Sènt'Uliana
Sènt'Uliana
Su na costa n cart de ora sora Vich l'é la lejia de Sènt'Uliana che se disc, che sie stat anticamenter la pieif de Fascia. E pel ben esser, parché anchecondì la é amó sot l massé (procurator general de la val) e duc set comuns la cogn mantegnir. Mo la sie coche la vel, segur l'é, che jà tel più veie document che trata de Fascia, tel testament del piovan de Fascia Iulianus Ambassarius, dal miledoicent e nonantaset, la vegn nominada. Te valada apede S. Uliana, olache se ge disc a la "Roina", se se conta che sie stat inant l paísc de Vich, ma na bisciaboa l'ábie sepolí. Ades passa aló l ruf de lejia con aga fresćia e lumenousa desche cristal. La lejia che se veit aldidanché, la é gotica e so ciampanil spiz passenea ben ben coi beches e co le tor, co le voie de le Dolomiti tedò. La é stata engrandida dal milecincent e desnef. Chel beliscim utar l l'à fat Gere da Busan. I bie afresć i é stac depenc più tart. De Sènt'Uliana e de chi piac e lesc dintorn se sà n muie de contìe e veies dic, che ve voi contar chiò.