cióng.

  1. Gōng ŭ cì góng Iǎ-Sú giǎng chio̤̿-di̿ chṳ̆ lâ̤ cō da̿u huǒi-bíng.
  2. Iǔ cèng cāi nêng cṳ̀ da̿u gṳ̀ ŭ-di̿, Iǎ-Sú ciū iòng ṳ̌ing cō-diū; duōi-gá-nêng dú gṳè da̿u ngāing-di̿.
  3. Iǎ-Sú ciū nà cèng cāi bǐ-piāng gâ̤ dī iáu gṳ̀-huo̿i-nêng gǒ̤ng, uā, Iǔ cì-ciă suŏi-cě̤ng gâ̤ nêng chṳ̆ ko̤̿ suŏi cě̤ng. [ 35 ]
  4. Dō̤-di̿ suŏi gâ̤ sî-hē iǔ lò̤ da̿u diō̤ bíng-ha̿ing gâ̤, ciā-ciě ṳě lâ̤ iè lâi-lī-tiāu.
  5. Iǎ iǔ lò̤ da̿u ciō̤-ngâng gâ̤ diá-di̿, ŭ-di̿ mǎu gǐ-duói nâi; éng-ṳē nâi cèng bò̤, iŏ̤ng cě̤ng dāi-diū ciū buǒi-ngâ.
  6. Mì-tê chṳ̆ lâ̤ cì pū, éng-ṳē mǎu gṳ́ing, ciū kú-tiāu.
  7. Iǎ iǔ lò̤ da̿u iǔ chi̿ gâ̤ ià-ṳê-chǎu dǐ-bíng, iŏ̤ng chǎu sáng kǐ lâ̤, nà ngâ máng-láng-diū.
  8. Iǎ iǔ lò̤ da̿u ciáng nâi-di̿ gâ̤, giĕ-cǎ̤, iǔ cì-bă bò gâ̤, iǔ lṳ̀-sī bò gâ̤, iǔ sáng-sī bò gâ̤.
  9. Iǔ nèng-ciě gâ̤, dú niōng tia̿ng-nī.
  10. ¶ Hă-sáing lâ̤ mōng Iǎ-Sú uā, Nì éng-ṳē sū-dī iáu duōi-gá-nêng uā bǐ-piāng gâ̤ dī?
  11. Iǎ-Sú a̿ing uā, Éng-ṳē tíng gŏ ko̤̿ng-diū gâ̤ dàu-lǐ nă nì dă̤-dí, ēng nă gṳ̀ dă̤-dí.
  12. Éng-ṳē iǔ gâ̤ nêng, gu̿ ŏ̤ tíng gṳ̀, ciū iǔ cèng cāi; mǎu gâ̤ nêng, ciū-sī gṳ̀ iǔ gâ̤, iǎ ŏ̤ chiǒng-ko̤̿-tiāu.
  13. Gu̿-chu̿ uòi iáu gṳ̀ uā bǐ-piāng gâ̤ dī, éng-ṳē gṳ̀ chū, ǐ chū ēng gi̿ng, tia̿ng-nī, ǐ tia̿ng-nī ēng gi̿ng, cǒng mài měng-bà̤.
  14. Ì-so̿-ngā sáing uā-gua̿ gâ̤ dī, da̿u iŏ̤ng nêng séng-di̿ iǔ gi̿ng-hāu làu, gṳ̀ uā, Nì tia̿ng-nī ŏ̤ tia̿ng-nī dă̤-gi̿ng, cǒng mài měng-bà̤, chū ŏ̤ chū-dă̤-gi̿ng cǒng ēng hiǎu-dă̤.
  15. Éng-ṳē iŏ̤ng bă-sia̿ng séng-di̿ cà̤-cō̤ng, nèng-ciě sông, mì-ciú chǐ-diū, sǎng-dă̤ mì-ciú chū-dă̤-gi̿ng, nèng-ciě tia̿ng-nī dă̤-gi̿ng, séng-di̿ měng-bà̤, gǎi-bi̿ng, uòi ciū í gṳ̀ hǎu.
  16. Lâ̤-sī nì gâ̤ mì-ciú sī iǔ hŭ-ki̿, éng-ṳē chū-dă̤-gi̿ng; nì gâ̤ nèng-ciě sī iǔ hŭ-ki̿, éng-ṳē tia̿ng-nī dă̤-gi̿ng.
  17. Uòi ì-cài iáu nì uā, Gǔ-sî-hē iǔ cèng cāi síng-dí iáu ngī-nêng o̿ chū nì chū-gi̿ng gâ̤ dī, ǐ mǎu-dă̤ tia̿ng-nī-gi̿ng.
