Séng-gĭng/Mā-tái Hók Ĭng/6
6:1 DIŎH sá̤-nê, ng-tĕ̤ng lŏ̤h nè̤ng sèng hèng nṳ̄ gì hō̤ dâi, gó-é ké̤ṳk ĭ káng-giéng: nâ ô ciŏng-uâng, cêu mâ̤ dáik nṳ̄ Tiĕng-Hô gì siōng-sé̤ṳ.
6:2 Gó-chṳ̄ nṳ̄ siĕ-cá̤ sì-hâiu, ng-tĕ̤ng chuŏi gáe̤k lŏ̤h nṳ̄ méng sèng, ŏ̤h ciā gā hō̤ gì nè̤ng, ĭ diŏh huòi-dòng gă̤ háe̤ng ciŏng-uâng có̤, giù nè̤ng chĭng-cáng. Nguāi sĭk-câi gâe̤ng nṳ̄ gōng, Ĭ ô dáik ĭ siōng-sé̤ṳ lāu.
6:3 Nâ nṳ̄ siĕ-cá̤ sì-hâiu, êu chiū báik-diòng:
6:4 ŏ̤h-ciŏng-uâng nṳ̄ gì siĕ-cá̤ sê mĕk-mĕk gì dâi dék-dék bó̤ nṳ̄.
6:5 Nṳ̄ gì-dō̤ sì-hâiu ng-tĕ̤ng ŏ̤h ciā gā hō̤ gì nè̤ng: ĭ huăng-hī kiê lŏ̤h huôi-dòng gă̤ kāu gì-dō̤, gó-é ké̤ṳk nè̤ng káng-giéng. Nguāi sĭk-câi gâe̤ng nṳ̄ gōng, Ĭ ô dáik ĭ siōng-sé̤ṳ lāu.
6:6 Nâ nṳ̄ gì-dō̤ sì-hâiu, éng-dŏng diē kó̤ bùng diē, muòng guŏng kó̤ gì-dō̤ nṳ̄ mĕk-mĕk gì Tiĕng-Hô, Tiĕng-Hô că-chák mĕk-mĕk gì dâi, dék-dék bó̤ nṳ̄.
6:7 Nṳ̄ gì-dō̤ iâ ng-tĕ̤ng tṳ̀ng-hók dŏ̤ gōng, chiông Ê-băng ìng: ĭ háng sê uâ gōng dék sâ̤ ciáh dáik tiăng-giéng.
6:8Nṳ̄ ng-tĕ̤ng ŏ̤h ĭ: ĭng muôi giù ī-sèng, nṳ̄ Tiĕng-Hô dŭ hiēu dék lāu.
6:9 Gó-chṳ̄ nṳ̄ gì-dō̤ diŏh ciŏng-uâng gōng: Nù-gáuk-nè̤ng gì Tiĕng-Hô diŏh tiĕng lā̤, Nguông Nṳ̄ gì miàng siàng séng.
6:10Nguông Nṳ̄ gì guók cêu â̤ hĭng-uông. Nguông Nṳ̄ gì cĭ-é tŭng-hèng, diŏh dê gâe̤ng diŏh Tiĕng lā̤ siŏh-iông.
6:11Nĭk ê̤ṳng gì liông-chō̤, giù Nṳ̄ gĭng-dáng sé̤ṳ nù.
6:12Giù Nṳ̄ siá nù gì cô̤i, Chiông nù iâ siá dáik cô̤i nù gì siŏh-iông.
6:13Mŏ̤h sāi nù ngê̤ṳ diŏh iū-hĕ̤k, diŏh géu nù táuk-liê hṳ̆ng-áuk. Ĭng guók gâe̤ng guòng-báng ìng-iéu, dŭ sṳ̆k diŏh Nṳ̄, gáu uâng uâng sié. Sĭk sĭng sū nguông.
6:14Nṳ̄ nâ miēng nè̤ng gì cô̤i-guó, Tiĕng-Hô cêu iâ miēng nṳ̄ gì cô̤i-guó.
6:15Nṳ̄ nâ ng miēng nè̤ng gì cô̤i-guó Tiĕng-Hô cêu iâ ng miēng nṳ̄ gì cô̤i-guó.
6:16Nṳ̄ géng-siăh sì-hâiu ng tĕ̤ng ŏ̤h gā-hō̤ gì nè̤ng, có̤ lā chèu-kū gì méng-sáik, sê ó̤i ciŏng géng-siăh hiêng ké̤ṳk nè̤ng káng. Nguāi sĭk câi gâe̤ng nṳ̄ gōng, Ĭ ô dáik ĭ siōng-sé̤ṳ lāu.
6:17Nâ nṳ̄ géng-siăh sì-hâiu, éng-găi dù tàu sā̤ méng;
6:18mŏ̤h ciŏng ciā géng-siăh hiêng ké̤ṳk nè̤ng káng, nâ hiêng ké̤ṳk mĕk-mĕk gì Tiĕng-Hô káng: nṳ̄ Tiĕng-Hô că-chák mĕk-mĕk gì dâi, dék-dék bó̤ nṳ̄.
