Sálem deńiz (Qayıpnazarov)
Tapsırayın bir amanat,
Bekkem saqla, bol itiyat,
Súygen yarǵa amanlıq xat,
Alıp barıp sálem deńiz.
— „Alǵa bas, sheginbe izge!“ —
Dep kúsh berip turǵan bizge,
Kolxozdaǵı qara kózge,
Saǵınıshlı sálem deńiz.
Mańlayınan tógip terin,
Iske jumsap jas jigerin,
Gúllendirip kolxoz jerin,
Júrgen yarǵa sálem deńiz.
Jan ayamay miynet etip,
Jeńisten-jeńiske jetip,
Keler-aw dep úmit etip,
Kútken yarǵa sálem deńiz.
Qoyıw qara súmbil shashlı,
Qálemdey qıyılǵan qaslı,
Húrlerge megzeydi haslı,
Periyzatqa sálem deńiz.
Quwanıshlı xosh kewilge,
Jipektey shashı súmbilge,
Baǵshadaǵı qızıl gúlge,
Búlbilińnen sálem deńiz.
Kózge súrme basqan izi,
Kókte kún yańlı gúl júzi,
Kóz aldımda qumar kózi,
Eleslep tur, sálem deńiz.
Qádirdanım, súygen yarım,
Kórsem tarqar kóz qumarım,
Alıstaǵı intizarım,
Inkarıma sálem deńiz.
Aynımaydı súygen kewil,
Aman bolsa baǵshada gúl,
Qaytıp barıp qonar búlbil,
Kútsin meni, sálem deńiz.
Kórmey júrsem etpey tózim,
Qarasam jetpeydi kózim,
Jawdı quwıp júrgen jerim,
Kay maydannan sálem deńiz.
Xabardar bolıp halıńnan,
Xat jazıp qısqan qolıńnan,
Sawashta júrgen yarıńnan,
Jawıngerlik sálem deńiz.
Qıyın-qıyın jerden ótip,
Jawdı jerge jeksen etip,
Caw bolsam bir kúni jetip,
Bararman men, sálem deńiz.
Bedew atımdı oynatıp,
Dushpandı shawıp qıyratıp,
Tóste orden jarqıratıp,
Bararman men, sálem deńiz.
Sonda gúldey jaynap júzi,
Móldir qara, jawdır kózi,
Íntıqqan yarımnıń ózi,
Shıqsın kúlip, sálem deńiz.
Dala gospitalı, 1944