Reynke de Vos/Argumentum und inholdt des Ersten Bokes

Argumentum und inholdt des Ersten Bokes

In dessem ersten Boke wil de Meister vorbylden und leren, dat ydt hoch nödich, dat dar sy eyn hövet und Here, de aver alle Stende der menschen eynen yderen mith rechte ym frede tho hanthaven de macht und regerung hebbe. Dessen Aversten heren wyl he vorbylden by dem Louwen. Vorder wert hyr gelert, dat men nemande mit gewalt effte anderer hynderlist wedder recht averfallen schole Sunder den berüchtigeden thor antwerdt vordern und kamen laten, Up dat me syne schult edder unschult deste grünthlyker erfaren möge. Item, Dat mennich syck sülvest bedrücht, de by den Fürsten unde Heren grote Lehene tho erlangen vorhapet, wen syne gyricheit unde valscheit nenen vortganck gewynnen mach, Leret wyder, dat Fürsten unde Heren van den Smeychlern unde Ogendenern in de wege der unrechtverdicheit vaken vorvöret werden; Derhalven sy en vele nütter wyse und getruwe Menner in erem Rade tho hebben alse untruwe unnd gyryge, Dan nenes Fürsten hoff effte Stadt ane wyßheit und truwe lange in eeren bestan mach, Warnet vornemlick vor de Lögeners, bedregers unde klickstens, de mit valscheit unde bösen nücken mennigen schenden, beklicken unde berüchtigen, Wo dan de lystige Voß vele tho schanden, grotem schaden unde ungelücke brachte, dennoch mit syner lögene und valscheit stedes by macht und groten eeren erholden blyfft. Also syn ock de lystigen Spytzhöde, Ogendeners und Voßswentzer by Have angeneme geleden und wol entholden.