  18. Gu̿-chu̿ suŏi cě̤ng gâ̤ bǐ-piāng nì niōng tia̿ng-nī.
  19. Iǔ nêng tia̿ng-nī tíng gŏ gâ̤ dàu-lǐ, mài měng-bà̤, ŭ ciă ŏ̤ gṳ̌ ciū lâ̤, nà suŏi da̿u gṳ̀ séng-dǐ gâ̤ cě̤ng, chiǒng-ko̤̿-tiāu. Iŏ̤ng ciū-sī bǐ-piāng suŏi da̿u diō̤ bíng-ha̿ing gâ̤. [ 36 ]
  20. Suŏi da̿u ciō̤-ngâng gâ̤ diá-di̿, ciū-sī bǐ-piāng nêng tia̿ng-nī dàu-lǐ, ciū cèng ka̿u-uòi se̿ng dă̤-gua̿.
  21. Lâ̤-sī gṳ̀ séng dǐ mǎu gṳ́ing, bŭ-gua̿ să-sî-cie̿, cì da̿u éng-ṳē iŏ̤ng dàu-lǐ, pōng-diō̤ kǔ-nūing, nă nêng bĭ-là̤, gṳ̀ ciū uā sī huōi gṳ̀ iǔ gua̿-ngāi.
  22. Suŏi da̿u iǔ chi̿ gâ̤ ià-ṳê-chǎu dǐ-bíng, ciū-sī bǐ-piāng nêng tia̿ng-nī dàu-lǐ, hē-mṳě iǔ si̿-gáing gâ̤ gua̿-lṳ̄, ngê̤ng-cîng pi̿ng nêng gâ̤ dī, máng-láng-diū iŏ̤ng dàu-lǐ, ciū mài giĕ-cǎ̤.
  23. Suŏi da̿u ciáng nâi-di̿ gâ̤, ciū-sī bǐ-piāng nêng tia̿ng-nī dàu-lǐ, ǐ měng-bà̤, iŏ̤ng nêng ì-cài giĕ-cǎ̤ iǔ cì-bă bò gâ̤, iǔ lṳ̀-sī bò gâ̤, iǔ sáng-sī bò gâ̤.
  24. ¶ Iǎ-Sú ǐ nà cì-ciă bǐ-piāng iáu duōi-gá-nêng uā, Tíng gŏ bǐ-piāng cì-ciă nêng suŏi hǎu gâ̤ cě̤ng da̿u châing-di̿.
  25. Nêng mì-chǐ-diō̤ gâ̤ sî-hē, dō-tê lâ̤ nà pāi cě̤ng suŏi hā mà-ciě-di̿, ciū ko̤̿-tiāu.
  26. Da̿u mà-ciě chṳ̆ să, giĕ-cǎ̤ gâ̤ sî-hē, pāi iǎ hīng chṳ̆ lâ̤.
  27. Châing-cṳ̌ gâ̤ nû-gě lâ̤ iáu gṳ̀ uā, Nì chîng-mâng sī suŏi hǎu gâ̤ cě̤ng da̿u châing-di̿, ēng sī? giâ-gíng gōng-ciōng iǔ iŏ̤ng pāi nī?
  28. Châing-cṳ̌ uā, Iŏ̤ng sī do̿-tê ca̿ gâ̤ dī. Nû-gě ciū uā, Nì niōng uòi ko̤̿ bí-tiāu iŏ̤ng pāi, ēng niōng?
  29. Châing-cṳ̌ uā, Ēng niōng, giáng-pa̿ bí-tiāu iŏ̤ng pāi, lîng mà-ciě iǎ ŏ̤ bí-tiāu.
  30. Běng-ciě gṳ̀ liòng-iōng câi-câi duōi kǐ lâ̤; dǎing niōng cāi mà-ciě, da̿u ŭ sî-hē uòi ŏ̤ gáu-dō cāi mà-ciě gâ̤ nêng, uā, Sáing nà pāi bí chṳ̆ lâ̤, gǎi iǎng-bǎ chiáu-tiāu: cuo̿i-tê nà mà-ciě siú hā chó̤ng-di̿.
  31. ¶ Ǐ nà cì-ciă bǐ-piāng iáu duōi-gá-nêng uā, Tíng gŏ su̿-siōng cì-ciă guo̿i-cha̤̿ cě̤ng, nêng dé ko̤̿ cá̤ hā hṳ̂ing-di̿.
