Súy, dostım (Qayıpnazarov)
Rus xalqın jaqın tuwısqan deymen,
Moskvanı júrek deymen, jan deymen,
Kremldi jer júzine nur shashıp,
Kúni-túni atıp turǵan tań deymen.
Qızıl maydan kóz aldımnan ketpeydi,
Bul maydanǵa hesh bir maydan jetpeydi.
Adam túwe kókten ushqan quslar da,
Asıqsa da bir aylanbay ótpeydi.
Jayları bar diń aspanǵa tiygendey,
Jerleri bar jasıl jipek kiygendey.
Bul gózzal kalanıń sulıw kelbetin,
Bir men emes kún eńkeyip suygendey.
Kórinisi kókke qulash urǵanday,
Adamları bir anadan tuwǵanday.
Kósheleri dáste-dáste gúl menen,
Qushaq ashıp meni kútip turǵanday.
Moskvaǵa kelsem ketkim kelmeydi,
Kim kelse de jatırqawdı bilmeydi.
Súy adamın, súy kóshesin, súy dostım,
Moskvanı súygen júrek ólmeydi!