Reynke de Vos/Dat ander boek: II. capittel
Dat ander capittel
[edit]Wo de konnynck na der klage des kannynen vnde der kreyen syck tornede vnde wat he sprack.
Do alzus der kreyen word
Vnde ok des kannynen weren ghehord,
Alze se er klage sus hadden vormelt,
Nobel de konnink wart sere vorgrelt.
He sprack in turne: »by myner truwen,
De ick schuldich byn myner vruwen,
Ick wyl dyt quade so erlyck wreken,
Datmen dar lange schal aff spreken,
Dat myn gheleyde vnde myn gheboth
Sus is tobroken. Ick was eyn soth,
Dat ick dessen schalken voß
So wyllygen hebbe ghelaten loß
Vnde ik syner loggen so 1öuede,
Dar mede he my so lystygen schöuede.
Ick makede eynen pelegrym van em,
He scholde hen to Yherusalem.
Wo klauwede he my vp der mouwen!
Men de schult was by myner vrouwen,
Doch ick byn des alleyne nicht,
De by vrouwen rade schaden krycht.
Late ick Reynken lenger betemen,
Alle wy moten vns des schemen.
Id is to malen eyn slymmen droch,
So was he to yar, so is he noch.
Gy heren, dencket dar vp myt vlyt,
Wo wy ene krygen in korter tyd.
Nicht en kan he vns entghan,
Wyl wy dat ernstlyck grypen an.«
In desseme capittel is nicht sunderlykes, doch machmen hir ynne merken twey stucke.
Dat erste is, dat eyne vrouwe schal wyß vnde kloek wesen vnde dencken al enckede ouer, wat se ereme heren radet, vppe dat se vyllichte nicht en werde vorschemet vnde beropen, so wan ere rad to deme argesten kumpt, so hir de konnynk syner vrouwen schult gyft.
Dat ander is, dat eyn here schal vorsychtich wesen vnde merken wol ouer, efte yd ock gud rad is, dat eme syn vrouwe reth, dat vyllychte eme dat dar na nicht enruwe, efte he eres rades volgende is, alze hir de konnynck naruwe hadde. Wente eyn man is van vaster complexien wan eyne vrouwe; dar vmme is eyneme manne meer tho vorwyten, wan he schaden efte schande kricht by vrouwen rade, wan alze eyner vrouwen is tho vorwyten, dat se den rad vthghyft (so vern ere menynge gud is), den se in radende menet; wente vrouwen nicht ensyn so vullenkomen, alze de mans, so vor ghesecht is.