Salıq (Berdaq)
Bıltırǵıdan bıyıl jaman,
Qalay-qalay boldı zaman,
Ǵarib qasir qalmay aman,
On tilladan keldi salıq
Onı saldı Nurımbetjan
Buyırdı dep atalıq qan,
Qalmasın dep hesh bir jan
On tilladan keldi salıq
Maǵan xesh gáp eshegim bar,
Satıp berermen bir bazar,
Átteń jarlı ash Ernazar,
Oǵan qıyın boldı salıq.
Anaw otır Qulımbet bay,
Tayar aldında appaq may,
Ash xalıq júr tabalmay jay,
Dóhmet boldı usı salıq.
Aq úzikli úlken otaw,
Óz aldında bolıp ataw,
Erman axun otır anaw,
Oǵandaǵı joqdur salıq.
Anaw júrgen Pirim sholaq,
Etip júr ol jalaq-julaq,
Salıq dese tayar ol-aq,
Bizler ushın boldı qıyın salıq.
|
This work was published before January 1, 1929, and is in the public domain worldwide because the author died at least 100 years ago. |