  32. Iŏ̤ng cě̤ng piāng biē cě̤ng sī děng siǎu gâ̤: da̿u duōi kǐ lâ̤, ciū piāng gŏ̤ iōng gâ̤ cha̤̿ ga̿ing duōi, gō̤ chiū ĭ-búing, bu̿ing-tíng gâ̤ ciā-ciě ṳě lâ̤, bō̤ dau kiá-di̿.
  33. Iǎ-Sú ǐ iáu duōi-gá-nêng gǒ̤ng cì-ciă bǐ-piāng gâ̤ dī, uā, Tíng gŏ su̿-siōng mīng-hó bṳ̌, á-niông-nêng dé lâ̤ ga̿ [ 37 ]hā sáng dě mīng-hó-di̿, dǎing mīng-hó tóng huăi ca̿ bṳ̌ kǐ lâ̤.
  34. ¶ Iŏ̤ng dú sī Iǎ-Sú nà bǐ-piāng iáu duōi-gá-nêng uā gâ̤ dī; lâ̤-ēng-sī bǐ-piāng, ciū ēng iáu gṳ̀ uā.
  35. Iŏ̤ng ciū-sī niōng gi̿ng-hāu síng-dí uā-gua̿ gâ̤ dī, gō̤ uā, Uòi ŏ̤ kṳé chṳ̄ uā bǐ-piāng gâ̤ dī; giǎng kṳé tíng bī dī à lâ̤ ko̤̿ng-diū gâ̤ dī, dú ŏ̤ uā chṳ̆ lâ̤.
  36. ¶ Iŏ̤ng-cì-sî Iǎ-Sú piĕ-tiāu ŭ cèng cāi nêng, nì chio̤̿-di̿ ko̤̿, hă-sáing giǎng-ce̿ng lâ̤, uā, Châing pāi gâ̤ bǐ-piāng gǎi-tiă nă uòi tia̿ng-nī.
  37. Iǎ-Sú iáu gṳ̀ uā, Ŭ ciă suŏi hǎu cě̤ng gâ̤, ciū-sī bǐ-piāng nêng gâ̤ Gṳ̌ing; châing sī bǐ-piāng si̿-gáing;
  38. Hǎu cě̤ng sī bǐ-piāng tíng gŏ gâ̤ gṳ̌ing-só̤ng; pāi sī bǐ-piāng ŭ ciă ŏ̤ gṳ̌ gâ̤ gṳ̌ing-só̤ng;
  39. Suŏi iŏ̤ng pāi gâ̤ do̿-tê sī bǐ-piāng mǒ̤-gṳ̌: cāi mà-ciě gâ̤ sî-hē sī bǐ-piāng si̿-gáing gâ̤ sṳē-mṳě; cāi mà-ciě gâ̤ nêng sī bǐ-piāng Cṳ̌ sǎ̤-chṳ̿ gâ̤.
  40. Pāi nă nêng chéng cì-dó, nà ko̤̿ chiáu-tiāu; iŏ̤ng si̿-gáing gâ̤ sṳē-mṳě iǎ ŏ̤ iŏ̤ng-gă̤-sĭ.
  41. Nêng gâ̤ Gṳ̌ing ŏ̤ hǎng gṳ̀ sǎ̤-chṳ̿-gâ̤ nà ŭ duói huōi nêng iǔ gua̿-ngāi gâ̤ dī, iáu ca̿-ŏ̤ gâ̤ nêng, giǎng gṳ̀ gŏ-di̿ tĭ chṳ̆ lâ̤.
  42. Diú hā hǒ-iâu-di̿: da̿u ŭ-di̿ iǔ gàu-ngâ chiĕ-chǐ di̿ tî-kŭ.
  43. Ŭ sî-hē ngī-nêng da̿u gṳ̀ Dá gâ̤ gŏ-di̿ iǔ guáng cia̿u chṳ̆ lâ̤, su̿-siōng mì-tê ĭ-búing. Iǔ nèng-ciě gâ̤, dú niōng tia̿ng-nī.
  44. ¶ Tíng gŏ ǐ su̿-siōng bǎu-bo̿ ko̤̿ng hā châing-di̿; nêng pōng-diō̤, ciū ciá-dă̤ mà̤-mà̤-di̿: éng-ṳē cèng ka̿u-uòi iŏ̤ng bǎu-bo̿, ciū ko̤̿ nà gṳ̀ lǒng-cǒng iǔ gâ̤ mî-dī, dú māi-tiāu, mǎi iŏ̤ng châing.
