Ringraziament del poer spazzacamin
Ringraziament del poer spazzacamin
RINGRAZIAMENT DEL POER SPAZZACAMIN PININ PININ
Pel pranzo Natalizio offerto dal Patronato agli Spazzacamini il Natale 1890
Mi sont ol spazzacamin pinin pinin... e innanz a lor inscì bei, inscì grand, inscì sciôr, me batt ol cœur come on uselin che sent la s'cioppettada...
Ma pur sto cœur al batt, al dis: parla, piscinin, cunta su chi te set, dov te set, dov te dœur – al dis ol cœur.
Mi sont ol piscinin che va per strâa a vosà: “spazzacamin”. G'hoo i scarp rott, i gamb biott e adoss on strasc d'on gipponin che, Gesù bambin!, al manda fœu di bœucc ca paren œucc.
Sont nassuu lontan lontan cent mïa de Milan, e in sto dì de Natal sont come on can, senza la mamm e senza ol pà, sont chì sol a guardà i olter che gh'han la mamm, ol pà, la cà; e pensi al mè campanin, mi poer spazzacamin, pinin pinin.
Lor sciori hinn staa tant bon de dimm: - Ven chì, scoldet piscinin; mangia on tondin de risott; tœu on tocch de manz, de pan, de panatton. Scoldet, quàttet, bev on gottin de vin a cunt de quell Bambin, che l'è nassuu anca lù pinin pinin.
Grazia a lor sciori, grazia! - Gh'al disi col magon che sa de panatton.
Grazia a sti bei sciorinn, che me paren angioritt, che gh'han portaa regai e regalitt.
Grazia a sti bei car bagai, che gh'han portaa danee, palpee, regai.
Grazia a sti benefattor e grazia anca al Signor, che gh'ha miss in dol cœur on penserin pel poer spazzacamin, pinin pinin.