6:19Nṳ̄ ng tĕ̤ng cék cièng-cài lŏ̤h dê lā̤, cŭ-uái ô dó-ngṳ̀ céu, â̤ săng-sĭng āng-bô, chĕk iâ â̤ kŭi tó̤i tău kó̤:
6:20nâ cék cièng-cài lŏ̤h tiĕng lā̤, hŭ-uái mò̤ dó-ngṳ̀ céu, mâ̤ săng-sĭng āng-bô, chĕk iâ mâ̤ kŭi-tó̤i tău kó̤:
6:21ĭng nṳ̄ cièng-cài diŏh dĕ̤ng-nē̤, nṳ̄ sĭng-sê̤ṳ iâ diŏh dĕ̤ng-nē̤.
6:22Sĭng lā̤ gì guŏng sê mĕk-ciŭ : nṳ̄ mĕk-ciŭ cĭng, cêu ciòng sĭng dŭ sê guŏng.
6:23Nṳ̄ mĕk-ciŭ muô, cêu ciòng sĭng dŭ sê áng. Nṳ̄ nô̤i-sĭng gì guŏng nâ áng kó̤, ciā áng hò̤-dēng duâi!
6:24Siŏh ciáh nè̤ng mò̤-dăng-dŏng hông-sê̤ṳ lâng ciáh ciō: hĕ̤k hièng hṳ̄ siŏh ciáh, tiáng cī siŏh ciáh; hĕ̤k káng-dâe̤ng cī siŏh ciáh, káng-kĭng hṳ̄ siŏh ciáh. Nṳ̄ mò̤ dăng-dŏng hông-sê̤ṳ Siông-Dá̤, lièng hông-sê̤ṳ cièng-cài.
6:25Gó-chṳ̄ Nguāi gâe̤ng nṳ̄ gōng, Ng sāi lê̤ṳ ciā miâng miéh-nó̤h siăh, miéh-nó̤h chiók; ciā sĭng miéh-nó̤h sê̤ṳng. Uăk-miâng ng sê duâi kó̤ liòng-chṳ̄ mŏ̤? sĭng-tā̤ ng sê duâi kó̤ ĭ-siòng mŏ̤?
6:26Ché káng tiĕng lā̤ buŏi gì cēu, ĭ mò̤ gĕng-cé̤ṳng gák dêu, iâ mò̤ nó̤h còng-cék diŏh chŏng lā̤; nâ nṳ̄ Tiĕng-Hô dŭ ô iōng ĭ. Nṳ̄ nò̤-nó̤h gó ng kĭng-gói kó̤ cēu mŏ̤?
6:27Nṳ̄ dṳ̆ng-găng diê-nè̤ng ĭng guá-lê̤ṳ, â̤ sāi ciā miâng dòng siŏh káik nĭ?
6:28Ciŏng-gì ĭng ĭ-siòng guá-lê̤ṳ nĭ? Ché-siōng kuōng-iā gì báik-hăk-huă, ciŏng-iông â̤ duâi; ĭ mò̤ lò̤-kū, iâ mò̤ pūng-cék:
6:29Nguāi gâe̤ng nṳ̄ gōng, Dŏng Sū-lò̤-muòng gĭk ìng-iêu sì-hâiu, ĭ gì ĭ-siòng cŏng-sók, gó mò̤-niăh ciā huă gì siŏh buò.
6:30Ŏ̤h ciā iā chāu, gĭng-dáng gó diŏh lā̤, mìng-dáng cêu dàu lŏ̤h huōi-lì, Siông-Dá̤ gó săng ĭ cī cáuk-gă, nò̤-nó̤h ng gáing-gáing ciéu-gó nṳ̄ siēu séng gì nè̤ng mŏ̤?
6:31Gó-chṳ̄ ng sāi lê̤ṳ miéh-nó̤h siăh, miéh-nó̤h chók, miéh-nó̤h sê̤ṳng.
6:32Cuòi dŭ sê Ê-băng-ìng sū giù gì; nâ nṳ̄ diŏh ô cī sâ̤ nó̤h sāi-ê̤ṳng.
6:33Nâ nṳ̄ diŏh sĕng giù Siông-Dá̤ gì guók, gâe̤ng Ĭ gì ngiê-lī; iòng-hâiu cī sâ̤ nó̤h, dék-dék gă ké̤ṳk nṳ̄.
6:34Gó-chṳ̄ mŏ̤h guá-lê̤ṳ mìng-dáng gì dâi: mìng-dáng gì dâi ô mìng-dáng gì guá-lê̤ṳ. Siŏh nĭk â̤ dŏng siŏh nĭk gì lò̤-kū, cêu gáu é lāu.
| Information about this edition | |
|---|---|
| Contributor(s): | Michael Ly |
| Level of progress: | 
|