  45. ¶ Tíng gŏ ǐ su̿-siōng ca̿-kă gâ̤ nêng, lāu děng hǎu gâ̤ céng-cṳ́:
  46. Pōng-diō̤ cì-ciă děng dì-cîng gâ̤ cṳ́, ciū ko̤̿ nà gṳ̀ lǒng-cǒng iǔ gâ̤ mî-dī, dú māi-tiāu, mǎi iŏ̤ng cṳ́. [ 38 ]
  47. ¶ Tíng gŏ ǐ su̿-siōng mòng suŏi ha huǒi-di̿, mòng-diū gŏ̤ iōng gâ̤ ngṳ̂:
  48. Iŏ̤ng mòng dó̤ng-mǔing làu, nêng ciū tuói iòng ngāing, cō-diū, nà ngṳ̂ tĭ chṳ̆ lâ̤, hǎu gâ̤ ciū dó̤ng hā gá-sí-di̿, làing gâ̤ ciū diú-tiāu.
  49. Si̿-gáing gâ̤ sṳē-mṳě iǎ ŏ̤ iŏ̤ng-gă̤-sĭ: Cṳ̌ sǎ̤-chṳ̄-gâ̤ ŏ̤ lâ̤ giǎng ngī-nêng dǐ-bíng, nà làing nêng tĭ chṳ̆ lâ̤,
  50. Diú hā hǒ-iâu-di̿: da̿u ŭ-di̿ iǔ gàu-ngâ chiĕ-chĭ-di̿ tî-kŭ.
  51. ¶ Iǎ-Sú mōng hă-sáing uā, Iŏ̤ng duói dī nì dú ŏ̤ měng-bà̤, mài? Hă-sáing uā, Měng-bà̤ lò̤.
  52. Iǎ-Sú iáu gṳ̀ uā, Iŏ̤ng-gă̤-sĭ mǎu-lō̤ng sū-mū nāng-sṳ́ nêng tĭ chṳ̆ lâ̤ ca̿ tíng gŏ gâ̤ hă-sáing, ciū su̿-siōng cì-ciă gá-cṳ̌, giǎng gṳ̀ ku̿-bǒng-di̿ nà séng giū gâ̤ mî-dī dé chṳ̆ lâ̤.
  53. ¶ Iǎ-Sú iŏ̤ng duói bĭ-piāng uā làu, ciū giǎng ŭ sù-cài ko̤̿-tiāu.
  54. Lâ̤ cù-cī gâ̤ dī-huó̤ng da̿u lǐ-ba̿i-dǒ̤ng-di̿ háu nêng, duōi-gá-nêng dú cèng gĭ-guo̿i, gō̤-uā, Iŏ̤ng nêng gōng-ciōng iǔ iŏ̤ng gâ̤ chóng-měng, iáu iŏ̤ng cǒ-nǎing gâ̤ dī?
  55. Gṳ̀ cia̿ng-sī cŏ̤-tê gâ̤ gṳ̌ing, gṳ̀ nǎi miâng hǎng Mǎ-lī-ngā, gṳ̀ hiáng-dī ciū-sī Ngǎ-gŏ̤, Iŏ̤-sái, Sái-mô̤ng, Iǔ-duōi!
  56. Gṳ̀ ci̿-mṳē dú sī iáu uòi-huo̿i-nêng gōng hióng-lǐ! Iŏ̤ng nêng gōng-ciōng iǔ iŏ̤ng duói gâ̤ dī nī?
  57. Duōi-gá-nêng ciū uā Iǎ-Sú sī huōi gṳ̀ iǔ gua̿-ngāi gâ̤. Iǎ-Sú iáu gṳ̀ uā, Síng-dí lâ̤ ēng-sī da̿u bǒ̤ng dī-huó̤ng, cù-cī chio̤̿, dú ŏ̤ nă nêng ge̿ng-dōng.
  58. Iǎ-Sú éng-ṳē nêng ēng se̿ng, da̿u ŭ-di̿ ēng-nǎing ca̿ gǐ-duói cǒ-nǎing gâ̤ dī.

← · Di̿ 12 Cióng · Di̿ 14 Cióng →
«Se̿ng-géng» gâ̤ mù-lṳ̀
Retrieved from "https://wikisource.org/w/index.php?title=Se̿ng-géng/Mǎ-tuo̿i_Hŭ-éng/13&oldid=1107935"