Reynke de Vos/Dat verde boek: XI. capittel

Dat XI. capittel

Wo de konnynck Reynken antworde vp de fabelen van den hunden vnde Reynken wedder hoch vorhöghede manckt synen heren.

De konnink sprak: »wat helpen vele wort?
Ik hebbet alle wol ghehort,
Ik hebbe yuwen syn ok wol vorstan.
Ik wyl yw wedder setten an
In mynen rad alsen eddelen baron.
Dar vmme synt gy dyt schuldich to dön,
Vnde wyl, dat gy vro vnde spade
Komen to myneme hemelyken rade.
Ik sette yw wedder in alle yuwe macht.
Seet, dat gy yw vor myssedaet wacht!
Helpet alle sake tom besten keren!
De hoff enkan yuwer nicht entberen.
Wan gy yuwe wyßheyt settet tor döget,
So is hir nemant bouen yw vorhöget
Van scharpeme rade, van nauwen vunden.
Ik wyl vort meer to allen stunden
Nicht meer horen, de ouer yw klagen.
Gy scholt vor my spreken vnde dagen,
Ok schole gy syn kentzeler desses rykes.
Myn segel bevele ik yw des ghelykes:
Wat gy bestellen, wat gy schryuen,
Dat schal bestelt vnde gheschreuen blyuen.«
Alsus is nu Reynke in der vorsten houe
De alder grotste worden van loue;
Wat he slut efte wat he radet,
Id is alleyns, yd vrome efte schadet.