Sô de luj
Fa cald, Ninetta,
Cerchemm l'ombria,
Ven, Nina mia,
Te scotta el sô.
Mett giò la ranza,
Ven chi riposa.
Povera tosa,
L'è longh el dì!
L'erba l'è fresca,
La sces l'è folta,
Nissum me scolta
Me ved nissun.
Settes chi donca
Senza paura;
Stà pur sicura,
Te set cont mi.
E mi te tocchi
Nanca la vesta,...
Ten sù la testa,
Fa minga inscì....
Butta sull'erba
La cappellina,
Lasset, o Nina,
Lasset vardà.
O Nina, Nina,
Te set tropp bella!
Che fior.... che stella!
Ghe vedi pù!
Sù sù alla svelta,
Sù, scappèmm via....
Gh'è tropp'ombria,
L'è sott el sô!
- * * * * * * * * * *
E intant i passer
Sconduu in la stobbia,
Guarden la cobbia
E fann cipp cipp!....